“Marso 14–20. Genesis 42–50: ‘Pinanagem ti Dios a Naimbag” Umaykayo, Sumurot Kaniak—Para iti Primary: Daan a Tulag 2022 (2021)
“Marso 14–20. Genesis 42–50,” Umaykayo, Sumurot Kaniak—Para iti Primary: 2022
Pannakailadawan ni Jose ti Egipto, ni Robert T. Barret
Marso 14–20
Genesis 42–50
“Pinanagem ti Dios a Naimbag”
Napateg a maammuam dagiti nasantuan a kasuratan nga isursurom, ngem napateg met a maammuam dagiti ubbing a sursuruam. Maaddaan iti oras a mangutob ken mangikararag maipapan kadakuada nga agpadpada.
Isuratmo dagiti Impresionmo
Yawis ti Panagbibinninglay
Gapu ta ti estoria iti Genesis 42–50 ti tuloy ti estoria iti adalen iti maudi a lawas, manipud iti Genesis 37–41, maaddaan iti oras iti rugi ti klase tapno maibinglay dagiti ubbing ti no ania ti malagipda maipapan ken ni Jose, agraman ti nasursuroda iti Primary ken iti pagtaengan.
Isuro ti Doktrina: In-inaudi nga Ubbing
Maipakitak ti panagayatko iti pamiliak.
Para kadagiti in-inaudi nga ubbing, mabalin a kayatmo a yunay-unay dagiti paset daytoy nga estoria a nangipakitaan ni Jose iti ayatna iti pamiliana.
Dagiti Mabalin nga Aktibidad
-
Iti panangusar iti “Ni Jose ken ti Panagbisin” (iti Dagiti Estoria iti Daan a Tulag) wenno dagiti ladawan iti Umaykayo, Sumurot Kaniak—Para kadagiti Indibidual ken Pamilai, ibagam kadagiti ubbing maipapan iti pannakipagkita manen ni Jose kadagiti kakabsatna a lallaki. Yunay-unay no kasano nga impakita ni Jose ti ayat para kadagiti kakabsatna.
-
Basaem dagiti ragup ti balikas manipud iti Genesis 45:4–15 a mangiladawan kadagiti banag nga inaramid ni Jose tapno maipakitana ti ayatna iti pamiliana. Awisem dagiti ubbing nga agpammarang nga ar-aramidenda no ania ti iladawan dagiti bersikulo. Kas pagarigan, mabalinda nga agpammarang a kiddawen iti maysa a miembro ti pamilia nga “umasideg” (bersikulo 4) wenno mangted iti taraon iti maysa a miembro ti pamilia (kitaen iti bersikulo 11).
-
Agkansion iti maysa a kanta maipapan iti ayat, kas iti “Love One Another” (Children’s Songbook, 136). Tulongam dagiti ubbing nga agdrowing iti maysa a balabala [outline] dagiti imada ken isuratda iti balabala [outline] ti maysa a banag a mabalinda nga aramiden tapno maipakitada ti ayat iti pamiliada.
Tulongandakto dagiti bendision ti Priesthood.
Binendisionan ni Jacob dagiti annak ken appokona (kitaen kadagiti bersikulo 48–49). Ita maawattayo dagiti bendision ti priesthood a mangted kadatayo iti liwliwa, pannakapaimbag, pannarabay, ken naespirituan a pigsa.
Makaawattayo kadagiti bendision manipud kadagiti addaan iti priesthood.
Dagiti Mabalin nga Aktibidad
-
Ipakitam kadagiti ubbing ti maysa a ladawan ni Jacob a mangbembendision kadagiti annakna wenno dagiti dadduma pay a ladawan dagiti bendision ti priesthood (kitaen dagiti ladawan iti daytoy a balabala [outline]; kitaen met iti Libro ti Arte ti Ebanghelio, num. 12). Pailadawam kadagiti ubbing no ania ti mapaspasamak kadagiti ladawan.
-
Ibasam kadagiti ubbing ti Genesis 48:8– 9. Ilawlawag a ni Israel, a naawagan pay iti Jacob, isu ti ama ni Jose ket kayatna nga ikkan dagiti annak ni Jose iti maysa a bendision ti priesthood. No adda kadagiti ubbing ti immawaten iti maysa a bendision ti priesthood, awisem ida a mangisarita maipapan iti padasda. Wenno ibinglaymo ti bukodmo a padas.
