“Agosto 1–7. Job 1–3; 12–14; 19; 21–24; 38–40; 42: ‘Ngem Agtalekakto Kenkuana,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Agosto 1–7. Job 1–3; 12–14; 19; 21–24; 38–40; 42,” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022
Dagiti Pannakaukom ni Job, ni Joseph Brickey
Agosto 1–7
Job 1–3; 12–14; 19; 21–24; 38–40; 42
“Ngem Agtalekakto Kenkuana”
Bayat ti panangbasam maipapan ken ni Job, iturongnakanto ti Espiritu a mangtakuat kadagiti napapateg a kinapudno nga adda pakainaiganna kenka. Isuratmo no ania ti natakuatam, ket utobem no kasano a mayaplikar kenka dagitoy a kinapudno.
Isuratmo dagiti Impresionmo
Gagangay a makapasiddaaw no apay a mapasamak dagiti dakes a banag kadagiti nasayaat a tao—wenno para iti dayta a banag, apay a mapasamak dagiti nasayaat a banag kadagiti dakes a tao. Apay ti Dios, a nalinteg, ipalubosna dayta? Masukisok dagiti saludsod kas kadagitoy babaen ti padas ni Job, maysa kadagita a nasasayaat a tao a nakapasamakan dagiti dakes a banag. Gapu kadagiti pannubok ni Job, nagsiddaaw dagiti gagayyemna no talaga met laeng nasayaat a tao daytoy. Impanamnama ni Job ti bukodna a kinalinteg ken nagsiddaaw no talaga met laeng a nalinteg ti Dios. Ngem iti baet ti panagsagaba ken panagsiddaawna, napagtalinaed ni Job ti integridad ken pammatina ken ni Jesucristo. Iti libro ni Job, napagduaduaan ken nasubok ti pammati ngem saan iti kaano man a naan-anay a nabaybay-an. Saan a kayatna a sawen a masungbatan ti amin a saludsod. Ngem isuro ti libro ni Job nga agingga a saan a masungbatan dagitoy, makapagkadua nga agtalinaed dagiti saludsod ken pammati, ken ania man ti mapasamak iti kabayatanna, mabalin a kunatayo iti Apo, “Ngem agtalekakto Kenkuana” (Job 13:15).
Para iti pakagupgopan ti libro ni Job, kitaen iti “Job” iti Pangiwanwan iti Nasantuan a Kasuratan (scriptures.ChurchofJesusChrist.org).
Dagiti Kapanunotan para iti Bukod a Panagadal iti Nasantuan a Kasuratan
Ti panagtalekko iti Nailangitan nga Ama ken ni Jesucristo ti makatulong kaniak nga agtalinaed a napudno iti amin a kasasaad.
Naisangrat dagiti panglukat a kapitulo ti Job a mangyunay-unay iti akem ni Satanas kas kabusortayo wenno mamabpabasol, a saan a mangiladawan no kasano a talaga ti pannakipulpol Dios ken ni Satanas. Bayat ti panangbasam kadagiti isawang ni Satanas maipapan ken ni Job (kitaen iti Job 1:9–11; 2:4–5), mabalinmo nga utoben no kastoy met ti maisao maipapan kenka. Mabalinmo a saludsoden iti bagim, Ania dagiti ti rasonko iti panagtalinaedko a napudno iti Dios? Utobem dagiti pannubok a naited ken ni Job ken dagiti sungbatna (kitaen iti Job 1:20–22; 2:9–10). Ania ti masursurom manipud kenkuana a mabalin a makatulong kenka nga iti panangsungbatmo kadagiti karitmo?
Nupay padpadasen ni Job ti nagtalinaed a napudno, nagtultuloy dagiti pannubok ken panagsagabana (kitaen dagiti panagunnoyna iti kapitulo 3). Kinapudnona, kasla kimmaro ti panagsagabana, ken insingasing dagiti gagayyemna a ti Dios ti mangdusdusa kenkuana (kitaen iti Job 4–5; 8; 11). Bayat ti panangbasam iti paset ti sungbat ni Job kadagiti kapitulo 12–13, ibilangmo no ania ti ammo ni Job maipapan iti Dios a nangpabalin kenkuana tapno agtultuloy iti panagtalekna, iti baet ti panagsagaba ken dagiti saan a nasungbatan a saludsod. Ania iti ammom maipapan iti Dios a mangtulong kenka a mangsango kadagiti karit? Kasano a naam-ammom dagitoy a kinapudno, ken no kasano a napatibkerda ti pammatim?
Ni Jesucristo ti Mannubotko.
No dadduma dagiti kapatgan a kinapudno a naipalgak kadatayo iti baet ti nalaus unay a ladingit. Utobem dagiti pannubok nga inladawan ni Job Job 19:1–22 ken ti kinapudno a naipakdaar iti Job 19:23–27. Kalpasanna utobem no kasano nga ammom a sibibiag ti Mannubbotmo. Ania ti pagdumaan nga aramiden daytoy a pannakaammo no mapadasam dagiti narigat a pannubok?
Kitaen met iti Doktrina ken Katulagan 121:1–12; 122.
Job, ni Gary L. Kapp
“Intono masuotnak, rummuarakto a kas balitok.”
