Ladawan ni Jose ti Egipto, ni Robert T. Barrett

Marso 14–20

Genesis 42–50

“Pinagagem ti Dios a Naimbag”

Ti panagbasa kadagiti nasantuan a kasuratan ket mangyawis iti Espiritu. Dumngeg kadagiti pannignayna bayat ti panagbasam, uray no kasla saanda a direkta a mainaig iti basbasaem.

Isuratmo dagiti Impresionmo

Agarup 22 a tawen ti naglabasen manipud pay idi inlako dagiti kakabsatna ni Jose iti Egipto. Nagsagaba iti adu a pannubok, agraman iti biddut a pannakapabasol ken pannakaibaludna. Idi nakitana manen dagiti kakabsatna iti kamaudianan, ni Jose ti gobernador iti intero nga Egipto, maikadua laeng iti saad ti faraon. Mabalin a nalaka kenkuana ti agibales kadakuada, no panunoten ti inaramidda ken ni Jose, a mabalin a kasla saan a maawatan. Ngem pinakawan ni Jose dagiti kakabsatna. Saan laeng a dayta, ngem tinulonganna pay ida a mangkita iti nadiosan a panggep iti panagsagabana. “Pinagagem ti Dios a naimbag” (Genesis 50:20), imbagana kadakuada, gapu ta daytoy ti nangikabil kenkuana iti saad tapno isalakanna ti “amin dagiti sangakabbalayan ti amana” (Genesis 47:12) manipud iti panagbisin.

Iti adu a wagas, maipada ti biag ni Jose iti biag ni Jesucristo. Nupay dagiti basoltayo ti nangigapu Kenkuana iti nalaus a panagsagabana, indiaya ti Mangisalakan ti pannakapakawan, a mangisalsalakan iti amin kadatayo manipud iti pagbanagan a nakarkaro nga amang ngem iti panagbisin. Naskentayo man nga awaten ti pannakapakawan wenno ibaybayag pay daytoy—iti maysa a punto kasapulantayo amin nga aramiden nga agpada—ti pagwadan ti Jose ti mangyasideg kadatayo iti Mangisalakan, ti pudno a pagtaudan ti pannakapaimbag ken pannakitunos.

Dagiti Kapanunotan para iti Bukod a Panagadal iti Nasantuan a Kasuratan

Genesis 45:1–8; 50:20

“Ti Dios imbaonnak nga immuna kadakayo tapno aywanankayo.”

Bayat ti panangbasam ti maipapan ken Jose, nadlawmo kadi dagiti ania man a pagpapadaan iti nagbaetan ti estoriana ken ti pangsubbot a mision ni Jesucristo? Mabalinmo nga utoben no kasano a maipada ti akem ni Jose iti pamiliana iti akem ti Mangisalakan iti pamilia ti Dios. Ania dagiti pagpapadaan a makitam iti nagbaetan dagiti padas ni Jose ken ti mision ti Mangisalakan, a naibaon “tapno ispalenna[tayo] babaen ti dakkel a salakan”? (Genesis 45:7).

Genesis 45; 50:15–21

Ti pammakawan ti mangyeg iti pannakapaimbag.

Ti panangbasa maipapan iti panangpakawan ni Jose kadagiti kakabsatna gapu kadagiti naulpit a banag nga inaramidda kenkuana ket mabalin a mangguyugoy kenka a mangpanunot iti maysa a tao nga agdama nga ikarkarigatam a pakawanen. Wenno nalabit a narigat a pannubok ti panangpakawan ti adda iti masakbayam. Iti ania man a wagas, makatulong daytoy a mangutob no apay a kinabaelan ni Jose ti mamakawan. Ania dagiti pamugtuan maipapan iti kababalin ken galad ni Jose a masarakam iti Genesis 45; 50:15–21? Kasano a mabalin a nakaimpluensia kenkuana dagiti padasna tapno agbalin nga ad-adda a mamakawan? Ania ti isingasing ti pagwadan ni Jose maipapan iti no kasano a makapagbalinka nga ad-adda a mamakawan babaen iti tulong ti Mangisalakan?

Kitaen pay dagiti bendision a simmangbay iti pamilia ni Jose gapu iti pammakawanna. Ania dagiti bendision a nakitamon manipud iti pammakawan? Mariknam kadi a naparegtaka a mangtulong iti maysa a tao a nagbiddut kenka?

Kitaen met iti Genesis 33:1–4; Doktrina ken Katulagan 64:9–11; Larry J. Echo Hawk, “Even as Christ Forgives You, So Also Do Ye,” Liahona, Mayo 2018, 15–16.

Genesis 49

Ania ti kaipapanan ti simbolismo kadagiti bendision ni Jacob?

Naglaon dagiti bendision ni Jacob iti kaputotanna iti nalawag a pannakailadawan, ngem mabalin a marigatan a maawatan dagitoy ti sumagmamano nga agbasbasa. Napnuan iti panagyaman, nangted kadatayo ti naisubli nga ebanghelio iti sumagmamano a nayon a pannakaawat. No basaem ti bendision ken ni Jose iti Genesis 49:22–26, basaem met dagiti sumaganad a bersikulo, ket kitaem no ania dagiti nalawag a pannakaammo ken pannakaawat nga ipaayda: 1 Nephi 15:12; 2 Nephi 3:4–5; Jacob 2:25; Doktrina ken Katulagan 50:44.

