“Abril 18–24. Exodo 18–20: ‘Amin a Sinao ni Jehova Aramidenminto,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Abril 18–24. Exodo 18–20,” Umaykayo, Sumurot Kaniak—Para kadagiti Indibidual ken Pamilia: 2022
Ti maysa a bantay iti Egipto a nakaugalian a patien a Bantay Sinai
Abril 18–24
Exodo 18–20
“Amin a Sinao ni Jehova Aramidenminto”
Insuro ni Sister Michelle Craig, “Kas napudno a disipulo ni [Jesucristo], makaawatka iti bukod a pammaregta ken paltiing, a maitunos kadagiti bilinna, a naipangpangruna kenka” (“Spiritual Capacity,” Liahona, Nob. 2019, 21). Isurat ken agtignay iti pammaregta a maawatyo bayat ti panangbasam iti Exodo18–20.
Isuratmo dagiti Impresionmo
Ti panagdaliasat dagiti Israelita manipud iti Egipto agingga iti sakaanan ti Bantay Sinai ket napnuan kadagiti milagro—dagiti saan a matallikudan a parangarang ti awan kapadana a bileg, ayat, ken asi ti Apo. Nupay kasta, adda dagiti bendision a nakalatang para kadakuada a nalablabes pay iti pannakawayawayada manipud iti Egipto ken panangpennekda iti pisikal a pannakabisin ken pannakawawda. Tinarigagayanna nga agbalinda a natulagan a tattaona, ti “naidumduma a gamengna,” ken ti “nasantuan a nasion” (Exodo 19:5–6). Ita, sakupen dagiti bendision daytoy a katulagan iti labes ti maysa laeng a nasion wenno tattao. Tarigagayan ti Dios nga agbalin ti amin nga annakna a natulagan a tattaona, nga “umannugot a napaypayso iti timek[na], ken salimetmetan ti tulag[na]” (Exodo 19:5), gapu ta ipakitana ti asina “kadagiti rinibribu nga agayat [Kenkuana] ken mangsalimetmet kadagiti bilin[na]” (Exodo 20:6).
Dagiti Kapanunotan para iti Bukod a Panagadal iti Nasantuan a Kasuratan
Makatulongak a “makipagannong” iti aramid ti Apo.
Bayat ti panangbasam iti balakad nga inawat ni Moises manipud iti katunganganna a lalaki, ni Jetro, utobem no kasano a makapagbalinkayo a “lallaki a napudno” (no dadduma maipatarus a “tumutop” a lallaki) kas nailadawan iti bersikulo 21. Kasano a makatulongka a “makipagannong” kadagiti lideryo iti Simbaan? (bersikulo 22). Kas pagarigan, kasano a mayaplikar daytoy a balakad kadagiti panagkagumaanmo iti ministering?
Mabalin pay nga ibilangmo a sika, no dadduma, maipada ken ni Moises, a mangikarkarigatan nga agaramid ti adu unay. Kasano a mayaplikar kenka ti balakad ni Jetro?
Kitaen met iti Mosiah 4:27; Henry B. Eyring, “The Caregiver,” Liahona, Nob. 2012, 121–24.
Ti panagminister iti dadduma ket maysa a wagas a mabalintayo ti makiraman iti aramid ti Apo.
Gameng Kenkuana dagiti natulagan a tao ti Apo.
Ania ti kaipapanan kenka ti agbalin a “naidumduma a gameng” ti Apo? (Exodo 19:5). Indiaya ni Presidente Russell M. Nelson ti maysa a panangilawlawag iti daytoy a ragup ti balikas: “Iti Daan a Tulag, ti termino a Hebreo a ti naipangpangruna ket naipatarus iti segullah, a kayatna a sawen ti ‘naikkan pateg a kukua,’ wenno ‘gameng.’ … Tapno mabigbigdatayo dagiti katulongan ti Apo kas naipangpangruna a tattao ket pangdaydayaw ti kangatuan a kinapateg” (“Children of the Covenant,” Ensign, Mayo 1995, 34). Kasano a ti panangammo a ti panagtungpal kadagiti katulagam aramidennaka a “naipangpangruna” a mangimpluensia iti wagas ti panagbiagmo?
Kitaen met iti Gerrit W. Gong, “Covenant Belonging,” Liahona, Nob. 2019, 80–83.
Agkasapulan iti panagsagana dagiti sagrado a padas.
Imbaga ti Apo ken ni Moises a kinasapulan ti agsagana dagiti annak ti Israel sakbay a mabalinda ti “sumabat iti Dios” (Exodo 19:10–11, 17) ken agtungpal iti katulagan Kenkuana (kitaen iti Exodo 19:5). Ania ti aramidem nga agsagana para kadagiti sagrado a padas iti biagmo, kas iti idadar-ay iti templo wenno pannakiranud iti sakramento? Ania ti maaramidmo a makapagsagana a naan-anay para kadagitoy a padas? Panunotem dagiti dadduma pay a naespirituan nga aktibidad nga agkasapulan iti panagsagana, ket utobem no kasano a maapektuan ti panagsaganam ti kita ti padasmo.
Manangngaasi ti Dios.
