Ladawan da Abraham ken Sara, ni Dilleen Marsh

Pebrero 7–13

Genesis 12–17; Abraham 1–2

“Tapno Agbalin a Nain-indaklan a Pasurot ti Kinalinteg”

Bayat ti panangbasam maipapan kada Abram ken Sarai (idi agangay naawaganda iti Abraham ken Sara) ken ti pamiliada, utobem no kasano a mangparegta kenka dagiti pagwadanda. Isurat dagiti impresion maipapan iti no ania ti maaramidmo tapno “agbalin[ka] a nain-indaklan a pasurot ti kinalinteg” (Abraham 1:2).

Isuratmo dagiti Impresionmo

Gapu iti katulagan nga inaramid ti Dios kenkuana, naawagan ni Abraham a “ti ama dagiti napudno” (Doktrina ken Katulagan 138:41) ken “ti Gayyem ti Dios” (Santiago 2:23). Minilmilion iti agdama ti mangdayaw kenkuana kas direkta a kapuonanda, ken naadaptar dagiti dadduma iti pamiliana babaen ti kumbersion iti ebanghelio ni Jesucristo. Ngem naggapu ni Abraham mismo iti nariribuk a pamilia—ti amana, a nangtallikud iti pudno a panagrukbab iti Dios, pinadasna a pangisakripisuen ni Abraham kadagiti palso a dios. Iti baet daytoy, tarigagayan ni Abraham ti “agbalin a nain-indaklan a pasurot ti kinalinteg” (Abraham 1:2), ken ipakita ti pakaammuan iti biagna a dinayaw ti Dios ti tarigagayna. Agtakder ti biag ni Abraham kas maysa a pammaneknek nga ania man ti pakasaritaan ti pamilia ti maysa a tao, mabalin a mapno iti namnama ti masakbayan.

Dagiti Kapanunotan para iti Bukod a Panagadal iti Nasantuan a Kasuratan

Abraham 1:1–19

Bendisionannakto ti Dios gapu iti pammatik ken dagiti nalinteg a tarigagayko.

Kas iti adu kadatayo, nagnaed ni Abraham iti nadangkes nga aglawlaw, ngem tinarigagayanna ti agbalin a nalinteg. Insuro ni Presidente Dallin H. Oaks ti kinapateg ti kaadda dagiti nalinteg a tarigagay: “Kas kapateg ti mangpukaw iti tunggal tarigagay para iti basol, agkasapulan ti agnanayon a biag iti ad-adu pay. Tapno magun-odtayo ti agnanayon a panungpalantayo, agtarigagay ken agtrabahotayonto para kadagiti kababalin a kasapulan tapno agbalin nga agnanayon a pinarsua. … No kasla narigat unay daytoy—ken awan duadua a saan a nalaka para iti asino man kadatayo—kalpasanna nasken a mangrugitayo para iti kakasta a kababalin ket umawagtayo iti managayat a Nailangitan nga Ama para iti tulong iti riknatayo [kitaen iti Moroni 7:48]” (“Desire,” Liahona, Mayo 2011, 44–45). Bayat ti panangbasam iti Abraham 1:1–19, ibilangmo no kasano nga ipakita dagitoy a bersikulo no ania ti insuro ni Presidente Oaks. Makatulong dagiti kastoy a saludsod:

• Ania ti tinarigagayan ken kinalikaguman a gun-oden ni Abraham? Ania ti inaramidna a nangipakita iti pammatina?

• Ania dagiti tagigagaymo? Adda kadi maysa a banag a mariknam a nasken nga aramidem a mangpatarnaw kadagiti tarigagaymo?

• Ania dagiti karit a sinango ni Abraham gapu kadagiti nalinteg a tarigagayna? Kasano a timmulong ti Dios kenkuana?

• Ania ti mensahe dagitoy a bersikulo para kadagiti miembro ti pamilia a saan nga agtarigagay iti kinalinteg?

Kitaen met iti Mateo 7:7; “Deliverance of Abraham” (video), ChurchofJesusChrist.org; “Educate Your Desires, Elder Andersen Counsels” (ChurchofJesusChrist.org).

Abraham 2:10–11

Asino ti mairaman iti katulagan ni Abraham?

Idi inaramid ti Apo ti katulaganna ken ni Abraham, inkarina nga agtultuloyto daytoy a katulagan iti an-annabo ni Abraham, wenno “bukel,” ken “kas iti kaadu ti umawat iti daytoy nga Ebanghelio ket … maibilangto kadagiti bukelmo” (Abraham 2:10–11). Kayat a sawen daytoy a dagiti kari ti katulagan ti Abraham maaramat met iti Simbaan iti agdama, literalda man nga an-annabo ni Abraham wenno naadaptarda iti pamiliana babaen ti panagbuniag ken kumbersion iti ebanghelio ni Jesucristo (kitaen iti Taga Galacia 3:26–29; Doktrina ken Katulagan 132:30–32). Tapno maibilang a kas bukel ni Abraham, nasken nga agtungpal ti maysa nga indibidual kadagiti linteg ken ordinansa ti ebanghelio.

