“Pebrero 14–20. Genesis 18–23: ‘Narigat kadi Unay ti Ania Man a Banag para iti Apo?”” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Pebrero 14–20. Genesis 18–23,” Umaykayo, Sumurot Kaniak—Para kadagiti Indibidual ken Pamilia: 2022
Da Sara ken Isaac, ni Scott Snow
Pebrero 14–20
Genesis 18–23
“Narigat kadi Unay ti Ania Man a Banag para iti Apo?”
Basaen ken utobem ti Genesis 18–23, ken isuratmo dagiti impresionmo. Mabalinmo nga usaren dagiti kapanunotan iti daytoy a balabala a mangtulong kenka a mangadal kadagitoy a kapitulo, ken mabalin pay a naparegtaka a mangsukisok iti dadduma pay a mensahe kadagiti nasantuan a kasuratan nga ipangpangruna ti Apo para kenka.
Isuratmo dagiti Impresionmo
Ti biag ni Abraham, a napno iti paspasamak nga agpada a makapasaem ken makaparegta, ket pakakitaan ti kinapudno a nasursuro ni Abraham iti maysa a parmata—nga addatayo iti daga tapno masubok, ta kitaen[tayo] no aramiden[tayo] amin a banag nga ibilin [kadatayo] ti Apo a Dios[tayo]” (Abraham 3:25). Napaneknekan kadi a napudno ni Abraham mismo? Ituloyna kadi ti maaddaan iti pammati iti kari ti Dios a maaddaan iti dakkel a kaputotan, uray no awan pay ti anakda ken ni Sara nga uray pay nataengandan? Ken apaman a nayanak ni Isaac, madaeran ngata ti pammati ni Abraham ti saan a mapanunot—bilin a mangisakripisio iti mismo nga anak a nangikarian ti Dios a mangipatungpal iti dayta a katulagan? Pinaneknekan a napudno ni Abraham. Nagtalek ni Abraham iti Dios, ken nagtalek ti Dios ken ni Abraham. Iti Genesis 18–23, masarakantayo dagiti estoria manipud iti biag ni Abraham ken dadduma pay a makaguyugoy kadatayo a mangpanunot maipapan iti bukodtayo a kabaelan a mamati kadagiti kari ti Dios, tapno umadayo iti kinadangkes ken saanen a sublian pay, ken tapno agtalek iti Dios iti laksid ti sakripisio.
Dagiti Kapanunotan para iti Bukod a Panagadal iti Nasantuan a Kasuratan
Ipatungpal ti Apo dagiti karina iti bukodna a panawen.
Nagaramid ti Apo kadagiti nagloriaan a kari kadagiti nalinteg, ngem no dadduma dagiti pasamak iti biagtayo ti mangigapu kadatayo tapno masdaaw no kasano a posible a maipatungpal dagita a kari. Mabalin a narikna da Abraham ken Sara ti kasdiay no dadduma. Ania ti masursurotayo manipud kadagiti padasda? Mabalin a makatulong a marugian ti panagadalmo babaen ti panangrebyu iti no ania ti inkari ti Apo ken ni Abraham iti Genesis 17:4, 15–22. Kasano ti reaksion da Abraham ken Sara? (kitaen met iti Patarus ni Joseph Smith, Genesis 17:23 [iti Genesis 17:17, footnote b]; Genesis 18:9–12). Kasano a simmungbat ti Apo a nangtulong kadakuada a maaddaan iti dakdakkel a pammati kadagiti karina? (kitaen iti Genesis 18:14).
Ania ti masarakam kadagitoy a bersikulo a mangbangon iti pammatim? Ania dagiti dadduma pay a padas—iti biagmo wenno iti biag ti maysa a tao—a nangpapigsa iti pammatim nga ipatungpalto ti Apo dagiti karina kenka iti bukodna a panawen ken wagas?
Kitaen met iti Doktrina ken Katulagan 88:68.
Bilinennatayo ti Apo nga umadayo iti kinadangkes.
Ania dagiti adalen a masursuroyo maipapan iti yaadayo iti kinadangkes bayat ti panagbasam maipapan ken ni Lot ken ti pamiliana? Kas pagarigan, ania ti makaawis ti riknam maipapan iti kinuna ken inaramid dagiti anghel a nangtulong ken ni Lot ken ti pamiliana a nakalibas iti pannakadadael? (kitaen iti Genesis 19:12–17). Kasano ti panangtulong ti Apo kenka ken ti pamiliam nga umadayo wenno mangsarak iti pannakasaluad manipud kadagiti dakes nga impluensia iti lubong?
Para iti ad-adu pay maipapan iti basbasol ti Sodom ken Gomorra, kitaen iti Ezequiel 16:49–50 ken Judas 1:7–8.
Kitaen met iti Patarus ni Joseph Smith, Genesis 19:9–15 (iti Pangiwanwan iti Nasantuan a Kasuratan).
Panaglibas iti Sodom ken Gomorra, ni Julius Schnorr von Carolsfeld
Ania ti inaramid a biddut ti asawa ni Lot?
