Ester, ni James Johnson

Hulio 25–31

Ester

“Sika Dika Mayeg … iti Kasta a Tiempo kas Itoy”

Paneknekan ti amin a nasantuan a kasuratan ni Jesucristo. Utobem no kasano a matulongamto dagiti ubbing a mangkita iti impluensia ti Mangisalakan iti estoria ni Ester.

Isuratmo dagiti Impresionmo

Yawis ti Panagbibinninglay

Ipasam ti maysa a ladawan ni Ester (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.). Bayat ti panangiggem dagiti ubbing iti ladawan, awisem ida a mangibinglay iti maysa a banag nga ammoda maipapan iti estoria ni Ester.

Isuro ti Doktrina: In-inaudi nga Ubbing

Ester 2:5–7

Makapagserbiak iti pamiliak.

Idi natay dagiti nagannak ni Ester, inaywanan ti kasinsinna a ni Mardokeo. Mabalinmo nga usaren ti padasda kas maysa a gundaway a pagsasaritaan ti maipapan iti panagserbi dagiti miembro ti pamiliatayo.

Dagiti Mabalin nga Aktibidad

• Iti pisarra, mangidrowing kadagiti ladawan a mangibagi ken ni Ester, dagiti nagannak kenkuana, ken ti kasinsinna a ni Mardokeo. Ilawlawag a natay dagiti nagannak ni Ester, isu a kasapulan ni Ester ti maysa a tao a mangaywan kenkuana. Ibasam ti Ester 2:7 kadagiti ubbing, ket kiddawen kadagiti ubbing a dumngegda no ania ti inaramid ni Mardokeo. Tulongam dagiti ubbing nga agpanunot kadagiti kasapulan dagiti miembro ti pamiliada a mabalin a pakatulongan dagiti ubbing.

• Awisem ti sumagmamano kadagiti ubbing a mangyakem iti maysa a banag a nasayaat a mabalinda nga aramiden tapno agserbi iti maysa a tao kadagiti pamiliada, ken kiddawem iti dadduma pay nga ubbing a mangpugto no ania ti ar-aramidenda. Awisem ida a mangisarita maipapan kadagiti banag nga aramidenda tapno mangbendision kadagiti pamiliada, ken isaritam ti maipapan iti sumagmamano kadagiti banag nga aramidem.

• Agkansion iti maysa a kanta maipapan iti panangtulongtayo iti pamiliatayo, kas iti “When We’re Helping” (Children’s Songbook,198). Ibinglaymo ti pammaneknekmo a maparagsaknatayo ti panangtulong kadagiti pamiliatayo.

Ester 4:15–16

Makapagbalinak a natured.

Maipasangonto dagiti ubbing a sursuruam kadagiti kasasaad no kasapulanda ti tulong ti Apo nga agbalin a natured. Kasano a matulongamto ida a makasursuro manipud iti pagwadan ni Ester iti kinatured?

Dagiti Mabalin nga Aktibidad

• Ammo kadi dagiti ubbing a sursuruam no ania ti kaipapanan ti agbalin a natured? Mangibinglay iti simple a pannakailawlawag, a kas iti “Ti panagbalin a natured kaipapananna ti panangaramid no ania ti umno uray no mabutengka.” Ibinglaymo ti estoria ni Ester (kitaen iti “Ni Reyna Ester iti Dagiti Estoria iti Daan a Tulag), ket tulongam dagiti ubbing a mangkita no kasano a nagtured ni Ester. Pausarmo kadagiti ubbing dagiti ladawan iti panid ti aktibidad itoy a lawas a mangisarita manen iti estoria.

• Ipakitam ti ladawan ni Ester (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Makipagkanta kadagiti ubbing maipapan iti panagbalin a natured, kas iti “I Will Be Valiant” (Children’s Songbook, 162). Ilawlawag dagiti balikas ken ragup ti balikas iti kanta a mangiladawan ken ni Ester, ken paneknekam a makatulong ti Mangisalakan kadagiti ubbing nga agbalin a natured.

