“Mayo 30–Hunio 5. Uk-ukom 2–4; 6–8; 13–16: ‘Ni Jehova Namangon iti Mangisalakan,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Mayo 30–Hunio 5. Uk-ukom 2–4; 6–8; 13–16,” Umaykayo, Sumurot Kaniak—Para kadagiti Indibidual ken Pamilia: 2022
Panangiladawan ken ni Debora a mangiturturong iti buyot ti Israel, © Lifeway Collection/licensed from goodsalt.com
Mayo 30–Hunio 5
Uk-ukom 2–4; 6–8; 13–16
“Ni Jehova Namangon iti Mangisalakan”
Paneknekan dagiti nasantuan a kasuratan ni Jesucristo. Utobem no kasano a tulongannaka dagiti estoria a mabasam iti Uk-ukom nga umas-asideg Kenkuana.
Isuratmo dagiti Impresionmo
Ammotayo amin no ania ti kayarigan ti agbiddut, agladingit iti daytoy, ket kalpasanna pagbabawyan ket ikeddeng a balbaliwantayo dagiti wagastayo. Ngem iti sumagmamano a kasasaad malipatantayo ti immun-una a pangngeddeng ken, no maipasangotayo iti sulisog, masarakantayo ti bagbagitayo nga agar-aramid manen iti biddut. Gagangay daytoy a napeggad a pagtuladan iti padpadas dagiti Israelita a nailadawan iti libro ti Uk-ukom. Naimpluensiaan kadagiti pammati ken kannawidan iti panangrukbab dagiti taga Canaan—a nasken koma a papanawenda iti daga—linabsing dagiti Israelita dagiti katulaganda iti Apo ken kimmayakayda iti panagrukbab Kenkuana. Kas bungana, napukawda ti panangsaluadna ket natnagda iti pannakaadipen. Ket iti tunggal kanito a napasamak daytoy, inikkan ti Apo ida iti gundaway nga agbabawi ken mamangon iti maysa a mangisalakan, maysa a dadaulo ti militar a maawagan iti maysa nga “ukom.” Awan ti nalinteg kadagiti amin nga ukom iti libro ti Uk-ukom, ngem sumagmamano kadakuada ti nangaramat iti dakkel a pammati iti panangisalakan kadagiti annak ti Israel ken ti panangisubli kadakuada iti katulagan ti pannakainaig iti Apo. Dagitoy nga estoria ti mangipalagip kadatayo a no uray ania ti nangiturong kadatayo manipud ken ni Jesucristo, Isu ti Mannubbot ti Israel ken kanayon a siaayat a mangisalakan kadatayo ken pasangbayennatayo nga agsubli Kenkuana.
Para iti pakagupgopan ti libro ti Uk-ukom, kitaen iti “Uk-ukom, libro ti” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Idiaya ti Apo ti pannakaisalakan no kumayakayak.
Ti libro ti Uk-ukom a makapagserbi kas maysa a pammallaag kadatayo: kalpasan a mapadasantayo ti bileg ti Apo iti biagtayo, kanayon a posible ti matnag nga agbasol. Makaited pay ti libro iti pammaregta kadagiti matnag nga agbasol, ta idiaya ti Apo ti maysa a dalan nga agsubli. Kas pagarigan, bayat ti panangbasam iti Uk-ukom 2:1–19, sapulem dagiti tignay a nangyadayo kadagiti Israelita manipud iti Apo ken no kasano nga insalakan ida ti Apo. Ania ti isuro kadatayo dagitoy a bersikulo maipapan iti Apo? Ania ti maaramidmo tapno agtalinaed nga agtultuloy a napudpudno Kenkuana?
Makitayonto ti pagtuladan ti kinasukir, panagladingit, ken panangisalakan a naulit iti intero nga Uk-ukom (kitaen nangnangruna dagiti kapitulo 3, 4, 6, ken 13). Bayat ti panangbasam iti libro ti Uk-ukom, utobem no ania ti inaramid dagiti ukom a nangispal iti Israel ken no kasano a tulongannaka ti Mangisalakan no kasapulam ti pannakaisalakan.
Ni Debora ti maysa a madaydayaw a pagwadan ti maysa a tao a timmulong a mangispal iti Israel. Basaem ti maipapan kenkuana iti Uk-ukom 4:1–16, ket kitaem ti impluensiana kadagiti tao iti aglawlawna. Ania dagiti balikas wenno tignay nga ipakita ni Debora kenka nga adda pammatina iti Apo? Ania ti mariknam a kayat a sawen ni Debora iti saludsodna iti bersikulo 14: “Saan aya ni Jehova rimmuar iti sangom?”
Kitaen met iti Alma 7:13; Doktrina ken Katulagan 84:87–88.
Asino da Baal ken Astarot?
Ni Baal ti dios ti bagyo dagiti Cananeo ket ni Astarot ti diosa ti pertilidad dagiti Cananeo. Ipakita ti panagrukbab kadagitoy dua a didiosen no kasano ti kapateg ti pertilidad ti daga ken dagiti tao kadagiti Cananeo. Ti wagas a panagdaydayaw dagiti tao kadagitoy ken iti dadduma pay a palso a didiosen—agraman, no dadduma, ti seksual nga imoralidad ken ti panangisakripisio kadagiti ubbing—ti nangnangruna pay a makapasakit iti Apo.
