“Pebrero 14–20. Genesis18–23: ‘Adda Kadi Ania Man a Banag a Narigat Unay para iti Apo?’” Umaykayo, Sumurot Kaniak—Para iti Primary: Daan a Tulag 2022 (2021)
“Pebrero 14–20. Genesis 18–24,” Umaykayo, Sumurot Kaniak—Para iti Primary: 2022
Da Sara ken Isaac, ni Scott Snow
Pebrero 14–20
Genesis 18–23
“Adda Kadi Ania Man a Banag a Narigat Unay para iti Apo?”
Bayat ti panagkalikagummo a mangipaay kadagiti kasapulan dagiti ubbing a sursuruam, ibilangmo dagiti kapanunotan para kadagiti in-inauna ken in-inaudi nga ubbing iti daytoy a balabala.
Isuratmo dagiti Impresionmo
Yawis ti Panagbibinninglay
Tapno matulongan dagiti ubbing a mangibinglay no ania ti ammodan maipapan iti Genesis 18–23, ipakita dagiti ladawan ti maysa wenno ad-adu pay a pasamak manipud kadagitoy a kapitulo, ken kiddawen kadagiti ubbing a mangibinglay iti ania man a banag a malagipda maipapan iti estoria.
Isuro ti Doktrina: In-inaudi nga Ubbing
Makapagtalekak iti Dios a tungpalenna dagiti karina.
Nupay inkari ti Dios kada Sara ken Abraham a maaddaanto iti maysa nga anak a lalaki, bayat ti panagbaket ken panaglakayda, kasla dinto maipatungpalen dayta a kari. Kasano a mausarmo daytoy nga estoria a mangtulong kadagiti ubbing a maaddaan iti pammati a kanayon a tungpalen ti Dios dagiti karina?
Dagiti Mabalin nga Aktibidad
-
Gupgopem dagiti kari ti Dios kada Abraham ken Sara a maaddaandanto iti maysa nga anak ken ti pannakaipatungpal daytoy a kari (kitaen iti Genesis 17:15–19; 18:9–14; 21:1–7). Wenno awisem ti maysa nga agassawa iti ward nga agkawesda a kas Abraham ken Sara ken isaritam ti pakasaritaanda. Tulongam dagiti ubbing a makaawat a lakay ken baket unayen da Abraham ken Sara tapno maaddaanda kadagiti annak. Damagem kadakuada ti saludsod manipud iti Genesis 18:14, “Narigat kadi unay ti ania man a banag para iti Apo?” Paneknekam a maipatungpal ti Apo dagiti karina, uray no kasla imposibleda.
-
Agaramid iti maysa a kari kadagiti ubbing nga ipatungpalmonto iti gibus ti klase (kas pagarigan, ipalubosmonto a koloranda ti maysa a ladawan). Iti unos ti klase, ipalagip kadakuada ti karim, ket kalpasanna ipatungpal daytoy. Ilawlawag a kanayon a tungpalen ti Apo dagiti karina.
-
Idawat kadagiti ubbing a mangibinglayda iti maysa a panawen a nasken nga agurayda iti maysa a banag a pudno a tinarigagayanda. Agkansion a kaduam dagiti ubbing iti maysa a kanta a mangipaneknek kadagiti kari ti Dios, kas iti “Keep the Commandments” (Children’s Songbook, 146–47). Tulongam dagiti ubbing a mangilasin kadagiti banag nga inkari ti Dios kadatayo no napudnotayo.
-
Ipakitam ti maysa a ladawan ti maysa a panagbuniag wenno ti sakramento (kitaen iti Libro ti Arte ti Ebanghelio, dagiti num. 103, 104, 107, 108). Tulongam dagiti ubbing a mangsursuro maipapan kadagiti inaramidtayo a kari iti Dios, ken no ania dagiti inkari ti Dios a supapakna, idi nabuniagan ken umawattayo iti sakramento. (Kitaen iti Napudno iti Pammati, 23–25.)
Nagtungpal ni Abraham iti Apo.
