Ti Nalabaga a Baybay

Abril 4–10

Exodo 14–17

“Agtalnakayo ket Kitaenyo ti Panangispal ni Jehova”

Bayat ti panangbasam iti Exodo 14–17, isuratmo dagiti naespirituan nga impresion a maawatmo. Dagitoy nga impresion makatulong kenka nga agplano tapno isuro dagiti nasantoan a kasuratan ken dagiti nasursurom a kinapudno kadagiti ubbing.

Isuratmo dagiti Impresionmo

Yawis ti Panagbibinninglay

TiExodo 14–17 naglaon kadagiti nakallalagip nga estoria. Awisem ti sumagmamano kadagiti ubbing a mangibinglay iti maysa nga estoria nga ammoda manipud kadagitoy a kapitulo, ken dagiti banag a nasursuroda manipud kadagitoy.

Isuro ti Doktrina: In-inaudi nga Ubbing

Exodo14:5–22

Insalakan ti Apo ni Moises ken dagiti taona.

Ti Panagsina ti Nalabaga a Baybay ket maysa a milagro a nangipakita ken ni Moises ken dagiti Israelita no kasano ti kinabileg ti Apo. Ti pannakaammo maipapan iti bilegna ket makatulong kadagiti ubbing nga agtalek Kenkuana.

Dagiti Mabalin nga Aktibidad

• Mangpanunot kadagiti wagas a mangibinglay ti estoria dagiti Israelita a bumalballasiw iti Nalabaga a Baybay iti makaay-ayo ken nakallalagip a wagas. Kas pagarigan, mabalinmo wenno ti sabali pay a miembro ti ward ti agkawes a kas ken ni Moises a mangisarita iti estoria manipud iti Exodo 14:5, 9–10, 13–16, 19–22. Mabalin nga agpammarang dagiti ubbing a dagiti tugaw ti Nalabaga a Baybay, ken mabalinda a tuladen ti tao nga agak-akem a kas Moises kabayatan ti panagaramidna iti dana iti nagbaetanda. Wenno mabalin nga agpammarang dagiti ubbing a kas danum ket umakarda nga agsina iti igid ti siled a kas iti panamagsina ni Moises kadagitoy. Yunay-unay nga inted ti Apo ti bileg ni Moises a mamagsina iti baybay tapno mawayawayaan dagiti Israelita manipud iti pannakabalud.

• Awisem dagiti ubbing a mangkolor iti panid ti aktibidad bayat ti panangrebyum kadakuada ti estoria manipud iti Exodo14:5–22. Kalpasanna makapagtitinnulongda a mangisarita iti estoria nga us-usarenda ti panid ti aktibidad.

Exodo 15:23–25; 16:14–15; 17:1–6

Ipaayto ti Apo dagiti kasapulak.

Dagiti pakaammuan maipapan iti panangipaay ti Apo iti taraon ken danum para kadagiti Israelita iti let-ang ket isuronatayo a kabaelanna nga ipaay dagiti kasapulantayo. Utobem no ania ti mabalinmo nga aramiden a mangiraman kadagiti ubbing itipanagsursuro kadagitoy nga estoria.

Pisikal a napakan ti Israel iti mana manipud iti Dios; kasapulantayo met ti inaldaw a naespirituan a pannakataraon. Fresco ni Leopold Bruckner

Dagiti Mabalin nga Aktibidad

• Tulongam dagiti ubbing a mangyakem kadagiti pasamak iti Exodo 15:23–25; 16:14–15; 17:1–6, nga agpammarang a Moises, wenno dagiti Israelita. No mabalin, mangitugot iti maysa a banag a makatulong a mangisarita iti tunggal estoria, kas iti maysa a sanga (a mangpaimbag iti danum iti Mara), maysa a garapon wenno banga (a napunno iti mana), ken maysa a bislak ken bato (para iti danum iti Horeb). Kasano nga inaywanan ti Dios dagiti Israelita? Kasano nga aywanannatayo iti tunggal aldaw?

