Ti Nalabaga a Baybay

Abril 4–10

Exodo 14–17

“Agtalnakayo, ket Kitaenyo ti Panangispal ni Jehova”

Binilin ti Apo ni Moises a mangisurat maipapan kadagiti padasna “iti maysa a libro a pakalaglagipan, ket saritaem kadagiti pagdengngeg” ni Josue (Exodo 17:14). Maipada a, ti panangsurat ken dagiti naespirituan a padpadas ti mangtulongto kenka ken dagiti patpatgem a manglaglagip iti kinaimbag ti Apo.

Isuratmo dagiti Impresionmo

Saan a makaballasiw dagiti Israelita. Adda iti maysa a bangir ti Nalabaga a Baybay, ken umas-asidegen iti maysa a bangir ti buyot ni Faraon. Kasla di makapagpaut ti panaglibasda manipud iti Egipto. Ngem adda mensahe ti Dios para kadagiti Israelita a kayatna a laglagipenda para kadagiti kaputotan: “Dikayo agbuteng. … Ni Jehova makibakalto gapu kadakayo” (Exodo 14:13–14).

Manipud iti dayta a panawen, idi kasapulan dagiti tao ti Dios ti pammati ken tured, masansan a pinanunotda daytoy a pakaammuan ti namilagruan a pannakaispal ti Israel. Idi tarigagayan ni Nephi ti mangparegta kadagiti kakabsatna, kinunana, “Agpapigsatayo a kas ken ni Moises; gapu ta pudno a nakisao iti Nalabaga a Baybay ket naguduada ditoy ken didiay, ket bimmallasiw dagiti ammatayo, manipud iti pannakabalud, nga agturong iti namaga a daga” (1 Nephi 4:2). Idi tarigagayan ni Ari Limhi dagiti balud a taona a “yangad[da] dagiti uloda, ket agrag-o[da],” impalagipna kadakuada daytoy isu met la nga estoria (Mosiah 7:19). Idi tarigagayan ni Alma nga agpaneknek iti anakna maipapan iti bileg ti Dios, nagibasaranna met daytoy nga estoria (kitaen iti Alma 36:28). Ken no kasapulantayo ti pannakaispal—no kasapulantayo ti dakdakkel pay bassit a pammati, no kasapulantayo ti ”agtalna[kayo], ken kitaen[yo] ti panangispal ni Jehova”—mabalintayo a lagipen no kasano “ti panangisalakan ni Jehova iti Israel iti daydi nga aldaw iti ima dagiti Egipsio” (Exodo 14:13, 30).

Dagiti Kapanunotan para iti Bukod a Panagadal iti Nasantuan a Kasuratan

Exodo 14

Adda pannakabalin ti Dios a mangisalakan kaniak.

Bayat ti panangbasam iti Exodo 14:1–10, panunotem no kasano ti narikna koma dagiti Israelita idi makitada nga umas-asidegen ti buyot ti Faraon. Nalabit a mariknam a kasapulam ti milagro tapno makalasat iti narigat a karit a pakaipaspasanguam. Ania ti masursurom manipud iti Exodo 14:13–31 a makatulong kenka nga agkalikagum a manggun-od iti panangisalakan ti Dios iti biagmo? Ania ti nasursurom maipapan kadagiti wagas ti panangispal ti Dios manipud iti rigat? Utobem no kasano a nakitamon ti pangisalakan a bilegna iti biagmo.

Kitaen met iti Doktrina ken Katulagan 8:2–3; L. Tom Perry, “The Power of Deliverance,” Liahona, Mayo 2012, 94–97; Bible Maps, num. 2, “Israel’s Exodus from Egypt and Entry into Canaan.”

Exodo 15:22–27

Maaramid ti Apo a nasam-it dagiti napapait a banag.

Bayat ti panangbasam iti Exodo 15:22–27 maipapan kadagiti panangdaliasat ti Israel a mapan iti naikari a daga, panunotem maipapan dagiti banag iti biagmo a kasla, “napait” kas iti dandanum ti Mara. Ibilangmo dagiti sumaganad a saludsod bayat ti panangutobmo kadagitoy a bersikulo: Kasano a maaramid ti Apo a nasam-it dagiti napait a banag iti biagmo? Ania ti pateg dagitoy a padas iti biagmo? Ania ti isingasing dagiti bersikulo 26 ken 27 maipapan iti no kasano a bendisionannatayo ti Apo no dumngegtayo iti timekna?

Exodo 15:23–27; 16:1–15; 17:1–7

Makapagtalekak iti Apo, uray kabayatan dagiti narigat a panawen.

Makasulisog ti agbalin a managdillaw kadagiti Israelita gapu ta nagdayamudom wenno nagreklamoda idi nagbalin a narigat dagiti kasasaadda, uray pay kalpasan nga inaramiden ti Dios ti amin a banag para kadakuada. Ngem bayat ti panangbasam iti Exodo 15:23–27; 16:1–15; 17:1–7, ibilangmo no nakaaramidka met laeng iti isu met la a banag. Ania ti masursurom manipud kadagiti padas dagiti Israelita a makatulong kenka a di unay agdaydayamudom ken agtalekka iti ad-adda pay a naan-anay iti Dios? Kas pagarigan, ania dagiti pagdumaan a madlawmo maipapan iti wagas a panagresponde dagiti Isarelita kadagiti rigat ken ti wagas a panagresponde ni Moises? Ania ti isuro kenka dagitoy a bersikulo maipapan iti Dios?

