“Septiembre 5–11. Isaias 1–12: ‘Ti Dios Isu ti Pakaisalakanak,’” Umaykayo, Sumurot Kaniak—Para iti Primary: Daan a Tulag 2022 (2021)
“Septiembre 5–11. Isaias 1–12,” Umaykayo, Sumurot Kaniak—Para iti Primary: 2022
Ipadto ni Propeta Isaias ti Pannakayanak ni Cristo, ni Harry Anderson
Septiembre 5–11
Isaias 1–12
“Ti Dios Isu ti Pakaisalakanak”
Mabalin a narigat a maawatan dagiti balikas ni Isaias. Bayat ti panangibilangmo no kasano nga isuro kadagiti ubbing maipapan ken ni Isaias, ipamaysam dagiti simple a kinapudno a mabalin a mangpapigsa iti pammatida ken ni Jesucristo.
Isuratmo dagiti Impresionmo
Yawis ti Panagbibinninglay
Awisem dagiti ubbing a mangibinglay iti maysa a banag nga inaramidda itay kallabes tapno agtungpal iti ebanghelio, kas iti panangisao iti kararag, panangipakita iti kinasayaat iti maysa a tao, wenno panagtungpal iti dadduma pay a bilin.
Isuro ti Doktrina: In-inaudi nga Ubbing
Iti templo masursurotayo maipapan ken ni Jesucristo.
Nasirmata ni Isaias ti maysa a panawen a ti templo, “ti bantay ti balay ni Jehova,” mangawisto kadagiti tao manipud iti “isu amin a nasion.” Mausarmo daytoy a padto a mangtulong kadagiti ubbing a mangpadpadaan iti panawen a makapanda iti templo.
Dagiti Mabalin nga Aktibidad
-
Idawatmo kadagiti ubbing nga agdrowing iti ladawan ti pagtaenganda. Kalpasanna aggigiddan a mangbasa iti Isaias 2:2, ket awisem ida a mangidrowing iti ladawan “ti balay ni Jehova,” a daytoy ti maysa a templo. Aggigiddan a mangbasa iti bersikulo 3 , ket awisem ida a mangnayon kadagiti ladawanda iti adu a tao a mapmapan iti templo, agraman dagiti pamiliada. Apay a kayattayo ti mapan iti balay ti Apo? Iburaymo ti pammaneknekmo maipapan kadagiti bendision a sumangbay bayat ti panagsursurotayo maipapan ti Apo iti balayna.
-
Paiggamam iti maysa nga ubing iti ladawan ti maysa a templo, ket kiddawen kadagiti ubbing nga agsarita maipapan iti no ania ti makitada iti ladawan. Saludsodem kadagiti ubbing no ania ti magustuanda maipapan iti templo. Aggigiddan a mangbasa iti Isaias 2:2–3 ken padengngegmo kadakuada ti ad-adu pay a rason no apay a maipategtayo ti templo. Ibagam kadagiti ubbing no apay nga ipatpategmo ti templo.
-
Makipagkansion kadagiti ubbing iti maysa a kanta maipapan iti templo kas iti “I Love to See the Temple” (Children’s Songbook,95). Tulongam ida a mangsarak kadagiti balikas ken ragup ti balikas iti kanta a mangisuro no ania ti templo ken no ania ti aramidentayo sadiay.
-
Mangidrowing iti maysa a dana iti pisarra, ket mangikabil iti maysa a ladawan ti templo wenno ti Mangisalakan iti maysa nga ungto (kitaen iti Bukod a Panagdur-as: Pangiwanwan a Libro dagiti Ubbing, 2–3). Pagsisinnublatem dagiti ubbing a mangidrowing iti bagbagida a magmagna iti dana. No aramidenda, awisem ida a mangulit iti daytoy a ragup ti balikas manipud iti Isaias 2:3: “Magnatayonto kadagiti danana.” Ania ti maaramidtayo tapno magna kadagiti dana ti Apo?