Narigat unay idi para ken ni Abraham a tungpalen ti bilin a mangisakripisio iti anakna. Utobem no kasano a maitutop a mausarmo daytoy nga estoria a pangallukoy kadagiti ubbing nga agtungpal iti Dios uray no narigat wenno saan a naan-anay ti ammoda kadagiti gapu iti bilbilinna.
Dagiti Mabalin nga Aktibidad
-
Ipakitam ti maysa a ladawan da Abraham ken Isaac (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket usarem daytoy a mangisarita iti estoria da Abraham ken Isaac (kitaen met iti “Abraham and Isaac,” iti Dagiti Estoria iti Daan a Tulag). Ipakitam ti maysa a ladawan ni Jesucristo, ken isaritam kadagiti ubbing maipapan no kasano a maipalagipda kadatayo ti estoria da Abraham ken Isaac mapapan iti sakripisio nga inaramid ti Nailangitan nga Ama ken ni Jesucristo kadatayo.
-
Agay-ayam iti maysa a simple nga ay-ayam a mangidawat kadagiti ubbing a mangsurot kadagiti direksion. Kas pagarigan, mabalin a mangiturong dagiti direksion iti maysa a ladawan ti Mangisalakan a nailemmeng iti siled ti klase. Ania dagiti sumagmamano a banag a kiniddaw ti Nailangitan nga Ama nga aramidentayo? Tulongam dagiti ubbing a makaawat a ti panagtungpal kadagiti bilinna ti makatulongto kadatayo nga agsubli a makipagnaed manen Kenkuana ken ni Jesucristo.
Isuro ti Doktrina: In-inauna nga Ubbing
Ipatungpal ti Apo dagiti karina, uray no kasla imposibleda.
Naibaga kada Abraham ken Sara a maaddaandanto iti maysa nga anak a lalaki, ngem kasla imposible daytoy—100 ti tawen ni Abraham idi, ken 90 ti tawen ni Sara (kitaen iti Genesis 17:17). Tinungpal ti Dios ti karina, ket makatulong daytoy nga estoria kadagiti ubbing a sursuruam a mangpatibker ti pammatida kadagiti kari ti Dios kadakuada.
Dagiti Mabalin nga Aktibidad
-
Isurat ti tunggal balikas manipud ti umuna a binatog ti Genesis 18:14 iti maysa a naisina a papel, ket mangted iti maysa iti tunggal ubing. Kalpasanna kiddawem kadagiti ubbing a mangurnos kadagitoy a balikas. Basaem ti Genesis 18:9–14; 21:1–7 kadagiti ubbing a mangsarak iti maysa a pagarigan manipud iti biag da Sara ken Abraham idi nagaramid ti Apo iti maysa a banag a kasla imposible. Ania ti masursurotayo manipud iti padas da Sara ken Abraham a makaallukoy kadatayo nga agtalek kadagiti kari ti Dios?
-
Ipakitam dagiti ladawan dagiti estoria iti nasantuan a kasuratan a nagaramid ti Dios iti sumagmamano a banag a kasla saan a sigurado wenno narigat (kas pagarigan, kitaen iti Libro ti Arte ti Ebanghelio, dagiti num. 7, 8, 25, 26). Kiddawem kadagiti ubbing nga ibinglayda no ania ti ammoda maipapan kadagiti pasamak a nailadawan kadagitoy a ladawan, ken tulongam ida a makita no kasano a naipatungpal ti Apo dagiti karina iti tunggal gundaway. Ibinglaymo no kasano a tinungpal ti Apo dagiti karina iti biagmo wenno iti biag dagiti tao nga am-ammom (para iti sumagmamano a pagarigan dagiti kari ti Apo, kitaen iti Malakias 3:10; Juan 14:26–27; Doktrina ken Katulagan 89:18–21). Paibinglaymo kadagiti ubbing dagiti maipada a pagarigan nga ammoda.
Maadaywak ti kinadangkes.
Ti pakaammuan ni Lot ken ti pamiliana a pimmanaw iti maysa a nadangkes a siudad ket makaparegta kadagiti ubbing a sursuruam nga umadayo kadagiti dakes nga impluensia iti biagda.
