“Agosto 29–Septiembre 4: Dagiti Proverbio 1–4; 15–16; 22; 31; Eclesiastes 1–3; 11–12: ‘Ti Panagbuteng ken Jehova Isu ti Punganay ti Pannakaammo,’” Umaykayo, Sumurot Kaniak—Para iti Primary: Daan a Tulag 2022 (2021)
“Agosto 29–Septiembre 4: Dagiti Proverbio 1–4; 15–16; 22; 31; Eclesiastes 1–3; 11–12,” Umaykayo, Sumurot Kaniak—Para iti Primary: 2022
Agosto 29–Septiembre 4
Dagiti Proverbio 1–4; 15–16; 22; 31; Eclesiastes 1–3; 11–12
“Ti Panagbuteng ken Jehova Isu ti Punganay ti Pannakaammo”
Bayat ti panagadalmo kadagiti Proverbio ken Eclesiastes, panunotem ti maipapan kadagiti ubbing nga isursurom. Ania dagiti mensahe manipud kadagitoy a nasantuan a kasuratan ti makatulong kadakuada a makarikna nga as-asidegda iti Nailangitan nga Ama ken ni Jesucristo?
Isuratmo dagiti Impresionmo
Yawis ti Panagbibinninglay
Mangidrowing iti pisarra kadagiti ladawan dagiti banag a nadakamat iti libro dagiti Proverbio, kas iti maysa a puso, maysa a silaw, wenno maysa a dana. Tulongam dagiti ubbing a mangbasa iti Dagiti Proverbio 3:5; 4:18, 26, ket awisem ida a mangibinglay iti maysa a banag a nasursuroda maipapan kadagitoy a banag manipud kadagiti nasantuan a kasuratan.
Isuro ti Doktrina: In-inaudi nga Ubbing
Makapagtalekak iti Apo iti amin a pusok.
No agtalektayo iti Apo iti amin a pusotayo, addaantayo iti pammati Kenkuana ken ammotayo a tulongannatayonto.
Dagiti Mabalin nga Aktibidad
-
Paiggemam iti maysa kadagiti ubbing ti maysa a ladawan ti Mangisalakan bayat ti panangbasam iti Dagiti Proverbio 3:5. Ibagam kadagiti ubbing no ania ti kaipapanan kenka ti panagtalek iti Apo. Awisem dagiti ubbing a mangaramid iti maysa a puso babaen kadagiti imada wenno ipan dagiti imada iti puspusoda bayat ti panangulit iti ragup ti balikas nga “agtalek iti Apo iti amin a pusom” iti sumagmamano a gundaway.
-
Idrowingmo ti maysa a dakkel a sinanpuso iti pisarra, ket tulongam dagiti ubbing a mangpanunot kadagiti banag a maaramidda a mangipakita nga agtalekda iti Apo. Awisem ida a mangidrowing kadagiti kapanunotanda iti uneg ti sinanpuso wenno iti maysa a papel. Allukoyem ida a mangibinglay iti kapanunotanda kadagiti pamiliada.
Mabalin a mangted dagiti ubbing iti “naalumamay a sungbat” babaen ti panangusar kadagiti nasayaat a balikas (Dagiti Proverbio 15:1).
Mausarko dagiti nasayaat a balikas.
Kadagiti makarurod wenno makapaupay a kasasaad, mabalin a masulisogtayo a sumungbat nga addaan panagpungtot. Isuro kadatayo tiDagiti Proverbio 15:1, 18 no kasano a malapdantayo ti agpungtot.
Dagiti Mabalin nga Aktibidad
-
Ibasam ti Dagiti Proverbio 15:1 kadagiti ubbing, ket ilawlawag dagiti ania man a balikas wenno ragup ti balikas a mabalin a saan a pamiliar kadakuada. Ibinglay ti sumagmamano a pagarigan dagiti kasasaad a mabalin a pakariknaan nga agpungtot ti maysa nga ubing (kas iti pannakisupiat iti maysa a kabsat a lalaki wenno babai). Tulongam ida a mangpanunot kadagiti “naalumamay a sungbat,” wenno nasayaat a balikas, a mabalinda nga usaren imbes a makagura a balikas. Tulongam ida a mangsanay iti panangisao kadagitoy a banag a naalumamay wenno iti naulimek a timek.
-
Agkansion iti maysa a kanta maipapan iti kinasayaat, kas iti “Kindness Begins with Me” (Children’s Songbook,145). Ania ti isuro kadatayo ti kanta maipapan iti panagbalin a nasayaat?
