Ni Jehova Isu ti Pastorko, ni Yongsung Kim, havenlight.com

Agosto 8–14

Dagiti Salmo 1–2; 8; 19–33; 40; 46

“Ni Jehova Isu ti Pastorko”

Isingasing daytoy a balabala ti sumagmamano a napipintas a binatog iti Dagiti Salmo a mangbendisionto kadagiti ubbing, ngem dimo riknaen a limitadoka kadagitoy. Surotem ti pannarabay ti Espiritu.

Isuratmo dagiti Impresionmo

Yawis ti Panagbibinninglay

Iti sumagmamano nga aldaw a nasapsapa, awisem ti sumagmamano nga ubbing a mangitugot iti klase kadagiti drowing a mangibagi kadagiti banag a nabasada ken ti pamiliada iti Dagiti Salmo iti daytoy a lawas, kas iti maysa a pastor, (kitaen iti Dagiti Salmo 23:1), maysa a baso (kitaen iti Salmo 23:5), wenno maysa a puso (kitaen iti Salmo 24:4). Awisem ida a mangisarita maipapan kadagiti drowingda ken maysa a bersikulo manipud iti Dagiti Salmo a mangdakamat kadagitoy.

Isuro ti Doktrina: In-inaudi nga Ubbing

Dagiti Salmo 19:1; 33:5

“Dagiti langlangit ipalawagda ti dayag ti Dios.”

Dagiti Salmo 19 ken 33 ti mangisuro a makasaraktayo iti pakakitaan ti dayag ken kinaimbag ti Dios ti amin iti aglawlawtayo kadagiti napintas a pinarsuana. Tulongam dagiti ubbing a makasursuro a makakita iti ima ti Dios iti lubong iti aglawlawda.

Dagiti Mabalin nga Aktibidad

• Ipakitam kadagiti ubbing ti sumagmamano a ladawan dagiti napipintas a banag a pinarsua ti Dios, wenno agigiddan a tumamdagkayo iti tawa a mangkita kadagitoy a banag. Saludsodem kadagiti ubbing no ania ti magustuanda maipapan kadagiti pinarsua ti Nailangitan nga Ama. Basaem ti Salmo 19:1 wenno 33: 5, ket saludsodem kadagiti ubbing no kasano ti riknada maipapan iti Nailangitan nga Ama no makitada dagiti pinarrsuana.

• Agkansion iti maysa a kanta maipapan kadagiti pinarsua ti Dios, kas iti “The World Is So Lovely” (Children’s Songbook,233). Awisem dagiti ubbing a pumidut iti maysa a banag a pinarsua ti Dios (kas iti maysa a banag a nadakamat iti kanta) ken mangidrowing iti maysa a ladawan daytoy tapno ibinglay kadagiti pamiliada.

Salmo 23

“Ni Jehova Isu ti Pastorko.”

No masursuro dagiti ubbing iti kinaubingda a ti Apo ti pastorda, ad-adda a sumurotda Kenkuana “kadagiti dana ti kinalinteg.”

Dagiti Mabalin nga Aktibidad

• Mangted iti tunggal ubing iti maysa a kopia ti panid ti aktibidad iti daytoy a lawas, wenno mangted iti tunggal maysa kadakuada iti maysa a ladawan manipud iti panid ti aktibidad. Awisem ida a dumngeg bayat ti panangbasam iti Salmo 23. Idawatmo kadakuada a mangitudo wenno mangitag-ay iti maysa a ladawan no mangngeganda a nadakamat daytoy iti salmo. Paneknekam nga aywanannatayo ni Jesus, kas met laeng iti panangaywan ti maysa a pastor kadagiti karnerona.

• Ibagam kadagiti ubbing ti sumagmamano a wagas nga ammom nga ay-ayatennaka ti Mangisalakan. Awisem dagiti ubbing nga agtakder a saggaysa iti maminsan ket mangibinglay iti sumagmamano a wagas nga ammoda nga ay-ayaten ni Jesus ida. Aggigiddan nga agkansion iti maysa a kanta a makaited kadakuada kadagiti kapanunotan, kas iti “I Feel My Savior’s Love” (Children’s Songbook, 74–75).

