“Agosto 22–28. Dagiti Salmo 102–103; 110; 116–119; 127–128; 135–139; 146–150: ‘Amin nga Adda Angesna Idaydayawda Koma ni Jehova’” Umaykayo, Sumurot Kaniak—Para iti Primary: Daan a Tulag 2022 (2021)
“Agosto 22–28. Dagiti Salmo 102–103; 110; 116–119; 127–128; 135–139; 146–150,” Umaykayo, Sumurot Kaniak—Para iti Primary: 2022
Agparintumengto Amin a Tumeng, ni J. Kirk Richards
Agosto 22–28
Dagiti Salmo 102–103; 110; 116–119; 127–128; 135–139; 146–150
“Amin nga Adda Angesna Idaydayawda Koma ni Jehova”
No kasapulam dagiti nayon a kapanunotan bayat ti panagsaganam a mangisuro, kitaen iti “Dagiti Nainayon a Resources para iti Panangisuro kadagiti Ubbing” ken “Panangipaay iti Kasapulan dagiti In-inaudi nga Ubbing” iti rugi ti daytoy a resource.
Isuratmo dagiti Impresionmo
Yawis ti Panagbibinninglay
Ipakitam ti sumagmamano kadagiti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ken awisem dagiti ubbing a mangisarita no ania ti makitada kadagiti ladawan. Tulongam ida a mangkita kadagiti pagnanaigan dagitoy a ladawan ken no ania ti nasursuroda iti libro dagiti Salmo.
Isuro ti Doktrina: In-inaudi nga Ubbing
Maipada ti balikas ti Dios iti maysa a lawag.
Adda dagiti ubbing a sursuruam iti dana nga agsubli iti Nailangitan nga Ama. Makatulong ti balikas ti Dios iti panangtalinaedda iti dayta a dana ita ken iti unos ti panagbiagda.
Dagiti Mabalin nga Aktibidad
-
Ipakitam dagiti ladawan dagiti banag a nadakamat iti Salmo 119:105, ket awisem dagiti ubbing nga ikabil dagiti ladawan iti urnos bayat ti panangbasam iti bersikulo. Idawatmo kadagiti ubbing a mangulit kenka iti ragup ti balikas manipud iti bersikulo bayat ti panangitudom kadagiti ladawan.
-
Awisem dagiti ubbing nga agsarita maipapan iti no ania ti rikna ti adda iti kasipngetan. Ania dagiti banag a narigat nga aramiden iti kasipngetan? Mabalinmo nga awisen ti maysa nga ubing a mangpadas nga agaramid iti maysa a banag a nakakidem dagiti matada, kas iti panangidrowing iti maysa a ladawan. Apay a nalaklaka nga aramiden dagitoy a banag no adda silaw? Tulongam dagiti ubbing a makaawat no kasano a ti balikas ti Dios, a masarakan kadagiti nasantuan a kasuratan ken balikas dagiti sibibiag a propeta, ket manglawag iti dalantayo nga agsubli iti Nailangitan nga Ama.
Am-ammo ken ay-ayatendak ti Nailangitan nga Ama ken ni Jesucristo.
Iti unos ti panagbiagtayo, nasken a mapalagipantayo nga am-ammodatayo mismo ti Nailangitan nga Ama ken ni Jesus. Makatulong kenka tiSalmo 139 iti panangisurom kadagiti ubbing nga am-ammona ida ken ay-ayatenna ida.
Dagiti Mabalin nga Aktibidad
-
Agaramidka iti ababa a listaan dagiti banag nga ammom maipapan iti tunggal ubing. Bayat ti panangbasam iti maysa a listaan iti maminsan, idawatmo kadagiti ubbing a mangpugto no asino ti iladladawanda. Basaem ti Salmo 139:1–3, ken tulongam dagiti ubbing a makaawat kadagiti balikas a mabalin a dida ammo. Paneknekam nga am-ammo ida a nasayaat unay ti Nailangitan nga Ama ken ni Jesus—ammoda ti nagnaganda, no ania ti mangparagsak ken mangpaliday kadakuada, ken dagiti banag nga aramidenda a nasayaat.
