Panangisalakan iti Dayta Napukawen, ni Michael T. Malm

Agosto 15–21

Dagiti Salmo 49–51; 61–66; 69–72; 77–78; 85–86

“Ipalawagkonto ti Impaayna Itoy Kararuak”

Ti pagwadam kas maysa a mannursuro ti ebanghelio ket mabalin a nabileg nga impluensia kadagiti ubbing. Ibinglaymo kadakuada dagiti naespirituan a padasmo iti panagsursuro iti ebanghelio.

Isuratmo dagiti Impresionmo

Yawis ti Panagbibinninglay

Ibinglaymo kadagiti ubbing ti maysa a bersikulo manipud iti maysa a salmo, maysa a himno, wenno maysa a kanta dagiti ubbing a makatulong kenka a mangrikna iti ayat ti Mangisalakan. Ikkam ti tunggal ubing iti gundaway a mangaramid met iti kasta.

Isuro ti Doktrina: In-inaudi nga Ubbing

Salmo 51:10

No agaramidak iti biddut a pili, matulongannak ni Jesucristo nga agbalbaliw.

Tulongam dagiti ubbing a makaawat a dagiti biddut ket paset ti mortal a biag ken makaawattayo iti tulong manipud ken ni Jesucristo a mangrimbaw kadagitoy.

Dagiti Mabalin nga Aktibidad

• Mangibinglay ti maysa a simple nga estoria, manipud iti biagmo wenno manipud iti Friend wenno Liahona, maipapan iti maysa nga ubing a nakaaramid iti biddut a pili ngem immawat iti tulong manipud iti Mangisalakan tapno agbalin a nasaysayaat (kas pagarigan, kitaen iti video “The Shiny Bicycle” iti ChurchofJesusChrist.org). Basaem ti Salmo 51:10, ket iburaymo ti rag-o a mariknam no tulongannaka ti Mangisalakan a maaddaan iti “nadalus a puso” ken “nalinteg nga espiritu.”

• Ipakitam kadagiti ubbing ti panid ti aktibidad iti daytoy a lawas. Itudom iti tunggal ladawan, ken pailadawanmo kadagiti ubbing no ania ti makitada. Basaem dagiti kapsion tapno matulongan dagiti ubbing a masursuruan maipapan iti panagbabawi ken pannakapakawan.

Salmo 71:8

Maibagak kadagiti dadduma maipapan ken ni Jesucristo.

Dagiti napnuan ti pammati a balikas ti maysa nga ubing ket addaan iti naidumduma a bileg a mangsagid iti puspuso. Mangted iti panagtalek kadagiti ubbing a ti pammaneknekda ken ni Jesucristo ket makatulong kadagiti dadduma.

Makasaritatayo dagiti dadduma no ania ti inaramid ni Jesus para kadatayo.

Dagiti Mabalin nga Aktibidad

• Ibasam kadagiti ubbing ti Salmo 71:8, ken mangidrowing iti dakkel a ngiwat iti pisarra. Idawatmo kadakuada a makatulong kenka a “mangpunno” iti ngiwat kadagiti banag a maibagatayo iti dadduma maipapan ken ni Jesucristo.

• Mangipasaka iti maysa a ladawan ni Jesucristo. Pagsisinnublatem dagiti ubbing iti panagiggem iti ladawan ken panangsaoda iti maysa a banag nga ammoda maipapan Kenkuana. Ania ti inaramidna para kadatayo? (Dagiti ladawan iti Libro ti Arte ti Ebanghelio ket makaipaay iti sumagmamano a kapanunotan.)

Salmo 86:7

Denggen ken sungbatan ti Nailangitan nga Ama dagiti kararagko.

Kaaduan kadagiti salmo ti kasla karkararag iti Dios para iti tulong, pannarabay, wenno pannakasaluad. Ibilangmo no kasano a matulongam dagiti ubbing a mangpapigsa iti pammatida a denggen ken sungbatan ida ti Nailangitan nga Ama no agkararagda.

