templo ti Zerubbabel

Ladawan ti templo ti Zerubbabel, ni Sam Lawlor

Hulio 18–24

Esdras 1; 3–7; Nehemias 2; 4–6; 8

Agar-aramidak iti Maysa a Dakkel nga Aramid”

Bayat ti panagadalmo, ibilangmo no ania kadagiti mensahe iti Esdras ken Nehemias a kasapulan unay dagiti ubbing a sursuruam. Mangaramidka iti maysa a plano iti panangisuro a mangiraman kadagiti impresion a maawatmo manipud iti Espiritu Santo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Isurat iti pisarra ti Zerubbabel, Esdras, ken Nehemias. Idrowing wenno ipakita ti sumagmamano a ladawan a mainaig kadagitoy a tao, kas iti maysa a templo, ti nasantuan a kasuratan, ken dagiti pader ti Jerusalem. Tulongam dagiti ubbing a mangiparis dagiti nagan kadagiti ladawan, ket pangibinglayem ida no ania ti ammoda maipapan iti no ania ti inaramid dagitoy a tao.

icon iti panangisuro

Isuro ti Doktrina: In-inaudi nga Ubbing

Esdras 3:8–13

Makaisangbay ti templo kaniak iti rag-o.

Ti pakaammuan ti Zerubbabel ken ti panangbangon manen dagiti Judio iti templo ket makatulong kadagiti ubbing a sursuruam nga agrag-o kadagiti bendision a sumangbay gapu iti balay ti Apo.

Dagiti Mabalin nga Aktibidad

• Awisem dagiti ubbing a mangisarita maipapan iti maysa a banag a mangparagsak kadakuada. Ipakitam ti ladawan ti maysa a tao nga umis-isem iti sango iti templo (kas iti ladawan iti daytoy a balabala), ket kiddawen kadagiti ubbing no apay a mabalin a naragsak unay ti tao. Paneknekam a balay ti Apo ti templo, ket isaritam maipapan iti panawen idi nariknam a naragsakka gapu iti templo.

• Ibasam kadagiti ubbing ti maudi a paset ti Esdras 3:12, a mangilawlawag nga idi inkabil dagiti Judio ti pundasion ti templo, adu ti nagdir-i gapu iti rag-o.” Awisem dagiti ubbing nga agdir-i iti rag-o. Tulongam ida a mangpanunot kadagiti gapu a makapanagrag-otayo maipapan iti templo. Kas pagarigan, iti templo agaramidtayo kadagiti kari iti Dios a mangpalugod kadagiti pamiliatayo nga agdedenna iti agnanayon.

• Makipagkanta kadagiti ubbing maipapan iti templo, kas iti “I Love to See the Temple” (Children’s Songbook, 95). Kalpasan ti tunggal linia, agsardeng tapno idawat iti maysa nga ubing a mangibinglay iti maysa a banag a magustuanna maipapan iti templo.

  pamilia a mangmagna kadagiti paraangan ti templo

  Ti templo ti mabalin a maysa a pagtaudan ti rag-o iti biagtayo.

Nehemias 2:17–20; 6:1–9

Tulongannakto ti Apo a mangileppas iti aramidna.

Idi tartarimaanen ni Nehemias dagiti pader a nailikmut iti Jerusalem, pinadas a pagsardengen dagiti kabusorna, ngem nagtalinaed a napudno isuna iti aramidna. Ania dagiti sumagmamano a napapateg a banag a kayat ti Apo nga aramiden dagiti ubbing, ken kasano a maparegtam ida nga agbalin a napudno iti dayta nga aramid?

Dagiti Mabalin nga Aktibidad

• Ibinglaymo kadagiti ubbing ti estoria ni Nehemias (kitaen iti Nehemias 2:17–20; 6:1–9; Dieter F. Uchtdorf, “We Are Doing a Great Work and Cannot Come Down,” Liahona, Mayo 2009, 59–62). Isaritam kadagiti ubbing no ania ti kinuna ni Nehemias idi pinagang-angawan dagiti tao isuna iti panagtarigagayna a mangtarimaan kadagiti pader ti Jerusalem: “Ti Dios ti langit, parang-ayennakamto; gapuna a dakami nga ad-adipenna tumakderkami ken bangonenmi” (Nehemias 2:20). Awisem dagiti ubbing a tumakder ken agpammarang a tumultulong a mangtarimaan kadagiti pader ti Jerusalem.

