Supiaten ni Elias dagiti Saserdote ni Baal, ni Jerry Harston

Hunio 27–Hulio 3

1 Ar-ari 17–19

“No ni Jehova Isu ti Dios, Sumurotkayo Kenkuana”

Magustuan ti kaaduan nga ubbing dagiti estoria. Tulongam dagiti ubbing a mangilasin kadagiti kinapudno iti estoria a masarakan iti 1 Ar-ari 17–19 a mangpapigsanto iti pammatida ken ni Jesucristo.

Isuratmo dagiti Impresionmo

Yawis ti Panagbibinninglay

Ipakitam kadagiti ubbing dagiti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Idawatmo kadakuada a mangibinglay no ania ti ammoda maipapan kadagiti estoria a nailadawan kadagiti ladawan. Ania ti masursurotayo manipud kadagitoy nga estoria?

Isuro ti Doktrina: In-inaudi nga Ubbing

1 Ar-ari 17

Bendisionan ti Apo dagiti adda pammatina.

Irekord ti1 Ar-ari 17 dagiti sumagmamano a pagarigan ti naindaklan a pammati. Kas bunga ti kaadda ti naindaklan a pammati, napakan ni Elias babaen dagiti wak iti panawen ti panagbisin, pinaadu ti balo a babai ken ti anakna a lalaki ti taraonda, ken pinaggungar ni Elias ti anak a lalaki ti balo a babai manipud iti patay.

Dagiti Mabalin nga Aktibidad

• I-display dagiti ladawan wenno banag a maigiddan kadagiti estoria iti 1 Ar-ari 17, kas iti tumatatayab, tinapay, wenno maysa nga ubing a lalaki. Isaritam dagitoy nga estoria kadagiti ubbing (“Ni Elias a Propeta” iti Dagiti Estoria iti Daan a Tulag ket makatulong), ket awisem ida a mangsapul iti ladawan wenno banag a maigiddan iti tunggal estoria. Yunay-unay nga adda pammati ni Elias a Propeta ken ti balo a babai ken ni Jesucristo ken immawatda kadagiti naindaklan a bendision.

• Tulongam dagiti ubbing a mangpanunot kadagiti wagas a pakaipakitaanda nga adda pammatida iti Nailangitan nga Ama ken ni Jesucristo, a kayatna a sawen a mamatida Kadakuada ken agtalekda Kadakuada. Makipagkanta kadakuada iti maipapan iti pammati, kas iti “I Know My Father Lives” (Children’s Songbook, 5).

1 Ar-ari 18:17–39

Mapilik ti sumurot ken ni Jesucristo.

Ginuyugoy ni Elias dagiti tao ti Israel a nagaramid iti pangngeddeng a sumurot ken ni Jesucristo. Tulongam dagiti ubbing a mangkita a makaaramidda iti kastoy met laeng a pili.

Dagiti Mabalin nga Aktibidad

• Ilawlawag kadagiti ubbing a saan a sigurado dagiti tao iti panawen ni Elias no kayatda ti sumurot iti Apo. Ibinglay ti estoria maipapan no kasano nga inawis ni Elias ida a pumili a mangsurot iti Apo, a masarakan iti 1 Ar-ari 18:17–39 (kitaen met iti “Ni Elias ken dagiti Saserdote ni Baal” iti Dagiti Estoria iti Daan a Tulag). Ibagam kadagiti ubbing no apay a pinilim ti sumurot ken ni Jesucristo, ken saludsodem kadakuada no apay a pilienda ti sumurot Kenkuana.

• Ibasam kadagiti ubbing no ania ti kinuna ni Elias kadagiti tao: “No ni Jehova Isu ti Dios, sumurotkayo kenkuana” (1 Ar-ari 18:21). Ania ti kaipapanan ti sumurot ken ni Jesucristo? Tulongam dagiti ubbing a mangpanunot kadagiti nalawag a banag nga aramidendanto a mangsurot ken ni Jesucristo, ket awisem ida a mangidrowing kadagiti ladawan ti bagbagida nga agar-aramid kadagita a banag.

