“Hunio 20–26. 2 Samuel 5–7; 11–12; 1 Ar-ari 3; 8; 11: ‘Maipasdekto ti Pagariam iti Agnanayon,’” Umaykayo, Sumurot Kaniak—Para iti Primary: Daan a Tulag 2022 (2021)
“Hunio 20–26. 2 Samuel 5–7; 11–12; 1Ar-ari 3; 8; 11,” Umaykayo, Sumurot Kaniak—Para iti Primary: 2022
Naipatugaw iti Trono ni Ari David, ni Jerry Milia Harston
Hunio 20–26
2 Samuel 5–7; 11–12; 1 Ar-ari 3; 8; 11
“Maipasdekto ti Pagariam iti Agnanayon”
Bayat ti panagbasam kadagiti nasantuan a kasuratan, makaited kenka ti Espiritu Santo iti impresion ken mangparegta kenka a mangammo no anianto ti kapatgan kadagiti ubbing a sursuruam.
Isuratmo dagiti Impresionmo
Yawis ti Panagbibinninglay
Kiddawem iti sumagmamano nga ubbing nga agsarita maipapan kadagiti padasda iti panagbasa kadagiti nasantuan a kasuratan (saggaysa, kadua dagiti pamiliada, wenno iti simbaan). Kaano ken sadino ti pagbasaanda kadagiti nasantuan a kasuratan? Ania ti mariknada no agbasada kadagiti nasantuan a kasuratan? Ania dagiti bendision nga aw-awatenda iti panagtungpalda iti daytoy a bilin?
Isuro ti Doktrina: In-inaudi nga Ubbing
No kasapulak ti pannarabay, makiddawko iti Nailangitan nga Ama.
Iladawan dagitoy a bersikulo no kasano a nagkararag ni David para iti pannarabay ken panangiturong kas ari ti Israel. Kasano a maparegtam dagiti ubbing nga umasideg iti Apo iti kararag no agkasapulanda?
Dagiti Mabalin nga Aktibidad
-
Ilawlawag kadagiti ubbing nga idi agkasapulan ni David iti tulong, isu “immuman,” wenno nagkararag, para iti sungbat. Bayat ti panangbasam iti 2 Samuel 5:19, 23, awisem dagiti ubbing a dumngeg iti balikas nga “immuman” ken agdalikepkepda no mangngeganda daytoy. Paneknekam a saantayo a kanayon a makapagkararag iti Nailangitan nga Ama no kasapulantayo ti tulong.
-
Tapno matulongan dagiti ubbing a mangpanunot maipapan iti no ania koma ti maisaoda no agkararagda, mabalinmo a saludsoden kadakuada no kasano nga ileppasda dagitoy a binatog: “Agyamankami Kenka para iti …” ken “Idawatmi Kenka a…” Pagdrowingem dagiti ubbing kadagiti ladawan dagiti banag a mabalinda a pagyamanan wenno idawat iti kararag.
Ladawanubing a babai nga agkarkararagMakapagkararagtayo iti Nailangitan nga Ama para iti tulong ken pannarabay.
-
Isaritam kadagiti ubbing maipapan iti maysa a panawen idi nagkararagka para iti tulong ti Nailangitan nga Ama. Kasano a sinungbatanna ti kararagmo? Ania ti pagdumaan a naaramid a gapu ti nangtulonganna Kenka? Awisem dagiti ubbing a mangibinglay kadagiti padasda.
Ni Jesucristo ti Aritayo.
Idi ni David ti ari ti Israel, imbaga ti Apo kenkuana a “ti trono[na] mapasingkedanto iti agnanayon” (2 Samuel 7:16). Maitudo daytoy a kari ken ni Jesucristo, ti Agnanayon nga Aritayo, a naipasngay babaen iti an-annabo ni David.
Dagiti Mabalin nga Aktibidad
-
Awisem ti maysa kadagiti ubbing nga agpammarang a maysa nga ari wenno reyna. No mabalin, ikkam ti ubing iti simple a props nga iggamanna. Ania ti ari wenno reyna? Ania ti aramidenda? Isaritam kadagiti ubbing a maysa nga ari ni David, ket isu ti maysa a kapuonan ni Jesucristo, nga awagantayo iti “Ari dagiti ar-ari” (Apocalipsis 19:16). Tulongam dagiti ubbing a mangpanunot kadagiti wagas a pakaipakitaantayo a mamatitayo a ni Jesucristo ti Agnanayon nga Aritayo.
-
No makumpleto dagiti ubbing ti panid ti aktibidad iti daytoy a lawas, agkanta wenno agpatugtog kadagiti rekording dagiti kanta a maitudo ken ni Cristo kas Aritayo, kas iti “He Died That We Might Live Again,” “Called to Serve,” “Rejoice, the Lord Is King!” wenno “I Believe in Christ” (Children’s Songbook, 65, 174–75; Hymns, nos. 66, 134). Idawat kadagiti ubbing a dumngeg iti balikas nga “Ari” ken mangiggem iti maysa a ladawan ni Jesus no mangngeganda daytoy. Kasano ti mariknatayo no agkantatayo iti maipapan ken ni Jesus?
Makapagnaak kadagiti dalan ti Dios.
Para kadagiti Israelita, ti panangbangon ken panangidaton iti templo ket maysa a gundaway a mangyasideg iti puspusoda iti Apo ken agkumitda manen a “magna kadagiti amin a daldalanna” (1 Ar-ari 8:58). Kasano a matulongam dagiti ubbing a sursuruam a “magna kadagiti amin a daldalanna”?
