“Abril 11–17. Paskua ti Panagungar: ‘Alimonennanto ni Patay iti Balligi,’” Umaykayo, Sumurot Kaniak—Para iti Primary: Daan a Tulag 2022 (2021)
“Abril 11–17. Paskua ti Panagungar,” Umaykayo, Sumurot Kaniak—Para iti Primary: 2022
Panangiladawan ti awan nagyanna a tanem ni Maryna Kriuchenko
Abril 11–17
Paskua ti Panagungar
“Alimonennanto ni Patay iti Balligi”
Bayat ti panagsaganam a mangisuro, utobem no kasano a matulongam dagiti ubbing a maaddaan iti naun-uneg a pannakaawat ken pammaneknek iti Pannubbot ni Jesucristo.
Isuratmo dagiti Impresionmo
Yawis ti Panagbibinninglay
Saludsodem kadagiti ubbing no ania ti aramiden dagiti pamiliada a mangrambak iti Paskua ti Panagungar. Ania ti aramidenda a panglaglagip iti Panagungar ni Jesucristo?
Isuro ti Doktrina: In-inaudi nga Ubbing
Ni Jesucristo ti Mangisalakanko.
Ti Domingo ti Paskua ti Panagungar ket nasayaat a gundaway a mangisuro kadagiti ubbing maipapan iti Pannubbot ti Mangisalakan iti Getsemani ken ti ipapatayna iti krus. Makatulong daytoy tapno mariknada ti ayat ni Jesus para kadakuada.
Dagiti Mabalin nga Aktibidad
-
Ipakitam dagiti ladawan ti Mangisalakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia wenno iti dadduma pay a ladawan ti sakripisio ti Mangisalakan (kitaen iti Libro ti Arte ti Ebanghelio, dagiti num. 56, 57, 58), ken paibinglay kadagiti ubbing kenka no ania ti ammoda maipapan kadagiti nailadawan a pasamak kadagiti ladawan. Isaritam kadagiti ubbing maipapan iti panagsagaba ni Jesus iti Getsemani ken iti krus (kitaen iti Mateo 26:36–46; 27:35–50; Lucas 22:39–46; Juan 19:16–30; “Kapitulo 51: Agsagaba ni Jesus iti Minuyongan ti Getsemani,” iti Dagiti Estoria ti Baro a Tulag, 129–32). Iburaymo ti pammaneknekmo a sitatallugod ni Jesus nga agsagaba ken matay para kadatayo gapu ta ay-ayatennatayo. Awisem dagiti ubbing a mangibinglay no ania ti riknada maipapan ken ni Jesucristo.
-
Ibasam ti Juan 10:9 kadagiti ubbing, a mangyunay-unay kadagiti balikas ni Jesus a “Siak ti ruangan.” Gapu ta nagsagaba ni Jesus para kadagiti basbasoltayo, natay, ken nagungar, inaramidna a posible para iti tunggal maysa kadatayo a makipagnaed manen iti Dios. Usarem ti ruangan ti siled ti klasem a mangisuro a maipada ni Jesus iti maysa a ruangan ti dalan a mangpalugod kadatayo nga agsubli iti Nailangitan nga Ama.
-
Ibasam ti Isaias 53:6 kadagiti ubbing, ken ipakitam kadakuada ti maysa a ladawan wenno drowing ti maysa a karnero. Paipanmo iti maysa nga ubing ti ladawan iti adayo a suli ti siled. Ilawlawag a no agaramidtayo kadagiti biddut a pili, agalla-allatayo nga umadayo iti Nailangitan nga Ama kas iti maysa a nayaw-awan a karnero. Kalpasanna paisublim ti karnero iti ubing, ket iburaymo ti pammaneknekmo a gapu ta nagsagaba ken natay ni Jesucristo para kadatayo, maisublinatayo iti Nailangitan nga Ama. (Mabalinmo nga ipakita ti maysa a ladawan ni Jesus kas maysa a pastor, a kas iti ladawan 64 iti Libro ti Arte ti Ebanghelio.)