  

  Mabalintayo a pilien ti sumurot ken ni Jesucristo.

1 Ar-ari 19:9–12

Agsao kaniak ti Espiritu Santo iti naalumamay, bassit a timek.

Addaan iti sumagmamano a pannarabay, mabigbig dagiti babassit nga ubbing ti impluensia ti Espiritu Santo iti biagda. Utobem no kasano a matulongam ida.

Dagiti Mabalin nga Aktibidad

• Gupgopem para kadagiti ubbing ti estoria a masarakan iti 1 Ar-ari 19:9–12, ken basaem dagiti bersikulo 11–12. Awisem ida nga agaramid kadagiti tignay a mangibagi iti napigsa nga angin, ti ginggined, ken ti apuy. Kalpasanna awisem ida nga agtugaw a natalna bayat ti panangbasam iti gibus ti bersikulo 12 iti naannayas a timek: “kalpasan ti apuy maysa a bassit a naalumamay a timek.” Idawatmo kadakuada a mangpadas nga agsao iti naalumamay, bassit a timek. Isaritam ti maipapan kadagiti panawen idi napadasam ti maysa a parikna manipud iti Espiritu Santo.

• Tulongam dagiti ubbing a mangbigbig no mariknada ti impluensia ti Espiritu Santo. Kas pagarigan, mangpatugtog wenno mangkansion iti maysa a naraem a kanta maipapan ken ni Jesus, ket saludsodem kadakuada no ania ti mariknada no panunotenda ti maipapan Kenkuana. Saludsodem kadakuada no kasano ti riknada kabayatan dagiti dadduma pay a naraem nga aktibidad, kas iti panagkararag a kadua ti pamiliada wenno pannakiranud iti sakramento. Ilawlawag nga umay dagitoy a rikna manipud iti Espiritu Santo. Isaritam kadagiti ubbing no kasano a binendisionan ti bileg ti Espiritu Santo ti biagmo.

Isuro ti Doktrina: In-inauna nga Ubbing

1 Ar-ari 17:8–16

No idawat ti Apo kaniak nga agsakripisio, makapagtungpalak iti pammati.

Nagtalek ni Balo ti Zarepat iti Apo ken iti propetana, uray pay no naidawat kenkuana nga agaramid iti dakkel a sakripisio. Makatulong daytoy nga estoria kadagiti ubbing no kiddawen ti Apo kadatayo nga agaramid kadagiti sakripisio.

Dagiti Mabalin nga Aktibidad

• Ibasam kadagiti ubbing ti 1 Ar-ari 17:8–16. Awisem ida a mangyakem iti estoria bayat ti panangbasam iti daytoy iti maikadua a gundaway. Agsardeng iti nadumaduma a punto ket saludsodem kadakuada no kasano ti riknada no isuda ni Elias wenno ti balo a babai. Awisem ida a mangibinglay no ania ti masursuroda manipud iti daytoy nga estoria.

• Awisem ti maysa nga ubing a mangidrowing iti pisarra ti maysa a ladawan ti no ania ti indawat ti Apo iti balo a babai nga ited ken ni Elias (kitaen iti 1 Ar-ari 17:12–13). Awisem ti sabali pay nga ubing a mangidrowing iti no ania ti inawat ti balo a babai kas supapak (kitaen iti 1 Ar-ari 17:15–16). Ania dagiti dadduma pay a banag nga idawat ti Apo nga isakripisiotayo? Awisem dagiti ubbing a mangibinglay no kasano a nabendisionanda iti panagaramid kadagiti sakripisio.

1 Ar-ari 18:17–39

Mapilik ti sumurot ken ni Jesucristo.

Adda panagduadua dagiti Israelita maipapan iti panangsurot iti Apo. Utobem no kasano a maparegtam dagiti ubbing nga agkumit iti kinadisipuloda.