Kitaen met iti 1 Nephi 2:11–12; “Sin of Murmuring” (video), ChurchofJesusChrist.org.

Ti manna manipud iti Dios pisikal a nangpakan iti Israel; kasapulantayo met ti inaldaw a naespirituan a pannakataraon. Fresco ni Leopold Bruckner

Exodo 16

Nasken a kalikagumak ti maaddaan iti inaldaw a naespirituan a pannakataraon.

Adu dagiti naespirituan a lesson a maadaltayo manipud iti milagro ti mana, a masarakan iti Exodo 16. Kitaen dagiti detalyado a pangiturong a naited kadagiti Israelita no kasano nga urnongen, usaren, ken taginayonen ti mana (kitaen iti Exodo 16:16, 19, 22–26). Ania ti masarakam kadagitoy a pangiturong a mayaplikar kenka bayat ti inaldaw panagkalikagummo iti naespirituan a pannakataraon?

Kitaen met iti Juan 6:31–35, 48–58 ken dagiti video “Daily Bread: Pattern,” “Daily Bread: Experience,” ken ti “Daily Bread: Change” (ChurchofJesusChrist.org).

Exodo 17:1–7

Ni Jesucristo ti naespirituan a batok ken danumko a nabiag.

Panunotem maipapan iti Mangisalakan bayat ti panangbasam iti Exodo 17:1–7. Kasano a maipada ni Jesucristo iti maysa a bato kenka? Salmo 62:6–7; Helaman 5:12). Kasano a maipada Isuna iti danum? (kitaen iti Juan 4:10–14; 1 Taga Corinto 10:1–4; 1 Nephi 11:25).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Exodo 14:13–22.Mabalin a maay-ayo dagiti miembro ti pamiliam a mangpadpadas a “mangbingay” iti danum iti maysa a malukong wenno bathtub, kas iti panangbingay ni Moises ti Nalabaga a Baybay. Tulongam ida a makaawat a saan a mabingay ti Nalabaga a Baybay no awan ti pannakabalin ti Dios. Kasano a nakitatayon ti bileg ti Dios iti biagtayo ken iti biag dagiti kapuonantayo?

Exodo 15:1–21. Kalpasan ti namilagruan a panagballasiw iti Nalabaga a Baybay, nagkansion dagiti Israelita iti kanta a pagdaydayaw a maawagan iti kanta ni Moises, a masarakan iti Exodo 15:1–21. Kas maysa a pamilia, sukisokenyo dagitoy a bersikulo para kadagiti ragup ti balikas a mangipaneknek iti inaramid ti Dios para kadagiti Israelita ken dadduma pay a napapateg a ragup ti balikas. Kalpasanna mabalinyo ti agkanta iti maysa a himno a mangipalagip iti pamiliam iti no ania ti inaramid ti Dios para kenka.

Exodo 16:1–5; 17:1–7.Ti panangbasa iti Exodo 16:1–5 ken 17:1–7 ket makaiturong ti panaglilinnawag maipapan iti Mangisalakan a kas Tinapay ti Biag, kas Danum a Nabiag, ken kas Batotayo. Kasano a mangipalagip kadatayo dagitoy nga estoria no ania ti inaramid ni Jesucristo para kadatayo? Kas paset ti panaglilinnawagyo, mabalinmo a basaen ti Juan 4:10–14; 6:29–35, 48–51; Helaman 5:12; Doktrina ken Katulagan 20:77, 79.

Exodo 17:8–16.Mabalinyo a yakem ti estoria da Aaron ken Ur a mangig-iggem kadagiti ima ni Moises ket paglilinnawagan no kasano a maisimbolo daytoy no kasano a makanunongantayo dagiti inawagan ti Dios a mangidaulo kadatayo. Mabalinmo pay nga igiddiat ti pagwadan da Aaron ken Ur iti panagdayamudom dagiti Israelita a maibusor ken ni Moises (nailadawan kadagiti intero a kapitulo 15–17). Ania dagiti sumagmamano a wagas a mabalin a pakatulongan ken pakakanunongantayo kadagiti lidertayo? Ania dagiti bendision nga umay kadatayo ken kadagiti lidertayo no aramidentayo?

Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawasiti Umaykayo, Sumurot Kaniak—Para iti Primary.

Naisingasing a kanta: “Redeemer of Israel,” Hymns, no. 6.

Panangpadur-as iti Bukod a Panagadal

Kalikagumam a gun-oden dagiti bukodmo a naespirituan a nalawag a pannakammo ken pannakaawat. Iti bukod ken sangapamiliaan a panagadalmo, saanmo a limitaran ti bagim kadagiti bersikulo a na-highlight kadagitoy adalen a balabala. Nalabit nga adda dagiti mensahe ti Apo a para kenka kadagitoy a kapitulo a saan a nayunay-unay ditoy. Sikakararag a kalikaguman a gun-oden ti inspirasion.

Ladawan ni Moises a mangisinsina iti Nalabaga a Baybay ni Robert T. Barrett