• Isaritam kadagiti ubbing maipapan kadagiti panawen idi nagtured ni Jesucristo; kas pagarigan, idi nagsagaba Isuna para kadagiti basbasoltayo, agpada iti Getsemani ken iti krus (kitaen iti Mateo 26: 36–39; 27:33–35). Idawat kadagiti ubbing a mangisarita maipapan iti maysa a panawen idi nagturedda (ibilang ti panangkontak kadagiti pamiliada iti nasapsapa tapno idawat kadakuada ti sumagmamano a pagarigan). Ania ti nakatulong kadakuada nga agbalin a natured? Isaritam kadagiti ubbing no kasano a tinulongannaka ti Apo nga agbalin a natured idi nagbutengka.

  

  Ni Ester iti sanguanan ti Ari, ni Minerva K. Teichert

Isuro ti Doktrina: In-inauna nga Ubbing

Ester 4:14

Makapagbalinak a maysa a ramit kadagiti ima ti Dios.

Idi nagbuteng ni Ester, inallukoy ni Mardokeo isuna babaen iti panangisuro kenkuana a nalabit nga inaramid ti Apo a reyna isuna “iti kasta a tiempo a kas itoy” (Ester 4:14). Utobem no kasano nga isagsagana ti Apo dagiti ubbing a sursuruam para kadagiti gundaway a mangparabur iti dadduma.

Dagiti Mabalin nga Aktibidad

• Awisem ti maysa a tao nga agpatugtog iti maysa a kanta para kadagiti ubbing iti maysa nga instrumento, wenno i-display ti maysa a ladawan ti maysa a tao nga agpatpatugtog iti maysa nga instrumento. Isaritam maipapan iti no ania ti kaipapanan ti agbalin a maysa nga instrumento wenno ramit kadagiti ima ti Dios. Irebyum ti estoria ni Ester kadagiti ubbing (kitaen iti “Reyna Ester” iti Dagiti Estoria iti Daan a Tulag), ket awisem ida a mangisarita maipapan iti no kasano a nagbalin a ramit ni Ester tapno ipatungpal ti Apo dagiti panggepna. Kasano a makapagbalintayo a ramit para iti Apo?

• Kalpasan ti panangrebyu iti estoria ni Ester, mangisingdan iti maysa a kard iti nagan ti maysa kadagiti mayak-akem a tao manipud iti estoria iti likud ti tunggal ubing. Awisem dagiti ubbing a mangpadas a mangammo no asino ti akinnagan ti adda iti likudda babaen ti panagsaludsod iti dadduma pay nga ubbing kas iti “Nalinteg kadi daytoy a tao?” wenno “Babai kadi daytoy a tao?” Kalpasanna paglilinnawagan no kasano a ramit iti Apo da Mardokeo ken Ester a nangisalakan kadagiti Judio.

Ester 3:1–11; 4:10–17

Tulongannak ti Nailangitan nga Ama a maaddaan iti tured no mabutengak.

Kaano a nakitam dagiti ubbing a sursuruam a nagbalin a natured? Ania dagiti padas a mabalinmo nga ibinglay idi kasapulam ti tulong ti Apo nga agbalin a natured?

Dagiti Mabalin nga Aktibidad

• Isurat iti pisarra Impakita ni Mardokeo ti kinatured babaen ti … ken Impakita ni Ester ti kinatured babaen ti … Awisem ti sumagmamano kadagiti ubbing a mangbasa iti Ester 3:1–11 ken ti dadduma pay a mangbasa iti Ester 4:10–17. Idawatmo kadakuada a mangusar iti nabasada a mangileppas kadagiti binatog iti pisarra. Kalpasanna isuratmo ti ipakitakto ti kinatured babaen iti … ket awisem dagiti ubbing a mangilista kadagiti banag a kayat ti Nailangitan nga Ama nga aramidenda nga agkasapulan iti kinatured. Kasano a makapagbalintayo a kas kada Mardokeo ken Ester?