“Ta nayanak ti maysa nga ubing kadatayo, maysa nga anak a lalaki ti naited kadatayo” (Isaias 9:6).
Impadto ni Isaias ni Jesucristo.
Paneknekan amin a propeta ni Jesucristo, agraman dagiti nagbiag iti nabayagen sakbay ti pannakayanakna, kas ken ni Isaias. Ibilangmo no ania ti masursuro dagiti ubbing maipapan ken ni Jesus manipud iti padto ni Isaias iti Isaias 9:6.
Dagiti Mabalin nga Aktibidad
-
Ibinglaymo kadagiti ubbing ti “Ni Isaias a Propeta” (iti Dagiti Estoria iti Daan a Tulag). Agsardeng a masansan tapno makapagsarita dagiti ubbing maipapan iti no ania ti ammo ni Isaias maipapan ken ni Jesucristo adu a tawen sakbay ti pannakayanakna. Ibasam kadagiti ubbing ti Isaias 9:6, ket awisem ida a mangulit kenka ti tunggal “nagan” a kinuna ni Isaias a “magaladanto” ni Jesucristo.
-
Isuratmo iti papel ti sumagmamano a pangawag ken ni Jesucristo a masarakan iti Isaias 9:6 (kitaen iti panid ti aktibidad iti daytoy a lawas). Awisem ti tunggal ubing a pumidut iti maysa, ket tulongam ti ubing a mangbasa iti pangawag iti klase. Isaritam kadagiti ubbing no ania ti kaipapanan kenka ti tunggal pangawag. Mangtedka iti maysa a ladawan ni Cristo iti maysa kadagiti ubbing, ket idawatmo kenkuana a mangibinglay iti maysa a banag maipapan ken Jesus ken kalpasanna ipasana ti ladawan iti sabali pay nga ubing. Uliten daytoy nga aktibidad agingga a maaddaan ti amin nga ubbing iti gundaway a mangibinglay.
Isuro ti Doktrina: In-inauna nga Ubbing
Gapu ken ni Jesucristo, makapagbabawiak ken agbalinak a nadalus.
Nagbiag ni Isaias iti maysa a panawen idi adu kadagiti taona ti immadayo iti Apo. Ngem inkari ti Apo kadakuada a mabalin a mapakawan dagiti basolda no agbabawida. Aramidenna met daytoy a kari kadatayo.
Dagiti Mabalin nga Aktibidad
-
Idawatmo kadagiti ubbing a mangbasa iti Isaias 1:2–4 ken isaritam maipapan iti sumagmamano kadagiti rason no apay a saan a naragsakan ti Apo kadagiti tao ti Juda. Kalpasanna aggigiddan a basaenyo ti Isaias 1:16–19 tapno maammuan no ania ti inyawis ti Apo nga aramiden dagiti tao. No kasapulan, tulongam dagiti ubbing a makaawat kadagiti naririgat a balikas ken ragup ti balikas. Tapno makatulong kadakuada a mangiladawan iti panunotda ti bersikulo 18, ipakitam iti maysa a banag a narangrang a nalabaga ken maysa a banag a nadalus a puraw. Ania ti masursurotayo maipapan iti asi ni Jesucristo manipud kadagitoy a bersikulo? Idawat kadagiti ubbing a mangibinglay no ania ti mariknada maipapan iti sagut ni Jesucristo a pannakapakawan, ibinglaymo met dagiti riknam.
-
Tulongam dagiti ubbing a mangyulo iti Isaias 1:18. Isuratmo ti bersikulo iti pisarra, ket awisem dagiti ubbing a mangisao iti daytoy iti sumagmamano a gundaway, a pugpugasem iti maysa a balikas iti tunggal kanito agingga a kabaelandan nga isao daytoy manipud iti memoriada. Mabalinmo pay nga usaren dagiti akikid a papel nga addaan kadagiti balikas manipud iti bersikulo a naisurat kadagitoy. Apay a napateg a kanayon a laglagipen no ania ti isuro daytoy a bersikulo? Ilawlawag no kasano magun-odtayo daytoy a kari babaen iti pannakabuniag ken pannakiranud iti sakramento.
