“Pebrero 21–27. Genesis 24–27: Napabaro ti Katulagan,” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Pebrero 21–27. Genesis 24–27,” Umaykayo, Sumurot Kaniak—Para kadagiti Indibidual ken Pamilia: 2022
Ladawan ni Rebeca, ni Dilleen Marsh
Pebrero 21–27
Genesis 24–27
Napabaro ti Katulagan
Bayat ti panagbasam iti Genesis 24–27, ikasom dagiti naespirituan a nalawag a pannakaammo ken pannakaawat a maawatmo. Agkararagka tapno maammuam no kasano nga adda pakainaiganna iti biagmo dagiti pagbatayan a masarakam.
Isuratmo dagiti Impresionmo
Mairaman iti katulagan ti Dios ti kari a babaen ken ni Abraham ken dagiti kaputotanna “mabendisionanto amin a kaamaan iti daga” (Abraham 2:11). Saan a kari dayta a maipatungpal iti maysa a henerasion: iti adu a wagas, ti Biblia ket estoria ti agtultuloy a panangipatungpal ti Dios iti karina. Ket rinugianna babaen ti panangpabarona iti katulagan iti pamilia da Isaac ken Rebeca. Babaen kadagiti padasda, masursurotayo ti maysa a banag maipapan iti panagbalin a paset ti katulagan. Dagiti padasda ti mangisuro kadatayo maipapan iti kinasayaat, kinaanus, ken panagtalek kadagiti naikari a bendision ti Dios. Ken masursurotayo a napateg ti panangisuko iti aniaman a nailubongan a “guisado [pottage]” (Genesis 25:30) tapno makagun-od kadagiti bendision ti Dios para iti bagbagitayo ken iti annaktayo para kadagiti sumangbay a henerasion.
Dagiti Kapanunotan para iti Bukod a Panagadal iti Nasantuan a Kasuratan
Kasapulan ti kallaysa iti agnanayon a plano ti Dios.
Ita saan unay a prioridad ti adu a tao ti kallaysa wenno ibilangda daytoy a maysa a dagensen. Sabali ti pannirigan ni Abraham—para kenkuana, kangatuan ti pateg ti kallaysa ti anakna a ni Isaac. Apay iti panagkunam a napateg unay daytoy para kenkuana? Bayat ti panangbasam iti Genesis 24, panunotem maipapan iti pateg ti kallaysa iti plano ti Dios iti pannakaisalakan. Mabalin a kayatmo pay a basaen ti mensahe ni Elder D. Todd Christofferson “Why Marriage, Why Family” (Liahona, Mayo 2015, 50–53) ket ibilangmo no apay a “ti pamilia a nabangon iti kallaysa ti maysa a lalaki ken babai ket mangipaay iti kasayaatan a lugar a pagdur-asan ti plano ti Dios” (panid 52).
Dagiti saludsod kas iti sumaganad mabalin a makatulong kenka a mangibilang iti dadduma pay a pagbatayan iti daytoy a kapitulo:
Genesis 24:1–14. Ania ti inaramid ni Abraham ken ti katulonganna nga inramanda ti Apo kadagiti panagkagumaanda a mangsarak iti asawa para ken ni Isaac?
Genesis 24:15–28, 55–60. Ania dagiti kababalin a masarakam ken ni Rebeca a kayatmo a tuladen?
Ania dagiti dadduma pay nalawag a pannakaammo ken pannakaawat a masarakam?
Kitaen met iti Doktrina ken Katulagan 131:1–4; “Ti Kaamaan: Maysa a Waragawag iti Lubong,” ChurchofJesusChrist.org.
Makapagpiliak iti nagbaetan ti apagbiit a pannakapnek ken dagiti banag a dakdakkel ti pategna.
Iti kultura ni Abraham, gagangay a ti inauna nga anak a lalaki iti pamilia ti umawat iti saad ti kinapangulo ken pribilehio, a maawagan iti saguday ti pannakayanak [birthright]. Immawat daytoy nga anak a lalaki iti dakdakkel a tawid manipud kadagiti dadakkelna, a karagpin dagiti dakdakkel a pangrebbengan para iti panangaywan iti dadduma pay a kapamiliana.
Bayat ti panangbasam iti Genesis 25:29–34, ibilangmo no apay a mabalin a nagtallugod ni Esau a mangisuko iti saguday ti pannakayanakna a kasukat ti maysa a makan. Ania dagiti adalen a masarakam para iti bagim iti daytoy a pakaammuan? Kas pagarigan, adda kadi “guisado [lugaw]” a mangsingsinga kenka iti pananggun-odmo kadagiti bendision a kapatgan kenka? Ania ti ar-aramidem tapno ipamaysam ken pagyamanam dagitoy a bendision?
Kitaen met iti Mateo 6:19–33; 2 Nephi 9:51; M. Russell Ballard, “What Matters Most Is What Lasts Longest,” Liahona, Nob. 2005, 41–44.
Napabaro ti katulagan ni Abraham babaen ken ni Isaac.
Naisangrat ti katulagan ti Dios nga inaramidna ken ni Abraham tapno agtultuloy iti adu a henerasion, isu a ti patawid da Abraham ken Sara iti panagtungpal iti katulagan ket nasken nga ipasa kada Isaac, Jacob, ken dadduma pay a napupudno a babbai ken lallaki iti kaputotanda. Bayat ti panangbasam iti Genesis 26:1–5, sarakem dagiti sumagmamano a bendision ti katulagan a dinakamat ti Dios. Ania ti masursurom maipapan iti Dios manipud kadagitoy a bersikulo?
