“Abril 25–Mayo 1. Exodo 24; 31–34: ‘Addaakto a Sumurot Kenka,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Abril 25–Mayo 1. Exodo 24; 31–34,” Umaykayo, Sumurot Kaniak—Para kadagiti Indibidual ken Pamilia: 2022
Panangiladawan ni Jehova iti panagparangna ken ni Moises ken ti 70 a panglakayen ti Israel, ni Jerry Harston
Abril 25–Mayo 1
Exodo 24; 31–34
“Addaakto a Sumurot Kenka”
Saan a mabalin a ma-highlight kadagitoy a balabala ti tunggal napateg a pagbatayan kadagiti nasantuan a kasuratan. Dumngegka iti Espiritu a makatulong kenka a mangipamaysa kadagiti kinapudno a kasapulam.
Isuratmo dagiti Impresionmo
Adda gapu tapno mangnamnama nga agtalinaed a napudno iti Dios dagiti annak ti Israel kalpasan nga impalgakna ti lintegna kadakuada (kitaen iti Exodo 20–23). Nupay a nagdayamudom ken nagduaduada iti napalabas, idi imbasa ni Moises ti linteg iti sakaanan ti Bantay Sinai, inaramidda daytoy a katulagan: “Amin dagiti sinao ni Jehova aramidenminto, ket situtulokkamto” (Exodo 24:7). Kalpasanna inawagan ti Dios ni Moises iti bantay, nga imbagana kenkuana a mangbangon iti tabernakulo tapno “agnaedak iti nagbabaetanda” (Exodo 25:8; kitaen iti kapitulo 25–30).
Ngem idi adda ni Moises iti tuktok ti bantay a mangad-adal no kasano a mapaadda dagiti Israelita ti presensia ti Dios kadakuada, adda dagiti Israelita iti tengnga ti bantay nga agar-aramid iti balitok a didiosen a pagrukbabanda ketdi. Inkarida laeng nga “awan ti sabali a dios,” ngem “nagbaw-ingda iti apagdarikmat” manipud kadagiti bilin ti Dios (Exodo 20:3; 32:8; kitaen met iti Exodo 24:3). Makapasiddaaw a panagbaw-ing, ngem ammotayo manipud iti padas a ti pammati ken panagkumit no dadduma mabalin marimbawan babaen ti kinaawan anus, panagbuteng, wenno panagduadua. Bayat ti panagkalikagumtayo iti presensia ti Apo iti biagtayo, makaparegta a maammuan a saan a simmuko ti Apo iti nagkauna nga Israel ken saanto a sumuko kadatayo—gapu ta Isu ket “manangngaasi ken managparabur, nainayad nga agpungtot, ken aglaplapusanan iti kinaimbag a siaayat ken kinapudno” (Exodo 34:6).
Dagiti Kapanunotan para iti Bukod a Panagadal iti Nasantuan a Kasuratan
Ipakita dagiti katulagak ti kinatallugodko nga agtungpal iti linteg ti Dios.
Bayat ti panangbasam iti Exodo 24:3–8 maipapan kadagiti Israelita a makitultulag nga agtungpal iti linteg ti Dios, maiturong dagiti kapanunotam kadagiti katulagan nga inaramidmo iti Dios. Mairaman iti katulagan ti Israel dagiti ritual a maigidiat iti no ania ti dawdawaten ti Dios iti agdama, ngem mabalin a madlawmo dagiti sumagmamano a pagpapadaan, nangnangruna no ibilangmo dagiti agnanayon a kinapudno nga isimbolo dagitoy a ritual.
Kas pagarigan, dakamaten dagiti bersikulo 4, 5, ken 8 ti maysa nga altar, dagiti sakripisio iti animal, ken dara. Ania ti mabalin nga ibagi dagitoy a banag, ken kasano a mainaigda kadagiti katulagam? Kasano a makatulong dagiti katulagam a mangaramid iti “amin dagiti sinao ni Jehova”? (bersikulo 7).
Kitaen met iti Moises 5:4–9; Becky Craven,”Naannad bersus Kasual,” Liahona, Mayo 2019, 9–11.
Ti basol ket panangtallikud iti Dios, ngem idiayana ti maysa a dalan nga agsubli.
Babaen ti panangutob no kasano ti kadaras dagiti Israelita a “minulitanda dagiti bagbagida” (Exodo 32:7) babaen ti panaglabsing kadagiti katulaganda, maliklikantayo dagiti kasta met la a biddut. Bayat ti panangbasam iti Exodo 32:1–8, padasem nga ikabil ti bagim iti lugar dagiti Israelita—addaka iti let-ang, pimmanawen ni Moises iti 40 nga aldaw, dimo ammo no wenno kaano ti panagsublinanto, ken ti komprontasionna kadagiti Cananeo iti naikari a daga ti adda iti masakbayam (kitaen met iti Exodo 23:22–31). Apay iti panagkunam a kayat dagiti Israelita ti balitok a didiosen? Apay a nadagsen unay ti basol dagiti Israelita? Mabalin a mangguyugoy kenka dagitoy a bersikulo tapno mangutob kadagiti wagas a mabalin a pakasulisogam nga agtalekka iti maysa a tao wenno maysa a banag malaksid iti Mangisalakan. Adda kadi ania man a mariknam a makaparegta nga aramiden tapno ad-adda a naan-anay nga ipangpangrunam ti Dios nga umuna iti biagmo? Ania ti mangparegta kenka maipapan iti pakaasi ni Moises iti Apo iti Exodo 33:11–17?