• Awisem dagiti ubbing a mangpanunot kadagiti kasasaad a pakaipasanguanda a mabalin a pakarigatan nga aramiden ti umno a banag. Isurat iti pisarra dagiti natured a balikas ni Ester “Iti kasta sumrekakto agingga iti ari, … ket no mapukawak, mapukawak” (Ester 4:16). Tulongam dagiti ubbing a mangaramat kadagiti balikas iti bagbagida babaen ti panangsukat ti “sumrekakto agingga iti ari” iti maysa a nalinteg ngem narigat a pili a mabalin a nasken nga aramidenda. Kalpasanna awisem ida a mangsukat iti “mapukawak” iti maysa a banag a saan a nasayaat a mabalin a sumangbay manipud iti panagaramid iti no ania ti umno. Apay a nasaysayaat nga agaramid iti umno a banag, uray pay no adda dagiti narigat a bungana?

• Ipabuyam ti video “Choose the Harder Right” (ChurchofJesusChrist.org), ket awisem dagiti ubbing a mangikeddeng iti “narigrigat nga umno” iti biagda a piliendanto. Paglilinnawagan no kasano a maysa a pagwadan ni Jesucristo iti daytoy a pagbatayan.

Ester 4:1–3, 10–17

Makatulong kaniak ti panagayuno a mangbendision kadagiti dadduma.

Kabayatan ti panawen ti panagkasapulan, nagayuno ni Ester ken dagiti Judio. Kasano a matulongam dagiti ubbing a sursuruam a makaawat kadagiti naespirituan a bendision ti panagayuno?

Dagiti Mabalin nga Aktibidad

• Awisem dagiti ubbing nga agaramid iti listaan dagiti banag a mabalinda a pagayunuan (no kasapulan, mabalinda a kitaen iti “Panagayuno ken dagiti Daton iti Panagayuno” iti Napudno iti Pammati,66–69). Kalpasanna idawat kadakuada a mangbasa iti Ester 4:1–3, 10–17 tapno ammuen no apay a nagayuno dagiti Judio ken ni Ester. Allukoyem dagiti ubbing a mangpanunot iti maysa a gapu a mabalin a kasapulanda ti naisangsangayan a tulong manipud iti Apo, ket maisingasing nga aramidenda dayta a gapu a parte iti panagayunoda kabayatan ti sumaruno a Domingo a panagayuno.

• Awisem dagiti ubbing nga agpammarang nga ilawlawagda iti maysa a gayyem nga apay nga agayunoda. Ania koma ti ibagada? Itudom kadakuada iti Pangiwanwan iti Nasantuan a Kasuratan, “Agayuno, Panagayuno” (scriptures.ChurchofJesusChrist.org) no kasapulanda ti tulong. Mangibinglayka iti maysa a padas idi nagayunoka nga umawat iti tulong ti Apo. Awisem dagiti ubbing a mangibinglay kadagiti padasda iti panagayuno.

Yallukoy ti Panagsursuro iti Pagtaengan

Aggigiddan nga agkansion iti maysa a kanta maipapan kadagiti pagbatayan a nasursurom iti klase ita nga agdama (kitaen iti topic index iti Children’s Songbook para kadagiti kapanunotan). Awisem dagiti ubbing nga agkansion iti maysa a kanta a kadua dagiti pamiliada.

Panangpadur-as iti Panangisurotayo

agbiagka a mayannurot kadagiti isursurom. Nabilbilegto ti panangisurom no makapagpaneknekka manipud iti bukodmo a padas maipapan kadagiti bendision ti panagbiag iti ebanghelio. Bayat ti panangpilim kadagiti pagbatayan nga isurom kadagiti ubbing, utobem no kasano a matungpalmo dagita a pagbatayan nga ad-adda a naan-anay. (Kitaen iti Panangisuro iti Wagas ti Mangisalakan, 13–14.)