“Agosto 22–28. Dagiti Salmo 102–103; 110; 116–119; 127–128; 135–139; 146–150: “Amin nga Adda Angesna Idaydayawda Koma ni Jehova,” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Agosto 22–28. Dagiti Salmo 102–103; 110; 116–119; 127–128; 135–139; 146–150,” Umaykayo, Sumurot Kaniak—Para kadagiti Indibidual ken Pamilia: 2022
Agparintumengto Amin a Tumeng, ni J. Kirk Richards
Agosto 22–28
Dagiti Salmo 102–103; 110; 116–119; 127–128; 135–139; 146–150
“Amin nga Adda Angesna Idaydayawda Koma ni Jehova”
Isuro tiSalmo 119:105 a “silaw iti dana[yo]” ti balikas ti Dios. Bayat ti panangbasam kadagiti Salmo, isuratmo dagiti ragup ti balikas ken kapanunotan a mangparegta kenka ken mangtulong a manglawag iti danam nga agsubli iti Nailangitan nga Ama.
Isuratmo dagiti Impresionmo
Ti tradisional a nagan a Judio para iti libro dagiti Salmo ket maysa a balikas a Hebreo a kaipapananna ti “panagdaydayaw.” Dayta a balikas, Tehillim, kasta met a mainaig iti panangipukkaw iti “alleluia” (kayatna a sawen ti “agdaydayaw ken ni Jehova” wenno “agdaydayaw iti Apo”). No nasken nga agpilika iti maysa a balikas tapno gupgopen ti kangrunaan a mensahe dagiti Salmo, ti “agdaydayaw” ti agbalin a nasayaat a pili. Sumagmamano dagiti Salmo ti naglaon iti direkta nga awis nga “agdaydayawka iti Apo” (kitaen nangnangruna iti Dagiti Salmo 146–50), ken mabalin a mangparegta ti amin kadagitoy iti maysa a rikna ti panagrukbab ken panagdayaw. Awisennatayo dagiti Salmo a mangutob iti bileg ti Apo, iti asina, ken iti naindaklan a bambanag nga inaramidna. Ditayo kaano man makapagbayad Kenkuana para iti ania man daytoy, ngem mabalintayo ti mangidaydayaw Kenkuana para iti daytoy. Dayta a panagdaydayaw mabalin a mayebkas iti nadumaduma a wagas para iti nadumaduma a tao—mabalin a mangiraman daytoy ti panagkanta, panagkararag, wenno panangted iti pammaneknek. Masansan nga agbanag daytoy iti naun-uneg a panagkumit iti Apo ken panangsurot kadagiti pannursurona. Ania man a kaipapanan ti “panagdaydayaw iti Apo” iti biagmo, masarakam ti ad-adu pay a pammaregta a mangaramid iti daytoy bayat ti panagbasam ken panagutobmo kadagiti Salmo.
Dagiti Kapanunotan para iti Bukod a Panagadal iti Nasantuan a Kasuratan
Maliwliwanakto ti Apo iti panagsagabak.
Kitaen no kasano nga iladawan ti Salmo 102:1–11 dagiti rikna ti panagdandanag ken pannakaisina a masansan a sumangbay kabayatan dagiti rigat. Nalabit a napadasamon dagita a rikna, ken dagitoy a pangiladawan ti makatulong kenka tapno maawatam a nasaysayaat dagiti padasmo. Wenno mabalin a makatulong kenka dagitoy a bersikulo tapno maawatam ti rikna dagiti dadduma nga agsagsagaba.
Bayat ti panangbasam iti Dagiti Salmo 102:12–28; 103; 116, sapulem dagiti ragup ti balikas a mangted kenka iti panagtalek a mabalinmo nga “awagam ti nagan ni Jehova” kadagiti pannubokmo (Salmo 116:13). Mabalin a kayatmo a markaan, yulo, wenno ibinglay kadagiti dadduma ti ragup ti balikas a mangted kenka iti namnama Kenkuana.
Kitaen met iti Isaias 25:8; 2 Taga Corinto 1:3–7; Hebreo 2:17–18; Alma 7:11–13; Evan A. Schmutz, “God Shall Wipe Away All Tears,” Liahona, Nob. 2016, 116–18.
Panangagas, ni J. Kirk Richards
Dagiti Salmo ti mabalin a mangitudo kaniak iti Mangisalakan.
Naglaon dagiti Salmo kadagiti binatog a mangitudo kaniak iti biag ken panagministro ni Jesucristo. Adtoy ti sumagmamano a pagarigan:
-
Salmo 110:1–4 (kitaen iti Mateo 22:41–45; Hebreo 5:4–10; 6:20)
-
Salmo 118:22 (kitaen iti Mateo 21:42; Dagiti Aramid 4:10–11; 1 Pedro 2:7)
-
Salmo 118:25–26 (kitaen iti Mateo 21:9)
Ania ti isuro kadatayo dagitoy a bersikulo maipapan ken ni Jesucristo? Kasano ti pannakaammom a bendisionannaka dagitoy a kinapudno?
Bayat ti panangbasam kadagiti Salmo iti daytoy a lawas, agtultuloy a mangmarka iti dadduma pay a binatog a mangisuro kenka maipapan iti Mangisalakan. Mabalinmo pay a basaen wenno denggen ti sumagmamano a paggugustom a himno a mangtulong kenka a mangpanunot maipapan Kenkuana.