Umad-adayo iti Sodoma ken Gomorra, ni Julius Schnorr von Carolsfeld
Dagiti Mabalin nga Aktibidad
-
Gupgopem ti Genesis 19:15–26 babaen ti panangilawlawag a nagbiag ti pamilia ni Lot iti maysa a nakadangdangkes a siudad, ket binallaagan ida dagiti anghel a pumanaw. Aggigiddan a basaenyo dagiti bersikulo 15–17, 26, ket tulongam dagiti ubbing a mangpanunot no ania ti mabalin a kayat a sawen kadakuada iti agdama ti “agtalaw” iti dakes ken “dika taliawen ti likudam” (bersikulo 17).
-
I-display ti maysa a ladawan iti Mangisalakan, ket kiddawem kadagiti ubbing nga umasideg iti maysa nga addang bayat iti panangibinglayda ti maysa a banag a mabalinda nga aramiden tapno umadayo iti kinadakes ken umas-asideg ken ni Cristo.
-
Ilawlawag ti sumagmamano a situasion a mabalin a pangawisan iti maysa a gayyem kadagiti ubbing nga agaramid iti maysa a banag nga ammoda a saan a rumbeng. Kasano a “panawan[tayo]” dagitoy a situasion? Ania koma ti mabalin nga ibagatayo iti gayyemtayo?
Imbaon ti Nailangitan nga Ama ti Anakna, a nangisakripisio iti Bagina para kadatayo.
Bayat ti panangisurom maipapan iti kinatallugod ni Abraham a mangisakripisio ken ni Isaac, agbalinka koma a managrikna iti marikrikna dagiti ubbing. Usarem daytoy nga estoria a mangtulong kadagiti ubbing tapno mapatibker ti panagayat ken panagyamanda iti sakripisio ti Mangisalakan.
Dagiti Mabalin nga Aktibidad
-
Tapno matulongan dagiti ubbing a mangsursuro iti estoria iti Genesis 22:1–14, ibasam dagiti bersikulo kadakuada, ket awisem ida a mangidrowing kadagiti ladawan ti no ania ti basbasaem. Apay a narigat a tungpalen ni Abraham ti bilin ti Apo a mangisakripisio ni Isaac? Ania ti masursurotayo manipud ken ni Abraham iti daytoy a estoria?
-
Agusar kadagiti ladawan da Abraham ken Isaac ken ti Pannakailansa iti krus (kitaen iti Libro ti Arte ti Ebanghelio, dagiti num. 9, 57) nga idasig iti estoria iti Genesis 22 iti sakripisio ti Mangisalakan (kitaen iti Mateo 27:26–37). Ania ti masursurotayo maipapan iti Nailangitan nga Ama ken ni Jesucristo manipud kadagiti pakaammuan da Abraham ken Isaac ken ti Pannakailansa iti krus?
-
Ipabuya ti video “For God So Loved the World” (ChurchofJesusChrist.org), wenno agkansion nga aggigiddan iti maysa a kanta maipapan iti sakripisio ti Mangisalakan, kas iti “He Sent His Son” (Children’s Songbook, 34–35). Awisem dagiti ubbing nga agsao maipanggep iti no kasano nga ipakita ti sakripisio ni Jesus ti panagayat ti Nailangitan nga Ama kadatayo.
Yallukoy ti Panagsursuro iti Pagtaengan
Awisem dagiti ubbing nga ibinglayda kadagiti pamiliada maipapan iti maysa a panawen idi binendisionan ti Dios ida idi nagtungpalda iti maysa kadagiti bilinna.
Panangpadur-as iti Panangisurotayo
Yallukoy ti panagraem. Kas kasapulan bayat ti klase, mabalinmo nga ipalagip kadagiti ubbing iti panagbalin a managraem. Mabalin nga aramidem daytoy babaen iti naulimek a panagdaydayyeng iti maysa a kanta wenno panangipakita iti maysa a ladawan ni Jesus.