“Enero 31–Pebrero 6. Genesis 6–11; Moises 8: ‘Nasarakan ni Noe ti Parabur kadagiti Mata ni Jehova’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Enero 31–Pebrero 6. Genesis 6–11; Moises 8,” Umaykayo, Sumurot Kaniak—Para kadagiti Indibidual ken Pamilia: 2022
Ladawan ni Noe a pumampanaw iti daong, ni Sam Lawlor
Enero 31–Pebrero 6
Genesis 6–11; Moises 8
“Nasarakan ni Noe ti Parabur kadagiti Mata ni Jehova”
Masansan a makaisuro kadatayo dagiti nasantuan a kasuratan iti adu a naespirituan nga adalen. Bayat ti panagbasa iti Dakkel a Layus ken ti Torre ti Babel, agdawat iti pammaregta no kasano a mayaplikar kenka dagitoy a pakaammuan.
Isuratmo dagiti Impresionmo
Pinaregta ti estoria ni Noe ken ti Layus dagiti kaputotan dagiti agbasbasa iti Biblia. Ngem addaantayo nga agbibiag kadagiti ud-udina nga aldaw iti naisangsangayan a gapu a mangipangag iti daytoy. Idi insuro ni Jesucristo no kasano ti nasken a panangsiputtayo iti Maikadua a Yaayna, kinunana, “Kas kadagidi aldaw ni Noe, kastanto met iti yaay ti Anak ti Tao” (Joseph Smith—Mateo 1:41). Mainayon pay, dagiti ragup ti balikas a mangiladawan iti aldaw ni Noe, kas iti “dakes” ken “napno iti kinaranggas,” ket kas kalaka a mangiladladawan iti panawentayo (Genesis 6:12–13; Moises 8:28). Ti estoria ti Torre ti Babel ket marikna pay a kasla adda pakainaiganna iti aldawtayo, addaan iti panangiladawan ti kinapalangguad kalpasan ti pannakatikaw ken pannakabingay kadagiti annak ti Dios.
Napateg dagiti nagkauna a pakaammuan saan laeng a gapu ta ipakitada kadatayo a maulit ti kinadangkes mismo iti intero a pakasaritaan. Napatpateg pay, isuroda kadatayo no ania ti aramiden maipapan iti daytoy. “Nakasarak iti parabur iti imatang ti Apo” ni Noe (Moises 8:27) iti laksid ti kinadangkes iti aglawlawna. Ket dagiti pamilia ni Jared ken ti kabsatna immasidegda iti Apo ken nayadayoda manipud iti kinadangkes iti Babel (kitaen iti Ether 1:33–43). No masdaawtayo no kasano a pagtalinaeden a natalged ti bagitayo ken dagiti pamiliatayo iti bukodtayo a panawen ti kurapsion ken kinaranggas, adu ti maisuro kadatayo dagiti pamiliar nga estoria kadagitoy a kapitulo.
Dagiti Kapanunotan para iti Bukod a Panagadal iti Nasantuan a Kasuratan
Adda naespirituan a kinatalged iti panangsurot iti propeta ti Apo.
Agyamantayo iti naisubli nga ebanghelio, ad-adu pay ti naammuantayo maipapan ken ni Noe ngem iti masarakan iti Daan a Tulag. Ipalgak ti naparegta a patarus ni Joseph Smith iti Genesis 6, a masarakan iti Moises 8, a ni Noe ti maysa kadagiti naindaklan a propeta ti Dios. Naordenan ken naibaon a mangikasaba iti ebanghelio ni Jesucristo, nakipagna ken nakisarita iti Dios, ken napili a mangipasdek manen kadagiti annak ti Dios iti daga kalpasan ti Layus (kitaen met iti Teachings of Presidents of the Church: Joseph Smith [2007], 104, 201). Ania ti masursurotayo maipapan kadagiti propeta manipud kadagiti padas ni Noe?
Bayat ti panangbasam maipapan iti aldaw ni Noe, mabalin a madlawmo dagiti pagpapadaan iti aldawtayo. Kas pagarigan:
-
Moises 8:18, 20–21, 23–24 (saan a panangawat kadagiti katulongan ti Dios)
-
Moises 8:21 (pannakapnek ken kinainlubongan)
-
Moises 8:22 (dagiti dakes nga arapaap ken pampanunot)
-
Moises 8:28 (korapsion ken kinaranggas)
Ania dagiti isursuro dagiti propeta ita maipapan iti ebanghelio ni Jesucristo a mabalin a mangpatalged kenka iti agdama a lubong? Bayat ti panangbasam maipapan kadagiti padas ni Noe, ania ti mangparegta kenka a mangsurot kadagiti propeta ti Apo iti agdama?
Kitaen met iti Mosiah 13:33; Doktrina ken Katulagan 21:4–7.
Dagiti pagilasinan ken simbolo ti mangtulong kadatayo a manglagip kadagiti katulagantayo iti Apo.