Dagiti Mabalin nga Aktibidad

• Saludsodem kadagiti ubbing no kasano ti pannakisaritada kadagiti tao nga agnaed iti adayo. Ipakitam kadakuada dagiti banag a mabalintayo nga usaren a makisarita, a kas iti maysa a telepono wenno maysa a surat. Ibasam kadakuada ti Salmo 86:7. Kasano nga “umawagtayo” iti Nailangitan nga Ama? Kasano ti panangsungbatna kadatayo?

• Awisem dagiti ubbing a mangyakem kadagiti banag a maaramidda iti tunggal aldaw, a kas iti panagriing, pannangan iti pamigat, ipapanaw a mapan iti pagadalan, wenno pannaturog. Tulongam ida a mangsapul iti kanito kabayatan ti aldaw a makapagkararagda iti Nailangitan nga Ama. Paneknekam a makapagkararagtayo Kenkuana iti ania man nga oras, ken kanayon a denggennatayo.

• Aggigiddan nga agkansion iti kanta maipapan iti kararag, kas iti “A Child’s Prayer” (Children’s Songbook, 12–13). Isaritam maipapan iti panawen idi sinungbatan ti Dios dagiti kararagmo.

Salmo 77:11

“Lagipekto dagiti ar-aramid ni Jehova.”

Dagiti nasantuan a kasuratan ti mabalin a mangbukel iti pammatitayo ken ni Jesucristo babaen ti panangtulong kadatayo a manglaglagip iti “nakaskasdaaw a gapuanan idi ugma.”

Dagiti Mabalin nga Aktibidad

• Ibasam kadagiti ubbing ti Salmo 77:11, ket ibagam kadakuada no kasano ti panangpadasmo a “lagipen dagiti ar-aramid ni Jehova,” agraman dagiti aramidna iti biagmo. Awisem dagiti ubbing a mangidrowing kadagiti ladawan a makatulong kadakuada a manglagip kadagiti naindaklan a banag nga inaramidna.

• Ipakitam dagiti ladawan manipud iti daytoy a libro wenno manipud iti Umaykayo, Sumurot Kaniak—Para kadagiti Indibidual ken Pamilia a mangipalagip kadagiti ubbing maipapan kadagiti estoria a nasursuroda iti Daan a Tulag maipapan kadagiti naindaklan a banag nga inaramid ti Apo para kadagiti taona. Saludsodem kadakuada no ania kadagitoy nga estoria ti magustuanda unay ken apay.

Isuro ti Doktrina: In-inauna nga Ubbing

Salmo 51

Ti panagbabawi ket maysa a panagbalbaliw ti puso.

Naglaon tiSalmo 51 iti sumagmamano a kinapudno maipapan iti panagbabawi. Kasano a matulongamto dagiti ubbing a mangtakuat kadagitoy a kinapudno?

Dagiti Mabalin nga Aktibidad

• Dutokam ti tunggal ubing a mangbasa iti maysa kadagiti reperensia ti nasantuan a kasuratan iti panid ti aktibidad itoy a lawas. Idawatmo kadakuada a mangsapul kadagiti balikas a mangisuro kadakuada iti maysa a banag maipapan iti panagbabawi. Paisuratmo kadakuada dagiti balikas iti pisarra. Kalpasan a nakaibinglay ti tunggal maysa, saludsodem kadagiti ubbing no kasano ti panangsungbatda iti maysa a gayyem nga agsaludsod, “Ania ti kayat a sawen ti agbabawi?”

• Mangidrowing iti maysa a puso iti pisara. Idawatmo kadagiti ubbing a manginagan iti sumagmamano a basol a pangsulisogan ni Satanas kadatayo nga agbasol. Isuratmo dagita a basbasol iti uneg ti puso. Idawatmo kadagiti ubbing a mangsapul iti balikas a puso iti Salmo 51:10, 17. Ania ti isuro dagitoy a bersikulo maipapan iti panagbabawi? (kitaen met iti bersikulo 6). Tulongam dagiti ubbing a makaawat nga uray no isardengtayo ti agaramid iti basol, kasapulan ti puspusotayo ti agbalbaliw tapno makapagbabawi. Idawatmo kadagiti ubbing a pugasenda dagiti basol iti uneg ti puso iti pisarra ket suratan kadagiti baro a balikas a mangiladawan iti panagbalbaliw iti puspusotayo no agbabawitayo. Ibinglaymo ti pammaneknekmo a ti Dios mabalinna a “parsuaen [kadatayo] ti nadalus a puso” no agbabawitayo (bersikulo 10).