-
Basaem ti Salmo 139:23, ket awisem dagiti ubbing a mangikabil kadagiti imada iti puspusoda no isaom ti “puso” ket sagidenda ti uloda no isaom ti “pampanunot.” Ibinglay ti maysa a panawen idi nariknam nga ammo ti Dios ti pusom ken dagiti pampanunotmo.
Maidaydayawko ti Apo.
Ti mangidaydayaw iti Apo kaipapannanna ti mangyebkas iti panagyaman ken ayattayo para Kenkuana. Tulongam dagiti ubbing a mangsursuro nga agdaydayawtayo Kenkuana no aramidentayo dagiti banag kas iti agkanta, agkararag, ken agtungpal kadagiti pannursurona.
Dagiti Mabalin nga Aktibidad
-
Awisem dagiti ubbing a mangibinglay kadagiti padas idi indaydayaw ida ti maysa a tao wenno imbagana kadakuada nga inaramidda iti nasayaat a trabaho. Ibinglay ti sumagmamano kadagiti nasayaat a banag manipud iti Salmo 146:6–9 nga inaramid ti Apo, ket awisem dagiti ubbing nga agsarita maipapan iti dadduma pay a banag nga aramidenna para kadatayo. Tulongam ida nga agpanunot kadagiti wagas a mabalin a pangidaydaywanda Kenkuana para kadagita a banag.
-
Aggigiddan nga agkansion iti maysa a kanta ti panagdaydayaw, kas iti “Beauty Everywhere” (Children’s Songbook,232). Ilawlawag a para kadagiti Israelita iti nabayagen a panawen, kasla kanta dagiti Salmo a kankantaentayo iti agdama a pagrukbab ken pagdaydayaw iti Dios.
Isuro ti Doktrina: In-inauna nga Ubbing
Idiaya ti Apo kaniak ti liwliwa ken namnama.
Ammo ti Apo dagiti pannubok ken leddaangtayo, ket kayatna a liwliwaen ken paregtaennatayo. Tulongam dagiti ubbing a mangbukel iti pammatida Kenkuana tapno umasidegda Kenkuana iti panawen ti panagkasapulan.
Panangagas, ni J. Kirk Richards
Dagiti Mabalin nga Aktibidad
-
Idawatmo iti maysa kadagiti ubbing a mangbasa iti Salmo 102:1–2. Kasano a matulongannatayo ti Apo kabayatan ti panawen ti riribuk? Kasano a kiddawentayo ti tulongna? Mangibinglay iti maysa a padas a nakariknaam a nangngegan ti Dios dagiti kararagmo idi nagkasapulanka, ken awisem dagiti ubbing a mangibinglay kadagiti padas ken pammaneknekda.
-
Awisem dagiti ubbing a mangsapul kadagiti balikas ti liwliwa ken namnama iti Salmo 103. Kasano a makatulong dagitoy a balikas kadagiti tao a maipaspasango kadagiti pannubok? Allukoyem dagiti ubbing a mangisurat kadagiti ragup ti balikas a nasarakanda a napnuan kaipapanan a mangipalagip kadakuada a matulongan ida ti Apo no addaanda kadagiti pannubok.
Matulongannak ti balikas ti Dios a sumurot iti danana.
Nupay mabalin a kasla nasipnget ti lubong no dadduma, mabalin ti balikas ti Dios a manglawag iti danatayo ket makatulong kadatayo nga agsubli Kenkuana.
Dagiti Mabalin nga Aktibidad
-
Mangidrowing iti pisarra iti ladawan ti maysa a silaw (kas iti maysa a lampara) ken maysa a ladawan dagiti nasantuan a kasuratan. Awisem dagiti ubbing a mangbasa iti Salmo 119:105. Kasano a tulongannatayo ti silaw? Kasano a tulongannatayo ti balikas ti Dios? Paisurat kadagiti ubbing dagiti sungbatda iti pisarra iti abay dagiti ladawan. Kasano a maipada ti balikas ti Dios iti maysa a silaw? Kasano a tulongannatayo nga agtalinaed iti dana nga agturong nga agsubli iti Nailangitan nga Ama?
