dagiti tao a pumampanaw iti siudad

Ti Ipapanaw dagiti Balud, ni James Tissot ken dagiti dadduma

Hulio 11–17

2 Ar-ari 17–25

“Nagtalek iti Apo a Dios ti Israel”

Bayat ti panangplanom kadagiti aktibidad iti panagsursuro para kadagiti ubbing, laglagipem a mabalin nga ibagay dagiti aktibidad para kadagiti in-inaudi nga ubbing iti daytoy a balabala para kadagiti in-inauna nga ubbing ken vice versa.

Isuratmo dagiti Impresionmo

icon iti panagbibinninglay

Yawis ti Panagbibinninglay

Isurat ti nagan ti tunggal ubing iti maysa a papel, ket ikabil dagiti papel iti maysa a container. Iti rugi ti klase, pagsisinnublaten dagiti ubbing a mangpili iti maysa a nagan. No mabunot ti nagan ti maysa nga ubing, awisem dayta ubing a mangibinglay iti maysa a banag a nasursurona maipapan iti ebanghelio wenno maipapan ken ni Jesucristo itay kallabes. Ituloy agingga a maaddaan ti tunggal ubing iti gundaway a mangibinglay.

icon iti panangisuro

Isuro ti Doktrina: In-inaudi nga Ubbing

2 Ar-ari 18:3, 5

Makapagtalekak iti Nailangitan nga Ama ken ni Jesucristo.

Makatulong ti pagwadan ni Ezekias iti 2 Ar-ari 18:3, 5 kadagiti ubbing a sursuruam nga agtalek iti Dios.

Dagiti Mabalin nga Aktibidad

• Manginagan iti sumagmamano a banag a mabalin nga aramiden ti maysa a nasayaat nga ari ken sumagmamano a banag a mabalin nga aramiden ti maysa a dakes nga ari. Idawat kadagiti ubbing a tumakderda ken agragsak para kadagiti nasayaat a banag ket agtugawda para kadagiti dakes a banag. Ilawlawag kadagiti ubbing nga aduan iti ari ti Israel, sumagmamano ti nalinteg ken sumagmamano ti saan a nalinteg. Awisem dagiti ubbing a dumngeg no ania ti namagbalin ken ni Ezekias a nasingpet nga ari bayat ti panangbasam iti 2 Ar-ari 18:3, 5. Tulongam ida a mangpanunot kadagiti wagas a pakaipakitaantayo nga agtalektayo iti Apo a kas ken ni Ezekias.

• Saludsodem kadagiti ubbing no ania ti kaipapanan ti agtalek iti maysa a tao. Isaritam maipapan kadagiti tao a pagtalkam, ken pagsaritaem dagiti ubbing a mangaramid met iti kasta. Ipakitam ti maysa a ladawan ni Jesucristo. Apay a nasken nga agtalektayo ken ni Jesucristo? Yebkasmo ti panagtalekmo nga ay-ayatennatayo ni Jesucristo ket tulongannatayto nga agsubli a makipagindeg iti agnanayon iti Nailangitan nga Ama.

2 Ar-ari 22:8–11; 23:2

Maysa a bendision dagiti nasantuan a kasuratan.

Nupay mabalin a saan a kabaelan nga agbasa wenno maawatan dagiti in-inaudi nga ubbing ti amin a banag kadagiti nasantuan a kasuratan, mabalin a mabendisionandanto babaen ti bileg ti nasantuan a kasuratan. Ania ti maaramidmo tapno makatulong kadakuada a maaddaan iti tarigagay a mabendisonan babaen ti balikas ti Dios?

Dagiti Mabalin nga Aktibidad

• Ilemmeng ti maysa a kopia dagiti nasantuan a kasuratan iti maysa a lugar iti siled, ken awisem dagiti ubbing a mangsapul iti daytoy. Ilawlawag a kadagidi aldaw ni Ari Josias, adu kadagiti tao ti saan a nagsursuro manipud kadagiti nasantuan a kasuratan agingga a nasarakan ida ti maysa a saserdote iti templo (kitaen iti 2 Ar-ari 22:8–11). Ania dagiti nasantuan a kasuratan? Apay a kasapulantayo dagiti nasantuan a kasuratan? Isaritam kadagiti ubbing no apay a naragsaktayo nga addaantayo kadagiti nasantuan a kasuratan iti agdama, ket pangibinglayem ida iti riknada maipapan kadagiti nasantuan a kasuratan.