Bayat ti panangbasam iti ad-adu pay ti debate ni Job ken dagiti gagayyemna maipapan kadagiti gapu iti likudan ti panagsagaba ni Job, mabalinmo nga utoben no kasano a sungbatam ti saludsod iti puso ti debateda: Apay nga agsagaba no dadduma dagiti nalinteg ken saan a madusa dagiti nadangkes no dadduma? Panunotem maipapan iti daytoy bayat ti panangbasam iti Job 21–24. Ania ti ammom maipapan iti Nailangitan nga Ama ken ti planona a makatulong a mangted kadagiti sungbat? Kitaen, kas pagarigan, iti 2 Nephi 2:11–13; Mosiah 23:21–23; 24:10–16; Abraham 3:22–26; Dallin H. Oaks, “Opposition in All Things,” Liahona, Mayo 2016, 114–17.
Kitaen met iti L. Todd Budge, “Consistent and Resilient Trust,” Liahona, Nob. 2019, 47–49.
Dakdakkel ti pannirigan ti Dios ngem iti pannirigak.
Napaay kadagiti pammabasol dagiti gagayyemna (kitaen iti Job 16:1–5; 19:1–3), ken inulit ni Job ti immararaw iti Dios nga agsapsapul iti pannakailawlawag para iti panagsagsagaba (kitaen iti Job 19:6–7; 23:1–9; 31). Napaliiw ni Elder Neal A. Maxwell a “no awan anustayo iti panangitiempo ti mannakaamo-iti-amin a Dios,” iti wagas a kasla pagbalinan ni Job, “talaga nga isingsingasingtayo nga ammotayo no ania ti kasayaatan. Karkarna, saan kadi—datayo nga agsuot kadagiti relos nga agkalikagumtayo a makiuman Kenkuana a mangimatmaton ken mangiturturong iti amin a pagorasan ken kalendario” (“Hope through the Atonement of Jesus Christ,” Ensign, Nob. 1998, 63). Utobem dagitoy a balikas bayat ti panangbasam iti sungbat ti Dios ken ni Job kadagiti kapitulo 38 ken40. Ania dagiti kinapudno nga insursurona ken ni Job? Apay a napateg a maammuantayo dagitoy a kinapudno bayat ti panagkarigatantayo iti rigat ken duadua ditoy a biag iti daga? Ania ti makaawis iti riknam maipapan iti sungbat ni Job iti Job 42:1–6?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Job 1:20–22.Tapno maawatan no kasano ti mabalin a narikna ni Job, kas nailadawan kadagitoy a bersikulo, mabalin a basaen ti pamiliam ti “Job” iti Dagiti Estoria iti Daan a Tulag wenno mangyakem iti Job 1:13–22. Ania ti masursurotayo manipud iti pagwadan ni Job?
-
Job 14:14.Kasano a sungbatantayo dagiti saludsod ni Job iti daytoy a bersikulo? Kasano a makatulong ti Alma 11:42–44 kadatayo? (Kitaen met iti video “He Lives—Celebrate Easter Because Jesus Christ Lives,” ChurchofJesusChrist.org.)
-
Job 16:1–5.Maipadatayo kadi kadagiti gagayyem ni Job, a nangkedngan ken nangdillaw ken ni Job idi kasapulanna ti liwliwa? (kitaen iti Job 16:1–4; kitaen met iti Juan 7:24). Kasano a mapapigsa dagiti balikastayo dagiti dadduma iti ladingitda? (kitaen iti Job 16:5).
-
Job 19:23–27.Kalpasan ti panangbasam kadagitoy a bersikulo, mabalin nga ibinglay dagiti miembro ti pamilia no kasano nga ammoda a sibibag ti Mannubbottayo. Mabalin nga agtitinnulongkayo a mangikabil kadagiti balikasyo iti pammaneknek (wenno dagiti drowing dagiti ubbing iti Mangisalakan) iti maysa a libro, kas iti maysa a journal ti pamilia (kitaen ti bersikulo 23). Mabalinyo pay ti agkansion iti kanta a mangipampaneknek maipapan iti Mangisalakan, a kas iti “I Know That My Redeemer Lives” (Hymns, no.136), ken ibinglay dagiti ragup ti balikas a mangpapigsa iti pammatiyo Kenkuana.
-
Job 23:8–11.Ania ti kayat a sawen ti “rummuar” manipud kadagiti pannuboktayo “kas balitok”? (kitaen met iti video a “The Refiner’s Fire,” ChurchofJesusChrist.org). Asino ti ammotayo a nangaramiden iti daytoy? Magustuan dagiti ubbing ti panangaramid iti maysa a banag nga usaren dagiti balikas manipud iti bersikulo 10 a naisurat ditoy. Mabalinmo pay nga ilawlawag no kasano a pinarmek ni Jesucristo dagiti pannubokna (kitaen iti Lucas 22:41–44; Doktrina ken Katulagan 19:16–19).
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “I Know That My Redeemer Lives,” Hymns no. 136.
Panangpadur-as iti Bukod a Panagadal
Panunotenyo! Mabalin a dumteng dagiti napateg a pannakaammo ken pannakaawat no ikarigatantayo a mangilugar iti bagbagitayo kadagiti adda iti nasantuan a kasuratan. Kas pagarigan, ti panangilugar iti bagim iti kasasaad ni Job ti makatulong kenka a mangutob iti pagnaigam iti Nailangitan nga Ama ken ni Jesucristo.
Ni Job ken dagiti Gagayyemna, ni Ilya Repin