Insuro ni Elder Jeffrey R. Holland:
“Nalawag, a ti biddut iti asawa ni Lot ket saan laeng a tumaltaliaw isuna; iti pusona tinarigagayanna ti mapan nga agsubli. Makita nga uray sakbay ti panaglabesna kadagiti beddeng ti siudad, kailiwnan no ania ti indiaya ti Sodom ken Gomorra kenkuana. … Awan ti pammatina. Nagduadua iti kabaelan ti Apo a mangted kenkuana iti maysa a banag a nasaysayaat ngem iti addan kenkuana. …
“Iti amin a tattao ti tunggal kaputotan, yawagko, ‘Laglagipenyo ti asawa ni Lot’ [Lucas 17:32]. Ti pammati ket para iti masakbayan. pammati iti napalabas ngem saan a ti kaano man nga agtarigagay nga agtalinaed sadiay. Ti pammati ket agtalek nga addaan ti Dios kadagiti naindaklan a banag a nailatang para iti tunggal maysa kadatayo ken pudno a ni Cristo ti “kangatuan a padi dagiti naimbag a bambanag nga umayto’ (Hebreo 9:11)” (“The Best Is Yet to Be,” Ensign, Ene. 2010, 24, 27).
Ti kinatallugod ni Abraham a mangisakripisio ken ni Isaac ket kaasping ti Dios ken ti Anakna.
Ditayo ammo ti amin a gapu a binilin ti Dios ni Abraham a mangidaton ken ni Isaac kas maysa a sakripisio: ammotayo a maysa a pannubok daytoy ti pammatina iti Dios (kitaen iti Genesis 22:12–19). Bayat ti panangbasam iti Genesis 22:1–19, ania ti masursurom manipud iti padas ni Abraham?
Ti kinatallugod ni Abraham a mangisakripisio iti anakna ket “kaasping ti Dios ken ti Bugbugtong nga Anakna” (Jacob 4:5). Bayat ti panangutobmo kadagiti pagpadaan iti nagbaetan ti pannubok ni Abraham ken ti panangidaton ti Dios Ama iti Anakna kas maysa a sakripisio para kadatayo, ania ti mariknam para iti Nailangitan nga Amam?
Adda met dagiti pagpapadaan iti nagbaetan ni Isaac ken ti Mangisalakan. Ibilang ti panangbasa iti Genesis 22:1–19 manen, nga agsapsapul kadagitoy a pagpapadaan.
Kitaen met iti “Akedah (The Binding)” (video), ChurchofJesusChrist.org.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Genesis 18:14.Adda kadi dagiti estoria manipud iti nasantuan a kasuratan, manipud iti pakasaritaan ti pamilia, wenno iti bukodmo a biag a maibinglaymo a nangisuro kenka nga awan ti narigat unay para iti Apo?
-
Genesis 18:16–33.Ania ti masursurotayo maipapan iti kababalin ni Abraham manipud kadagitoy a bersikulo? Kasano a masurottayo ti pagwadanna? (Kitaen met iti Alma 10:22–23.)
-
Genesis 19:15–17.Makatulong dagitoy a bersikulo kadagiti miembro ti pamiliam nga agsagana para kadagiti panawen no kasapulan nga aglibasda manipud kadagiti nadangkes a kasasaad. Ania koma ti sumagmamano a mabalin a kastoy a kasasaad? Kas pagarigan, mabalin nga addaanka iti panangilawlawag maipapan iti saan nga umno a media wenno pannulisog nga agtsismis. Kasano a makapaglibastayo manipud kadagiti kasta a kasasaad?
-
Genesis 21:9–20.Ania ti makaawis iti rikna ti pamiliam maipapan iti wagas a panangtrato ti Dios kada Agar ken Ismael kalpasan ti panangpapanaw kadakuada da Sara ken Abraham?
-
Genesis 22:1–14.Kasano a matulongam ti pamiliam a makitada ti pakainaigan ti estoria ti Dios a mangbilbilin ken ni Abraham a mangisakripisio ken ni Isaac ken ti pangsubbot a sakripisio ti Mangisalakan? Mabalinmo nga ipakita dagiti ladawan da Abraham ken Isaac ken ti Pannakailansa iti Krus (kitaen iti “Da Abraham ken Isaac,” iti Dagiti Estoria iti Daan a Tulag) idinto a paglilinnawagan dagiti miembro ti pamilia dagiti pagpapadaan a makitada iti nagbabaetan dagitoy a pasamak. Mabalinmo pay ti agkanta iti maysa a himno wenno kanta maipapan iti sakripisio ti Mangisalakan, kas iti “He Sent His Son” (Children’s Songbook, 34–35), ket sapulen dagiti ragup ti balikas a mangiladawan iti sakripisio ti Mangisalakan.
Ania ti naidawat nga isakripisiotayo kas maysa a pamilia? Kasano a nangyas-asideg kadatayo iti Dios dagitoy a sakripisio?
Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “God Loved Us, So He Sent His Son,” Hymns, no. 187.
Panangpadur-as iti Bukod a Panagadal
Dumngeg iti Espiritu. Bayat ti panagadalmo, imdengam dagiti kapanunotan ken riknam, uray no kasla awan pakainaiganna iti no ania ti basbasaem. Mabalin a dagita nga impresion ti mismo a banag a kayat ti Dios a maammuam.
Ladawan da Abraham ken Isaac, ni Jeff Ward