-
Tulongam dagiti ubbing a mangpanunot kadagiti gapu a mabalin a pagdawatanda iti maysa a bendision ti priesthood. Kasta met a tulongam ida a manginagan kadagiti priesthood holder a mabalin a pagsaludsodanda, kas iti maysa nga ama, lelong wenno ministering brother.
Mabalinko ti mamakawan.
Ania ti masursuro dagiti ubbing maipapan iti pammakawan manipud iti pagwadan ni Jose a mangpakpakawan kadagiti kabsatna a lallaki?
Dagiti Mabalin nga Aktibidad
-
Usarem daytoy a panid ti aktibidad iti daytoy a lawas tapno matulongan dagiti ubbing a manglagip iti no kasano a nagbalin a natangsit dagiti kabsat a lallaki ni Jose kenkuana. Ibasam kadagiti ubbing ti Genesis 50: 17, a mangyunay-unay a nagladingit dagiti kabsat ni Jose iti inaramidda. Basaem dagiti bersikulo 21 tapno ipakita a pinakawan ni Jose dagiti kabsatna—a saanna a kagurat pay ida.
-
Aggigiddan a kansionen ti “Help Me, Dear Father” (Children’s Songbook, 99). No agkantakayo maipanggep iti panangpakawan, awisem dagiti ubbing nga itudoda ni Jose iti panid ti aktibidad. No agkantakayo maipanggep iti panagbabawi, awisem dagiti ubbing nga itudoda dagiti kakabsatna.
-
Tulongam dagiti ubbing a mangpanunot kadagiti situasion a mabalin a kasapulanda ti mangpakawan iti maysa a tao. Awisen dagiti ubbing nga agsanay no ania ti mabalinda a sawen wenno aramiden a mangipakita ti pammakawan iti dayta a tao.
Isuro ti Doktrina: In-inauna nga Ubbing
Mangisangbay ti pammakawan iti talna.
Nakaaramid dagiti kabsat ni Jose kadagiti nakaam-amak a banag kenkuana. Uray kasta pinakawan ida ni Jose ket nangisangbay iti talna iti pamiliana.
Dagiti Mabalin nga Aktibidad
-
Tulongam dagiti ubbing a mangyakem iti senario manipud iti Alma 42–44. Kabayatan ti panangaramidda, saludsodem kadakuada no kasano iti panagkunanda a mabalin a narikna ni Jose a nakakita manen kadagiti kabsatna wenno kasano a mabalin a narikna dagiti kabsatna idi nailasinda ni Jose iti kamaudiananna.
-
Saludsodem kadagiti ubbing no ania ti kaipapanan ti mangpakawan iti maysa a tao. Tulongam ida a makaawat a ti mangpakawan iti maysa a tao ket iramanna ti panangtrato iti ayat a kas ken ni Cristo. Saludsodem kadagiti ubbing no ania ti ammoda maipapan iti estoria ni Jose a mangpakpakawan kadagiti kabsatna, wenno basaem a kadua dagiti ubbing ti bersikulo manipud iti Genesis 45:1–15. Ania ti inaramid wenno insao ni Jose tapno maipakaammo kadagiti kabsatna a pinakawanna ida? Ania ti mabalin a sawen wenno aramidentayo no kiddawen dagiti dadduma a pakawanentayo ida?
-
Awisem dagiti ubbing a mangpanunot iti maysa a panawen idi pinakawanda ti maysa a tao wenno idi pinakawan ida ti maysa a tao? Tapno maikkam ida iti oras nga agpanunot, mangibinglay iti bukodmo a padas, ket ipaneknekmo dagiti bendision a simmangbay manipud iti pammakawan. Awisem dagiti ubbing a mangibinglay kadagiti padasda, no kayatda. Kasano ti nariknada? Ania dagiti kinapudno a masursurotayo maipapan iti pammakawan manipud iti pagwadan ti Mangisalakan? (kitaen iti Lucas 23:33–34).
Imbaon ti Nailangitan nga Ama ni Jesucristo a mangisalakan kaniak.
Ti estoria ni Jose a mangisalsalakan iti pamilianamanipud iti bisin ket makaisuro kadatayo maipapan ken ni Jesucristo, a mangisalakan kadatayo manipud iti basol ken ipapatay.
