“Agosto 1–7. Job 1–3; 12–14; 19; 21–24; 38–40; 42: ‘Ngem Agtalekakto Kenkuana,’” Umaykayo, Sumurot Kaniak—Para iti Primary: Daan a Tulag 2022 (2021)
“Agosto 1–7. Job 1–3; 12–14; 19; 21–24; 38–40; 42,” Umaykayo, Sumurot Kaniak—Para iti Primary: Daan a Tulag 2022
Dagiti Pannakaukom ni Job, ni Joseph Brickey
Agosto 1–7
Job 1–3; 12–14; 19; 21–24; 38–40; 42
“Ngem Agtalekakto Kenkuana”
Bayat ti panagadalmo iti pakaammuan ni Job, ania dagiti mensahe a masarakam para iti bukodmo a biag? Ania kadagita a mensahe a mariknam a nasken a denggen dagiti ubbing a sursuruam?
Isuratmo dagiti Impresionmo
Yawis ti Panagbibinninglay
Ipakitam kadagiti ubbing ti ladawan ni Job (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.). Idawatmo kadagiti ubbing no kasano iti panagkunada a mabalin a marikna ti tao iti ladawan. Awisem ida a mangibinglay iti ania man a banag nga ammoda maipapan ken ni Job.
Isuro ti Doktrina: In-inaudi nga Ubbing
Tulongannakto ti Nailangitan nga Ama ken ni Jesucristo kabayatan dagiti narigat a panawen gapu ta adda pammatik Kadakuada.
Nagtalek ni Job iti Dios ket kinabaelanna ti nagtalinaed a napudno uray pay no naipasango kadagiti nakarigrigat a pannubok. Makatulong ti estoria ni Job kadagiti ubbing a mangpapigsa iti pammatida iti Nailangitan nga Ama ken ni Jesucristo tapno iti kasta makapagsaganadanto a mangsango kadagiti bukodda a narigat a pannubok.
Dagiti Mabalin nga Aktibidad
-
Awisem dagiti ubbing a mangibinglay no ania ti ammoda maipapan ken ni Job, ken tulongam ida a makaawat no ania ti napasamak kenkuana (kitaen iti Job 1–2; “Job” iti Dagiti Estoria iti Daan a Tulag). Saludsodem kadagiti ubbing no kasano ti mariknada no isuda ni Job. Asino ti makatulong kadatayo no mapasamak dagiti naliday a banag iti biagtayo? Ipakitam ti ladawan ni Jesucristo, ken ilawlawagmo a ti pammati ni Job iti Apo ti nakatulong kenkuana kabayatan dagiti pannubokna (kitaen Job 1:21).
-
Ibasam kadagiti ubbing dagiti balikas ni Job iti Job 13:15: “Agtalekak kenkuana.” Tapno matulongan dagiti ubbing a makaawat no ania ti kayat a sawen ti agtalek iti Dios, kasaritam ida maipapan iti dadduma pay a tao a pagtalkanda. Kas pagarigan, ania ti italektayo nga aramiden dagiti nagannak kadatayo? Ania ti italektayo nga aramiden dagiti mannursurotayo? Ania ti italektayo nga aramiden ti Nailangitan nga Ama ken ni Jesucristo? Yebkasmo ti panagtalekmo iti Nailangitan nga Ama ken ni Jesucristo, ken tulongam dagiti ubbing a mangpanunot kadagiti wagas a mabalinda nga ipakita nga ayaten ken agtalekda Kadakuada.
Ni Jesucristo ti Mannubbotko.
Nabaelan ni Job nga ibturan dagiti pannubok ken sagabaenna gapu iti pammatina iti Apo. Kasano a matulongamto dagiti ubbing a mangbukel iti pammatida ken ni Jesucristo, ti Mannubbottayo?