Mabalin nga itrabaho ti Apo dagiti milagro no agtalekak kadagiti wagasna.
Tapno umawat kadagiti milagro ti Apo iti biagtayo, nasken nga agtalektayo kadagiti wagasna, uray no kasla karkarna dagiti wagasna. Ti estoria ni Gideon, a masarakan iti Uk-ukom 6–8, ti maysa a nasayaat a pagarigan daytoy. Kasano nga agtrabaho ti Apo iti kasla awan namnamana a milagro idi inabak ti buyot ni Gideon dagiti Midianita? Ania ti mariknam a padpadasen ti Apo nga isuro kenka? Kasano a naimatangamom ti Apo a mangaramid Iti trabahona iti wagas a kasla awan namnamana?
Kitaen met iti Russell M. Nelson,“With God Nothing Shall Be Impossible,” Ensign, Mayo 1988, 33–35.
Sumangbay ti pigsa manipud iti kinapudno kadagiti katulagak iti Dios.
Agpada a napukaw ni Samson ti pisikal a pigsana ken ti naespirituan a pigsana gapu ta linabsingna dagiti katulaganna iti Dios, agraman dagiti naaramat a naipangpangruna kadagiti Nazareo (para iti impormasion maipapan kadagiti Nazareo, kitaen iti Numeros 6:1–6; Uk-ukom 13:7). Bayat ti panangbasam iti estoria ni Samson iti Uk-ukom 13–16, utobem ti tunggal katulagan nga inaramidmo. Kasano a naparaburanka iti pigsa gapu ta tinungpalmo dagita a katulagan? Ania ti nasursurom manipud iti estoria ni Samson a mangparegta kenka tapno agtalinaedka a napudno kadagiti katulagam iti Dios?
Ibaba ni Samson dagiti Adigi, ni James Tissot ken dagiti dadduma
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Uk-ukom 2:10.Kalpasan ti ipapatay ti Josue, ti sumaruno a kaputotan dagiti Israelita “dida inammo ni Jehova.” Kasaritam ti pamiliam maipapan no kasano nga ammoda a ti Apo ken dagiti “aramid nga isu inaramidna idi” para kadakuada. Kasano a maipanamnamamto a mataginayonto daytoy a pannakaammo para kadagiti sumaruno a kaputotan?
-
Uk-ukom 3:7–10.Gupgopen dagitoy a bersikulo ti maysa a pagtuladan a masansan a makita iti intero a libro ti Uk-ukom. Bayat ti panagbasa dagiti miembro ti pamiliam kadagitoy a bersikulo, mabalinda ti mangilasin no ania iti inaramid ti Israel a kimmayakay manipud iti Apo ken no ania ti inaramid ti Apo a mangisalakan kadakuada. Ania ti mabalin a mangiturong kadatayo tapno manglipat iti Apo? Kasano a maisalakannatayo? Kasano a makapagbalintayo nga agtultuloy a napudpudno Kenkuana?
-
Uk-ukom 6:13–16, 25–30.Impakita ni Gideon ti dakkel a tured iti panagtungpal iti Apo, uray pay kadagiti tignayna a saan a nalatak. Ania ti indawat ti Apo nga aramidentayo a mabalin a saan nga anamongan dagiti dadduma? Kasano a makaparegta kadatayo dagiti balikas ti Apo ken ni Gideon kadagiti bersikulo 13–16 tapno agaramid iti umno a banag?
-
Uk-ukom 7.Mausarmo kadi ti maysa a papel nga ak-akmem wenno sabali pay nga aktibidad iti panangpartuat wenno sabali pay a makatulong iti pamiliam a makasursuro manipud iti padas ti buyot ni Gideon a nailadawan iti daytoy a kapitulo? Kasano a mayaplikar dagiti balikas ti Apo iti daytoy a kapitulo (kitaen, kas pagarigan, kadagiti bersikulo 2 ken 15) iti biagtayo?
-
Uk-ukom 13:5.Dagiti katulagan ni Samson iti Apo ti nangted kenkuana iti pigsa, a kas met iti panangted dagiti katulagantayo iti pigsa. Mabalin a magustuan ti pamiliam ti agaramid iti sumagmamano a panagwatwat iti bagi ken panangilawlawag no kasano a makatulong dagita a panagwatwat a mangpapigsa kadatayo. Ania ti maaramidtayo a makatulong kadatayo nga agbalin a naespirituan a napigpigsa? Para iti sumagmamano a kapanunotan, mabalin a basaen dagiti miembro ti pamilia ti Mosiah 18:8–10; Doktrina ken Katulagan 20:77, 79. Kasano a mangted kadatayo iti naespirituan a pigsa ti panagtungpal kadagiti katulagantayo?
Para iti ad-adu pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Redeemer of Israel,” Hymns, no. 6.
Panangpadur-as iti Bukod a Panagadal
Agtignayka iti no ania ti masursurom. Bayat ti panagadalmo, saludsodem iti bagim no kasano a mayaplikarmo no ania ti nasursurom, ken kalpasanna agkumit nga aramidem daytoy. Agpatarabayka iti Espiritu. (Kitaen iti Panangisuro iti Wagas ti Mangisalakan,35.)
Ti Buyot ni Gideon, ni Daniel A. Lewis