Hunio 20–26. 2 Samuel 5–7; 11–12; 1 Ar-ari 3; 8; 11: ‘Maipasdekto ti Pagariam iti Agnanayon’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Hunio 20–26. 2 Samuel 5–7; 11–12; 1 Ar-ari 3; 8; 11,” Umaykayo, Sumurot Kaniak—Para kadagiti Indibidual ken Pamilia: 2022
Naitrono ni Ari David, ni Jerry Milia Harston
Hunio 20–26
2 Samuel 5–7; 11–12; 1 Ar-ari 3; 8; 11
“Maipasdekto ti Pagariam iti Agnanayon”
“Amin a nasantuan a kasuratan nga impaltiing ti Dios isu met ti naimbag a pakasursuruan, pakatinggaran, pakababalawan, ken pakaadalan iti kinalinteg” (2 Timoteo 3:16).
Isuratmo dagiti Impresionmo
Nangrugi ti panagturay ni Ari David iti nakaad-adu a kari. Naglatak ti natured a pammatina iti panangabakna ken ni Goliat. Kas ari, impatalgedna ti Jerusalem kas kabiserana ken pinagkaykaysana ti Israel (kitaen iti 2 Samuel 5). Di kaano man napigpigsa ti pagarian. Ngem nagpasulisog ni David ket napukawna ti naespirituan a bilegna.
Kasta met a nangrugi ti panagturay ti anak ni David a ni Solomon babaen iti nakaad-adu a kari. Naglatak ti nadiosan a naawat a sirib ken pannakaawat ken panagriknana. Kas ari, inyatiddogna dagiti beddeng ti Israel ken nangbangon iti maysa a nangayed a templo iti Apo. Di kaano man napigpigsa ti pagarian. Ngem simamaag nga impalubos ni Solomon ti pusona nga agrukbab iti dadduma a didiosen.
Ania ti masursurotayo manipud kadagitoy a nakabutbuteng nga estoria? Nalabit a ti maysa a leksion ket iti baet dagiti padas iti napalabas, agpannuray dagiti naespirituan a pigsatayo kadagiti pili nga aramidentayo iti agdama. Masursurotayo pay kadagitoy a pakaammuan a saan a ti bukodtayo a pigsa wenno tured wenno sirib ti mangisalakanto kadatayo—daytoy ti pigsa wenno tured wenno sirib ti Apo. Dagitoy nga estoria ti mangipakita kadatayo iti dayta a pudno a namnama ti Israel—ken ti namnamatayo—saan a ni David, ni Solomon, wenno ti asino man a mortal nga ari, ngem iti sabali pay nga “anak ni David”: ni Jesucristo (Mateo 1:1), ti Agnanayon nga Ari a “mangpakawanto iti basol dagiti tao[na]” no datayo ket “agsubli [Kenkuana]” (1 Ar-ari 8:33–34).
Para iti pakagupgopan dagiti libro ti 2 Samuel ken 1 Ar-ari, kitaen iti “Samuel, dagiti libro ti” ken “Ar-ari, dagiti libro ti” iti Pangiwanwan iti Nasantuan a Kasuratan.
Dagiti Kapanunotan para iti Bukod a Panagadal iti Nasantuan a Kasuratan
Maikkannak ti Apo iti direksion.
Apaman a nabaelan ni David a mangkaykaysa iti Israel (kitaen iti 2 Samuel 5:1–5), nasken a salaknibanna dagiti taona manipud kadagiti Filisteo. Bayat ti panangbasam iti 2 Samuel 5:17–25, ibilangmo no kasano a makatulong kenka ti pagwadan ni David kadagiti karit a pakaipasanguam (kitaen met iti 1 Samuel 23:2, 10–11; 30:8; 2 Samuel 2:1). Kasano nga agkalkalikagumka a manggun-od iti direksion ti Apo iti biagmo? Kasano a nabendisionanka babaen iti panagtignaymo a mayannurot iti paltiing a naawatmo?
Kitaen met iti 1 Cronicas 12; Richard G. Scott, “How to Obtain Revelation and Inspiration for Your Personal Life,” Liahona, Mayo 2012, 45–47.
Ania ti “balay” nga inkari ti Apo ken ni David?
Idi indiaya ni David a mangbangon iti maysa a balay, kayatna a sawen ti maysa a templo, para iti Apo (kitaen iti 2 Samuel 7:1–3), simmungbat ti Apo nga iti kinapudnona ti anak ni David ti mangbangonto iti daytoy (kitaen kadagiti bersikulo 12–15; kitaen met iti 1 Cronicas 17:1–15). Kinuna pay ti Apo nga Isu met ti mangbangon iti “balay,” ni David a kayatna a sawen ti an-annabo, ken agpautto iti agnanayon ti tronona (kitaen iti 2 Samuel 7:11, 16, 25–29; Salmo 89:3–4, 35–37). Naipatungpal daytoy a kari ken ni Jesucristo, ti Agnanayon nga Aritayo, nga an-annabo ni David (kitaen iti Mateo 1:1; Lucas 1:32–33; Juan 18:33–37).
Nasken a kanayon nga agannadak a maibusor iti basol.
