Ladawan da Moises ken Aaron iti pangukoman ni Faraon, ni Robert T. Barrett

Marso 28–Abril 3

Exodo 7–13

“Laglagipenyo Daytoy nga Aldaw Isu ti Panagtalawyo Sadi Egipto”

Bayat ti panagbasam ken panagutobmo iti Exodo 7–13, isuratmo dagiti impresion a naawatmo. Bayat ti masansan a panangaramidmo iti daytoy, dumur-asto ti kabaelam a mangbigbig kadagiti arasaas ti Espiritu Santo.

Isuratmo dagiti Impresionmo

Nagsasaruno dagiti angol [plague] a nangparigat iti Egipto, ngem nagkedked latta ni Faraon a mangruk-at kadagiti Israelita. Ngem intuloy ti Dios nga impakita ti bilegna ken inikkanna ti Faraon kadagiti gundaway nga awatenna “a Siak ni Jehova” ken “awan sabali a kas kaniak iti amin a daga” (Exodo 7:5; 9:14). Idi agangay, mabalin a nasdaaw a nakaimatang ni Moises ken dagiti Israelita kadagitoy a pannakaiparangarang ti bileg ti Dios nga agpaay kadakuada. Awan duadua a nangpatalged iti pammatida iti Dios dagitoy nagtultuloy a pagilasinan ken nangpapigsa iti kinatallugodda a mangsurot iti propeta ti Dios. Sa, kalpasan a napaay a nangwayawaya ti siam a nakaro nga angol kadagiti Israelita, daydiay maikasangapulo nga angol—ti ipapatay dagiti inauna nga annak, agraman ti inauna nga anak ni Faraon—ti nangigibus iti pannakaadipen iti kamaudiananna. Kasla maitutop daytoy gapu ta iti tunggal kasasaad ti naespirituan a pannakaadipen, adda pudno laeng a maysa a wagas tapno makalibas. Ania man ti mabalin a pinadastayo iti napalabas, adda kadatayo daytoy kas iti adda kadagiti annak ti Israel. Ti laeng sakripisio ni Jesucristo, ti Inauna—ti dara ti Kordero nga awan mulitna—ti mangisalakanto kadatayo.

Dagiti Kapanunotan para iti Bukod a Panagadal iti Nasantuan a Kasuratan

Exodo 7–11

Mapilik a paluknengen ti pusok.

Sapay koma ta saanto a dakkel a maisuppiat ti pagayatam iti pagayatan ti Dios kas iti pagayatan ti Faraon. Addanto pay laeng panawentayo amin no saan a kas iti kalukneng ti pusotayo a kas iti nasken koma, isu nga adda maysa a banag a masursuro manipud kadagiti tingnay ni Faraon kas naisurat iti Exodo 7–10. Bayat iti panangbasam maipapan kadagiti angol kadagitoy a kapitulo, ania ti napateg kenka maipapan kadagiti sungbat ti Faraon? Adda kadi dagiti madlawmo a maipada nga ayo iti kinatangken ti panagpuspuso iti bagim? Utobem no ania ti masursurom manipud kadagitoy a kapitulo maipapan iti kayat a sawen ti maaddaan iti nalukneng a puso.

Kitaen nga ilawlawag ti Patarus ni Joseph Smith ti Exodo 7:3, 13; 9:12; 10:1, 20, 27; 11:10 a saan a pinatangken ti Apo ti panagpuspuso ni Faraon—Ni Faraon ti nangpatangken iti bukodna a panagpuspuso (kitaen dagiti footnote para iti tunggal bersikulo).

Ania ti masursurom manipud kadagiti sumaganad a nasantuan a kasuratan maipapan iti panangpadur-as iti nalukneng a puso? 1 Nephi 2:16; Mosiah 3:19; Alma 24:7–8; 62:41; Ether 12:27.

Kitaen met iti Michael T. Ringwood, “An Easiness and Willingness to Believe,” Liahona, Nob. 2009, 100–102.

Exodo 12:1–42

Isimbolo ti Fiesta ti Paskua ti Pannubbot ni Jesucristo.

Ti laeng kakaisuna a wagas tapno maispal dagiti Israelita manipud iti maikasangapulo nga angol, kas nailadawan iti Exodo 11:4–5, ket ti mangsurot a husto kadagiti pagalagadan nga inted ti Apo ken ni Moises iti Exodo 12, maysa a ritual a maawagan Fiesta ti Paskua. Ti Fiesta ti Paskua ti mangisuro kadatayo babaen kadagiti simbolo a kas met laeng iti panangispal ti Apo kadagiti Israelita manipud iti pannakabalud iti Egipto, maispalnatayo pay manipud iti pannakabalud iti basol. Ania ti masarakam kadagiti pagalagadan ken simbolo ti Fiesta ti Paskua a mangipalagip kenka maipapan ken ni Jesucristo ken ti Pannubbotna? Ania ti isingasing kenka dagitoy a simbolo ken pagalagadan maipapan iti no kasano ti panangawat kadagiti bendision ti Pannubbotna? Kas pagarigan, ania ti ibagi ti panangikabil iti dara ti kordero kadagiti bautek ti ridaw? (bersikulo 7). Ania ti kayat a sawen kenka ti “sisasapatos ken siiiggemkayo iti sarukod”? (bersikulo 11).

