“Hulio 4–10. 2 Ar-ari 2–7: ‘Adda maysa a Propeta iti Israel,’” Umaykayo, Sumurot Kaniak—Para iti Primary: Daan a Tulag 2022 (2021)
“Hulio 4–10. 2 Ar-ari 2–7,” Umaykayo, Sumurot Kaniak—Para iti Primary: 2022
Ladawan ni Eliseo a mangipakpakita iti adipenna ti luglugan nga apuy, © Review & Herald Publishing/licensed from goodsalt.com
Hulio 4–10
2 Ar-ari 2–7
“Adda maysa a Propeta iti Israel”
Nairanta dagiti aktibidad iti daytoy a balabala a mangigapu iti bukodmo a managpartuat a kapanunotan. Babaen iti nainkararagan a panagadal, mabalinmo ti umawat iti pammaregta tapno maipaay dagiti kasapulan dagiti ubbing a sursuruam.
Isuratmo dagiti Impresionmo
Yawis ti Panagbibinninglay
Tapno maallukoy dagiti ubbing a mangibinglay no ania ti ammoda maipapan ken ni propeta Eliseo, awisem ida a mangidrowing iti ladawan ti maysa a banag nga inaramidna.
Isuro ti Doktrina: In-inaudi nga Ubbing
Makaaramid ti Dios kadagiti milagro iti biagko.
Babaen ken ni propeta Eliseo, binendisionan ti Apo ti adu a tao iti namilagruan a wagas. Tulongam dagiti ubbing a mangbigbig kadagiti milagro ti Apo iti biagda.
Dagiti Mabalin nga Aktibidad
-
Mangibinglay iti maysa wenno ad-adu pay kadagiti milagro a nairekord iti 2 Ar-ari 4–5 (kitaen iti “Ni Eliseo a Propeta” ken “Agasan ni Eliseo ni Naaman iti Dagiti Estoria iti Daan a Tulag). Paibinglay kadagiti ubbing no ania ti ammoda maipapan kadagitoy nga estoria. Awisem ida a mangulit a mangisarita kadagiti estoria iti tunggal maysa.
-
Paneknekam a mausar ti Apo iti bilegna nga agaramid kadagiti naindaklan a banag a makatulong kadatayo. Maawagantayo dagitoy a banag iti milagro. Ibinglay no kasano nga impakita ti Apo ti ayatna para kenka kadagiti wagas a dadakkel wenno babassit. Aggigiddan a kantaen ti maysa a kansion maipapan iti ayat ti Dios, kas iti “My Heavenly Father Loves Me” (Children’s Songbook, 228–29). Idawat kadagiti ubbing a mangibinglay iti no kasano nga ammoda nga ay-ayaten ida ti Nailangitan nga Ama.
Makapagpiliak nga agaramid iti no ania ti ibilin ti Dios babaen iti propetana.
Narigatan ni Naaman iti panagtungpal idi imbaga ti propeta Eliseo kenkuana no kasano a maagasan ti kukutelna. Utobem no kasano a matulongam dagiti ubbing a makaawat kadagiti bendision nga isangbay ti panagtungpal.
Dagiti Mabalin nga Aktibidad
-
Isaritam ti estoria ni Naaman (kitaen iti 2 Ar-ari 5:9–14; “Agasan ni Eliseo ni Naaman” iti Dagiti Estoria iti Daan a Tulag; kitaen met iti ladawan ni Naaman iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Yunay-unay nga idi damo saan a kayat ni Naaman ti agbuggo iti Karayan Jordan, nupay imbaga ni Eliseo kenkuana a daytoy ti makaagas iti sakitna. Isaritam maipapan iti maysa a panawen idi saanka a sigurado no kayatmo nga agaramid iti umno a banag, ken tulongam dagiti ubbing a mangpanunot kadagiti bukodda a pagarigan. Kalpasanna ibinglay no kasano a nabendisionan ni Naaman idi inaramidna ti umno a pili.