• Mangitugot iti sumagmamano a bloke iti klase, ket pausarmo dagitoy kadagiti ubbing a mangtulong kenka a mangbangon iti maysa a pader (wenno mangidrowing iti maysa a pader iti pisarra). Tulongam dagiti ubbing nga agpanunot iti sumagmamano a napapateg a banag a mabalin nga idawat ti Nailangitan nga Ama nga aramidenda, a kas iti panagsursuro no kasano ti agbasa kadagiti nasantuan a kasuratan. Iti tunggal kapanunotan nga ibinglayda, awisem ida a mangnayon iti maysa a bloke iti pader. Ilawlawag nga idi ar-aramiden ni Nehemias ti napateg nga aramidna iti panangtararimaan kadagiti pader ti Jerusalem, pinadas dagiti tao ti nanglapped kenkuana. Basaem ti Nehemias 6:9, ket awisem dagiti ubbing a mangingato kadagiti imada no basaem ti “papigsaem dagiti im-imak.” Ibagam kadagiti ubbing maipapan iti maysa a panawen idi nariknam a pinapigsa ti Dios dagiti imam a mangaramid iti trabahona.

Nehemias 8:1–12

Maysa a bendison dagiti nasantuan a kasuratan.

Mabalinmo nga usaren ti estoria ni Esdras nga agbasbasa iti linteg a mangtulong kadagiti ubbing a mangpanunot maipapan iti no kasano a naparaburantayo a naaddaan kadagiti nasantuan a kasuratan.

Dagiti Mabalin nga Aktibidad

• Ibagam kadagiti ubbing nga imbasa ni Esdras dagiti nasantuan a kasuratan kadagiti tao. Basaen iti napigsa ti sumagmamano a ragup ti balikas manipud iti Nehemias 8:2–3, 5–6, 8–9, 12 a mangiladawan no ania ti inaramid dagiti tao idi nangngeganda kadagiti nasantuan a kasuratan, ket awisem dagiti ubbing a mangyakem kadagitoy a ragup ti balikas. Apay nga agyamantayo nga addaantayo kadagiti nasantuan a kasuratan?

• Awisem dagiti ubbing a mangkolor iti panid ti aktibidad iti daytoy a lawas. Bayat ti panangaramidda, ibinglaymo kadagiti ubbing no kasano nga ad-adda a nangyasideg kenka iti Mangisalakan ti panagbasam kadagiti nasantuan a kasuratan.

icon iti panangisuro

Isuro ti Doktrina: In-inauna nga Ubbing

Esdras 3:8–13; 6:16–22

Mangted kaniak ti templo iti gapu ti panagrag-ok.

Bayat ti panangrebyum kadagiti ubbing ti pakaammuan ti Zerubbabel ken dagiti Judio iti panangbangonna manen iti templo, mangsapul kadagiti wagas tapno agpaneknek maipapan iti rag-o a sumangbay kadatayo gapu ta addaantayo kadagiti templo iti agdama.

Dagiti Mabalin nga Aktibidad

• Awisem dagiti ubbing nga agtitinnulong a mangsapul kadagiti ragup ti balikas iti Esdras 3:10–13 a mangipakita no kasano ti narikna dagiti Judio idi mabangon manen ti templo iti Jerusalem. Kasano a maipakitatayo ti rag-otayo iti kaadda dagiti templo iti daga iti agdama? Tulongam dagiti ubbing a mangpanunot kadagiti wagas a pakapagsaganaanda a mapan iti templo.

• Ibinglaymo kadagiti ubbing ti riknam maipapan iti templo. Kasano a nakatulong kenka ti templo a makarikna nga as-asidegka iti Nailangitan nga Ama ken iti Mangisalakan? Apay nga agrambaktayo no maidaton ti maysa a templo? Mangted kadagiti ubbing iti gundaway a mangisurat no kasano ti panagriknada maipapan iti templo, ket allukoyen ida a mangibinglay no ania ti insuratda kadagiti pamiliada.