Dagiti Mabalin nga Aktibidad

• Dutokam ti tunggal ubing a mangbasa iti sumagmamano a bersikulo manipud iti 1 Ar-ari 18:17–39 ken mangidrowing iti maysa a ladawan nga iladawan dagiti bersikulona. Tulongam dagiti ubbing a makaawat kadagiti bersikulo no kasapulan. Kalpasanna pausarmo dagiti ladawanda a mangisarita iti estoria. Ania iti isuro kadatayo daytoy nga estoria maipapan iti Apo?

• Idawat kadagiti ubbing a mangisarita maipapan kadagiti panawen idi nasken a mangeddengda iti nagbaetan ti dua nga agduma a banag. Ania ti nangtulong kadakuada a nangeddeng? Tulongam ida a mangpanunot kadagiti kasasaad idi nalabit a kasapulanda ti mangeddeng no surotenda wenno saan ni Jesucristo. Ania dagiti kinapudno manipud iti estoria iti 1 Ar-ari 18:17–39 a makatulong kadakuada a mangeddeng?

1 Ar-ari 19:9–12

Agsao kaniak ti Espiritu Santo iti naalumamay, bassit a timek.

Napno ti lubong kadagiti makasinga nga ariwawa a mangparigat a dumngeg iti naalumamay, bassit a timek ti Espiritu. Kasano a matulongamto dagiti ubbing a dumngeg iti daytoy?

Dagiti Mabalin nga Aktibidad

• Idawatmo kadagiti ubbing a dumngeg a nasayaat bayat ti panangibasam iti 1 Ar-ari 19:11–12 kadakuada a siuulimek. Awisem ida a mangsukisok iti 1 Ar-ari 19 a mangsapul kadagiti bersikulo a basaem ken sursuruem no ania ti ar-aramiden ni Elias. Isaritam maipapan iti no ania ti nasken nga aramidenda tapno dumngeg no ania ti isasaom, ken tulongam ida a mangidilig iti daytoy iti no ania ti nasken nga aramidentayo tapno dumngeg iti “naalumamay a bassit a timek” ti Espiritu. Pagsisinnublatem dagiti ubbing nga agbasa a siuulimek kadagiti dadduma pay a bersikulo manipud iti 1 Ar-ari 19 idinto nga agsapul dagiti dadduma pay nga ubbing kadagiti bersikulo iti nasantuan a kasuratan.

• Ibinglaymo kadagiti ubbing dagiti sumagmamano a nasantuan a kasuratan a mangiladawan no kasano a makisarita kadatayo ti Espiritu (kitaen iti Pangiwanwan iti Nasantuan a Kasuratan, “Pammaregta, Paregtaen,” scriptures.ChurchofJesusChrist.org). Idawat kadagiti ubbing a mangisarita maipapan kadagiti panawen idi nariknada ti Espiritu Santo a mangtartarabay kadakuada wenno agpampaneknek kadakuada. Ania ti ar-aramidenda? Ania ti makasinga kadatayo iti panangbigbig iti Espiritu? Aggigiddan a mangbasa iti Moroni 4:3, ken allukoyem dagiti ubbing a pumili iti maysa a banag nga aramidendanto tapno “kanayon ti Espirituna a mangkadkadua kadakuada.”

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a banag a kayatda nga aramiden gapu iti no ania ti nasursuroda ita nga aldaw. Kas pagarigan, mabalin mangitudingda iti panggep a tun-oyen a mainaig iti naespirituan, intelektual, pisikal, wenno sosial tapno agbalin nga ad-adda pay a kas ken ni Jesucristo.

Panangpadur-as iti Panangisurotayo

Tulongam dagiti ubbing a mangbigbig iti Espiritu. “Maysa kadagiti kapatgan a banag a maaramidmo kas maysa a mannursuro ket mangtulong kadagiti sursuruam a mangbigbig iti impluensia ti Espiritu Santo. … Tulongam dagiti [ubbing] manginaig kadagiti naespirituan a riknada iti impluensia ti Espiritu Santo.“ (Panangisuro iti Wagas ti Mangisalakan,11.)