Dagiti Mabalin nga Aktibidad
-
I-display ti maysa a ladawan ni Jesus iti krus wenno iti pannakaikalina iti tanem (kitaen iti Libro ti Arte ti Ebanghelio, num. 57,58). Awisem dagiti ubbing a mangilawlawag no ania ti mapaspasamak iti ladawan. Ibasam kadagiti ubbing ti pammaneknek ni Job iti Job 19:25. I-display ti ladawan ti nagungar a Mangisalakan (kitaen iti Libro ti Arte ti Ebanghelio, num. 59,60; kitaen met iti panid ti aktibidad iti daytoy a lawas), ken paneknekam a nagungar ni Jesucristo ket sibibiag iti agdama. Apay nga agyamantayo iti panagungar ni Jesus?
-
Ipakitam ti ladawan ni Job, ket ilawlawag nga adda ni Job ti nakaro a saem gapu ta nabungon iti gaddil ti sibubukel a kudilna. Napukawna ti pagtaenganna, ket natay dagiti annakna. Ngem ammo ni Job ti maysa a banag a napateg unay a nangted kenkuana iti pannakaliwliwa. Basaem ti Job 19:25, ket saludsoden kadagiti ubbing no ania ti ammo ni Job. Ibinglaymo kadagiti ubbing no kasano nga ammom a sibibiag ni Jesucristo, ket awisem ida a mangibinglay kadagiti pammaneknekda maipapan Kenkuana.
Ladawanlalaki a kumitkita iti ngatoJob, ni Gary L. Kapp
-
Awisem dagiti ubbing a mangkolor iti panid ti aktibidad iti daytoy a lawas. Bayat ti panangaramidda, agkanta maipapan iti Panagungar ni Jesus, kas iti “Did Jesus Really Live Again?” wenno “Jesus Has Risen” (Children’s Songbook, 64, 70). Kiddawem kadakuada a mangibinglay no kasano ti mariknada maipapan ken ni Jesus, ken tulongam ida a makaawat a maaddaantayo iti nasayaat a rikna manipud iti Espiritu Santo a makatulong kadatayo a mangammo a pudno ni Jesucristo.
Isuro ti Doktrina: In-inauna nga Ubbing
Tulongannakto ti Nailangitan nga Ama ken ni Jesucristo a mangparmek kadagiti karitko no adda pammatik Kadakuada.
Addaan ti tunggal maysa kadagiti narigat nga aldaw, ken addaan pannubok ti sumagmamano a tao nga agpaut iti nabayag a panawen. Ti pammati ni Job iti Dios ti nangtarabay kenkuana kadagiti pannubokna. Ibilangmo no kasano a makatulong ti estoriana kadagiti ubbing a mangbukel iti pammatida iti Nailangitan nga Ama ken ni Jesucristo tapno kabaelandanto a mangsango kadagiti pannubokda, ita ken iti masakbayan.
Dagiti Mabalin nga Aktibidad
-
Idawatmo kadagiti ubbing a mangibinglay no ania ti ammoda maipapan iti estoria ni Job. Ania a kita ti tao isuna? Ania ti napasamak kenkuana? Kasano a sinungbatanna dagiti karitna? Itudom kadakuada kadagiti bersikulo iti Job 1–2 a makatulong kadakuada a mangisarita iti estoria a bersikulo (kitaen iti Job 1:1, 13–22; 2:7–10; kitaen met iti “Job” iti Dagiti Estoria iti Daan a Tulag). Awisem dagiti ubbing a mangibinglay no ania ti mariknada a kangrunaan a mensahe ti estoria ni Job.
-
I-display iti sumagmamano a ladawan ni Jesucristo a makipulpulapol kadagiti dadduma, ket saludsodem kadagiti ubbing no ania ti mariknada nga isuro kadatayo dagitoy a ladawan maipapan iti kinasiasino ni Jesucristo ken no ania ti kayariganna. Ania pay ti ammotayo maipapan Kenkuana? Awisem dagiti ubbing a mangbasa iti sumagmamano kadagiti sumaganad a bersikulo tapno mangsapul iti sumagmamano a banag nga ammo ni Job maipapan iti Apo: Job 12:10, 13, 16; 19:25–27. Apay a napateg a maammuan dagitoy a banag maipapan iti Mangisalakan?