-
Tapno matulongan dagiti ubbing a makaawat no ania ti kayat a sawen ti “nabannayat nga agpungtot” (Dagiti Proverbio 15:18), isaritam ti bukod nga estoria idi nagpungtotka (wenno ti maysa a tao nga am-ammom), ngem pinilim ti nagbalin a nasayaat. Awisem dagiti ubbing a mangibinglay met kadagiti bukodda a padas. Tulongam dagiti ubbing nga agpanunot kadagiti banag a mabalinda nga aramiden imbes nga agpungtotda. Kas pagarigan, mabalinda a panunoten ti maipapan ken ni Jesus, kiddawenda iti Nailangitan nga Ama a tulonganna ida, agkantada iti maysa a kanta iti Primary para iti bagbagida, wenno, no mabalin, pumanawda lattan.
Maibinglayko iti dadduma dagiti adda kaniak.
Masursuro dagiti ubbing ti mangtulong kadagiti tao iti aglawlawda nga agkasapulan. Kasano a maparegtam ida a mangibinglay no ania ti adda kadakuada kadagiti dadduma?
Dagiti Mabalin nga Aktibidad
-
Ipakitam kadagiti ubbing ti sumagmamano a ladawan dagiti dadduma nga agserserbi wenno tumultulong kadagiti tao nga agkasapulan, agraman dagiti ladawan ti Mangisalakan (kas iti Libro ti Arte ti Ebanghelio, dagiti num. 42, 44,46). Kiddawem kadagiti ubbing a mangibaga kenka no ania ti mapaspasamak iti tunggal ladawan. Ibasam kadagiti ubbing ti Dagiti Proverbio 22:9. Ilawlawag a ti maysa a wagas a mabalintayo ti agserbi ket babaen ti pannangted iti “tinapay iti napanglaw,” ngem adu ti dadduma pay a wagas a panangtulong kadagiti agkasapulan. Awisem dagiti ubbing a mangidrowing iti maysa a ladawan ti bagbagida a mangtultulong iti maysa a tao.
-
Mangitugot iti klase iti sumagmamano a banag a mabalinmo nga ibinglay kadagiti ubbing, a kas kadagiti ladawan wenno krayola. Bayat ti pannangtedmo iti maysa iti tunggal ubing, sawem ti, “Ibinglayko ken ni [nagan ti ubing].” Pagsisinnublatem dagiti ubbing iti panangibinglay kadagiti banag iti tunggal maysa. Ania dagiti sumagmamano a a dadduma pay a banag a mabalinda nga ibinglay kadagiti dadduma?
-
Aggigiddan nga agkansion iti maysa a kanta maipapan iti panagserbi, kas iti “Give,’ Said the Little Stream” (Children’s Songbook,236). Wenno ipabuyam ti video a “Gordon Hinckley: Lessons I Learned as a Boy” (ChurchofJesusChrist.org). Saludsodem kadagiti ubbing no kasano ti mariknada no tulonganda dagiti dadduma.
Isuro ti Doktrina: In-inauna nga Ubbing
Dagiti Proverbio 1:7; 2:5; 15:33; 16:6; Eclesiastes 12:13
Tapno “agbuteng iti Dios” kaipapananna ti agayat ken agtungpal Kenkuana.
Maysa kadagiti napateg a mensahe iti Dagiti Proverbio ken Eclesiastes ket ti “agbutengka iti Dios, ken salimetmetam dagiti bilbilinna” (Eclesiastes 12:13). Utobem no kasano a matulongam dagiti ubbing a makaawat no ania ti kayat a sawen ti agbuteng iti Dios.
Dagiti Mabalin nga Aktibidad
-
Awisem dagiti ubbing a mangilista iti sumagmamano a banag a mabalin a pagbutngan dagiti tao. Kalpasanna kiddawen kadakuada a mangbasa iti Dagiti Proverbio 1:7 ken Eclesiastes 12:13. Ania ti kayat a sawen ti agbuteng iti Dios? Tapno matulongan a masungbatan daytoy a saludsod, idawat iti maysa nga ubing a mangbasa manen kadagiti bersikulo, a mangsuksukat iti balikas nga “agbuteng” iti balikas a “panagrukbab.” Uliten daytoy nga aktibidad kadagiti balikas a kas iti “ayat,” “panagtungpal,” wenno “agtungpal.” Kasano a mangbalbaliw iti pannakaawattayo iti no ania ti kayat a sawen ti agbuteng iti Dios?
