“Mayo 23–29. Josue 1–8; 23–24: ‘Bumilegka ken Umingelka,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Mayo 23–29. Josue 1–8; 23–24,” Umaykayo, Sumurot Kaniak—Para kadagiti Indibidual ken Pamilia: 2022
Panangiladawan ken ni Moises a mangor-orden ken ni Josue, ni Darrell Thomas
Mayo 23–29
Josue 1–8; 23–24
“Bumilegka ken Umingelka”
Bayat ti panagadalmo iti libro ni Josue, ibilangmo no kasano makapapigsa iti pammatim ken ni Jesucristo dagiti banag a masursurom maipapan kadagiti Israelita.
Isuratmo dagiti Impresionmo
Napalabas ti sumagmamano a kaputotan, ngem asidegen a maipatungpal ti panggep ti Apo: kasla mapasamaken ti panangtawid dagiti annak ti Israel iti naikari a daga. Ngem iti dalanda adda dagiti tubeng iti Karayan Jordan, dagiti pader ti Jerico, ken dagiti nadangkes ngem maingel a tao a nangsupring iti Apo (kitaen iti 1 Nephi 17:35). Malaksid iti dayta, awanen ti ay-ayatenda a dadaulo a ni Moises. Mabalin a ti kasasaad ti nangiparikna a nakapsut ken mabuteng dagiti Israelita, ngem kinuna ti Apo, “Bumilegka ken umingelka.” Apay a nasken a mariknada ti kastoy? Saan a gapu iti bukodda a pigsa—wenno uray ti pigsa ni Moises wenno ti pigsa ni Josue—ngem gapu ta “ni Jehova a Diosmo adda kenka iti sadino man a papanam” (Josue 1:9). No addaantayo kadagiti bukodtayo a karayan a ballasiwen ken pader nga ibaba, mapasamak dagiti nakaskasdaaw a banag iti biagtayo, gapu ta ni “Jehova [isu] ti agaramidto kadagiti datdatlag iti tengnga[tayo] (Josue 3:5).
Para iti pakagupgopan ti libro ti Josue, kitaen iti “Josue, libro ti” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Addanto ti Dios kaniak no napudnoak Kenkuana.
Panunotem no ania koma ti mabalin a kayarigan para ken ni Josue a maawagan a mangsukat ken ni Moises. Kitaem no ania ti kinuna ti Apo iti Josue 1:1–9 a mangallukoy kenkuana. Panunotem maipapan kadagiti narigat a karit a pakaipasanguam; ania kadagitoy a bersikulo ti mangted kenka iti tured?
Mabalin a makaay-ayo a kitaen a ti nagan a Josue (Yehoshua wenno Yeshua iti Hebreo) kaipapananna ti “mangisalakan ni Jehova.” Ket ti nagan a Jesus naggapu iti Yeshua. Isu a bayat ti panangbasam maipapan ken ni Josue, ibilangmo no kasano a mangiturong ti misionna kadagiti annak ti Israel iti naikari a daga ken mangipalagip kenka iti mision ti Mangisalakan.
Kitaen met iti Ann M. Dibb, “Be of Good Courage,” Liahona, Mayo 2010, 114–16.
Agpadpada ti pammati ken ti aramid a kasapulan iti pannakaisalakan.
Nakita dagiti nagkauna a Kristiano ni Rahab kas maysa a pagwadan ti bileg ti pammati ken dagiti aramid (kitaen iti Hebreo 11:31; Santiago 2:25). Bayat ti panangbasam iti Josue 2, ibilangmo ti akem ti pammati ni Rahab ken dagiti aramid iti panangisalakan iti bagina, ti pamiliana, ken dagiti iskawt nga Israelita. Ania ti isuro daytoy kenka maipapan iti no kasano a makaimpluensia iti bagim ken iti dadduma ti pammatim ken ni Cristo ken dagiti aramidmo?
Mabalin nga interesadoka a mangammo a ni Rahab ti kapuonan da Ari David ken Jesucristo (kitaen iti Mateo 1:5). Ania dagiti mabalin nga adalen a masursurotayo manipud iti daytoy?
Ni Rahab iti abay ti tawana. Panagur-uray iti Kari, ni Elspeth Young.
Mapadasak ti “datdatlag” ti Dios no adda pammatik ken ni Jesucristo.
Tarigagayan ti Apo nga “isu amin a tattao ditoy lubong maammuanda koma ti ima ni Jehova nga isu mannakabalin” (Josue 4:24). Bayat ti panangbasam iti Josue 3– 4, utobem no kasano nga ammom a mannakabalin ti ima ti Apo. Kasano nga inaramid ti Apo dagiti “datdatlag” iti biagmo? (Josue 3:5). Kasano a mapadasam—wenno mabigbigmo—dagiti datdatlag nga ad-adda a masansan? (kas pagarigan, kitaen iti Josue 3:17).