-
Awisem dagiti ubbing a mangbasa iti Job 19:14–19, ket saludsodem kadakuada no ania ti ibaga dagitoy a bersikulo maipapan iti no kasano ti panangtrato dagiti dadduma a tao ken ni Job. Kasano ti mariknatayo no napasamak daytoy kadatayo? Awisem dagiti ubbing a mangbasa iti Job 19:23–27 tapno ammuen no kasano a nasarakan ni Job ti liwliwa iti daytoy a kasasaad. Ania ti isuro kadatayo dagitoy a bersikulo maipapan iti Mangisalakan? Apay a napateg a maammuan a sibibiag Isuna ken ay-ayatennatayo? (kitaen iti Juan 17:3).
-
Aggigiddan nga agkansion iti maysa a kanta a mangipaneknek ken ni Jesucristo, kas iti “I Know That My Redeemer Lives” (Hymns, no. 136). Ania ti isingasing ti kanta maipapan iti no apay a napateg ti maaddaan iti pammaneknek a sibibiag ni Jesucristo? Isaritam kadagiti ubbing no kasano nga ammom a sibibiag ti Mangisalakan ken no apay pagyamyamanam dayta a pannakaammo. Allukoyem ida a mangibinglay met iti rikna ken pammaneknekda.
Itag-ay ken paregtaen dagiti nasayaat nga aggagayyem ti tunggal maysa.
Idi agkarkarigatan ni Job, kinunana dagiti gagayyemna a Dios ti mangdusdusa kenkuana gapu ta isu ket nagbasol. Makatulong kenka daytoy nga estoria a mangisuro kadagiti ubbing iti nasaysayaat a wagas a panagresponde no addaan ti maysa a gayyem kadagiti pannubok (kitaen iti Job 16:1–5).
Dagiti Mabalin nga Aktibidad
-
Idawatmo kadagiti ubbing a mangrebyu iti adu a naririgat a banag a napasamak ken ni Job (kitaen iti Job 1:13–19; 2:7). Aggigiddan a basaen ti Job 19:14, 19, a mangsapsapul no kasano ti reaksion dagiti gagayyem ni Job kadagiti pannubokna (kitaen met iti Job 22:1–5). Awisem dagiti ubbing a mangipapan nga isuda dagiti gagayyem ni Job—kasano a padasenda ti makatulong kenkuana? Allukoyem ida a mangpanunot iti maysa a gayyem a mabalin nga agpadpadas iti narigat a panawen ken agplano iti maysa a banag a maaramidda a mangipakita iti ayat ken suporta iti gayyemda.
-
Idawat kadagiti ubbing a mangilista iti sumagmamano a kababalin ti nasayaat a gayyem ken manginagan iti maysa a gayyem nga addaan kadagitoy a kababalin. Ipakitam ti maysa a ladawan ni Jesucristo. Iti ania a wagas a maysa a nasayaat a gayyem ni Jesus iti tunggal maysa kadatayo? Kasano a masurottayo ti pagwadanna?
Yallukoy ti Panagsursuro iti Pagtaengan
Awisem dagiti ubbing a mangibinglay iti maysa a miembro ti pamilia wenno gayyem iti maysa a wagas a pakatulongan kadakuada ti Nailangitan nga Ama ken ni Jesucristo no addaanda iti narigat a panawen.
Panangpadur-as iti Panangisurotayo
Paneknekam maipapan kadagiti naikari a bendision. No mangted ti Mangisalakan iti maysa a bilin, masansan nga ikarina dagiti bendision iti panagtungpal iti dayta a bilin. No awisem dagiti ubbing iti Primary a mangtungpal ti naisangsangayan a pagbatayan, mangibinglay kadagiti kari nga inaramid ti Dios babaen kadagiti propeta para kadagiti agbiag iti dayta a pagbatayan. Mabalinmo pay a paneknekan maipapan dagiti bendision a naawatmon babaen iti panagbiag iti pagbatayan.