Salmo 30:5

Mapagbalin ni Jesucristo a rag-o ti liday.

Utobem no kasano a matulongamto dagiti ubbing a makagun-od iti bukodda a pammaneknek iti rag-o nga idiaya ni Jesucristo kadatayo no nalidaytayo.

Dagiti Mabalin nga Aktibidad

• Awisem dagiti ubbing nga agpammarang nga agsangsangitda bayat ti panangbasam iti Salmo 30:5, “Ti sangit mabalin nga agpatnag iti rabii.” Kalpasanna idawatmo kadakuada nga agragsak bayat ti panangbasam iti, “Ngem iti ragsak umay iti bumigat.” Uliten daytoy a ragup ti balikas ti sumagmamano a gundaway ken paneknekam kadagiti ubbing a gapu ken ni Jesucristo, ti liday a mariknatayo iti daytoy a biag mabalin a masukatan iti rag-o.

• Ipakitam ti ladawan ti Mangisalakan, ket isaritam kadagiti ubbing maipapan iti sumagmamano a banag a naaramidna para kenka a nangisangbay iti rag-o. Mangtedi iti tunggal ubing iti batang a mangiggem iti ladawan ket ibinglay no ania ti inaramid ni Jesus a mangisangbay kadakuada iti rag-o.

Isuro ti Doktrina: In-inauna nga Ubbing

Salmo 23; 27–28; 32; 46

Idiaya ti Apo kaniak ti kappia, pigsa, ken pannarabay.

Adu kadagiti Salmo ti mangipaneknek maipapan kadagiti bendision ti Apo iti biagtayo. Mabalinmo nga usaren ti Dagiti Salmo a mangtulong kadagiti ubbing a mangsursuro nga agtalektayo Kenkuana ken umasideg Kenkuana.

Dagiti Mabalin nga Aktibidad

• Isurat iti pisarra Ni Jehova isu ti . Pagpiliem dagiti ubbing iti maysa wenno ad-adu pay kadagiti sumaganad a nasantuan a kasuratan a mangbasa iti: Dagiti Salmo 23:1; 27:1; 28:1; 28:7; 32:7; 46:1. Idawatmo kadakuada a mangkumpleto iti binatog iti pisarra nga us-usaren ti no ania ti masursuroda manipud iti nasantuan a kasuratanda. Tulongam dagiti ubbing a mangilawlawag no ania ti isuro kadatayo dagitoy a simbolo maipapan ti Apo.

• Ipakitam kadagiti ubbing ti ladawan ti maysa a kordero. Idawatmo kadakuada a manginagan iti sumagmamano a banag a kasapulan ti kordero tapno agbalin a natalged ken nasalun-at, ken allukoyen ida nga agsapul iti Dagiti Salmo 23:1–4 para kadagiti kapanunotan. Kalpasanna ipakitam ti ladawan ti maysa nga ubing. Ania ti kasapulantayo tapno agbalin a naespirituan a natalged ken nasalun-at? Aggigiddan a mangbasa iti Salmo 23, ket saludsodem kadagiti ubbing no kasano a maidilig dagiti banag nga ar-aramiden ti pastor iti ar-aramiden ni Jesucristo para kadatayo.

Nasken a naespirituan a nadalus ken natarnawtayo a sumrek iti imatang ti Apo.

Salmo 24:3–4

Tapno sumrek iti templo, kasapulantayo dagiti “nadalus nga im-ima, ken natarnaw a puso.”

Bayat ti panangpadpadaan dagiti ubbing iti iseserrek iti templo iti maysa nga aldaw, tulongam ida a makaawat a mabalinda ti agsagana babaen ti panagbalin a naespirituan a nadalus babaen ti Pannubbot ti Mangisalakan.