-
Bingayem dagiti ubbing iti kada paris, ken mangted iti tunggal paris iti maysa kadagiti sumaganad a binatog ti nasantuan a kasuratan: Salmo 119:47–48; Salmo 119:105; 1 Nephi 11:25; 2 Nephi 31:20. Awisem ida a mangbasa kadagiti binatog ken mangsapul no ania ti inted ti Nailangitan nga Ama kadatayo tapno agtalinaed iti dana nga agsubli Kenkuana. Awisem dagiti ubbing a mangutob ken mangibinglay no ania ti mariknada a nakaparegtaanda nga aramiden gapu iti nasursuroda.
-
Aggigiddan nga agkansion iti maysa a kanta maipapan iti panangsurot iti dana ti Dios, kas iti no kasano a tulongannatayo ni Jesus, kas iti “I Will Walk with Jesus” (ChurchofJesusChrist.org). Ania ti masursurotayo manipud iti daytoy a kanta maipapan iti no kasano ti agtalinaed iti umno a dana?
Matulongannak ti Nailangitan nga Ama ken ni Jesucristo a mangammo no kasano ti dumur-as.
Isuro tiSalmo 139 nga ammo ti Dios ti amin a banag maipapan kadatayo, agraman dagiti pagpigsaan ken pagkapsutantayo. No umasidegtayo Kenkuana, maisurona kadatayo no ania ti nasken nga aramidentayo tapno agbalin nga ad-adda pay a kas Kenkuana.
Dagiti Mabalin nga Aktibidad
-
Isuratmo dagiti balikas ti Salmo 139:23–24 iti pisarra, ket awisem dagiti ubbing a manguged kadagiti balikas a mangiladawan kadagiti banag a maaramid ti Dios para kadatayo. Apay a kayattayo nga aramiden ti Dios dagitoy a banag? Kasano ti panangawistayo Kenkuana a “mangiturong [kadatayo] iti dalan nga agnanayon”?
-
Allukoyem dagiti ubbing a “sukimatenda” ti bukodda a biag para kadagiti wagas a mabalin a pakapagdur-asanda iti uppat a tay-ak ti pokus iti programa ti Ubbing ken Agtutubo—espiritual, sosial, pisikal, ken intelektual. Ipalagip kadakuada nga ammo iti Apo no kasano a makapagdur-asda iti tunggal maysa kadagitoy a tay-ak, ken allukoyem ida nga agkalikagum a manggun-od iti pannarabayna.
-
Agkansion iti maysa a kanta maipapan iti no kasano a matulongannatayo ti Nailangitan nga Ama a dumur-as, kas iti maikadua a berso ti “Help Me, Dear Father” (Children’s Songbook, 99). Ibinglaymo no kasano a tinulongannaka a dimmur-as ti Nailangitan nga Ama ken ni Jesucristo.
Yallukoy ti Panagsursuro iti Pagtaengan
Sagpaminsan, mabalinmo nga awisen ti maysa kadagiti ubbing ken maysa kadagiti miembro ti pamiliana a mangibinglay iti klase no ania ti ar-aramidenda a panagsursuro iti ebanghelio iti pagtaengan. Allukoyem dagiti dadduma pay nga ubbing a mangibinglay kadagitoy a kapanunotan kadagiti pamiliada.
Panangpadur-as iti Panangisurotayo
Usarem ti musika. Dagiti kanta iti Primary ken himno ti makatulong kadagiti ubbing a makaawat ken mangaramat kadagiti kinapudno ti ebanghelio iti makallalagip a wagas. Ti panagkanta ti mangpatalinaed pay nga aktibo dagiti ubbing a makiraman iti panagsursuro. (Kitaen iti Panangisuro iti Wagas ti Mangisalakan,22.)