Ni Jesucristo ti ubbog ti danum a nabiag.
Mabalin a madlawmo a dagiti bubon ken ubbog ken dadduma pay a pagtaudan ti danum ket napateg dagiti akemda iti adu nga estoria iti Daan a Tulag. Saan a nakakaskasdaaw daytoy, gapu ta napasamak ti kaaduan dagitoy nga estoria kadagiti namaga a daga. Bayat ti panagbasam iti Genesis 26 maipapan kadagiti bubon ni Isaac, utobem no ania ti mabalin nga isimbolo ti danum kadagiti nasantuan a kasuratan. Ania dagiti nalawag a pannakaammo ken pannakaawat a masarakam maipapan kadagiti naespirituan a bubon ti “danum a nabiag”? (kitaen iti Juan 4:10–15). Kasano ti panangkalim kadagiti naespirituan a bubon iti biagmo? Kasano a maipada ti Mangisalakan iti danum a nabiag para kenka? Kitaen a “ginaburan” dagiti Filisteo dagiti bubon (kitaen iti Genesis 26:18). Adda kadi ania man a banag iti biagmo a manggabgabur kadagiti bubonmo iti danum a nabiag?
Ti bubon iti Beer-sheba, a nangkalian da Abraham ken Isaac iti bubon.
Nagbiddut kadi da Rebeca ken Jacob a nangallilaw ken ni Isaac?
Ditayo ammo dagiti gapu iti likudan ti wagas nga inusar da Rebeca ken Jacob tapno magun-od ti bendision para ken ni Jacob. Makatulong a lagipen nga iti Daan a Tulag nga adda kadatayo itan ket saan a kumpleto (kitaen iti Moises 1:23, 41). Mabalin nga adda napukaw nga imporrmasion manipud kadagiti orihinal a kasuratan a mangiladawan no ania ti nalabit a mangburburibor kadatayo. Nupay kasta, ammotayo a pagayatan ti Dios nga awaten ni Jacob ti bendision manipud ken ni Isaac gapu ta naaddaan ni Rebeca iti paltiing a nasken nga iturayan ni Jacob ni Esau (kitaen iti Genesis 25:23). Kalpasan a nabigbig ni Isaac a binendisionanna ni Jacob imbes a ni Esau, impatalgedna a “mabendisionanto” ni Jacob (Genesis 27:33)—a mangisingsingasing a naipatungpalen ti pagayatan ti Dios.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Genesis 24:2–4, 32–48.Indawat ni Abraham iti maysa a mapagtalkan nga adipen a magsapul iti asawa para ken ni Isaac, ket nakitulag ti adipen ken Abraham nga aramidenna. Kasano nga impakita ti adipen ni Abraham ti kinapudno iti panagtungpal iti katulaganna? Kasano a masurottayo ti pagwadanna?
-
Genesis 24:15–28, 55–60.Mabalin a sapulen ti pamiliam kadagitoy a bersikulo dagiti kababalin a nangpabalin ken ni Rebeca a maikari nga agnanayon a kadua para ken ni Isaac. Allukoyem dagiti miembro ti pamilia a mangpili iti maysa kadagitoy a kababalin a mariknada a nasken a padur-asenda.
-
Genesis 25:19–34; 27.Tapno irebyu dagiti estoria iti no kasano a napan ken ni Jacob ti saguday ti pannakayanak ken ti bendision ni Esau, mabalinmo nga isurat dagiti binatog manipud iti “Jacob ken Esau” (iti Dagiti Estoria iti Daan a Tulag) iti nasinasina nga akikid a papel. Makapagtitinnulong dagiti miembro ti klase a mangyurnos kadagiti binatog iti husto nga urnos.
Bayat ti panangilawlawagmo iti panangilako ni Esau iti saguday ti pannakayanakna, mabalin a kayatmo pay nga isarita maipapan iti no ania ti kapatgan iti pamiliam, kas iti pakainaiganyo iti Nailangitan nga Ama ken ni Jesucristo. Nalabit a mabalin a makasarak dagiti miembro ti pamilia kadagiti banag wenno ladawan a mangibagi no ania ti ibilangda nga addaan iti agnanayon a pategna. Pailawlawagmo kadakuada no apay a pinilida dagita a banag.
-
Genesis 26:3–5.Tapno matulongan a maawatan ti pamiliam ti katulagan ni Abraham, mabalinmo nga awisen ida a mangsapul kadagiti kari a nailadawan kadagitoy a bersikulo. Apay a napateg a maammuantayo maipapan kadagitoy a kari iti agdama? (kitaen iti “Dagiti Kapanunotan a Laglagipen: Ti Katulagan,” iti daytoy a resource).
-
Genesis 26:18–25, 32–33.Apay a napateg dagiti bubon? Kasano a mayarig ni Jesucristo ti bubon ti danum?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Choose the Right,” Hymns, no. 239.
Panangpadur-as iti Bukod a Panagadal
Mangyulo iti maysa a nasantuan a kasuratan. Insuro ni Elder Richard G. Scott, “Ti maysa a nayulo a nasantuan a kasuratan ket agbalin a napaut ken naibtur a gayyem a saan nga agkapsut iti panaglabas ti panawen” (The Power of Scripture,” Liahona, Nob. 2011, 6).
Ilako ni Esau ti Saguday ti Pannakayanakna ken ni Jacob, ni Glen S. Hopkinson