Dagiti Salmo 66:16; 77:11; 78:7

“Lagipekto dagiti ar-aramid ni Jehova.”

Sinuruan dagiti Israelita dagiti annakda maipapan kadagiti milagro nga inaramid ti Dios para kadakuada tapno dagiti ubbing “maisaadda koma ti inanamada iti Dios” (Salmo 78:7).

Dagiti Mabalin nga Aktibidad

• Idawatmo kadagiti ubbing a mangibinglay kenka iti sumagmamano a paggugustoda nga estoria manipud kadagiti nasantuan a kasuratan (dagiti ladawan manipud iti Libro ti Arte ti Ebanghelio ti makatulong kadakuada a mangpanunot kadagiti estoria). Apay a mangustuanda dagitoy nga estoria? Ania ti isuro kadatayo dagitoy nga estoria maipapan iti Apo? Aggigiddan a mangbasa iti Salmo 77:11; 78:7. Apay a napateg a “lagipen dagiti ar-aramid ni Jehova”?

• Idawatmo kadagiti ubbing a mangbasa iti Salmo 66:16 ken panunotem wenno isuratmo dagiti sungbat iti saludsod nga “Ania ti inaramid ti Apo para iti kararuak?” Kalpasanna paibinglaymo kadakuada dagiti sungbatda, no kayatda. Ania ti maaramidtayo tapno “kanayon a lagipen” (Moroni 4:3; 5:2) no ania ti inaramid ti Apo para kadatayo?

Salmo 86:5, 13, 15

Kayat ti Apo a mamakawan.

No agbasoltayo, kayat ni Satanas a panunotentayo a dinatayonto pakawanen ti Apo iti kaano man. Tulongam dagiti ubbing a mangbukel iti pammatida a ti Apo “sisasagana a mamakawan; ket aglaplapusanan iti kinamanagayat” (Salmo 86:5).

Dagiti Mabalin nga Aktibidad

• Ipakitam ti ladawan ti Mangisalakan (kas iti maysa iti Umaykayo, Sumurot Kaniak—Para kadagiti Indibidual ken Pamilia), ket idawatmo kadagiti ubbing no ania dagiti balikas nga usarenda a pangiladawan Kenkuana. Awisem ida a mangsapul kadagiti balikas a mangiladawan Kenkuana iti Salmo 86:5, 13, 15. No kasapulan, tulongam ida a mangilawlawag kadagitoy a balikas. Ania ti maisaotayo iti maysa a gayyem a makarikna a makagura ti Dios kadakuada no agbasolda?

• Makipagkansion kadagiti ubbing iti maysa a kanta a mariknam ti mangtulongto kadakuada a makaawat iti managpakawan nga ugali ti Mangisalakan, kas iti “I Stand All Amazed” (Hymns, no. 193). Ibinglaymo ti pammaneknekmo a kayat ni Jesucristo a pakawanennatayo.

Yallukoy ti Panagsursuro iti Pagtaengan

Awisem ti tunggal ubing a manginagan iti maysa a gapu nga ay-ayatenda ti Nailangitan nga Ama ken ni Jesucristo. Allukoyem ida a mangibinglay iti dayta a gapu iti maysa a kapamilia iti pagtaengan. Paneknekam a dagiti balikasda ti mangbendisionto iti dayta a tao.

Panangpadur-as iti Panangisurotayo

Ipeksam ti panagtalek. “No makarikna dagiti [ubbing] nga adda panagtalekmo kadakuada, dumakkelto ti panagtalekda iti nadiosan a potensialda. … Siaayat a makisaritaka nga ammom a makapagbalinda a responsable para iti bukodda a pannakasursuro” (Panangisuro iti Wagas ti Mangisalakan, 28).