-
Makipagkanta kadagiti ubbing ti maysa a kanta maipapan ken ni Jesucristo, kas iti “I Feel My Savior’s Love” (Children’s Songbook, 74–75). Tulongam ida a makadlaw iti ania man a rikna ti talna ken ayat nga adda kadakuada bayat ti panagkantada. Ilawlawag pay dagiti balikas iti kanta a mangiladawan ti ayat ti Mangisalakan. Kasano a maibinglaytayo ti ayatna kadagiti dadduma?
Natay ken nagungar ni Jesus para kaniak.
Kasano a matulongam dagiti ubbing a makasursuro a gapu iti Panagungar ni Jesucristo, agungartayonto ken dagiti ipatpategtayo iti maysa nga aldaw.
Grey Day Golgotha, ni J. Kirk Richards
Dagiti Mabalin nga Aktibidad
-
Isaritam kadagiti ubbing maipapan iti ipapatay ken panagungar ni Jesus (kitaen iti Marcos15–16). Usarem dagiti ladawan ti balabala iti daytoy a lawas, dagiti ladawan 57–60 iti Libro ti Arte ti Ebanghelio, wenno “Kapitulo 54: Nagungaren ni Jesus” iti Dagiti Estoria iti Baro a Tulag (dagiti panid 139–44) tapno matulongan dagiti ubbing a mangiladawan ti panunotda iti estoria.
-
Tulongam dagiti ubbing a makaawat a ti kayat a sawen ti panagungar a kalpasan a mataytayo agbiagtayto manen nga agnanayon nga addaan iti maysa a naan-anay a pisikal a bagi ken saantayton a matay iti kaano man. Ibinglaymo ti pammaneknekmo maipapan iti Panagungar, ket paaramidmo kadagiti ubbing ti panid ti aktibidad iti daytoy a lawas. Awisem dagiti ubbing a mangusar iti daytoy a mangibinglay kadagiti pamiliada ti estoria ti Panagungar ni Jesus.
-
Ibasam ti Alma 40:23 kadagiti ubbing. Ipakitam kadakuada ti imam iti uneg ti maysa a guantes. Ibagam kadakuada at maipada ti imam iti maysa nga espiritu ket maipada ti guantes iti maysa a pisikal a bagi. Uksotem ti guantes tapno ipakita a no mataytayo, pumanaw ti espiritutayo iti bagitayo. Yusokmo manen ti guantes tapno mangibagi iti Panagungar.
-
Agkansion iti maysa a kanta maipapan iti Panagungar kas iti “Did Jesus Really Live Again?” wenno “Jesus Has Risen” (Children’s Songbook, 64, 70). Iburaymo ti pammaneknekmo a gapu ken ni Jesucristo agbiagtayto manen ket maaddaan kadagiti naan-anay a bagi kalpasan ti ipapataytayo.
Isuro ti Doktrina: In-inauna nga Ubbing
Nagsagaba ni Jesucristo para kaniak.
Bayat ti panagadalmo iti Pannubbot ti Mangisalakan, utobem no kasano a matulongam dagiti ubbing a makaawat no kasano a mabendisionan ken mapatibker ida ti Mangisalakan.
Dagiti Mabalin nga Aktibidad
-
Bingayem dagiti ubbing iti tallo a ragup, ket mangted iti tunggal ragup iti maysa kadagiti sumaganad a binatog ti nasantuan a kasuratan: Isaias 53:4–12; Alma 7:11–13; ken Doktrina ken Katulagan 19:16–19. Awisem dagiti ubbing a mangsapul kadagiti balikas ken ragup ti balikas a mangiladawan kadagiti banag a sinagaba ni Jesucristo para kadatayo. Kiddawem kadakuada a mangisurat kadagiti sungbatda iti pisarra ket ibinglayda no kasano ti riknada maipapan iti Mangisalakan kalpasan ti panangbasada kadagitoy a nasantuan a kasuratan.
-
Mangisaganaka kadagiti akikidi a papel. Iti kagudua dagitoy, isuratmo dagiti reperensia ti nasantuan a kasuratan iti Daan a Tulag dagiti pammadto maipapan ken ni Jesucristo. Iti sabali pay a kagudua, isuratmo dagiti maitutop a reperensia ti nasantuan a kasuratan iti Baro a Tulag maipapan iti no kasano a natungpal dagitoy a pammadto. (Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia nakalista dagiti sumagmamano a pagarigan.) Awisem dagiti ubbing a mangbasa kadagiti bersikulo ket iparis dagiti pammadto kadagiti pannakaipatungpalda.