Genesis 12:1–3; 13:15–16; 15:1–6; 17:1–8, 15–22; Abraham 2:8–11

Bendisionannak ken ti pamiliak ti katulagan ni Abraham.

Gapu ta mairaman iti katulagan ni Abraham ti amin a miembro ti Simbaan, mabalin a kayatmo a bubosen ti sumagmamano nga oras iti panangutob no apay a napnuan kaipapanan daytoy a katulagan iti biagmo. Isuratmo dagiti kapanunotam maipapan kadagiti sumaganad a saludsod:

Kasano a dagiti kari a masarakan iti Abraham 2:8–11 bendisionnak ken ti pamiliak? (kitaen met iti Genesis 12:1–3; 13:15–16).

Ania ti masursurok maipapan iti katulagan ni Abraham manipud iti Genesis 15:1–6; 17:1–8, 15–22?

Ania ti mariknak a makaparegta nga aramiden a mangtulong a mangipatungpal iti kari a “mabendisionanto amin a kaamaan iti daga”? (Abraham 2:11).

Mabalinmo nga ibilang a sumagmamano kadagiti naindagaan a bendision a naikari kada Abraham ken Sara, kas iti panagtawid iti naikari a daga ken panagbalin a nagannak ti dakkel a kaputotan, addaan kadagiti agnanayon a kapadpada. Iraman dagitoy ti tawid iti celestial a pagarian (kitaen iti Doktrina ken Katulagan 132:29) ken agnanayon a panagassawa nga addaan iti agnanayon a kaputotan (kitaen iti Doktrina ken Katulagan 131:1–4; 132:20–24, 28–32). “Iti uneg templo,” insuro ni Presidente Russell M. Nelson nga “awatentayo dagiti kangrunaan a bendisiontayo, a kas iti bukel da Abraham, Isaac, ken Jacob” (“The Gathering of Scattered Israel,” Liahona, Nob. 2006, 80).

Kitaen met iti Patarus ni Joseph Smith, Genesis 15:9–12; 17:3–12 (iti Pangiwanwan iti Nasantuan a Kasuratan); Bible Dictionary, “Abraham, katulagan ni”; “Thoughts to Keep in Mind: The Covenant,” iti daytoy a resource.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Genesis 13:5–12.Ania ti inaramid ni Abraham a mangparnuay iti talna iti pamiliana? Nalabit a mabalin a sanayen dagiti miembro ti pamiliam iti panagbalin a mamagkappia kas ken ni Abraham babaen ti panangyakem no kasano ti mangrisut kadagiti susik a nalabit a rumsua iti pamiliam.

Genesis 13:16; 15:2–6; 17:15–19.Kasano a matulongam ti pamiliam a makaawat iti kari ti Apo kadagitoy a bersikulo—a nupay awan pay annak da Abraham ken Sara, agbalin ti kaputotanda a kas iti kaadu ti tapok iti daga, bituen iti langit, wenno darat iti igid ti baybay, (kitaen met iti Genesis 22:17). Nalabit a mabalinmo nga ipakita kadagiti miembro ti pamilia ti maysa a pagikkan a napunno iti darat, kumita kadagiti bituen, wenno usaren ti ladawan a nairagpin iti daytoy a balabala. Kasano a makapagtalektayo kadagiti kari ti Dios uray no kasla imposible dagitoy?

Genesis 14:18–20.Ania ti masursurotayo maipapan ken ni Melchizedek manipud iti Patarus ni Joseph Smith, Genesis 14:25–40? (iti Pangiwanwan iti Nasantuan a Kasuratan; kitaen met iti Alma 13:13–19)? Kasano a mabalintayo ti “[mangpatalinaed] iti kinalinteg” kas iti inaramid ni Melchizedek? (bersikulo 36). Ania pay maipapan iti panagministro ni Melchizedek ti mangparegta kadatayo?

Bendisionan ni Melchizedek ni Abram, ni Walter Rane

Genesis 16.Ti panagbasa maipapan ken ni Agar ket mabalin a maysa a gundaway a paglilinnawagan no kasano a tulongannatayo ti Apo no mariknatayo a nagbidduttayo. Mabalinmo nga ilawlawag a ti “Ismael” kaipapanna ti “dumngeg ti Dios.” Kaano a nariknatayo a dinengngeg ken tinulongannatayo ti Apo idi nariknatayo a nagbidduttayo? (kitaen iti Genesis 16:11).

Para kadagiti dadduma pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I Want to Live the Gospel,” Children’s Songbook,148.

Panangpadur-as iti Panangisurotayo

Agbalin a sidadaan a magun-od ken maasitgan. Sumagmamano kadagiti kapintasan a kanito tapno makaisuro ket mangrugi iti maysa a saludsod wenno pakaseknan iti puso ti maysa a miembro ti pamilia. Ipakaammom kadagiti miembro ti pamiliam babaen kadagiti balikas ken tignaymo a magagaranka a dumngeg kadakuada. (Kitaen iti Panangisuro iti Wagas ti Mangisalakan,16

Inkari ti Dios nga umadunto ti kaputotan da Abraham ken Sara “kas kadagiti bituen ti langit” (Genesis 22:17). Panangutob iti Kari ti Dios, ni Courtney Matz.