Mayo 2–8

Exodo 35–40; Levitico 1; 16; 19

“Kinasantuan iti Apo”

Bayat ti panangbasam kadagiti nasantuan a kasuratan iti daytoy a lawas, panunotem ti maipapan kadagiti ubbing nga isursurom. Ti Espiritu Santo ti makatulong kenka a mangammo no ania dagiti kinapudno a kasapulanda a sursuruen ken no kasano a maisurom dagita a kinapudno kadakuada.

Isuratmo dagiti Impresionmo

Yawis ti Panagbibinninglay

Ikabil ti nagan ti tunggal ubing iti maysa a container. Kiddawem iti maysa nga ubing a pumidut iti maysa kadagiti nagan, ken awisem ti ubing nga akinnagan tapno mangibinglay iti maysa a banag a nasursurona itay kallabes manipud iti Daan a Tulag. Isaritam kadagiti ubbing no kasano a makatulong kadakuada nga ad-adda nga umasideg ken ni Jesucristo dagiti banag a nasursuroda. Ituloymo agingga a naaddaan ti tunggal maysa iti gundaway a mangibinglay.

Isuro ti Doktrina: In-inaudi nga Ubbing

Exodo 36:1

Makatulongak iti aramid ti Apo.

Addaan dagiti babassit nga ubbing iti sagsagut a mabalinda nga usaren a makatulong iti aramid ti Apo iti daga. Kasano a matulongam dagiti ubbing a makarikna iti tarigagay a mangibinglay no ania ti inted kadakuada ti Apo?

Dagiti Mabalin nga Aktibidad

• Ibasam ti Exodo 36:1 kadagiti ubbing, ket kiddawem kadakuada a dumngeg no ania ti inted ti Apo kada Bezaleel ken Aholiab a nangtulong kadakuada a mangbangon iti “santuario” (tabernakulo). Ibagam iti tunggal ubing maipapan iti maysa a sagut (mabalin a makatulong a saludsodem kadagiti nagannak kadakuada). Paneknekam a “nangikabil” ti Dios iti sagsagut iti tunggal maysa kadagiti annakna.

• Ibagam kadagiti ubbing no apay a kayatmo ti tumulong iti aramid ti Apo. Tulongam ida a mangpanunot kadagiti wagas a mabalinda met ti makiraman (kas iti panagsursuro maipapan iti maysa a kapuonan, panangisarita iti maysa a tao maipapan ken ni Jesus, wenno panagserbi ti maysa a miembro ti pamilia). Isuratmo dagiti kapanunotanda iti babassit a papel, ikabil dagitoy iti maysa a container, ket awisem iti tunggal ubing a pumili iti maysa ket yakemna ti aksion nga adda iti bassit a papel.

Exodo 40:17–34

Mariknak ti kaadda ti Dios kadagiti nasantuan a lugar.

Binilin ti Apo dagiti annak ti Israel a mangbangon iti tabernakulo tapno mabalinna ti “agnaed iti nagbabaetanda” (Exodo 25:8). Makatulongka kadagiti ubbing nga agsursuro maipapan kadagiti nasantuan a lugar nga inted kadatayo ti Dios iti agdama a mangtulong kadatayo a makarikna iti presensiana.

Dagiti Mabalin nga Aktibidad

• Ipakitam ti ladawan ti nagkauna a tabernakulo (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Kiddawen kadagiti ubbing a mangsapul iti nadumaduma a paset ti tabernakulo iti ladawan, kas iti candlestick wenno altar, ket ilawlawag a nairanta dagitoy a banag a pangtulong kadagiti Israelita a mangpanunot maipapan iti Apo (para iti ad-adu pay nga impormasion maipapan iti tabernakulo, kitaen iti Exodo 40:17–34). Ania dagiti nasantuan a lugar nga adda kadatayo iti agdama a makatulong kadatayo a mangpanunot maipapan iti Apo?

• Ipakitam ti ladawan ti maysa a templo, ket ibasam ti Exodo 25:8 kadagiti ubbing. Ilawlawag nga iti aldawtayo, inikkannatayo ti Dios kadagiti nasantuan a lugar a makaasidegtayo Kenkuana. Tulongam dagiti ubbing a mangilista iti sumagmamano kadagitoy a lugar. Saludsodem kadagiti ubbing no kasano ti mariknada no panunotenda ti maipapan kadagitoy a nasantuan a lugar. Ibinglaymo kadakuada a mariknatayo pay nga asidegtayo iti Dios no agkararagtayo, sadino man ti yantayo.

• Leppasem ti panid ti aktibidad a kadua dagiti ubbing. Bayat ti panangaramidmo, makipagkanta kadakuada maipapan iti templo, kas iti “I Love to See the Temple” (Children’s Songbook, 95).

  

  Kas iti nagkauna a tabernakulo, itudo ti templo kadatayo iti Mangisalakan.

Isuro ti Doktrina: In-inauna nga Ubbing

Exodo 35:20–29; 36:1

Inted ti Dios kaniak dagiti sagut a makatulong iti aramidna.

Tunggal maysa kadagiti annak ti Nailangitan nga Ama addaan iti maysa a banag a makatulong iti aramidna. Mabalin a kasapulan dagiti ubbing a sursuruam ti tulong a mangilasin no kasano a mausarda dagiti sagutda a makatulong iti aramid ti Dios.

Dagiti Mabalin nga Aktibidad

• Ipakita ti ladawan ti tabernakulo (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Saludsodem kadagiti ubbing no ania a material ti mabalin a kasapulan tapno mangbangon iti tabernakulo. Basaen a kadua dagiti ubbing ti Exodo 35:20–29, ket kiddawem kadakuada a sapulenda no kasano a naipaay dagiti kasapulan a material. Paneknekam a tunggal maysa kadagiti ubbing addaan iti maysa a banag a makatulong iti aramid ti Apo.