-
Ibasam ti 2 Ar-ari 5:13 kadagiti ubbing, ken ilawlawag a nakatulong dagiti adipen ni Naaman kenkuana a mangikeddeng nga agtungpal ken ni propeta Eliseo. Tulongam dagiti ubbing a mangpanunot kadagiti wagas a mabalin a pakatulonganda kadagiti gagayyemda wenno miembro ti pamiliada a dumngeg ken agtungpal iti propeta.
Bambantayannak ti Apo.
Idi nakita ti adipen ni Eliseo ti buyot ti Siria a mangliklikmut kadakuada, kasta unay ti butengna. Nupay kasta, imbaga ni Eliseo kenkuana a “dika agbuteng” gapu ta adda ti Apo kadakuada (2 Ar-ari 6:16).
Dagiti Mabalin nga Aktibidad
-
Ibasam ti 2 Ar-ari 6:15 kadagiti ubbing, wenno i-paraphrase-mo daytoy tapno maawatanda. Awisem dagiti ubbing a mangipapan a nalikmutanda iti dakkel a buyot nga addaan kadagiti kabalio kenluglugan, kas iti naaramid iti adipen ni Eliseo. Kasano koma ti mariknada? Ania koma ti aramidenda? Idawatmo kadakuada nga agkidem bayat ti panangbasam iti 2 Ar-ari 6:16–17 kadakuada. No madanonmo dagiti balikas a “luktam koma dagiti matana,” idawatmo kadagiti ubbing nga agmulagatda. Iladawan kadakuada no ania ti nakita ti adipen a mangsalsaluad kenkuana ken ni Eliseo. Ibinglay no kasano nga ammom a bambantayannatayo ti Apo.
-
Aggigiddan nga agkansion iti kanta maipapan iti panangaywan ti Dios kadatayo, kas iti umuna a berso ti “Dearest Children, God Is Near You” (Hymns, no. 96). Sukatam dagiti balikas iti kanta iti nagnagan dagiti ubbing a mangyunay-unay a bambantayan ida ti Dios.
Isuro ti Doktrina: In-inauna nga Ubbing
Makaaramid ti Dios kadagiti milagro iti biagko.
Kabayatan ti panagministrona, inagasan ken binendisionan ni Eliseo ti adu a tao. Kasano a makatulong dagiti milagro iti 2 Ar-ari 4–5 kadagiti ubbing a mangbigbig iti ima ti Nailangitan nga Ama iti biagda?
Dagiti Mabalin nga Aktibidad
-
Awisem dagiti ubbing a mangisurat iti pisarra ti adu a milagro agingga a kabaelanda a lagipen manipud kadagiti nasantuan a kasuratan. Kalpasanna ikkam ida iti gundaway a mangrebyu iti 2 Ar-ari 4–5 ket inayon iti listaanda (kitaen iti 2 Ar-ari 4:1–7, 14–17, 32–35, 38–41, 42–44; 5:10–14). Ania ti isuro dagitoy a milagro maipapan no kasano ti rikna ti Nailangitan nga Ama maipapan kadatayo?
-
Idawatmo kadagiti ubbing nga agsarita maipapan iti no ania ti maysa a milagro. No kasapulanda ti tulong, mabalinda nga irebyu ti “Milagro” iti Pangiwanwan iti Nasantuan a Kasuratan (scriptures. ChurchofJesusChrist.org). Awisem ida a mangibinglay iti sumagmamano a milagro nga inaramid ni Jesus. Isaritam maipapan iti no kasano a nakitamon iti bileg ti Dios iti biagmo. Mabalinmo nga iraman dagiti inaldaw a milagro a kas iti rikna ti talna, ti sagut ti inaldaw a panagbiag, wenno mangtulong kadagiti inaldaw nga aramiden. Awisem dagiti ubbing a mangisarita maipapan kadagiti milagro iti biagda, agpada a dadakkel ken babassit.
Mapilik ti agbalin a napudno, napakumbaba, ken natulnog.