• Ibasam 2 A-ar 23:2 kadagiti ubbing, ket idawatmo kadakuada a dumngeg iti no ania ti inaramid ti ari kadagiti nasantuan a kasuratan. Apay a napateg a dumngeg ti tunggal maysa no ania ti naisurat kadagiti nasantuan a kasuratan? Agkanta iti maipapan kadagiti nasantuan a kasuratan, a kas iti “Search, Ponder, and Pray” (Children’s Songbook,109), ket kiddawen kadagiti ubbing nga agsarita maipapan iti no ania ti mariknada no mangngeganda dagiti pannursuro ken estoria manipud kadagiti nasantuan a kasuratan.

  pamilia nga agad-adal kadagiti nasantuan a kasuratan

  Makatulong dagiti nasantuan a kasuratan a mangiturong iti puspusotayo iti Apo.

icon iti panangisuro

Isuro ti Doktrina: In-inauna nga Ubbing

2 Ar-ari 18:3–6; 19:14–19

Makapagtalekak iti Nailangitan nga Ama ken ni Jesucristo.

Idi impangta dagiti Asirio ti Jerusalem, immasideg ti nalinteg nga Ari Ezekias iti Apo a sipapammati. Makatulong kenka ken kadagiti ubbing ti pagwadan ni Ezekias a mangisarita maipapan no kasano a maipakitatayo ti pammatitayo iti Apo, uray pay no makarit dayta a pammati.

Dagiti Mabalin nga Aktibidad

• Iti panangusarmo iti mapa 3, “Ti Pannakabingay ti 12 a Tribu,” ilawlawag biit kadagiti ubbing a pinarmek dagiti tao a maawagan iti Asirio ti Akin-amianan a Pagarian ti Israel. Ilawlawag nga idi agangay pinadas a pinarmek dagiti Asirio ti Akin-abagatan a Pagarian ti Juda. Awisem dagiti ubbing a mangipapan no kasano ti mariknada no nagnaedda iti Juda ken ammoda a dumteng dagiti Asirio a mangdadael iti siudad. Idawat kadagiti ubbing a mangbasa iti 2 Ar-ari 18:3, 5–6 tapno ammuen no apay a kinabaelan ni Ezekias, ti ari ti Juda, ti nagtured, idi dimteng dagiti Asirio.

• Awisem dagiti ubbing a mangbasa iti 2 Ar-ari 19:14–19, a mangsapsapul no ania ti inaramid Ezekias idi pinangtaan dagiti Asirio ti pagarianna. Kasano a ti panangaramid kadagitoy a banag ti mangipakita a nagtalek isuna iti Apo? Ania ti maaramidtayo a mangipakita iti panagtalektayo iti Apo no kasapulantayo ti tulong?

2 Ar-ari 22:8–13; 23:2–3

Isuro kadatayo ti nasantuan a kasuratan no kasano ti mangsurot ken ni Jesucristo.

Kalpasan dagiti tawen ti naespirituan a kinasipnget, pinabaro dagiti Judio ti panagkumitda iti Apo. Napasamak daytoy gapu ta natakuatan manen ni Ari Josias ti linteg ken imbasana daytoy kadagiti tao. Makatulong daytoy a pakaammo kadagiti ubbing a makaawat no apay a napateg unay dagiti nasantuan a kasuratan.