-
Tulongam dagiti ubbing a mangyulo iti maikatlo a pagannurotan ti pammati. Ania iti isuro kadatayo daytoy a nasantuan a kasuratan maipapan iti Pannubbot ni Jesucristo ken ti plano ti Nailangitan nga Ama para kadagiti annakna?
-
Saludsodem kadagiti ubbing no kasano nga iladawanda ti Pannubbot ni Jesucristo iti maysa a tao. Allukoyem ida a mangusar kadagiti nasantuan a kasuratan, dagiti himno, wenno dagiti ladawan a mangyebkas no ania ti kaipapanan ti pangsubbot a sakripisio ti Mangisalakan kadakuada. Kasano a nabendisionantayo gapu iti Pannubbot ni Jesucristo?
Natay ni Jesus ken nagungar para kaniak.
Mangyeg kadatayo ti kinapudno ti Panagungar ni Jesucristo iti naindaklan a namnama ken rag-o—nangnangruna no mapasarantayo ti ipupusay ti maysa nga ipatpateg. Kasano a matulongam dagiti ubbing a mangsarak iti pannakaliwliwa iti Panagungar?
Dagiti Mabalin nga Aktibidad
-
I-display dagiti ladawan 57–59 iti Libro ti Arte ti Ebanghelio. Kiddawem kadagiti ubbing a mangiparis kadagiti ladawan kadagiti sumaganad a binatog: Mateo 27:29–38; Mateo 27:59–60; ken Juan 20:10–18. Kalpasanna awisem dagiti ubbing a mangisarita iti estoria ti ipapatay, pannakaitanem, ken Panagungar ni Jesus iti bukodda a balikas.
-
Ibasam ti Job 14:14 kadagiti ubbing. Awisem dagiti ubbing a mangibinglay no kasano a masungbatanda ti saludsod ni Job. Tulongam ida a mangsapul kadagiti nasantuan a kasuratan a mangipaneknek iti Panagungar (kitaen iti Pangiwanwan ti Nasantuan a Kasuratan,“Panagungar,” scriptures.ChurchofJesusChrist.org).
-
Basaem ti Moises 1:39 kadagiti ubbing. Saludsodem kadakuada no ammoda ti paggiddiatan ti “saan nga ipapaatay” ken “agnanayon a biag.” Awisem ida a mangsapul kadagiti sungbat iti umuna a parapo ti “Eternal Life” (Gospel Topics, topics.ChurchofJesusChrist.org). Asinonto ti umawat iti saan nga ipapaatay? Ania ti kasapulan iti panangawat iti agnanayon a biag? Ibinglaymo ti pamaneknekmo nga agpada a mabalin dagitoy dua a napapateg a sagut gapu iti Pannubbot ni Jesucristo.
-
Sangkamaysa nga agkansion iti maysa a kanta wenno himno ti Paskua ti Panagungar, kas iti “He Sent His Son” (Children’s Songbook, 34–35) wenno “He Is Risen!” ( Dagiti Himno num. 199). Awisem dagiti ubbing a mangibinglay no ania ti riknada no kansionenda dagitoy a kanta. Ania ti isuro dagitoy a kanta maipapan iti Nailangitan nga Ama ken ni Jesucristo? Awisen dagiti ubbing nga isurat dagiti pammaneknekda iti Mangisalakan tapno ibinglay iti pagtaengan kadagiti pamiliada.
Yallukoy ti Panagsursuro iti Pagtaengan
Tapno matulongam dagiti ubbing a mangibinglay kadagiti pamiliada no ania ti nasursuroda iti klase, allukoyem ida nga agkansion iti maysa a kanta iti pagtaengan itoy a lawas maipapan iti Pannubbot ni Jesucristo.
Panangpadur-as iti Panangisurotayo
Mailasin dagiti ubbing ti impluensia ti Espiritu. Isurom kadagiti ubbing a dagiti rikna nga adda kadakuada no agsaritada wenno agkantada maipapan ken ni Jesucristo ken aggapu ti ebangheliona iti Espiritu Santo ken dagitoy a rikna ti makapaadda kadagiti pammaneknekda.