Mayo 2–8

Exodo 35–40; Levitico 1; 16; 19

“Kinasantuan iti Apo”

Bayat ti panagadalmo kadagiti nasantuan a kasuratan, ikasom dagiti naespirituan nga impresion a maawatmo maipapan kadagiti wagas a makapagbalinam nga ad-adda pay a kas iti Nailangitan nga Ama ken ni Jesucristo.

Isuratmo dagiti Impresionmo

Ti ipapanaw iti Egipto—kas napateg ken namilagruan kas iti sigud—saan a naan-anay a naipatungpal dagiti panggep ti Dios para kadagiti annak ti Israel. Uray pay ti masakbayan a panagrang-ay iti naikari a daga ket saan a kangrunaan a panggep para kadakuada. Dagitoy laeng ti addang iti no ania ti talaga a kayat ti Dios para kadagiti taona: “Dakayo agsantokayto: gapu ta siak a Jehova ,a Diosyo santoak” (Levitico 19:2). Kasano a kinalikaguman ti Dios a mangaramid kadagiti taona a nasantuan idi awan ti ammoda no di pannakaadipen para kadagiti kaputotan? Binilinna ida a mangparnuay iti maysa a lugar ti kinasantuan iti Apo—tabernakulo iti let-ang. Inikkanna ida kadagiti katulagan ken paglintegan a mangiwanwan kadagiti tignayda ken, kangrunaanna, a mangbalbaliw iti puspusoda. Ket no mapaayda kadagiti panagkagumaanda nga agtungpal kadagita a paglintegan, imbilinna kadakuada a mangisakripisio kadagiti ayup a mangisimbolo iti pannubbot para kadagiti basolda. Nairanta amin dagitoy a mangitudo iti panunotda, puspusoda, ken biagda iti Mangisalakan ken ti pannakasubbot nga idiayana. Isu ti pudno a dana iti kinasantuan, para kadagiti Israelita ken para kadatayo. No dadduma addatayo amin iti pannakaadipen iti basol, ken maawistayo amin nga agbabawi—a mangpanaw iti basol ken mangsurot ken ni Jesucristo, a nangikari iti, “Mabalinkayo nga aramiden a nasantuan” (Doktrina ken Katulagan 60:7).

Para iti pakagupgopan ti libro ti Levitico, kitaen iti “Levitico” iti Pangiwanwan iti Nasantuan a Kasuratan.

Dagiti Kapanunotan para iti Bukod a Panagadal iti Nasantuan a Kasuratan

Exodo 35–40; Levitico 19

Kayat ti Apo nga agbalinak a nasantuan a kas Kenkuana.

Irekord tiExodo 25–31 dagiti pangiturong ti Apo kadagiti Israelita maipapan iti no kasano ti mangbangon iti tabernakulo, a makatulong dagiti sagrado nga ordinansa kadakuada nga agbalin a nasantuan a tattao. Iladawan tiExodo 35–40 dagiti panagkagumaan dagiti Israelita nga agtungpal kadagitoy a pangiturong. Bayat ti panangbasam iti kapitulo 35–40, sapulem dagiti banag nga indawat ti Apo kadagiti taona nga ikabil iti tabernakulo, ket utobem no ania ti mabalin nga ibagi dagitoy a banag ken no ania ti isingasingda kenka maipapan iti panangpadur-as iti kinasantuan. Nangnangruna nga ibilangmo no kasano a mangiturong dagitoy a banang iti panangpanunotmo iti Mangisalakan. Mabalin a makatulong kenka ti maysa a tsart a kas iti daytoy:

Ania a banag ti nasarakam?	Ania ti mabalin nga ibagi daytoy?
Ania a banag ti nasarakam? Lakasa ti katulagan (Exodo 37:1–9; 40:20–21)	Ania ti mabalin nga ibagi daytoy? Ti presensia ti Dios; dagiti katulagan ken bilinna
Ania a banag ti nasarakam? Altar ti insienso (Exodo 40:26–27; kitaen met iti Exodo 30:1, 6–8)	Ania ti mabalin nga ibagi daytoy? Dagiti kararag a dumandanon iti Apo
Ania a banag ti nasarakam? Candelerio wenno lampstand (Exodo 37:17– 24)
Ania a banag ti nasarakam? Altar a pagidatonan (Exodo 38:1–7; kitaen met iti Exodo 27:1; 29:10–14)
Ania a banag ti nasarakam? Palanggana (basin) ti danum (Exodo 30:17–21)

No nakiramankan kadagiti ordinansa iti templo, ania ti masursurom maipapan ti tabernakulo manipud iti Exodo 35–40 a mangipalagip kenka iti padasmo sadiay? (kitaen met iti “Dagiti Kapanunotan a Laglagipen: Ti Tabernakulo ken Sakripisio”). Utobem no kasano a makatulong kenka dagiti katulagan iti templo nga agbalin a nasansantuan kas iti Nailangitan nga Ama ken ni Jesucristo.

Siempre, ti kaadda laeng kadagiti nasantuan a lugar saan a mangaramid kadatayo a nasantuan. Iladawan tiLevitico 19 dagiti paglintegan ken bilin nga inted ti Apo a mangtulong kadagiti Israelita a mangpadur-as iti kinasantuan. Ania ti masarakam kadagitoy a bilin a makatulong kenka nga agbalin a nasansantuan? Ania ti nakaawisan ti riknam nga aramiden tapno ad-adda a naan-anay nga agbiag kadagitoy a pagbatayan?