• Mangibinglay iti ababa kadagiti estoria iti Exodo 15:23–25; 16:14–15; 17:1–6 (kitaen met ti “Idauluan ni Moses ti Israel,” iti Dagiti Estoria iti Daan a Tulag). Bayat ti panangibinglaymo, awisem dagiti ubbing a mangidrowing kadagiti ladawan iti tunggal estoria. Ania ti masursurotayo maipapan iti Dios manipud kadagitoy nga estoria?

Exodo 17:8–16

Makanunongak ti propetatayo.

Mabalin nga idasig ti estoria da Aaron ken Hur a mangitagtag-ay kadagiti ima ti propeta a ni Moises kadagiti panagkagumaantayo a mangkanunong ti sibibiag a propetatayo.

Dagiti Mabalin nga Aktibidad

• Awisem ti tallo nga ubbing nga agtakder iti sango ti siled a mangibagi kada Moises, Aaron, ken Hur bayat ti panangisaritam ti estoria manipud iti Exodo 17:8–16. Ania ti mabalintayo nga aramiden ita nga agdama a makatulong iti propetatayo, kas iti panagtulong da Aaron ken Hur ken ni propeta Moises?

• Ipakita ti maysa a ladawan ti sibibiag a propeta, ken saludsodem dagiti ubbing no asino daytoy. Tulongam dagiti ubbing a manglagip iti sumagmamano a banag nga insuro ti propeta iti nabiit. Kiddawem kadagiti ubbing a mangibinglay kadagiti wagas a pakasurotanda iti propeta. Aggigiddan nga agkansion iti sumagmamano a berso ti “Follow the Prophet,” pakairamanan ti maudi a berso (Children’s Songbook, 110–11).

Isuro ti Doktrina: In-inauna nga Ubbing

Exodo14:5–22

Masursurok a kanayon a suroten ti Espiritu.

Naammuan ni Moises babaen ti paltiing no kasano ti mangiturong kadagiti Israelita iti ballasiw ti Nalabaga a Baybay (kitaen iti Doktrina ken Katulagan 8: 2–3). Kasano a matulongan daytoy nga estoria dagiti ubbing a sursuruam nga agtignay iti bukod a paltiing?

Dagiti Mabalin nga Aktibidad

• Ipakita ti ladawan ni Moises a namagsina iti Nalabaga a Baybay iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Idawat kadagiti ubbing a mangrebyu iti Exodo 14:5–22 ket ibinglay ti sumagmamano a banag nga ammoda maipapan iti estoria. Ania ti mainayon ti Doktrina ken Katulagan 8:2–3 iti pannakaawattayo iti estoria? Isaritam maipapan ti maysa a padas idi imbaga kenka ti Espiritu Santo ti maysa a banag iti panunotmo wenno puso, ket awisem dagiti ubbing nga agsarita maipapan kadagiti padasda.

• Palagipam dagiti ubbing ti estoria ni Nephi a nangsurot iti Espiritu idi napanna innala dagiti pinanid a gambang (kitaen iti 1 Nephi 4:1–6). Tulongam dagiti ubbing a mangkita a nasken a kinasapulan pay a suroten ni Moises ti Espiritu idi inturongna dagiti taona iti ballasiw ti Nalabaga a Baybay. Tulongam dagiti ubbing a mangisurat iti baro a bersikulo iti “Nephi’s Courage” (Children’s Songbook, 120–21) maipapan iti no kasano nga impaayan ti Apo ni Moises iti wagas idi impakitana ti tured ken sinurotna ti Espiritu. Aggigiddan a mangkanta iti baro a berso.

Exodo 15:23–25; 16:14–15; 17:1–6

Ipaayto ti Apo dagiti kasapulak.

No umasidegtayo ken ni Jesucristo, matulongannatayo bayat dagiti naririgat a panawen iti biagtayo, kas iti panagtulongna kadagiti annak ti Israel.