-
Awisem ti tunggal ubing a pumili iti maysa kadagiti sumaganad a bersikulo a basaen, a mangsapsapul iti balikas nga “agbuteng”: Dagiti Proverbio 1:7; 2:5; 15:33; 16:6. Kiddawen kadagiti ubbing a mangibinglay no ania ti isuro ti bersikuloda maipapan kadagiti bendision a sumangbay no agbutengtayo iti Apo, a kaipapananna nga ipakitatayo ti panagrukbab ken panagdayaw Kenkuana (kitaen met iti Dagiti Proverbio 14:26–27). Kasano nga ipakitatayo iti Apo nga agayat ken agraemtayo Kenkuana?
“Agtalekka ken Jehova iti amin a pusom.”
-
Aggigiddan a mangbasa iti Dagiti Proverbio 3:5–7, ken awisem dagiti ubbing a mangilista kadagiti banag nga ibaga dagitoy a bersikulo a nasken nga aramidentayo ken nasken a saantayo nga aramiden. Saludsodem kadakuada no ania ti mariknada a mabalin a kayat a sawen ti tunggal maysa kadagitoy a banag. Ania dagiti kababalin a masarakantayo kadagiti tao a pagtalkantayo? Ania dagiti kababalin nga adda iti Apo a makatulong kadatayo nga agtalek Kenkuana?
-
Tapno ipakita no ania ti kayat a sawen ti “dika agtalged iti pannakaawatmo met laeng,” bay-am a padasen nga ipasanggir dagiti ubbing ti maysa a stick wenno maysa a lapis iti sumagmamano a banag, a kas iti maysa a libro wenno maysa a papel. Ania kadagiti banag ti kasayaatan? Apay a napateg ti “agtalek ken ni Jehova ket saan agtalged iti “pannakaawattayo laeng”?
Dagiti Proverbio 15:1, 18; 16:32
“Ti naalumamay a sungbat pagbaw-ingenna ti pungtot.”
Ti panagsasao a napungtot ti masansan a mangpalaus iti maysa a nakaro a kasasaad. Isuro dagitoy a bersikulo a dagiti balikastayo ken dagiti ugalitayo ti mabalin a mangpaawan iti pungtot ken gura.
Dagiti Mabalin nga Aktibidad
-
Isuratmo dagiti balikas a pungtot ken riri iti pisarra, ken mangibinglay iti maysa a pagarigan ti maysa a suppiat a mabalin nga adda kadagiti ubbing. Kalpasanna idawat kadagiti ubbing a mangbasa iti Dagiti Proverbio 15:1, 18; 16:32 ket pasapul ti balakad a maitedda kadagiti ubbing nga agsisinnupiat. Tunggal kanito a mangibinglay dagiti ubbing iti maysa a kapanunotan, awisem ida a mangpugas iti paset ti balikas iti pisarra. Awisem ida a mangsukat kadagita a balikas iti dadduma a mangiladladawan kadagiti kababalin a kas ken ni Cristo a mangisangbay iti talna.
-
Tulongam dagiti ubbing nga agpanunot kadagiti pakaammuan iti nasantuan a kasuratan idi impakita ti Mangisalakan no ania ti naisuro iti Dagiti Proverbio 15:1, 18; 16:32. Para kadagiti kapanunotan, mabalinda a sapulen iti Juan 8:1–11; 18:1–11. Aggigiddan nga agkansion iti maysa a kanta maipapan iti pagwadan ti Mangisalakan, kas iti “I’m Trying to Be like Jesus” (Children’s Songbook, 78–78). Kasano a masurottayo ti pagwadan ni Jesus bayat ti pannakipulapoltayo kadagiti miembro ti pamilia, gagayyem, ken kadagiti dadduma?
Yallukoy ti Panagsursuro iti Pagtaengan
Tulongam dagiti ubbing a pumidut iti maysa a bersikulo a basaenda iti klase a magustuanda. Allukoyem ida a mangibinglay iti dayta a bersikulo kadagiti pamiliada ket ibagam kadakuada no ania ti nasursuroda manipud iti daytoy.
Panangpadur-as iti Panangisurotayo
Dumur-as kas maysa a mannursuro a kas ken ni Cristo. Utobem dagiti wagas a pakapagdur-asan ti kabaelam a mangtulong kadagiti ubbing a mangpapigsa iti pammatida iti Nailangitan nga Ama ken ni Jesucristo. Makatulong dagiti saludsod iti bukod a panangamiris iti bagi iti panid 37 ti Panangisuro iti Wagas ti Mangisalakan .