Iti templo masursurotayo maipapan ken ni Jesucristo.
Ipalgak dagiti padto ni Isaias maipapan iti “bantay ti balay ni Jehova” ti sumagmamano kadagiti bendision a sumangbay manipud iti panagrukbab iti templo, kasta met dagiti dadduma pay a bendision nga umay kadagiti maudi nga aldaw. Ibilang no kasano a maparegtamto dagiti ubbing nga agkalikagum a manggun-od kadagitoy a bendision.
Dagiti Mabalin nga Aktibidad
-
Idawatmo kadagiti ubbing a mangbasa iti maipapan iti no ania ti nakita ni Isaias iti Isaias 2:2–3 ket mangidrowing iti maysa a ladawan ti no ania iti panagkunada a mabalin koma a langa daytoy. Ilawlawag nga inawagan ni Isaias ti templo a “ti bantay ti balay ni Jehova.” Apay a nasayaat a simbolo ti maysa a bantay para iti templo?
-
Awisem dagiti ubbing a mangbasa iti Isaias 2:2–3,5 ken mangilasin iti tunggal maysa kadagitoy a bersikulo ti maysa a banag a mangparegta kadakuada a mapan iti templo iti maysa nga aldaw. Kalpasanna basaen ti bersikulo 4 nga aggigiddan, ket paglilinnawagan no kasano a makatulong ti templo a mangipatungpal iti talna a nailadawan iti daytoy a bersikulo. Tulongam dagiti ubbing a mangpanunot kadagiti wagas a pakapagsaganaanda a mapan iti templo iti maysa nga aldaw.
Impadto ni Isaias ni Jesucristo.
Impadto ni Isaias ti pannakayanak ti maysa nga ubing nga agtugawto iti trono ni David ken mangipasdek iti pagarian nga awan patinggana. Kasano a matulongam dagiti ubbing a sursuruam a maawatanda dagitoy a padto maipapan ken ni Jesucristo?
Dagiti Mabalin nga Aktibidad
-
Idawatmo kadagiti ubbing a mangted kadagiti pagarigan dagiti pangawag a mabalin nga addaan iti maysa a tao, kas pangawag a mainaig iti maysa a trabaho, maysa a takem, maysa a bunggoy, wenno maysa a pamilia. Ania ti ibaga dagitoy a pangawag maipapan iti tao nga addaan kadagitoy? Tulongam dagiti ubbing a mangsapul kadagiti pangawag ken ni Jesucristo iti Isaias 7:14 ken 9:6–7. Ania ti isuro dagitoy a pangawag maipapan Kenkuana? Ania pay ti masursurotayo maipapan ken ni Jesucristo manipud kadagitoy a bersikulo?
-
Aggigiddan a mangbasa iti Mateo 1:21–23 ken Lucas 1:31–33, ket paglilinnawagan no kasano a naipatungpal dagiti padto ni Isaias iti Isaias 7:14; 9:6–7 idi nayanak ni Jesucristo.
Yallukoy ti Panagsursuro iti Pagtaengan
Idawat kadagiti ubbing a mangpanunot iti maysa a banag a nasursuroda maipapan iti Mangisalakan a pakaibinglayanda iti pagtaengan iti pamiliada, a kas iti maysa kadagiti nagnaganna.
Panangpadur-as iti Panangisurotayo
Tulongam dagiti ubbing a mangpatibker iti panagtalekda. Mabalin a marikna dagiti sumagmamano nga ubbing a saanda a kabaelan ti agsursuro iti ebanghelio iti bukodda. Ti maysa a wagas tapno mapatibker ti panagtalekda isu ti panangdayaw kadakuada no makiramanda iti klase. Ikarim kadagiti ubbing a tulonganto ida ti Espiritu Santo bayat ti panagsursuroda.