Dagiti Mabalin nga Aktibidad
-
Isurat iti pisarra ti Jose ken Jesucristo. Tulongam dagiti ubbing a mangsukisok kadagiti sumaganad a paris dagiti nasantuan a kasuratan ket isurat iti pisarra dagiti banag a pagpadaan da Jose ken Jesus: Genesis 37:3 ken Mateo 3:17; Genesis 37:26 – 28 ken Mateo 26: 14–16; Genesis 45:5–7 ken Lucas 4:18; ken Genesis 47:12 ken Juan 6:35.
-
Saludsodem dagiti ubbing no ania ti kaipapanan ti isalakan wenno alawen ti maysa a tao. No adda man kadakuada ti addaan iti maysa a padas a naisalakan wenno naalaw manipud iti peggad, awisem ida a mangibinglay. Kasano nga insalakan ni Jose dagiti kakabsatna? (kitaen iti Genesis 42:1–3; 45:5–7). Ipakitam ti maysa a ladawan ti Mangisalakan. Kasano nga insalakannatayo ni Jesus?
Patarus ni Joseph Smith Genesis 50:27–33 (iti Pangiwanwan iti Nasantuan a Kasuratan)
Insagana ti Nailangitan nga Ama ni Joseph Smith nga agbalin a propeta iti panawentayo.
Rinibu a tawen a nasapsapa, nakita ni Jose iti Egipto nga awagan ti Apo ni Joseph Smith nga agaramid iti maysa a naindaklan nga aramid iti ud-udina nga aldaw. Isurom dagiti ubbing no kasano a nabendisionannatayo ti Apo babaen ken ni Propeta Joseph Smith.
Dagiti Mabalin nga Aktibidad
-
Mangted kadagiti ubbing kadagiti pangiladawan a pamugtuan maipapan ken ni Joseph Smith, ken awisem ida a mangpugto no asino ti iladladawanmo. Iramamo dagiti pamugtuan manipud iti Patarus ti Joseph Smith, Genesis 50:27–33 (iti Pangiwanwan iti Nasantuan a Kasuratan), a kas “insuro kadatayo maipapan iti katulagan” (kitaen iti bersikulo 28), “isu ket nangted kadatayo iti balikas ti Apo” (kitaen iti bersikulo 30), ken “nga agnagan iti naipasurot iti amana” (kitaen ti bersikulo 33). Kalpasan a mapugtuan dagiti ubbing nga umno, awisem ida a mangsarak kadagitoy a pamugtuan kadagiti bersikulo. Ania pay ti masursurotayo maipapan ken ni Joseph Smith manipud iti pammadto maipapan ken ni Jose iti Egipto?
-
Ipakitam kadagiti ubbing dagiti ladawan a mangibagi kadagiti napapateg a banag nga inaramid wenno insuro ni Joseph Smith (kitaen, kas pagarigan, iti Libro ti Arte ti Ebanghelio, dagiti num. 89–95, 97, 98, 117, 118). Tulongam dagiti ubbing nga agpanunot kadagiti bendision nga adda kadatayo gapu ken ni Joseph Smith. Kas pagarigan, kasano a natulongannatayo ti aramidna nga umas-asideg ken ni Jesucristo?
Yallukoy ti Panagsursuro iti Pagtaengan
Awisem dagiti ubbing a mangibinglay iti pamiliada iti pagtaengan iti daytoy a panid ti aktibidad iti daytoy a lawas. Mabalinda nga usaren daytoy a mangrebyu iti estoria ni Jose ken dagiti kakabsatna a lallaki ken paglilinnawagan ti kinapateg ti ayat ken panagpakawan iti pamiliatayo.
Panangpadur-as iti Panangisurotayo
Paneknekan ti maipapan ken ni Jesucristo. Uray pay no saan a dinakamat iti Daan a Tulag ti nagan ni Jesucristo, maibasar daytoy Kenkuana babaen kadagiti sabali a nagan, ken mangipaneknek Kenkuana babaen kadagiti simbolo ken estoria. Tulongam dagiti ubbing nga agsursuro a mangkita kadagiti kinapudno maipapan iti Mangisalakan no agbasada iti nasantuan a kasuratan.