Kitaen iti Carol F. McConkie, “The Beauty of Holiness,” Liahona, Mayo 2017, 9–12; “The Tabernacle” (video), ChurchofJesusChrist.org; Bible Dictionary, “Holiness”; temples.ChurchofJesusChrist.org.

Exodo 35:4–36:7

Idawat kaniak ti Apo a mangaramid iti datonko a siaannugot iti puso.

Iti tawen kalpasan ti panangpanaw iti Egipto, ti relasion dagiti annak ti Israel ken ni Jehova mabalin a mailadawan a kasla agbaliwbaliw. Ngem, bayat ti panangbasam iti Exodo 35:4–36:7, kitaem no kasano a simmungbat dagiti Israelita iti bilin a mangbangon iti maysa a tabernakulo. Ania ti nasursurom manipud kadagiti Israelita a makatulong kenka a nasaysayaat a makapagserbi iti Apo?

Insuro ni Presidente Bonnie L. Oscarson: “Tunggal miembro nasken a maammuanna no kasano ti kadakkel ti panagkasapulan kenkuana. Adda napateg a maysa a banag nga itulong ti tunggal tao ken addaan kadagiti naidumduma a talento ken kabaelan a makatulong a mangituloy iti daytoy napateg nga aramid” (“Young Women in the Work,” Liahona, Mayo 2018, 37). Bayat ti panangbasam iti Exodo 36:1–4, utobem no ania ti “nangisaadan” kenka ti Apo. Ibilang ti panangsaludsod iti Nailangitan nga Ama no ania ti inted ti Apo kenka tapno mabalinmo ti makiraman iti aramidna.

Nangted dagiti annak ti Israel kadagiti daton para iti tabernakulo a “siaannugot ti pusoda” (Exodo 35: 5). Panangiladawan ni Corbert Gauthier, © Lifeway Koleksion/licensed from goodsalt.com

Levitico 1:1–9; 16

Babaen ti Pannubbot ni Jesucristo, mapakawannak.

Kaadduan ti libro ti Levitico ti mabalin a karkarna kadatayo—dagiti panangisakripisio iti ayup, dagiti ritual maipanggep iti dara ken iti danum, ken dagiti linteg a mangiturturay kadagiti babassit unay wenno naipangpangruna a detalye ti biag. Ngem naisangrat dagitoy a ritual ken linteg a mangisuro kadagiti pagbatayan a pamiliar—panagbabawi, kinasantuan, ken ti Pannubbot ti Mangisalakan. Tapno mangsapul kadagitoy a pagbatayan bayat ti panangbasam iti Levitico 1:1–9; 16, panunotem dagiti saludsod kas kadagitoy: Ania ti masursurok manipud kadagitoy a sakripisio ti maipapan ken ni Jesucristo ken ti pangsubbot a sakripisiona? Kasano a maituladak kadakuada iti panangaramid kadagitoy a sakripisio? Mabalin nga ibilangmo ti panangrebyu iti “Dagiti Kapanunotan a Laglagipen: Ti Tabernakulo ken Sakripisio” iti daytoy a resource ken “Daton” iti Pangiwanwan iti Nasantuan a Kasuratan (scriptures.ChurchofJesusChrist.org).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Exodo 36:1–7.Iti Exodo 36:1–7, ania ti masursurotayo manipud iti wagas a panangresponde dagiti Israelita iti bilin a mangbangon iti maysa a tabernakulo? Kas maysa a pamilia, mabalinyo ti mangpanunot kadagiti wagas a nangyawisan ti Apo kadatayo a makiraman iti aramidna. Kasano a masurottayo ti pagwadan dagiti Israelita?

Exodo 40.Bayat ti panangbasayo iti Exodo 40 nga aggigiddan, mabalinmo nga awisen dagiti miembro ti pamilia a mangingato kadagiti imada tunggal kanito a mangngegda ti ragup ti balikas a kas iti “kas imbilin ni Jehova.” Ania ti masursurotayo manipud iti daytoy a kapitulo maipapan iti panagtulnog iti Apo?

Exodo 40:1–34.Bayat ti panangbasam maipapan iti panangbukel iti tabernakulo iti Exodo 40, makapagtitinnulongkayo a mangilasin iti nadumaduma a paset ti tabernakulo, nga us-usaren ti ladawan a nairagpin iti daytoy a balabala. Tapno inaig daytoy a panaglilinnawag iti panagrukbab iti templo iti aldawtayo, mabalin nga aggigiddankayo a mangrebyu iti “Why Latter-day Saints Build Temples” (temples.ChurchofJesusChrist.org) wenno agbuya iti video a “Temples” (ChurchofJesusChrist.org).

Levitico 19.Mabalin a mangsapul ti tunggal miembro ti pamilia iti maysa a bersikulo iti daytoy a kapitulo a mariknada a mangtulongto kadakuada nga agbalin a “santo” (Levitico 19:2) ket ibinglayda daytoy iti pamilia.

Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Naisingasing a kanta: “More Holiness Give Me,” Hymns, no. 131.

Panangpadur-as iti Bukod a Panagadal

Sapulem ni Jesucristo. Paneknekan dagiti amin a nasantuan a kasuratan, uray pay ti Daan a Tulag, maipapan ken ni Jesucristo. Bayat ti panangbasam iti Daan a Tulag, panunotem no ania ti isuro kenka dagiti simbolo, dagiti tao, ken dagiti pasamak maipapan iti Mangisalakan.

Ti Nagkauna a Tabernakulo, ni Bradley Clark