Kitaen met iti Doktrina ken Katulagan 89:21.

Tulongannatayo ti sakramento a manglagip iti Mangisalakantayo, ni Jesucristo.

Exodo 12:14–17, 24–27; 13:1–16

Makatulong kaniak ti sakramento a manglagip iti pannakaisalakanko babaen ken ni Jesucristo.

Kayat ti Mangisalakan a kanayon a laglagipen dagiti Israelita nga insalakanna ida, uray no nagbalin a narigaten a malipatan kalpasan ti pannakabaludda. Daytoy ti gapuna no apay a binilinna ida a mangrambak iti fiesta ti Paskua iti tunggal tawen. Bayat ti panangbasam kadagiti pagalagadan iti Exodo 12:14–17, 24–27; 13:1–16, panunotem maipapan no ania ti ar-aramidem a manglaglagip kadagiti bendision ti Dios kenka. Kasano a mataginayonmo dayta a pakalaglagipan “kadagiti kaputotanyo”? (kitaen iti Exodo 12:14, 26–27).

Ania dagiti pagpapadaan a makitam iti nagbaetan dagiti panggep ti fiesta ti Paskua ken ti sakramento? Kasano a ti panangbasam maipapan iti Fiesta ti Paskua mangipalagip kenka iti sakramento ken mangisangbay iti ad-adda a kaipapanan iti dayta nga ordinansa? Ibilangmo no ania ti maaramidmo tapno “kanayon a laglagipen” ni Jesucristo (Moroni 4:3; 5:2; kitaen met iti Lucas 22:7–8, 19–20).

Mabalinmo pay nga utoben dagiti dadduma pay a banag a kayat ti Apo a laglagipem: kitaen, kas pagarigan, iti, Helaman 5:6–12; Moroni 10:3; Doktrina ken Katulagan 3:3–5, 10; 18:10; 52:40.

Kitaen met iti Juan 6:54; “Always Remember Him” (video), ChurchofJesusChrist.org; “The Sacrament of the Lord’s Supper,” in Teachings of Presidents of the Church: Howard W. Hunter (2015), 197–206.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Exodo 7–12.Nalabit a kalpasan ti panangbasam maipapan kadagiti angol nga imbaon ti Apo kadagiti Egipsio kas pagilasinan ti pannakabalinna, mabalin nga ibinglay ti pamiliam dagiti wagas a pangipakitaan ti Apo iti pannakabalinna ita.

Exodo 8:28, 32; 9:27–28, 34–35.Mabalin nga usaren dagitoy a bersikulo a pangirugi iti panaglilinnawag maipapan iti kinapateg ti panagtungpal iti balikastayo. Nalabit a mabalin nga ibinglay dagiti miembro ti pamilia dagiti padasda idi nakitada dagiti dadduma a nangaramid iti inanamonganda nga aramiden.

Exodo 12:1–42.Kalpasan ti panangbasa iti Exodo 12:1–42 nga aggigiddan, mabalinmo nga isurat kadagiti panid ti papel dagiti banag a maaramidyo kas maysa a pamilia tapno laglagipen ti Pannubbot ni Jesucristo. Gapu iti dara ti kordero kadagiti bautek ti ridaw (kitaen iti bersikulo 23) ti mangibagi iti Mangisalakan, mabalinmo nga ikabil dagitoy a papel iti ruangan ti ridaw iti pagtaenganyo. Mabalinyo pay ti mangan iti sumagmamano a taraon a naggapu iti Fiesta ti Paskua, kas iti tinapay nga awan ti lebadurana (kraker wenno tortilia) wenno dagiti napait nga herbal (parsley wenno marunggay), ket panglilinnawagan no kasano a matulongannatayo ti Fiesta ti Paskua a manglaglagip no kasano nga insalakan ti Dios dagiti taona. Kas pagarigan, ti tinapay nga awan lebadurana ti mangipalagip kadakuada nga awan ti panawen nga umalsa ti tinapayda sakbay a naglibasda manipud iti pannakabalud. Dagiti napait a herbal ti mangipalagip kadakuada iti kinapait ti pannakabalud.

Exodo 12:14, 24–27.Nalabit a mabalinyo nga irebyu dagitoy a bersikulo kas maysa a pamilia sakbay ti sumaruno a mitingyo iti sakramento. Kasano a mainaig dagitoy a bersikulo iti sakramento? Kasano a maaramidtayo nga ad-adda a naan-anay ti sakramento a “pakalaglagipan” iti inaramid ti Mangisalakan para kadatayo?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “In Memory of the Crucified,“ Hymns, num. 190.

Panangpadur-as iti Panangisurotayo

Ibinglay dagiti adalen a banag [object lesson]. Awisem dagiti miembro ti pamilia a mangsapul kadagiti banag a makatulong kadakuada a makaawat kadagiti pagbatayan iti nasantuan a kasuratan a basbasaenyo. Kas pagarigan, dagiti nalukneng ken natangken a banag makatulong kadagiti miembro ti pamilia a mangilawlawag iti paggidiatan ti kaadda ti nalukneng a puso ken ti natangken a puso.

Ladawan ti pangrabii iti Fiesta ti Paskua, ni Brian Call