Mabalin nga ibagi ti maysa a tanda, simbolo wenno “pagilasinan” dagiti katulagan iti ebanghelio (Genesis 9:12). Kas pagarigan, panunotem no kasano a ti tinapay ken danum ti sakramento wenno dagiti danum ti panagbuniag ket mangipalagip kadagiti sagrado a kinapudno a mainaig kadagiti katulagantayo. Segun iti Genesis 9:8–17, ania ti mabalin a ipalagip ti bullalayaw kenka? Ania ti inayon iti pannakaawatmo ti Patarus ni Joseph Smith, Genesis 9:21–25 (iti Pangiwanwan iti Nasantuan a Kasuratan)? Apay a kayat ti Apo a manglaglagipka Kenkuana ken dagiti katulagan nga inaramidmo?
Kitaen met iti Gerrit W. Gong, “Always Remember Him,” Liahona, Mayo 2016, 108–11.
Ti laeng wagas a makadanon iti langit ket ti panangsurot ken ni Jesucristo.
Ti nagkauna a Babel, wenno Babylon, ket nabayagen a nausar kas simbolo ti kinadangkes ken kinainlubongan (kitaen iti Apocalipsis 18:1–10; Doktrina ken Katulagan 133:14). Bayat ti panagadalmo iti Genesis 11:1–9, utobem dagiti nalawag a pannakaammo ken pannakaawat nga inted ni propeta Mormon, a nangisurat a ni Satanas “ti nangimula iti puspuso dagiti tao a mangbangon iti torre a naan-anay ti kangatona a dumanon iti langit” (Helaman 6:28; kitaen met kadagiti bersikulo 26–27). Ania dagiti ballaag nga adda para kenka ti estoria ti Torre ti Babel?
Kitaen met iti Salmo 127:1.
Ladawan ti Torre ti Babel, ni David Green
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Genesis 6–8.Kasano ti panangusarmo ti estoria ti daong ni Noe a mangisuro iti pamiliam no kasano a mapagtalinaedtayo a naespirituan a natalged ti panangsurot iti propeta? (kitaen iti “Ni Noe ken ti Pamiliana,” iti Dagiti Estoria iti Daan a Tulag). Nalabit a makapagtitinnulong ti pamiliam a mangaramid iti simple nga ay-ayam a bilog manipud iti papel wenno bloke. Bayat ti panagbasam iti Genesis 6–7, mabalinmo a pagdasigen ti kinatalged nga ited ti bilog ken ti kinatalged a masarakantayo iti panangsurot iti propeta. Mabalin a kayatmo nga ilawlawag ti kaudian a balakad manipud iti propeta ket isurat dagiti balikasna iti bilogmo.
Ania pay ti inted ti Dios kadatayo a mabalin a maidasig iti daong a nangisalakan iti pamilia ni Noe? Isingasing dagitoy a resources ti sumagmamano a sungbat, nupay adu ti dadduma pay: 2 Nephi 9:7–13; Doktrina ken Katulagan 115:5–6; ken ti mensahe ni Presidente Russell M. Nelson “Becoming Exemplary Latter-day Saints” (Liahona, Nob. 2018, 113–14).
-
Moises 8:17.Ania ti kayat a sawen ti “katakunaynay[tayo]” ti Espiritu ti Apo? (kitaen iti 1 Nephi 7:14; Doktrina ken Katulagan 1:33). Kaano a napadasantayon ti Espiritu a makitakunaynay kadatayo?
-
Genesis 9:8–17.Mabalin a kaay-ayo dagiti babassit nga ubbing ti agdrowing wenno agkolor iti bullalayaw bayat ti panagsaritam maipapan iti no ania ti ibagianna (kitaen met iti Patarus ni Joseph Smith, Genesis 9:21–25 [iti Pangiwanwan iti Nasantuan a Kasuratan]). Mabalinmo pay nga ilawlawag dagiti banag a mangtulong kadatayo a manglagip kadagiti katulagantayo, kas iti sakramento, a tumulong kadatayo a manglagip iti katulagan ti panagbuniag a sumurot ken ni Jesucristo (kitaen iti Doktrina ken Katulagan 20:75–79).
-
Genesis 11:1–9.Mabalin a makatulong no basaen ti Ether 1:33–43 bayat ti panagadal ti pamiliam iti Genesis 11 ken masursuro maipapan iti Torre ti Babel. Ania ti masursurotayo manipud kadagiti pamilia ni Jared ken ti kabsatna a makatulong iti pamiliatayo a mangsarak iti naespirituan a talged iti baet ti kinadangkes iti lubong? Ania dagiti mainayon nga adalen a masursurotayo manipud ken ni Noe ken ti pamiliana bayat ti panangsangoda iti kasta met la a karit? (kitaen iti Moises 8:13, 16–30).
Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Follow the Prophet,” Children’s Songbook, 110–11, (bersikulo 3).
Panangpadur-as iti Bukod a Panagadal
Ibinglaymo dagiti nalawag a pannakaammo ken pannakaawatmo. No ibinglaymo no ania ti masursurom manipud kadagiti nasantuan a kasuratan, saanka laeng a mangbendision iti dadduma no di pay ketdi mangpauneg iti bukodmo a pannakaawat. Ania ti mariknam a makaparegta nga ibinglay manipud kadagiti nasantuan a kasuratan iti pamiliam, gagayyemmo, wenno miembro ti ward?
Panangiladawan iti daong ni Noe, ni Adam Klint Day