“Dagiti Kapanunotan a Laglagipen: Ti Katulagan,” Umaykayo, Sumurot Kaniak—Para Kadagiti Indibidual ken Pamilia: Daan a Tulag 2022 (2021)
“Dagiti Kapanunotan a Laglagipen: Ti Katulagan,” Umaykayo, Sumurot Kaniak—Para kadagiti Indibidual ken Pamilia: 2022
Dagiti Kapanunotan a Laglagipen
Ti Katulagan
Iti Intero a Daan a Tulag, masansan a mabasamto ti balikas a katulagan. Ita masansan a mapanunottayo dagiti katulagan a kas sagrado a kari iti Dios, ngem idi nagkauna a lubong, dagiti katulagan ket napateg pay a paset ti pannakipulapol dagiti tao iti tunggal maysa. Para iti panagtalged ken panagbiagda, kinasapulan dagiti tao tapno makapagtitinnalek, ken dagiti katulagan ket wagas a mangpatalged iti dayta a panagtalek.
Ngarud idi kinasarita ti Dios da Noe, Abraham, wenno Moises maipapan kadagiti katulagan, aw-awisenna ida a sumrek iti maysa a linnangen nga addaan iti panagtalek Kenkuana. Maysa kadagiti kalatakan a pagarigan ti maysa a katulagan iti Daan a Tulag ket ti inaramid ti Dios kada Abraham ken Sara—ket kalpasanna napabaro kadagiti an-annaboda a da Isaac ken Jacob (a naawagan pay iti Israel). Masansan nga awagantayo daytoy iti katulagan ni Abraham, nupay iti Daan a Tulag naam-ammo laeng daytoy a “ti katulagan.” Makitayonto a ti Daan a Tulag ket kangrunaanna a ti estoria dagiti tao a nangibilang iti bagbagida kas agtawid iti daytoy a katulagan—dagiti natulagan a tao.
Agtultuloy ti katulagan ni Abraham nga agbalin a napateg iti agdama, nangnangruna kadagiti Santo iti Ud-udina nga Aldaw. Apay? Gapu ta datayo pay dagiti natulagan a tao, direktatayo man nga an-annabo da Abraham, Isaac, ken Jacob wenno saan (kitaen iti Taga Galacia 3:27–29). Gapu iti daytoy, napateg a maawatan no ania ti katulagan ni Abraham ken no kasano a mayaplikar daytoy kadatayo iti agdama.
Ania ti Katulagan ni Abraham?
Tinarigagayan ni Abraham “nga agbalin a nain-indaklan a pasurot ti kinalinteg” (Abraham 1:2), isu nga inawis ti Dios isuna iti maysa a pannakinaig iti katulagan. Saan a ni Abraham ti immuna a naaddaan iti daytoy a tarigagay, ken saan nga isu ti immuna nga immawat iti katulagan. Dinawatna “ti bendision dagiti amma” (Abraham 1:2)—bendision a naidiaya babaen ti katulagan kada Adan ken Eva ken kalpasan dayta kadagiti nagdawat kadagitoy a bendision a sipapasnek.
Ti katulagan ti Dios ken ni Abraham nangikari kadagiti nakaskasdaaw a bendision: tawid ti daga, dakkel a kaputotan, panaggun-od kadagiti ordinansa iti priesthood, ken nagan a madayawto para kadagiti umay a kaputotan. Ngem ti pokus daytoy a katulagan saan laeng a kadagiti bendision ni Abraham ken ti pamiliana nga umawatto ngem iti pay panagbalindanto a bendision iti dadduma pay nga annak ti Dios. “Sikanto ti maysa a bendision,” impakdaar ti Dios, ken benditodanto kenka amin a kaputotan iti daga” (Genesis 12:2–3).
Nangted kadi daytoy a katulagan kada Abraham, Sara, ken dagiti an-annaboda iti addaan pribilehio a kasasaad kadagiti annak ti Dios? Iti laeng kaipapanan daytoy ket pribilehio a mangbendision iti dadduma. Ti pamilia ni Abraham isudanto ti “mangpaneknek kadaytoy a panagserbi ken Kinasaserdote iti amin a pagilian” a mangibingbinglay “kadagiti bendision ti Ebanghelio, nga isuda ti bendision ti pannakaisalakan, uray pay iti agnanayon a biag” (Abraham 2:9, 11).
