Ni Moises ken ti Maur-uram a Bassit a Kayo, ni Harry Anderson

Marso 21–27

Exodo 1–6

“Linagipkon ti Tulagko”

Rugiam ti panagadalmo iti kararag, ken agpatulongka a mangsapul kadagiti mensahe iti Exodo 1–6 nga adda pakainaiganna iti biagmo ken iti serbisiom iti pagarian ti Dios.

Isuratmo dagiti Impresionmo

Ti awis nga agbiag iti Egipto ti talaga a nangisalakan iti pamilia ni Jacob. Ngem kalpasan dagiti ginasgasut a tawen, dagiti an-annaboda ket tinagabo ken pinarigat ti maysa a baro a faraon “a di nangbigbig ken Jose” (Exodo 1:8). Gagangay koma para kadagiti Israelita a masdaaw no apay nga impalubos ti Dios a mapasamak daytoy kadakuada, dagiti natulagan a taona. Nalagipna kadi ti katulagan nga inaramidna kadakuada? Isuda kadi pay laeng dagiti taona? Makitana kadi no kasano ti kadakkel ti panagsagabada?

Mabalin nga adda dagiti panawen a nariknam a makadamdamagenka kadagiti isu met la a saludsod? Mabalin a masdaawka, Ammo ngata ti Dios ti pagpaspasarak? Mangngeganna ngata dagiti ararawko a tulong? Ti estoria iti Exodo ti pannakaispal ti Israel manipud iti Egipto ti makasungbat a silalawag kadagiti kasta a saludsod: Saan a malipatan ti Dios dagiti taona. Malagipna dagiti katulaganna kadatayo ken ipatungpalna dagitoy iti bukodna a panawen ken wagas (kitaen iti Doktrina ken Katulagan 88:68). “Subbotenkayto nga addaan iti siuunnat a takiag,” ipakdaarna. “Siak ni Jehova a Diosyo a mangilasat kadakayo kadagiti pakarigatan[yo]” (Exodo 6:6–7).

Para iti pakagupgopan ti libro ti Exodo, kitaen iti “Exodo, libro ti” iti Pangiwanwan iti Nasantuan a Kasuratan.

Dagiti Kapanunotan para iti Bukod a Panagadal iti Nasantuan a Kasuratan

Exodo 1–2

Ni Jesucristo ti Mangisalakanko.

Maysa kadagiti kangrunaan a tema iti libro ti Exodo ket iti kaadda ti pannakabalin ti Dios a mangwayawaya kadagiti taona manipud iti pannakaidadanes. Ti pannakaadipen dagiti Israelita kas nailadawan iti Exodo 1 ket makita kas maysa a simbolo ti pannakabalud a pakaipaspasanguantayo amin ita gapu iti basol ken ipapatay (kitaen iti 2 Nephi 2:26–27; 9:10; Alma 36:28). Ket ni Moises, ti nangispal kadagiti Israelita, ket makita kas maysa a kita, wenno mangibagi, ken ni Jesucristo (kitaen iti Deuteronomio 18:18–19; 1 Nephi 22:20–21). Basaem ti Exodo 1–2 a pampanunotem dagitoy a pagpapadaan. Kas pagarigan, mabalin a madlawmo, nga agpada da Moises ken Jesus a nataginayon manipud iti ipapatay kas babassit nga ubbing (kitaen iti Exodo 1:22–2:10; Mateo 2:13–16) ken agpada a binubosda ti panawenda iti let-ang sakbay ti rugi ti panagministroda (kitaen iti Exodo 2:15–22; Mateo 4:1–2). Ania dagiti dadduma pay a nalawag a pannakaammo ken pannakaawat manipud iti Exodo maipapan iti naespirituan a pannakabalud? maipapan iti panangispal ti Mangisalakan?

Kitaen met iti D. Todd Christofferson, “Redemption,” Liahona, Mayo 2013, 109–12.

Ni Moises iti Mula a Runo, © Providence Collection/licensed from goodsalt.com

Exodo 3–4

Ikkan ti Dios iti bileg dagiti awaganna nga agaramid iti trabahona.

Ita am-ammotayo ni Moises kas naindaklan a propeta ken lider. Ngem saan a nakita ni Moises ti bagina iti kasta a wagas idi damo nga inawagan ti Apo. “Asinoak,” nagsiddaaw ni Moises, “tapno mapanak ken ni Faraon?” (Exodo 3:11). Nupay kasta, ammo ti Apo no asino a talaga ni Moises idi—ken no asino ti pakapagbalinanna. Bayat ti panangbasam iti Exodo 3–4, kitaem no kasano nga pinatalgedan ti Apo ni Moises ken sinungbatanna dagiti pakaseknanna. Ania ti masarakam kadagitoy a kapitulo a mabalin a mangparegta kenka no mariknam ti kinakurang? Kasano a bendisionan ti Apo iti nayon a bileg dagiti katulonganna nga agaramid iti pagayatanna? (kitaen iti Moises 1:1–10, 24–39; 6:31–39, 47). Kaano a nakitam ti Dios nga aramidenna ti trabahona babaen kenka wenno dagiti dadduma?