Bayat ti panangbasam iti Exodo 20, ibilangmo ti panangisurat no ania kadagiti Sangapulo a Bilin ti pakariknaam a matungpalmo ken pakariknaam a matungpalmo a napudpudno. Mabalinmo ti agpili iti maysa a bilin nga itrabahom ket kalpasanna adalem daytoy a detalyado babaen ti panangbasam kadagiti adda pakainaiganna a nasantuan a kasuratan (kitaen iti Pangiwanwan iti Nasantuan a Kasuratan iti scriptures.ChurchofJesusChrist.org) wenno dagiti mensahe iti komperensia (kitaen iti topics section ti conference.ChurchofJesusChrist.org). Ibilangmo ti panangiraman iti panagadalmo kadagiti bendision a sumangbay kadagiti agtungpal iti bilin. Kasano nga ipakita dagitoy a bendision ti asi ti Dios ken ayat para kenka?
Kitaen met iti Carole M. Stephens, “If Ye Love Me, Keep My Commandments,” Liahona, Nob. 2015, 118–20.
Napateg ti mangipangpangruna iti Apo iti biagko.
Ti panangbasa iti Exodo 20:1–7 mabalin a mangguyugoy kenka a mangpanunot maipapan kadagiti prioridad iti biagmo—mabalinmo pay nga isurat dagitoy iti listaam. Ania ti sumagmamano a mabalin a “dios” wenno “[dagiti] ladawan a kinitikitan” (Exodo 20:3–4) a mabalin a pakasulisogam nga ipangruna sakbay ti Dios? Kasano a ti panangipangpangruna nga umuna iti Apo matulongannaka iti dadduma pay a napapateg a banag iti biagmo? Ania ti nakaparegtaam nga aramiden a mangpadur-as iti pokusmo iti Nailangitan nga Ama ken ni Jesucristo?
Kitaen met iti Dallin H. Oaks, “No Other Gods,” Liahona, Nob. 2013, 72–75.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Exodo 18:8–12.Ania ti epekto ken ni Jetro iti pammaneknek ni Moises maipapan iti panangispal ti Dios? Ania dagiti naindaklan a banag nga inaramiden ti Apo para iti pamiliatayo? Asino ti pangibinglayantayo iti padpadastayo? Kasano a mataginayontayo dagita a padas para kadagiti masakbayan a kaputotan?
-
Exodo 18:13–26.Mabalin a mangparegta dagitoy a bersikulo iti pamiliam tapno panunotenda maipapan iti serbisio dagiti lokal a lideryo iti Simbaan, kas iti bishop, dagiti lider dagiti agtutubo, wenno dagiti manursuro iti Primary. Ania dagiti pagrebbengan nga adda kadakuada a mabalin a kasla “napalalo ti dagsenna” (Exodo 18:18) tapno baklayen nga agmaymaysa ti maysa a tao? Ania ti maaramidtayo a makatulong a mangpalag-an kadagiti dagensenda?
-
Exodo 20:3–17.Panunotem ti napnuan kaipapanan a wagas a paglilinnawagan ti Sangapulo a Bilin kas mays a pamilia. Kas pagarigan, mabalinmo nga isurat dagiti bilin iti Exodo 20:3–17 iti sangapulo nga akikid a papel. Kalpasanna mabalin nga urnosen dagiti miembro ti pamilia dagitoy iti dua a kategoria: (1) panangdayaw iti Dios ken (2) panagayat iti dadduma (kitaen met iti Mateo 22:36–40). Ibilang iti panangpili iti maysa wenno dua a bilin iti tunggal aldaw itoy a lawas ken sangkamaysa a paglilinnawaganyo daytoy iti ad-adda a detaliado. Kas pagarigan, kasano a mangpapigsa iti pamiliatayo ti panagtungpal iti daytoy a bilin? Kasano a tinungpal ti Mangisalakan daytoy?
-
Exodo 20:12.Tapno nasaysayaat a maawatan ti Exodo 20:12, mabalin a makatulong iti pamiliam a mangkita kadagiti kaipapanan ti balikas a “dayawen.” Nalabit a makaaramid dagiti miembro ti pamilia iti listaan dagiti banag a maaramidtayo a mangdayaw kadagiti nagannak kadatayo. Mabalinyo ti agkansion iti maysa a kanta maipapan iti panangdayaw kadagiti nagannak, kas iti “Quickly I’ll Obey” (Children’s Songbook, 197), ket kalpasanna usarem ti sumagmamano kadagiti kapanunotan iti listaam a mangisurat kadagiti baro a bersikulo iti kanta.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Keep the Commandments,” Children’s Songbook, 146–47.
Panangpadur-as iti Bukod a Panagadal
Mangsapul iti oras a mayannatup para kenka. Masansan a nalaklaka ti agsursuro manipud kadagiti nasantuan a kasuratan no makapagadalka kadagitoy a saanka a masingsinga. Mangsapul iti oras a mayannatup para kenka, ken aramidem ti amin a kabaelam nga agtultuloy nga agadal iti dayta nga oras iti tunggal aldaw.
Ladawan ni Moises a mangig-iggem iti Sangapulo a Bilin, ni Sam Lawlor