• Kiddawen kadagiti ubbing a mangbasa iti Exodo 36:1 tapno ammuen no ania ti inted ti Apo kadagiti naawagan a tumulong a mangbangon iti tabernakulo. Awisem dagiti ubbing a mangibinglay no ania ti mariknada nga inted ti Apo kadakuada a tumulong a mangbangon Iti pagarianna (mangidiaya kadagiti singasing no kasapulan). Kasano a mausartayo dagitoy a banag a mangbendision kadagiti dadduma?

Exodo 40:17–33

Makapagbalinak nga ad-adda a kas ken ni Jesucristo ken iti Nailangitan nga Ama.

Saan laeng nga impalubos ti tabernakulo kadagiti annak ti Israel nga adda ti presensia ti Dios kadakuada, ngem daytoy pay ti nangisuro kadakuada kadagiti banag a mabalinda nga aramiden tapno agbalin nga ad-adda pay a kas iti Dios.

Dagiti Mabalin nga Aktibidad

• Awisem dagiti ubbing a mangusar iti Exodo 40:17–33 a mangilasin kadagiti banag a paset ti tabernakulo ket mangsapul iti sumagmamano kadagitoy iti maysa a ladawan ti nagkauna a tabernakulo (kitaen iti balabala itoy a lawas iti Umaykayo, Sumurot Kaniak Para kadagiti Indibidual ken Pamilia). Awisem dagiti ubbing a mangidrowing kadagiti bukodda a ladawan ti tabernakulo. Isaritam maipapan iti no kasano a makaisuro ti tunggal paset ti tabernakulo maipapan iti Mangisalakan wenno ti Nailangitan nga Ama. Kas pagarigan, iti daong ti pammaneknek ket makaipalagip kadatayo kadagiti bilin ti Dios, ti altar ket makaipalagip kadatayo ti sakripisio ni Jesucristo, ti candlestick ket makaipalagip kadatayo a ti Mangisalakan ti Silaw ti Lubong, ken dadduma pay.

• Kiddawen kadagiti ubbing a mangbasa iti Exodo 25:8 tapno ammuen no apay a kayat ti Apo a mangbangon dagiti annak ti Israel iti maysa a “santuario” (wenno tabernakulo). Tulongam dagiti ubbing a mangilista kadagiti lugar ken kasasaad a mabalin a pakariknaantayo iti presensia ti Apo. Kasano a tulongannatayo dagitoy a lugar nga agbalin nga ad-adda a kas iti Nailangitan nga Ama ken ni Jesucristo?

Levitico 1:1–4

Babaen ti Pannubbot ni Jesucristo, mabalin a mapakawannak.

Dagiti panagisakripisio iti ayup a naaramid iti Daan a Tulag ket nairanta a mangisuro kadagiti annak ti Israel maipapan iti pammakawan a naaramid a posible babaen ti Pannubbot ni Jesucristo.

Dagiti Mabalin nga Aktibidad

• Ipakitam dagiti ladawan ni Jesucristo iti Getsemani ken iti krus (kitaen iti Libro ti Arte ti Ebanghelio, dagiti num. 56, 57). Ilawlawagmo a binilin ti Apo dagiti annak ti Israel nga agaramid kadagiti sakripisio a mangisuro kadakuada a mabalinda a mapakawan iti basbasolda babaen ti Pannubbot ni Jesucristo. Basaen a kadua dagiti ubbing ti Levitico 1:1–4, ket awisem ida a mangsapul kadagiti balikas wenno ragup ti balikas a mangipalagip kadakuada iti sakripisio ni Jesucristo.

• Ipakitam ti ladawan ni Jesucristo a sumarsarungkar kadagiti tao iti America (kas iti Libro ti Arte ti Ebanghelio, num. 82). Ilawlawag a kalpasan a nailansa iti krus ken nagungar ni Jesucristo, insurona kadagiti tao iti America no apay a didan kasapulan nga isakripisio dagiti ayup. Aggigiddan a basaen ti 3 Nephi 9:19–20, ket saludsodem kadagiti ubbing no ania ti nabilin nga isakripisiotayo ketdi. Ania ti kayat a sawen ti mangidaton iti nasneban a puso ken napnuan babawi nga espiritu? Isingasing a sukisokenda ti “Nasneban a Puso” iti Pangiwanwan iti Nasantuan a Kasuratan (scriptures.ChurchofJesusChrist.org) para iti tulong a mangsungbat iti daytoy a saludsod. Awisem ida a mangutob no kasano a mabalinda nga idiaya ti nasneban a puso ken napnuan babawi nga espiritu ti Apo.

Yallukoy ti Panagsursuro iti Pagtaengan

Awisem dagiti ubbing a kiddawenda iti Nailangitan nga Ama iti daytoy a lawas no kasano ti kayatna a panangtulongda Kenkuana iti aramidna iti pamiliada.

Panangpadur-as iti Panangisurotayo

Itudom kadagiti ubbing ti Nailangitan nga Ama ken ni Jesucristo. Nasken a kangrunaan a panggepmo ti makatulong kadagiti ubbing a sursuruam ti mangpapigsa iti pammatida iti Nailangitan nga Ama ken ni Jesucristo. Ania ti maaramidmo a makatulong kadakuada a makaawat no kasano a ti panagbiag kadagiti kinapudno ti ebanghelio ti mangtulongto kadakuada tapno agbalinda nga ad-adda a kas iti Ama ken ti Anak?