Para iti ad-adu pay maipapan iti biag ken panagministro ni Moises, kitaen iti “Moises” iti Bible Dictionary wenno Pangiwanwan iti Nasantuan a Kasuratan.

Exodo 5–6

Ipatungpalto ti Apo dagiti karina iti bukodna a panawen.

Nupay situtured ni Moises a napan iti sango ti Faraon, kas iti imbilin ti Dios, ket imbagana kenkuana a ruk-atanna dagiti Israelita, nagkedked ti Faraon. Kinapudnona, ad-adda a pinarigatna ti biag dagiti Israelita. Nalabit a nasdaaw ni Moises ken dagiti Israelita no apay a saan a naar-aramid a nasayaat dagiti banag uray no inar-aramid ni Moises ti indawat ti Dios nga aramidenna (kitaen iti Exodo 5:22–23).

Nariknam kadin nga inar-aramidmo idi ti pagayatan ti Dios ngem dimo nakita ti balligi a ninannamam? Irebyum ti Exodo 6:1–8, a mangsapsapul no ania ti kinuna ti Apo a makatulong ken ni Moises nga agpursigi. Kasano a matulongannaka ti Apo a mangipetteng iti panangaramid iti pagayatanna?

Exodo 6:3

Asino ni Jehova?

Ti Jehova ket maysa kadagiti nagan ni Jesucristo ken mangitudo iti premortal a Mangisalakan. Ilawlawag ti Patarus ni Joseph Smith nga am-ammo da propeta Abraham, Isaac, ken Jacob ti Apo iti daytoy a nagan (kitaen iti Exodo 6:3, footnote c). Gagangay a, no makita ti ragup ti balikas a “ti Apo” iti Daan a Tulag, itudona ti Jehova. Iti Exodo 3:13–15, ti paulo a “SIAK” ket pagibasaran pay ken ni Jehova (kitaen met iti Doktrina ken Katulagan 38:1; 39:1).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Exodo 1–2.Inakem dagiti sumagmamano a babbai dagiti napapateg a papel iti plano ti Dios a mangpatanor iti maysa a mangisalakan para kadagiti Israelita. Kas maysa a pamilia, mabalinmo a basaen maipapan kadagiti mammaltot a da Sifra ken Pua (Exodo 1:15–20); ina ni Moises, Jochebed, ken ti kabsatna a babai, ni Miriam (Exodo 2:2–9; Numero 26:59); anak a babai ni Faraon (Exodo 2:5–6, 10); ken ti asawa ni Moises a ni Zippora (Exodo 2:16–21). Kasano a pinadur-as dagitoy a babbai ti plano ti Dios? Kasano a mangipalagip kadatayo dagitoy a padasda maipapan iti mision ni Jesucristo? Mabalinmo pay ti mangummong kadagiti ladawan dagiti kabagian ken kapuonan a babbai ket ibinglaymo dagiti estoria maipapan kadakuada. Kasano a naparaburantayo gapu ta addaantayo kadagiti nalinteg a babbai? Mabalin a mangnayon ti mensahe ni Presidente Russell M. Nelson “A Plea to My Sisters” (Liahona, Nob. 2015, 95–98) iti panaglilinnawagyo.

Exodo 3:1–6.Idi inasitgan ni Moises ti maur-uram a kayo, imbaga ti Apo kenkuana nga ikkatenna ti sapatosna kas maysa a tanda ti panagraem. Kasano a maipakitatayo ti panagraemtayo kadagiti sagrado a lugar? Kas pagarigan, ania ti maaramidtayo tapno mapagbalintayo ti pagtaengantayo a sagrado a lugar a mabalin a pagnaedan ti Espiritu ti Apo? Kasano a maipakitatayo ti ad-adda a panagraemtayo kadagiti dadduma pay a sagrado a lugar?

Exodo 4:1–9.Inikkan ti Apo ni Moises iti bileg a mangaramid kadagiti milagro kas pagilasinan tapno ipakita kadagiti annak ti Israel nga Isu ti nangibaon ken ni Moises. Ania ti isuro kadatayo dagitoy a pagilasinan maipapan ken ni Jesucristo?

Exodo 5:2.Ania ti mabalin a kayatna a sawen kadatayo ti “am-ammo” ti Apo? Kasano ti pannakaam-ammotayo Kenkuana? (kas pagarigan, kitaen iti Alma 22:15–18). Kasano ng apektuan ti pannakinaigtayo Kenkuana ti tarigagaytayo nga agtungpal Kenkuana? (kitaen met iti Juan 17:3; Mosiah 5:13).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Reverence is Love,” Children’s Songbook, 31.

Panangpadur-as iti Panagsursurotayo

Agsurat iti study journal. Mabalin a makitam a makatulong ti agusar iti maysa a journal wenno kuaderno a pagisuratan kadagiti pampanunoten, kapanunotan, saludsod, wenno impresion a sumangbay bayat iti panagadalmo.

Masarakan ti Anak a Babai ni Faraon ni Moises iti Runo a Kayo, ni George Soper