Idinto a nadagsen ti basol dagiti Israelita, iraman pay daytoy nga estoria ti mensahe ti asi ken pammakawan ti Dios. Ania ti isuro kenka ti Exodo 34:1–10 maipapan iti Mangisalakan? Kasano nga ipalagip kenka dagiti tignay ni Moises a maipaay kadagiti Israelita ti inaramid ni Jesucristo para iti amin a tao? (kitaen iti Exodo 32:30–32; Mosiah 14:4–8; 15:9; Doktrina ken Katulagan 45:3–5).
Patarus ni Joseph Smith, Exodo 34:1–2 (iti Pangiwanwan iti Nasantuan a Kasuratan).
Ania ti pagdumaan dagiti dua nga asmang ti taptapi a bato nga inaramid ni Moises?
Idi bimmaba ni Moises manipud iti bantay, inyegna ti linteg a naisurat iti taptapi a bato. Kalpasan ti panangammona a linabsing dagiti Israelita ti katulaganda, imbuong ni Moises dagiti taptapi (kitaen iti Exodo 31:18; 32:19). Idi agangay, binilin ti Dios ni Moises a mangaramid iti sabali nga asmang ti taptapi a bato ken isublina dagitoy iti bantay (kitaen iti Exodo 34:1–4). Ilawlawag tiPatarus ti Joseph Smith, Exodo 34:1–2 (iti Pangiwanwan iti Nasantuan a Kasuratan) a nairaman ti immuna nga asmang ti taptapi a bato dagiti ordinansa ti Dios a “nasantuan nga urnos,” wenno ti Kinasaserdote a Melchizedek. Nairaman iti maikadua nga asmang “ti linteg ti nailubongan a bilin.” Daytoy ti nababbaba a paglintegan nga inannong ti “nababbaba a kinasaserdote” (kitaen iti Doktrina ken Katulagan 84:17–27), a naisangrat a mangisagana kadagiti Israelita iti nangatngato a linteg ken nangatngato a kinasaserdote tapno iti kasta ad-adda a naan-anayda a makastrek iti sidong ti Dios.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Exodo 31:12–13, 16–17.Kalpasan ti panangbasam kadagitoy a bersikulo, nalabit a mabalin a paglilinnawagan ti pamiliam ti saludsod ni Presidente Russell M. Nelson maipapan iti ugalitayo iti aldaw ti Sabbath: “Ania ti tanda nga itedmonto iti Apo a mangipakita iti ayatmo para Kenkuana?” (“The Sabbath Is a Delight,” Liahona, Mayo 2015, 130). Mabalin nga aramiden ti pamiliam ti sumagmamano a tanda nga ikabil iti lawlaw ti pagtaenganyo a mangipalagip kadakayo no kasano ti mangipakita iti ayat para iti Apo iti Sabbath. (Kitaen iti video collection “Sabbath Day—At Home” [ChurchofJesusChrist.org].)
Babaen ti panagdayaw iti Sabbath, ipakitatayo ti ayattayo para iti Apo.
-
Exodo 32:1–8.Tapno matulongan ti pamiliam a mapaglilinnawagan no kasano a timmalikudda iti Dios, ibilang ti panangaramid iti maysa a dana iti suelo (wenno mangsapul iti maysa nga asideg ti pagtaenganyo). Bayat ti pannagna iti dana, mabalin a pagsasaritaan dagiti miembro ti pamilia maipapan kadagiti pannulisog a pakaipasanguantayo tapno umadayotayo iti “dalan nga imbilin ti Apo].” Kasano a makapagtalinaedtayo iti dana? No kimmayakaytayo, kasano a makapagsublitayo iti daytoy? Kasano a tulongannatayo ti Mangisalakan?
-
Exodo 32:26.Kalpasan a nasarakanna dagiti Israelita nga agrukrukbab iti maysa a didiosen, sinaludsod ni Moises, “Siasino ti adda iti biang ni Jehova?” Kasano a maipakitatayo nga addatayo iti sibay ti Apo?
-
Exodo 33:14–15.Mabalin ti mangibinglay dagiti miembro ti pamilia kadagiti padasda idi nariknada ti inkari ti Dios ken ni Moises: “Ti panangimatangko kumuyogto kenka, ket siak paginanaenkanto.” Mabalinyo a kantaen ti maysa a himno maipapan ti panagpannuraytayo iti Dios, a kas iti “Abide with Me!” (Hymns, no. 166).
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “Who’s on the Lord’s Side?” Hymns, no. 260.
Panangpadur-as iti Panangisurotayo
Awisen ti Espiritu. Ibilangmo no kasano a makaimpluensia ti sagrado a musika, artwork, ken panangipeksa iti ayat iti naespirituan nga aglawlaw iti pagtaenganyo bayat ti panangisurom iti pamiliam (kitaen iti Panangisuro iti Wagas ti Mangisalakan, 15).
Agrukbab iti Baka, ni W. C. Simmonds