Tinarigagayan ni Naaman a maagasan ti kukutelna, ngem saanna a ninamnama ti simple a pangiwanwan nga inted kenkuana ni Eliseo: “Inka ket agdigoska iti mamimpito a daras idiay Jordan” (2 Ar-ari 5:10). Ibilangmo no kasano a mausarmo daytoy nga estoria a mangisuro kadagiti ubbing maipapan iti pammati ken ni Jesucristo, panagpakumbaba, ken panagtulnog.
Dagiti Mabalin nga Aktibidad
-
Isurat ti pammati, kinapakumbaba, ken panagtungpal iti pisarra, ket saludsodem kadagiti ubbing no ania ti kaipapanan dagitoy a balikas (kitaen iti Napudno iti Pammati, 54–56, 86–87, 108–9). Awisem dagiti ubbing a mangbasa iti 2 Ar-ari 5:9–14. Mabalinmo pay nga ipakita dagiti paset ti video a “Naaman and Elisha” (ChurchofJesusChrist.org). Kasano nga impakita ni Naaman ti pammatina iti Apo, kinapakumbaba, ken panagtungpalna? Apay a napateg nga addaantayo kadagitoy a kababalin?
-
Idawatmo kadagiti ubbing a mangisarita maipapan iti maysa a panawen idi tinulongan ida ti maysa a gayyem a pumili iti umno. Kasta met a mangibinglayka iti bukodmo a padas. Aggigiddan a mangbasa iti 2 Ar-ari 5:10–13 tapno maammuan no kasano a nakatulong kenkuana dagiti adipen ni Naaman a pumili nga agtungpal iti propeta. Ania ti maaramidtayo a makatulong iti tunggal maysa a sumurot iti propeta iti agdama?
-
Awisem dagiti ubbing a mangileppas iti panid ti aktibidad ken mangibinglay iti maysa a miembro ti pamilia wenno gayyem iti maysa a banag a nasursuroda manipud iti estoria ni Naaman iti 2 Ar-ari 5:1–15.
Saanak nga agmaymaysa.
Mabalin a no dadduma makarikna dagiti ubbing a sursuruam kas iti narikna ti adipen ni Eliseo—saan a sigurado no kasano ti mangsaranget kadagiti karit a naipasango kadakuada. Mabalinmo nga usaren ti pakaammuan iti 2 Ar-ari 6:8–17 a mangisuro kadakuada a “dika agbuteng” gapu ta saan ida a pinanawan ti Apo nga agmaymaysa.
Dagiti Mabalin nga Aktibidad
-
Aggigiddan a mangbasa iti 2 Ar-ari 6:15-17. Awisem ti maysa kadagiti ubbing nga agpammarang nga adipen ni Eliseo idinto nga agsaludsod dagiti dadduma pay nga ubbing maipapan iti padasna, kas iti no kasano ti nariknana idi linikmutan ti buyot ti Siria ti siudad wenno no ania ti kasla ti kayariganna ti makakita iti buyot ti Dios. Isaritam kadagiti ubbing maipapan kadagiti panawen a mariknada nga agmaymaysada iti panangikarigatan nga agbiag iti ebanghelio. Kasano a tulongannatayo ti Apo a mangammo a saantayo nga agmaymaysa?
-
Agkanta maipapan iti panagpannuray iti Apo, kas iti “When Faith Endures” (Hymns, no. 128). Ania ti isuro daytoy a kanta maipapan iti panagtalek iti Apo?
Yallukoy ti Panagsursuro iti Pagtaengan
Awisem dagiti ubbing a mangibinglay kadagiti padas iti pamiliada idi nabigbigda ti ima ti Dios iti biagda. Allukoyem ida a mangkiddaw kadagiti miembro ti pamiliada a mangibinglay kadagiti kasta met la a padas a padas.
Panangpadur-as iti Panangisurotayo
Makasursuro dagiti ubbing iti adu a wagas. “Dagiti panagkagumaanmo a mangisuro kadagiti ubbing ti agbalinto a kasamayan kabayatan ti panangusarmo iti nadumaduma a pamay-an iti panangisuro,” mairaman dagiti estoria, tulong a ladawan [visual aid], ken musika (Panangisuro ti Wagas iti Mangisalakan,25).