Dagiti Mabalin nga Aktibidad
-
Ipakitam kadagiti ubbing ti maysa a ladawan ti kabaruanan a templo ken ti templo a binangon ni Solomon (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Ilawlawag nga idi binangon ni Solomon ti templo para kadagiti Israelita, inallukoyna ida a “magna kadagiti amin a daldalan ti [Apo]” (1 Ar-ari 8:58). Ibagam kadagiti ubbing no kasano a tulongannaka ti templo a magna kadagiti dalan ti Apo. Awisem dagiti ubbing a mangibinglay no ania ti riknada maipapan iti templo. Makipagkansion kadagiti ubbing iti maysa a kanta maipapan iti templo kas iti “I Love to See the Temple” (Children’s Songbook, 95).
-
Ikkam ti sumagmamano nga ubbing kadagiti sinanpuso a papel ken dadduma pay nga ubbing kadagiti sinantugot ti saka a papel. Basaem ti 1 Ar-ari 8:58, ket idawatmo kadagiti ubbing a mangitag-ay kadagiti sinanpusoda no isaom ti balikas a “puspuso” ken sinantugot no isaom ti ragup ti balikas a “magna kadagiti amin a daldalanna.” Tulongam dagiti ubbing a makaawat a magnatayo kadagiti daldalan ti Apo no surotentayo ni Jesus ken padasentayo ti agbalin a kas Kenkuana. Saludsodem kadagiti ubbing no ania ti aramidenda tapno magna kadagiti dalan ti Mangisalakan. Mabalinyo ti agkansion iti maysa a kanta maipapan iti panangsurot ken ni Jesus, kas iti “I’m Trying to Be like Jesus” (Children’s Songbook, 78–78).
Isuro ti Doktrina: In-inauna nga Ubbing
Ni Jesucristo ti Aritayo.
Dagiti ari a mabasatayo maipapan iti Daan a Tulag addaanda iti amin a pakapilawan ken nakaaramid iti biddut—uray pay dagiti nasayaat. Ngem ti Ari a naipadto nga umay manipud iti linia ni David, ni Jesucristo, isu ti naan-anay ken agturayto iti agnanayon.
Dagiti Mabalin nga Aktibidad
-
Awisem dagiti ubbing a mangbasa no ania ti imbaga ni propeta Natan ken ni Ari David iti 2 Samuel 7:16–17, ket saludsodem kadakuada no ania iti panagkunada ti mabalin a kayat a sawen daytoy a padto. Kasano a mabalin nga awan patinggana ti pagarian ni David? Tulongam dagiti ubbing a mangsarak ken mangbasa kadagiti binatog ti nasantuan a kasuratan a mangisuro a maysa nga Ari ni Jesucristo, nga an-annabo ni David, kas iti Lucas 1:32–33; Juan 18:33–37; ken Apocalipsis 19:16. Kasano a mayarig ni Jesucristo iti maysa nga ari? Ania dagiti sumagmamano a wagas a maipakitatayo a ni Jesucristo ti Agnanayon nga Aritayo?
-
Makipagkanta kadagiti ubbing iti sumagmamano a himno a mangitudo ken ni Cristo kas Aritayo, a kas “Come, O Thou King of Kings,” “Rejoice, the Lord Is King!” or “Jesus, Once of Humble Birth” (Hymns, nos. 59, 66, 196). Ania ti isuro dagitoy a himno maipapan iti no ania ti kaipapanan ti maaddaan ken ni Jesucristo kas Aritayo?
Maparmekko ti sulisog.
Agaramid dagiti ubbing a sursuruam iti babassit ngem napapateg a pangngeddeng iti inaldaw. Kasano a matulongam ida a makaawat iti kinapateg ti panagpili no ania ti umno uray no narigat?
Dagiti Mabalin nga Aktibidad
-
Irebyum ti 2 Samuel 11 kadagiti ubbing, a mangilawlawag kadagiti pili nga inaramid ni David. Kiddawen kadagiti ubbing no ania dagiti nasayaat a pili a nasken koma nga inaramid ni David. Ania dagiti sumagmamano a banag a mabalintayo nga aramiden no masulisogtayo a makatulong kadatayo nga agpili iti umno?
-
Tapno mangibinglay iti maysa a pagwadan ti maysa a tao a, kas ken ni David, nagkedked iti sulisog, saludsodem kadagiti ubbing no malagipda ti estoria ni Jose ken ti asawa ni Potifar (kitaen iti Genesis 39:7–12). Mabalinmo nga irebyu daytoy nga estoria kadagiti ubbing ket tulongam ida a mangidilig daytoy iti estoria ni David. Ania ti masursurotayo manipud kadagiti estoria ni David ken ti estoria ni Jose maipapan iti no kasano ti mangkedked iti sulisog?
Yallukoy ti Panagsursuro iti Pagtaengan
Tulongam dagiti ubbing a mangpanunot iti maysa a banag a mabalinda nga aramiden a mangyaplikar no ania ti nasursuroda ita nga aldaw. Kalpasanna allukoyem ida nga agtignay kadagiti planoda.
Panangpadur-as iti Panangisurotayo
Surnadam dagiti awis nga agtignay. No awisem dagiti ubbing nga agtignay iti no ania ti masursuroda, surnadam ti awismo kabayatan ti sumaruno a klase. Mangipakita daytoy kadagiti ubbing a maseknanka maipapan iti no kasano ti panangbendision ti ebanghelio ti biagda. Bayat ti panangibinglayda kadagiti padasda, mapapigsadanto ken agtitinnulongdanto nga agtungpal iti ebanghelio.