Nehemias 2; 4; 6

Papigsaennakto ti Apo nga agaramid iti “maysa a dakkel nga aramid.”

Addaan ti Apo iti napateg nga aramid para kadagiti ubbing a sursuruam. Ania ti masursuroda manipud ken ni Nehemias maipapan iti panagpasnek iti dayta nga aramid uray no maipasangoda iti pagsusupadian?

Dagiti Mabalin nga Aktibidad

• Irebyum kadagiti ubbing ti estoria maipapan iti panangtarimaan ni Nehemias kadagiti pader a nailikmut iti Jerusalem, a pakairamanan ti pannakasuppiat a nakaipasanguanna. Aggigiddan a mangbasa iti Nehemias 2:19, ket kiddawen kadagiti ubbing a mangibinglay kadagiti kasasaad a mabalin a pangkatawaan kadatayo ti maysa a tao gapu iti panagaramid iti nasayaat a banag. Segun iti Nehemias 2:20, kasano a simmungbat Nehemias? Kasano a makasungbattayo no pagkakatawaandatayo dagiti tao wenno dillawendatayo gapu iti panagaramidtayo iti umno a banag?

• Aggigiddan a basaen ti Nehemias 6:7–9. Kasano nga inulit dagiti kabusor ni Nehemias a mangpasardeng iti panagtrabahona iti pader, ken kasano a sinungbatanna? Ania nga aramid ti kayat ti Dios nga aramidentayo? (kitaen, kas pagarigan, iti Mosiah 18:8–10). Kasano a masurottayo ti pagwadan ni Nehemias iti bersikulo 9 no narigat nga aramiden ti indawat ti Dios nga aramidentayo?

Nehemias 8:1–12

Mabendisionannak no adalek dagiti nasantuan a kasuratan.

Saan a nangngegan dagiti tao iti Jerusalem dagiti balikas ti Dios iti atiddog a panawen sakbay nga imbasa ni Esdras dagitoy kadagiti tao. Ipalagip kadatayo dagiti estoria ni Esdras maipapan iti no kasano ti kinapateg dagiti nasantuan a kasuratan kadatayo.

Dagiti Mabalin nga Aktibidad

• Awisem dagiti ubbing a mangsukisok iti Nehemias 8:1–12 kadagiti balikas wenno ragup ti balikas a mangipakita no kasano ti narikna dagiti tao maipapan iti panagdengngeg iti balikas ti Dios. Idawat kadagiti ubbing a mangibinglay no ania ti mariknada no basaenda dagiti nasantuan a kasuratan, ket iburaymo met dagiti riknam.

• Awisem ti maysa nga ubing a mangbasa iti Nehemias 8:8, ket kiddawen kadagiti ubbing no ania ti makatulong kadakuada a makaawat kadagiti nasantuan a kasuratan. Ipakitam kadakuada no kasano nga usaren dagiti tulong iti panagadal iti nasantuan a kasuratan kas iti Pangiwanwan iti Nasantuan a Kasuratan ken Gospel Topics (ChurchofJesusChrist.org). Awisem dagiti ubbing a mangibinglay iti maysa a banag a nasursuroda maipapan iti Mangisalakan manipud kadagiti nasantuan a kasuratan.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a pumili iti maysa a banag a nasursuroda ita nga aldaw a kayatda nga ibinglay kadagiti pamiliada.

Panangpadur-as iti Panangisurotayo

Agsagana a naespirituan. “Ti nabileg a panangisuro iti ebanghelio ket kaipapananna ti saan laeng a panangisagana iti maysa nga adalen no di ketdi panangisagana pay iti bagbagitayo. … Dagiti epektibo a mannursuro iti ebanghelio—sakbay a panunotenda maipapan iti panangpunno iti oras ti klase—agpokusda iti panangpunno iti puspusoda iti Espiritu Santo” (Panangisuro iti Wagas ti Mangisalakan, 12).

panid ti aktibidad: Maysa a bendision dagiti nasantuan a kasuratan