Ti balikas ti Dios ti mangpatalinaedto kaniak Iti danana.
Naglaon daytoy a salmo ti adu a ragup ti balikas a mangidilig iti biagtayo iti panagdaliasat nga agsubli iti Nailangitan nga Ama. Bayat ti panangbasam, sapulem dagiti balikas a kas magna, dana, dalan, saka, ken maisiasi. Utobem dagiti panagdaliasat iti bukodmo a biag—no sadino ti napanamom, sadino ti ayanmo ita, ken ania a direksion ti papanam. Ania ti masursurom manipud iti daytoy a salmo maipapan ti panagdaliasatmo nga agawid? Segun iti daytoy a salmo, ania ti impaay ti Dios a nangtulong kenka nga agtalinaed iti umno a dana?
Mabalin nga interesadoka a mangammo nga iti sigud a Hebreo, ti umuna a walo a bersikulo iti Salmo 119 mangrugi iti umuna a letra iti alpabeto a Hebreo. Kadagiti sumaruno a walo a bersikulo a mangrugi iti sumaruno a letra, ken kasta met iti agingga iti gibus ti alpabeto.
Kitaen met iti Isaias 42:16; 2 Nephi 31:17–21; Alma 7:19–20.
Nabilbileg ti Apo ngem iti ania man a didiosen.
Kitaem dagiti gapu a naited iti Salmo 135:15–18 maipapan no apay a maag ti agtalek kadagiti palso a didiosen. Ania ti mabalin pakasulisogam nga agtalek iti dayta maipada kadagiti didiosen a nailadawan kadagitoy a bersikulo?
Mabalinmo ti agaramid iti listaan dagiti nabileg a banag a mabalin nga aramiden ti Apo, kas nailadawan iti Salmo 134–36. Ania dagiti nabileg a banag nga inaramidnan para kenka?
“Agdaydayawka iti Apo.”
Bayat ti panangbasam kadagitoy maudi a salmo ti panagdayaw, panunotem dagiti gapu no apay a nasken nga agdaydayawka iti Apo. Apay a napateg ti agdaydayaw Kenkuana? Ania dagiti wagas a pakapagdaydayawam Kenkuana?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Psalm 119:105.Nalabit a makaaramid ti pamiliam iti maysa a dana ken magna iti kasipngetan, nga us-usaren ti silaw a manglawag iti dalan a masungad. Bayat ti pannagnayo, mabalin nga agdamagka kadagiti saludsod kas iti “Ania iti biagtayo ti kapada daytoy a sipnget?” wenno “Kasano a maipada ti balikas ti Dios iti maysa a silaw?” Ti panangkansion iti maysa a kanta maipapan iti silaw ti Dios, kas iti “Teach Me to Walk in the Light” (Children’s Songbook, 177), ket makatulong kenka a mangpatibker iti pagbatayan a naisuro iti Salmo119:105.
-
Dagiti Salmo 127–28.Ania ti kayat a sawen ti tulongannatayo ti Apo a “mangbangon iti balay[tayo]”? (Salmo 127:1). Kasano a nasaysayaat makiramantayo Kenkuana kadagiti panagkagumaantayo a mangparnuay iti maysa a nalinteg a pagtaengan? Tapno matulongan ti pamiliam a mangsungbat iti daytoy a saludsod, mabalinmo nga idrowing ti maysa a balay iti maysa a papel ket gettengem daytoy iti pirapiraso ti puzzle. Iti likud ti tunggal piraso, mabalin dagiti miembro ti pamilia ti mangisurat wenno mangidrowing kadagiti wagas tapno aramidenyo ti Apo a paset ti pagtaenganyo. Kalpasanna mabalinyo a buklen a sangkamaysa ti puzzle. Ania pay ti masarakantayo kadagitoy a salmo a mangparegta kadatayo a magna kadagiti dalan ti Apo?
-
Salmo 139.Kalpasan ti panangbasa kadagiti bersikulo 1–4, mabalin a pagsasaritaan dagiti miembro ti pamilia maipapan no kasano a naamuanda nga am-ammo ti Dios ida mismo (kitaen dagiiti bersikulo 14–15, 23–24).
-
Salmo 146–50.Mabalinmo nga awisen ti pamiliam a mangbasa iti sumagmamano a bersikulo ti Dagiti Salmo 146–50 iti napigsa, a mangpadpadas a mangiladawan iti rikna ti mannurat. Kasano a mayebkastayo ti panagdayawtayo iti Apo? Mabalin a magustuan dagiti miembro ti pamilia ti panangisurat kadagiti bukodda a salmo ti panagdayaw ken panangibinglay kadagitoy iti tunggal maysa.
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “Teach Me to Walk in the Light,” Children’s Songbook, 177.
Panangpadur-as iti Panangisurotayo
Usarem dagiti audio recording. Bayat ti panangisurom iti pamiliam, ibilangmo ti idedengngeg iti audio a bersion dagiti nasantuan a kasuratan, a masarakan iti ChurchofJesusChrist.org wenno iti Gospel Library app. Ti panagdengngeg kadagiti salmo ti mabalin a naipangpangruna a nabileg gapu ta saanda a nairanta a maisawang iti napigsa.
“Ipannak iti dana dagiti bilbilinmo, ta kadakuada maragsakannak” (Salmo 119:35).