Dagiti Mabalin nga Aktibidad

• Isaritam kadagiti ubbing nga imbaga ni Ari Josias kadagiti taona a mangtarimaan iti templo, ket bayat ti panangaramidda, nakasarakda iti maysa a banag a napateg unay. Awisem dagiti ubbing a mangbasa iti 2 Ar-ari 22:8–11 tapno ammuen no ania daytoy. Ilawlawag a naglaon ti libro a nasarakanda kadagiti katulagan ken bilin a saan nga ammo dagiti annak ti Israel. Ania koma ti mapasamak kadatayo no awanantayo kadagiti nasantuan a kasuratan? Kiddawen kadagiti ubbing no apay nga agyamanda nga addaanda kadagiti nasantuan a kasuratan. Apay a narigrigat ti mangsurot iti Mangisalakan no awanantayo kadagiti nasantuan a kasuratan?

• Ikkam ti tunggal ubing iti maysa a papel, ket idawatmo a pigisenda daytoy. Ilawlawag nga iti papawen ni Ari Josias, no dadduma ray-aben, wenno “pigisen,” dagiti tao dagiti kawesda no maupayda. Kiddawen kadagiti ubbing a mangsapul iti balikas a “pigisen” iti 2 Ar-ari 22:11. Apay a mabalin a naupay ni Josias? Tulongam dagiti ubbing a mangsapul iti sungbat iti bersikulo 13. Apay a napateg a basaentayo a masansan dagiti nasantuan a kasuratan?

• Basaen ti 2 Ar-ari 23:2–3 nga aggigiddan, ket kiddawen kadagiti ubbing a mangsapul no kasano a nakatulong dagiti nasantuan a kasuratan ken ni Josias ken dagiti taona. Ibinglaymo kadagiti ubbing ti maysa a nasantuan a kasuratan a nangparegta kenka iti “pannagna a siaannurot ken ni Jehova” (bersikulo 3), ket awisem dagiti ubbing a mangibinglay kadagiti nasantuan a kasuratan a nakatulong kadakuada. Aggigiddan a mangkanta iti “I Will Walk with Jesus” (ChurchofJesusChrist.org).

2 Ar-ari 23:3

Agtungpalakto kadagiti katulagak iti Dios.

Idi nasursuro ni Josias ken dagiti taona dagiti bilin ti Dios, nagaramidda iti katulagan nga agbiagda kadagitoy. Mabalinmo a tulongan dagiti ubbing a sursuruam nga agtarigagay nga agtalinaed a napudno kadagiti katulagan nga inaramidda iti panagbuniag.

Dagiti Mabalin nga Aktibidad

• Awisem dagiti ubbing a mangbasa iti 2 Ar-ari 23:3 ket mangsapul kadagiti balikas wenno ragup ti balikas a mangipakita no kasano ti narikna dagiti tao maipapan kadagiti bilin ti Apo. Awisem ida a tumakder ket isaritada no ania ti mabalin a kayat a sawen ti “[agtakder] iti katulagan.” Awisem ida a magna iti lugar ket isaritada no ania ti mabalin a kayat a sawen ti “pannagna a siaannurot ken ni Jehova.” Awisem ida a mangikabil iti imada iti puspusoda ket mangisingasing kadagiti wagas a mabalin a pakatungpalantayo kadagiti bilin “iti amin a puso[tayo].”

• Tulongam dagiti ubbing nga agaramid iti listaan dagiti kari nga inaramidda iti panagbuniag (kitaen iti Mosiah 18:10; Doktrina ken Katulagan 20:37, 77, 79). Ania ti ikari ti Dios kadatayo no agtungpaltayo kadagiti katulagantayo? Ania ti masursurotayo manipud iti 2 Ar-ari 23:3 maipapan no kasano a nasken nga agtungpaltayo kadagiti katulagantayo?

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay iti maysa a miembro ti pamilia iti maysa a bersikulo ti nasantuan a kasuratan wenno estoria manipud kadagiti nasantuan a kasuratan a nangbendision kadakuada.

Panangpadur-as iti Panangisurotayo

Mangbukel iti panagtalek kadagiti ubbing. Maysa a wagas a pakatulongan kadagiti ubbing a manggun-od iti panagtalek ket ti panangdayaw kadakuada no makiramanda iti klase. Ikarim kadagiti ubbing a tulonganto ida ti Espiritu Santo bayat ti panagsursuroda.

panid ti aktibidad: Maysa a bendision dagiti nasantuan a kasuratan