Apay iti panagkunam a kasapulan dagiti Israelita a mangpasanto iti bagbagida sakbay ti panangballasiwda iti Karayan Jordan? Ania ti kinapateg a masarakam iti kinapudno a nabingay laeng ti karayan kalpasan a “dagiti saksaka dagiti saserdote … naitanebda iti igid ti danum”? (Josue 3:13, 15).
Para iti dadduma pay a napapateg a pasamak a napagteng iti Karayan Jordan, kitaen iti 2 Ar-ari 2:6–15; 5:1–14; ken Marcos 1:9–11. Bayat ti panangutobmo kadagitoy a nasantuan a kasuratan, ania ti pagnaigan a makitam iti nagbabaetan dagitoy a pasamak?
Kitaen met iti Gérald Caussé, “Is It Still Wonderful to You?” Liahona, Mayo 2015, 98–100; “Exercise Faith in Christ” (video), ChurchofJesusChrist.org.
Ti panagtungpal mangisangbay iti bileg ti Dios iti biagko.
Mainaig dagitoy a kapitulo kadagiti panagranget iti daga ti Jerico ken Ai. Bayat ti panangbasam kadagitoy, ibilangmo no kasano a makirangetka iti sulisog iti bukodmo a biag (kas pagarigan, kitaen iti Josue 7:10–13). Ania ti masursurom maipapan no kasano a makatulong ti Dios kenka ken no ania ti kasapulam nga aramiden tapno magun-odmo ti bilegna? Kas pagarigan, ania ti makaawis iti riknam maipapan kadagiti pangiturong ti Apo iti panangala iti Jerico? (kitaen iti Josue 6:1–5). Nalabit a paregtaennakanto ti pakaammuan iti Josue 7 tapno mangikeddeng no adda “naipaay a banag” iti biagmo a nasken nga ibellengmo (Josue 7:13).
“Kumpetkayo ken Jehova a Diosyo.”
Kalpasan ti panangbingay iti naikari a daga kadagiti sangapulo a tribu ti Israel (kitaen iti Josue 13–21), inikkan ni Josue ida iti maudi a pannursurona. Bayat ti panangbasam kadagitoy a pannursuro iti Josue 23–24, mabalinmo ti mangidulin iti maysa a listaan dagiti ballaag, balakad, ken naikari a bendision a masarakam. Iti panangibilang iti amin a banag a napasaran dagiti Israelita, apay iti panagkunam a pinili ni Josue nga ibaga kadakuada dagitoy a banag iti gibus ti biagna? Ania ti masarakam a mangparegta kenka a “kumpet ken Jehova“?? (Josue 23:8).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Josue 1:8.Ania ti isingasing daytoy a bersikulo maipapan no kasano ti nasken a wagastayo iti panagadal iti nasantuan a kasuratan, kas agmaymaysa ken kas maysa a pamilia? Kasano nga inaramid dagiti nasantuan a kasuratan a “parang-ayen ti dalantayo” ken mangyeg kadatayo iti “naimbag a banag”?
-
Josue 4:3, 6–9.Kalpasan ti panangbasam iti no ania ti kayat ti Apo nga aramiden dagiti Israelita kadagiti bato manipud iti Karayan Jordan, mabalin nga isarita ti pamiliam maipapan iti sumagmamano kadagiti naindaklan a banag nga inaramid ti Apo para kenka. Kalpasanna mabalinmo ti mangted iti tunggal miembro ti pamilia iti maysa a bato ket awisem ida a mangisurat wenno mangidrowing ditoy ti maysa a banag nga inaramid ti Apo para kadakuada.
-
Josue 6:2–5.Mabalin a naragsak ti pamiliam a mangyakem kadagiti panangiturong nga inted ti Apo kadagiti Israelita tapno mangparmek iti Jerico. Ania ti mabalin a kayat ti Apo a masursurotayo manipud iti daytoy nga estoria?
-
Josue 24:15Kalpasan ti panangbasam iti daytoy a bersikulo, mabalin nga ibinglay dagiti miembro ti pamilia dagiti padas a pakapagpilianda nga agserbi iti Apo uray no narigat. Apay a napateg nga agaramid iti pili nga agserbi Kenkuana “ita nga aldaw” imbes nga agur-uray a mangikeddeng agingga a rumsua ti maysa a kasasaad? Kasano a masuportarantayo dagiti miembro ti “balaytayo” bayat ti panagkagumaantayo nga “agserbi ken Jehova”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kania—Para iti Primary.
Naisingasing a kanta: “Choose the Right,” Hymns, no. 239.
Panangpadur-as iti Panangisurotayo
Iburaymo a masansan ti pammaneknekmo. Nabileg a makaimpluensia iti pamiliam ti napudno a panagsaksim iti kinapudno. Saan a nasken a napintas wenno atiddog daytoy. Kabilgan ti maysa a pammaneknek no natarus ken naimpusuan daytoy. (Kitaen iti Panangisuro iti Wagas ti Mangisalakan,11.)
Pinatumba ti Apo dagiti pader ti Jerico. © Providence Collection/licensed from goodsalt.com