Dagiti Kapanunotan a Laglagipen

Ti Balay ti Israel

Iti maysa a lugar iti let-ang a dayaen ti Canaan, sidadanag nga inuray ni Jacob ti pannakirangetna iti kasinginna, ni Esau. Ti kaudian a pannakakita ni Jacob ken ni Esau, agarup 20 a tawen a nasapsapa, pinangtaan ni Esau a papatayenna daytoy. Binubos ni Jacob ti agpatnag a pannakidangadangna iti let-ang, nga agkalkalikagum iti bendision manipud iti Dios. Kas bunga ti pammati, panagpursigi, ken determinasion ni Jacob, sinungbatan ti Dios dagiti kararagna. Dayta a rabii nabaliwan ti nagan ni Jacob iti Israel, nagan a kaipapananna ti “nakisuot iti Dios” (Genesis 32:28, footnote b; kitaen met iti Genesis 32:24–32).¹

Iti asideg ti Karayan Jabbok, inawat ni Jacob ti nagan nga Israel.

Daytoy ti umuna a gundaway a makita ti nagan nga Israel iti Biblia, ken daytoy ti nagan a nagtultuloy a nagpursigi iti intero a libro ken iti unos ti pakasaritaan. (Iti saan a nabayag simmangbay ti nagan a mangitudo iti nasursurok ngem maysa laeng a tao.) Addaan 12 nga annak a lallaki ni Israel, ket maawagan dagiti an-annaboda kas ti “balay ti Israel,” dagiti “tribu ti Israel,” dagiti “annak ti Israel,” wenno dagiti “Israelita.”

Iti unos ti pakasaritaan, napateg unay ti pannakaisilpo dagiti annak ti Israel iti nagtaudanda manipud iti maysa kadagiti sangapulo-ket-dua a tribu ti Israel. Napateg a paset ti kapupuonda iti pakabigbiganda iti katulagan. Impakdaar ni Apostol Pablo nga isuna ket nagtaud “ti kapuonan [tribu] ni Benjamin” (Taga Roma 11:1). Idi imbaon ni Lehi dagiti annakna a lallaki iti Jerusalem a mangala kadagiti pinanid a gambang, maysa a makaigapu ket naglaon dagiti pinanid iti “puon dagiti ammana” (1 Nephi 5:14; kitaen met iti 1 Nephi 3:3). Natakuatan ni Lehi a maysa isuna nga an-annabo ni Joseph, ti pannakaawat ti kaputotanna iti koneksionda iti balay ti Israel ket pakakitaan a napateg kadakuada kadagiti tawen nga umay (kitaen iti Alma 26:36; 3 Nephi 20:25).

Iti Simbaan iti agdama, mabalin a mangngegam maipapan iti Israel kadagiti panangisawang kas “ti pannakaummong ti Israel.” Kantaentayo ti “Redeemer of Israel,” ti “Hope of Israel,” ken “Ye Elders of Israel.”² Kadagitoy a kaso, ditayo agsarsarita wenno agkankanta laeng maipapan iti nagkauna a pagarian ti Israel wenno ti moderno a nasion a maawagan iti Israel. Ketdi, itudtudotayo dagiti naguummong manipud kadagiti pagilian ti lubong iti Simbaan ni Jesucristo. Itudtudotayo dagiti tao a nagpursigi iti Dios, a sipapasnek a nagkalikagum a manggun-od kadagiti bendisionna, ken isu, a babaen iti panagbuniag, nagbalin a natulagan a tattaona.

Naibaga iti patriarchal blessingmo ti koneksionmo iti maysa kadagiti tribu ti balay ti Israel. Dayta ti ad-adda a makaay-ayo a paset ti impormasion iti pakasaritaan ti pamilia. Ti panagbalin a paset ti balay ti Israel kaipapananna nga adda natulagan a pakainaigam iti Nailangitan nga Ama ken ni Jesucristo. Kayatna a sawen a sika, kas ken ni Abraham, naisangrat nga agbalin a “bendision” kadagiti annak ti Dios (Genesis 12:2; Abraham 2:9–11). Kayatna a sawen, kadagiti balikas ni Pedro, a “dakayo ti napili a kaputotan, naarian a padi, nasantuan a nasion, ili a kukua ti Dios; tapno ipaduyakyakyo dagiti kinatan-ok daydiay nangayab kadakayo manipud kinasipnget inggana iti nakaskasdaaw a lawagna” (1 Pedro 2:9). Kayatna a sawen a sika ti maysa a “napinget iti Dios” bayat ti panangdayawmo kadagiti katulagam Kenkuana.

Dagiti Nagadawan

1. Adda dagiti dadduma pay a mabalin a kaipapanan para iti nagan nga Israel, agraman iti “agturay ti Dios” wenno “makiranget wenno agpinget ti Dios.”

2. Hymns, dagiti num. 6, 259, ken 319.

Ladawan ti family tree ni Jacob, ni Keith L. Beavers