Ti kinapudno ni David iti Apo iti napalabas saan a nangaramid kenkuana a nalaka a masulisog idi “nagnagna iti pangatepan ti balay ti ari” ken “nakitana iti maysa a babai nga agdigdigus” (2 Samuel 11:2). Ibilangmo no ania dagiti adalen a mabalinmo a sursuruen manipud kadagiti padasna. Dagiti saludsod kas kadagitoy ti mabalin a makatulong kenka nga adalem daytoy a pakaammuan:
-
Ania dagiti pili nga inaramid ni David a nangiturong kenkuana iti umad-adun a dana ti managbasol? Ania dagiti nalinteg a pili nga inaramidna koma ketdi?
-
Kasano ti mabalin a panangpadas ti kabusor a mangiturong kenka kadagiti dana ti managbasol iti bukodmo a biag? Ania dagiti pili a mabalinmo nga aramiden itan nga agsubli iti kinatalged?
Kitaen met iti 2 Nephi 28:20–24; “To Look Upon” (video), ChurchofJesusChrist.org.
Tulongannak ti sagut ti pannakaawat [discernemet] a mangilasin iti umno ken biddut.
No kinuna ti Apo kenka, “Kiddawem ti itedkonto kenka” (1 Ar-ari 3:5), ania koma ti kiddawem? Ania ti makaawis iti riknam maipapan iti kiddaw ni Solomon? Utobem no apay a ti “maysa a mannakaawat a puso” a “mangilasin iti naimbag ken ti dakes” (bersikulo 9) ket maysa a napateg a sagut. Ania ti maaramidmo a mangsapul iti daytoy a sagut?
Kitaen met iti 2 Cronicas 1; Moroni 7:12–19; David A. Bednar, “Quick to Observe,” Ensign, Dis. 2006, 30–36.
Ti templo ti balay ti Apo.
Iti uneg ti ginasgasut a tawen, ibagi ti presensia ti Dios dagiti mabitbit a tabernakulo a binangon ni Moises. Nupay tinarigagayan ni David a mangbangon iti ad-adda a manayon a lugar para iti Dios, pinili ketdi ti Dios ti anak ni David a ni Solomon a mangbangon iti templo ti Apo. Bayat ti panangbasam iti kararag ni Solomon ken dagiti balikas nga insaona kadagiti taona iti panangileppas iti templo, kitaem no kasano ti nagriknana maipapan iti Apo ken iti balayna. Mabalinmo met ti agaramid iti listaan dagiti bendision a kiniddaw ni Solomon iti kararagna. Ania ti makitam maipanggep kadagitoy a bendision? Kasano a bendisionannaka ti balay ti Apo iti aldawtayo?
Kitaen met iti 2 Cronicas 6.
Templo iti Barranquilla Colombia
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
2 Samuel 5:19, 23.Kaanotayo nga “immuman ken Jehova” para iti pannarabay ken panangiturong? Kasano a sinungbatannatayo?
-
2 Samuel 7:16.Idi imbaga ti Apo ken ni David, “Ti tronom mapasingkedanto nga agnanayon,” dakdakamatenna ti masakbayan nga ari iti pamilia ni David nga agturayto iti agnanayon: ni Jesucristo. Nalabit a a magustuan ti pamiliam ti panagpartuat kadagiti balangat bayat ti panangilawlawagmo no apay a nasken a managyamanka a ni Jesucristo ti Agnanayon nga Ariyo.
-
2 Samuel 11.Ti panagbasa maipapan kadagiti nadagsen a basol ni David ket mabalin a maysa a nasayaat a gundaway a paglilinnawagan dagiti peggad ti pornograpia, narugit a pampanunot, ken imoralidad. Makatulong dagiti sumaganad a pagadawan (resources) iti panaglilinnawagyo: ti Oktubre 2019 nga isyu ti Liahona, the Church’s Addressing Pornography resources (ChurchofJesusChrist.org/addressing-pornography), ken dagiti video a “What Should I Do When I See Pornography?” ken “Watch Your Step” (ChurchofJesusChrist.org). Mabalin nga agaramid dagiti miembro ti pamilia iti maysa a plano maipapan iti no anianto ti aramidenda no maipasangoda iti pornograpia.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F78%2F5e%2F785eb819662b93e93f3f4f3054e6509cb6973007%2F785eb819662b93e93f3f4f3054e6509cb6973007.jpeg/full/!250,/0/default)
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fda%2Fd2%2Fdad25c0ed8962819673c12fd69705303881a7ab5%2Fwatch_your_step.jpeg/full/!250,/0/default)
-
1 Ar-ari 11:9–11.Ania dagiti sumagmamano a “sabali a didios” (bersikulo 10) a mabalin a mangyadayo iti puspusotayo iti Apo? Kasano a mapagtalinaedtayo ti puspusotayo a naisentro iti Nailangitan nga Ama ken ni Jesucristo?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “More Holiness Give Me,” Hymns, no. 131.
Panangpadur-as iti Panangisurotayo
Ipokusmo dagiti pagbatayan wenno prinsipio a mangbendisionto iti pamiliam. Bayat ti nainkararagan a panagadalmo iti balikas ti Dios, saludsodem iti bagim, “Ania ti masarakak ditoy nga agbalinto a napateg unay iti pamiliak?” (kitaen iti Panangisuro iti Wagas ti Mangisalakan, 17).
Panangiladawan iti templo ni Solomon, ni Sam Lawlor