Bayat ti panangbasam maipapan iti bendision ni Juda iti Genesis 49:8–12, laglagipem nga an-annabo ni Juda nga agpada da Ari David ken Jesucristo. Ania dagiti balikas ken ragup ti balikas kadagitoy a bersikulo ti mangipalagip kenka maipapan iti Mangisalakan? No adalem ti bendision ni Juda, mabalin a makatulong a basaen pay ti Apocalipsis 5:5–6, 9; 1 Nephi 15:14–15; Doktrina ken Katulagan 45:59; 133:46–50.

No kayatmo a sursuruen ti ad-adu pay maipapan kadagiti annak ni Jacob ken dagiti tribu ti Israel a nagtaud manipud kadakuada, adda maysa a serrek para iti tunggal maysa iti Pangiwanwan iti Nasantuan a Kasuratan (scriptures.ChurchofJesusChrist.org).

Genesis 50:24–25; Patarus ni Joseph Smith, Genesis 50:24–38 (iti Pangiwanwan iti Nasantuan a Kasuratan)

“Maysa a mammadto ti pataudento ti Apo a Diosko.”

Babaen kadagiti tagainep ni Jose (kitaen iti Genesis 37:5–11) ken dagiti kayuloganna iti dadduma pay a tagainep dagiti dadduma (kitaen iti Genesis 40–41), impalgak pay ti Apo dagiti banag a mapasamakto kadagiti aldaw wenno tawen iti masakbayan. Ngem impalgak pay ti Apo ken ni Jose no anianto ti mapasamak kadagiti umay a siglo. Kangrunaanna, naammuanna maipapan kadagiti naimpadtuan a mision da Moises ken Joseph Smith. Bayat ti panangbasam kadagiti balikas ni Joseph iti Genesis 50:24–25 ken iti Patarus ni Joseph Smith, Genesis 50:24–38 (iti Pangiwanwan iti Nasantuan a Kasuratan), saludsodem iti bagim no kasano a ti pannakaammo kadagitoy a banag ti mabalin a nangbendision ken ni Jose ken dagiti annak ti Israel. Apay iti panangkunam a napateg nga insubli ti Apo daytoy a pammadto babaen ken ni Joseph Smith? (kitaen met iti 2 Nephi 3).

Kasano nga impatungpal ni Joseph Smith dagiti pammadto iti Patarus ni Joseph Smith, Genesis 50: 27–28, 30–33? (kitaen iti Doktrina ken Katulagan 1:17–23; 20:7–12; 39:11; 135:3).

Ladawan ni Jose ti Egipto, ni Paul Mann

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Genesis 42–46.Nalabit a magustuan ti pamiliam ti panangyakem iti estoria ni Jose iti pannakikaduana manen kadagiti kakabsatna. Ti (“Ni Jose ken ti Panagbisin,” iti Dagiti Estoria iti Daan a Tulag ket mabalin a makatulong.) Maragsakankayo iti daytoy—agusar kadagiti costume ken props no kayatyo. Allukoyem dagiti miembro ti pamilia a mangpadas a makaawat kadagiti emosion ken pannirigan dagiti agak-akem. Mabalinmo ti agpokus nangnangruna iti rikna ni Jose kadagiti kakabsatna ken iti no kasano ti mabalin a nariknada idi pinakawanna ida. Makaiturong daytoy iti panaglilinnawag maipapan no kasano a makabendision iti pamiliayo ti panangpakawan.

Idi makita manen ni Jose dagiti kakabsatna kalpasan ti adu a tawen, kasano ti panangipakitada a nagbalbaliwdan manipud pay idi naudi a nakitana ida? Ania ti masursurotayo maipapan iti panagbabawi manipud kadagiti padasda?

Genesis 45:3–11; 50:19–21.Nabigbig ni Jose a nupay narigat ti padasna iti Egipto, “pinagagem ti Dios a naimbag” (Genesis 50:20). Nakapadas kadin ti pamiliayo kadagiti ania man a pannubok a pinagbalin ti Dios a bendision?

Ti maysa a himno maipapan iti kinaimbag ti Dios iti panawen ti pannubok (kas iti “How Firm a Foundation” [Hymns, num. 85]) ti mabalin a mangpapintas iti daytoy a panaglilinnawag. Ania dagiti detalye manipud kadagiti padas ni Jose ti mangipagwadan no ania ti isuro ti himno?

Genesis 49:9–11, 24–25.Ania ti masarakam kadagitoy a bersikulo a mangisuro kadatayo maipapan kadagiti akem ken mision ni Jesucristo? (Para iti tulong iti pannakaawat kadagiti ragup ti balikas kadagitoy a bersikulo, kitaen iti material maipapan iti Genesis 49 iti “Dagiti Kapanunotan para iti Bukod a Panagadal iti Nasantuan a Kasuratan.”)

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “How Firm a Foundation,” Hymns, no. 85.

Panangpadur-as iti Panangisurotayo

Usarem ti musika. Tulongam dagiti miembro ti pamilia a mangsapul kadagiti kinapudno iti ebanghelio kadagiti balikas [lyrics] ti himno ken kanta iti Primary. Agsapul kadagiti wagas tapno maaramid ti sagrado a musika a regular a paset ti panagadalmo iti ebanghelio.

Ni Jacob a Mangbembendision kadagiti Annakna a Lallaki, ni Harry Anderson