Dagiti Mabalin nga Aktibidad

• Bingayem ti klase iti kada paris wenno iti babassit a grupo, ket dutokam ti tunggal grupo a mangbasa kadagiti sumaganad a binatog: Exodo 15:23–25; 16:14–15; 17:1–6. Kiddawem kadagiti ubbing iti tunggal grupo a mangidrowing kadagiti ladawan a mangibagi no ania ti nabasada kadagitoy a bersikulo, ken kalpasanna idawatmo kadagiti dadduma pay a miembro ti klase a magpugto no ania ti indrowingda. Tulongam dagiti ubbing a mangilasin no ania ti isuro dagitoy nga estoria maipapan ken ni Jesucristo. Ania dagiti adda a pannubok dagiti tao iti agdama? Kasano a matulongannatayo ti Nailangitan nga Ama ken ni Jesucristo kadagiti pannuboktayo?

• Bayat ti panangrebyum kadagitoy nga estoria, saludsodem kadagiti ubbing no apay a napateg unay ti tinapay ken danum kadagiti annak ti Israel. Ania ngata ti mabalin a napasamak no awan kadakuada dagitoy a banag? Tulongam dagiti ubbing a makaawat a naespirituan a kasapulantayo ti tinapay ken danum iti sakramento (kitaen iti Juan 4:13–14; 6:35, 48–51). Mabalinmo nga awisen dagiti ubbing a mangibinglay kadagiti riknada maipapan iti sakramento.

Exodo 17:8–16

Mabendisionantayo no kanunongantayo dagiti lidertayo ti Simbaan.

Nagballigi laeng dagiti annak ti Israel iti dangadang a maibusor ken ni Amalek idi intag-ay ni Moises dagiti imana iti tangatang. Ania ti masursurotayo maipapan iti panangkanunong kadagiti lidertayo manipud iti daytoy nga estoria?

Dagiti Mabalin nga Aktibidad

• Tapno matulongam dagiti ubbing a mangrebyu iti estoria iti Exodo 17:8–16, isurat iti pisarra: Asino ti nangtulong ken ni Moises kabayatan ti dangadang? Ania ti inaramidda? Ania ti imbungana? Awisem dagiti ubbing a mangsapul kadagiti sungbat kadagiti bersikulo. Ania ti isuro daytoy nga estoria maipapan no kasano a makatulongtayo iti pagarian ti Dios nga agballigi? Ania ti mabalintayo nga aramiden a mangsuporta, mangkanunong, ken managsurot kadagiti lidertayo iti Simbaan?

• Awisem dagiti ubbing a mangbasa iti Exodo 17:8–16 ket mangidrowing iti maysa a ladawan ti no ania ti nabasada. Allukoyem ida a mangisurat iti drowingda iti maysa a mensahe a nasursuroda manipud iti estoria. Apay a napateg daytoy a mensahe para kadatayo ita?

Yallukoy ti Panagsursuro iti Pagtaengan

Awisem dagiti ubbing nga agpili ti maysa kadagiti estoria manipud iti panaglilinnawagyo ita nga aldaw. Tulongam dagiti ubbing a mangpanunot iti maysa a banag a mabalinda nga aramiden inton sumaruno a lawas a pakayaplikaran no ania ti isuro ti estoria.

Panangpadur-as iti Panangisurotayo

Magustuan dagiti ubbing dagiti estoria. Nasaysayaat ti pannakaawat dagiti ubbing kadagiti pagbatayan ti ebanghelio no makitada ida iti biag dagiti pudno a tao. Bayat ti panangibinglaymo kadagiti estoria iti nasantuan a kasuratan, ibilangmo ti panangibinglay kadagiti padas manipud iti biagmo a mangisuro kadagiti isu met la a pagbatayan. Mabalin met nga awisem dagiti ubbing nga ibinglayda dagiti padasda.