Dagiti Mabalin nga Aktibidad

• Ipakitam kadagiti ubbing ti ladawan ti maysa a templo. Awisem ida a mangbasa iti Salmo 24:3 ket mangsapul kadagiti balikas a mangipalagip kadakuada iti templo. Kalpasanna aggigiddan a mangbasa iti bersikulo 4 tapno ammuen no asino ti mabalin a sumrek iti templo (ilawlawag ti ania man a saan a pamiliar a balikas). Kasano nga agbalin a pisikal a narugit dagiti imatayo? Kasano nga agbalin a naespirituan a narugit dagiti ima ken pusotayo? Kasano a pisikal a dalusantayo dagiti imatayo? Kasano a tulongannatayo ti Mangisalakan a mangdalus kadagiti ima ken pusotayo a naespirituan? (No makatulong, ilawlawag a dagiti “im-ima” iti daytoy a bersikulo ket mabalin a mangibagi kadagiti tignaytayo ken ti “puso” mabalin a mangibagi kadagiti tarigagaytayo.)

• Irebyum kadagiti ubbing dagiti naidawat a kasapulan nga umawat iti temple recommend (kitaen iti Russell M. Nelson, “Closing Remarks,” Liahona, Nob. 2019, 120–22; wenno mangawis iti maysa a miembro ti bishopric tapno mangilawlawag kadagitoy naidawat a kasapulan iti klase). Awisem dagiti ubbing a pumili iti maysa a banag a mariknada a makaparegta nga aramiden tapno makapagsagana nga agbalin a maikari a sumrek iti templo.

Salmo 46:10

“Agtalnakayo, ket ammuenyo a siak ti Dios.”

Iti kaadda iti gundaway nga agbalin a managraem ken natalna, iti baet ti kinaadu iti aramid iti aglawlawtayo, ket makatulong kadatayo a mangpapigsa kadagiti pammaneknektayo a sibibiag ti Dios.

Dagiti Mabalin nga Aktibidad

• Tulongam dagiti ubbing a mangikabesa ti umuna a linia manipud iti Salmo 46:10: “Agtalnakayo, ket ammuenyo a siak ti Dios.” Isaritam kadakuada maipapan no ania ti mabalin a kayat a sawen ti “agtalnakayo,” iti agpada a bagi ken panunot. Ibinglaymo kadagiti ubbing ti maysa a padas iti panagbalin a “natalna” ti nangpapigsa iti pammaneknekmo maipapan iti Nailangitan nga Ama. Awisem dagiti ubbing a mangibinglay kadagiti ania man a napasaranda. Apay a ti panagbalin a natalna ket napateg a wagas a mangammo a sibibiag ti Dios?

• Awisem dagiti ubbing a mangrebyu kenka no ania ti aramidenda kabayatan ti gagangay nga aldaw. Tulongam ida a mangpanunot kadagiti kanito kabayatan ti aldaw no mabalinda a padasen ti “agtalna” ken makarikna nga asidegda iti Nailangitan nga Ama. Allukoyem ida a mangituding iti maysa a panggep a tun-oyen a mangusar iti kakasta a kanito kabayatan ti umay a lawas tapno mangpapigsa iti pammaneknekda iti Nailangitan nga Ama.

• Awisem dagiti ubbing a mangilista iti sumagmamano a banag a maaramidtayo a mangammo para iti bagbagitayo a pudno ti Nailangitan nga Ama ken ay-ayatennatayo. Awisem ida a pumili iti maysa a banag manipud iti listaan a kayatda nga aramiden.

Yallukoy ti Panagsursuro iti Pagtaengan

Awisem dagiti ubbing a pumili iti maysa a bersikulo a kayatda manipud kadagiti salmo a napagsasaritaanda ita nga aldaw. Allukoyem ida a mangibinglay iti dayta a bersikulo iti maysa a miembro ti pamilia wenno maysa a gayyem.

Panangpadur-as iti Panangisurotayo

Agpokuska iti kasapulan dagiti ubbing. Kas maysa a mannursuro, addaka iti naidumduma a saad a makaawat iti kasapulan dagiti sursuruam. Dagiti padasmo, ti kinamannakaammom kadagiti ubbing, ken ti pannarabay ti Espiritu ket mangtulongto kenka no ania kadagiti aktibidad iti panagsursuro ti kangrunaan a mangpapigsa iti pammatida iti Nailangitan nga Ama ken ni Jesucristo.