Daytoy a katulagan ti bendision a tinartarigagayan ni Abraham. Kalpasan ti panangawatna iti daytoy, kinuna ni Abraham iti pusona, “Siaanus a sinapulnaka ti katulongam; ita nasarakankan” (Abraham 2:12).
Rinibribu a tawen ti naglabasen dayta, ngem naisubli ti katulagan iti aldawtayo (kitaen iti 1 Nephi 22:8–12). Ken madama a maipatpatungpalen daytoy iti biag dagiti tao ti Dios. Kinapudnona, ti pannakaipatungpal ti katulagan ket nabangonen a momentum kadagiti ud-udina nga aldaw bayat ti panagdur-as iti aramid ti Dios, a mangbembendision kadagiti pamilia iti intero a lubong. Ken asino man a, kas ken ni Abraham, nga agtarigagay nga agbalin a nain-indaklan a pasurot ti kinalinteg, asino man a sipapasnek nga agsapul iti Apo, makapagbalin a paset daytoy.
Ania ti Kaipapanan Kaniak ti Katulagan ni Abraham?
Maysaka nga anak ti katulagan. Nagaramidkayo iti katulagan iti Dios idi nabuniagankayo. Pabaruem dayta a katulagan iti tunggal kanito a makiranudka iti sakramento. Ken agaramidka kadagiti sagrado a katulagan iti templo. Sangkamaysa, dagitoy a katulagan ti mangaramid kenka a mairaman iti katulagan ni Abraham, ti pakabuklan daytoy ket masarakan kadagiti ordinansa iti templo. Kas iti insuro ni Presidente Russell M. Nelson, “Kamaudiananna, iti nasantuan a templo, makapagbalintayo a makipagtawid kadagiti bendision ti agnanayon a pamilia, kas iti naminsan a naikari kada Abraham, Isaac, Jacob, ken iti an-annaboda.”1
Babaen kadagitoy a katulagan ken ordinansa, agbalintayo a tattao ti Dios (kitaen iti Exodo 6:7; Deuteronomio 7:6; 26:18; Ezequiel 11:20). Agbalintayo a naidumduma manipud ti lubong iti aglawlawtayo. Dagiti katulagan ti mangaramid a posible iti panagbalintayo a napudno, nagkumit a disipulo ni Jesucristo. “Dagiti katulagantayo,” inlawlawag ni Presidente Nelson, “mangbegkes kadatayo Kenkuana ken mangted kadatayo iti nadiosan a bileg.”2 Ken no bendisionan ti Dios dagiti taona iti bilegna, buyogan daytoy ti awis ken namnama a bendisionandanto dagiti dadduma—tapno isudanto “ti bendision” iti “amin a kaamaan iti daga” (Abraham 2:9, 11).
Daytoy ti napateg a pannakaawat a naited kadatayo gapu iti Pannakaisubli ti katulagan ni Abraham babaen ken ni Propeta Joseph Smith. Isu a no mabasam maipapan kadagiti katulagan iti Daan a Tulag, saanmo a panunoten laeng maipapan iti pakainaigan ti Dios kada Abraham, Isaac, ken Jacob. Panunotem met maipapan iti pakainaiganna kenka. No mabasam maipapan iti kari dagiti adu a kaputotan (kitaen iti Genesis 28:14), saanmo laeng panunoten maipapan kadagiti minilion nga awaganda ita ni Abraham nga amada. Panunotem met maipapan iti kari ti Dios kenka maipapan kadagiti agnanayon a pamilia ken agnanayon a panagadu (kitaen iti Doktrina ken Katulagan 131:1–4; 132:20–24). No mabasam maipapan iti kari ti maysa a tawid a daga, saanmo laeng a panunoten maipapan iti daga a naikari ken ni Abraham. Panunotem met maipapan iti celestial a pagtungpalan ti daga a mismo—tawid a naikari kadagiti “naemma” nga “agpannuray ken Jehova” (Mateo 5:5; Salmo 37:9, 11; kitaen met iti Doktrina Ken Katulagan 88:17–20). Ken no mabasam maipapan iti kari a bendisionanto dagiti natulagan a tao ti Dios “amin a pamilia ti daga” (Abraham 2:11), saanmo a panunoten laeng maipapan iti panagministro ni Abraham wenno dagiti propeta a bimmaba manipud kenkuana. Panunotem met no ania ti maaramidmo—kas natulagan a pasurot ni Jesucristo—tapno agbalinka a bendision iti amin a pamilia iti aglawlawmo.