“Septiembre 12–18. Isaias 13–14; 24–30; 35: ‘Maysa a Nakaskasdaaw nga Aramid ken Datdatlag’” Umaykayo, Sumurot Kaniak Para iti Primary: Daan a Tulag 2022 (2021)
“Septiembre 12–18. Isaias 13–14; 24–30; 35,” Umaykayo, Sumurot Kaniak—Para iti Primary: 2022
Sagrado a Kakaywan, ni Brent Borup
Septiembre 12–18
Isaias 13–14; 24–30;35
“Maysa a Nakaskasdaaw nga Aramid ken Datdatlag”
Kalpasan ti nainkararagan a panangadal iti Isaias 13–14; 24–30;35, agplano kadagiti aktibidad a makatulong kadagiti ubbing nga agsursuro. Mabalin a maibagay dagiti kapanunotan iti aktibidad iti baba para iti ania man a grupo-ti-edad.
Isuratmo dagiti Impresionmo
Yawis ti Panagbibinninglay
Awisem dagiti ubbing a tumakder no kayatda ti mangibinglay iti maysa a banag a nasursuroda itay nabiit maipapan iti ebanghelio iti pagtaengan wenno iti simbaan. Ikkam ti tunggal ubing iti gundaway a mangibinglay.
Isuro ti Doktrina: In-inaudi nga Ubbing
Adda gubat idi idiay langit.
Sakbay a nabukel ti lubong, pinili ti Nailangitan nga Amatayo ni Jesucristo tapno agbalin a Mangisalakantayo. TiIsaias 14:12–14 ti mangiladawan iti kinapalangguad nga impakita ni Satanas iti Konseho iti Langit sakbay daytoy a biag.
Dagiti Mabalin nga Aktibidad
-
Usarem ti “Pakauna: Ti Plano ti Nailangitan nga Amatayo” (iti Dagiti Estoria iti Baro a Tulag, 1–3) wenno ti kanta nga “I Lived in Heaven” (Children’s Songbook,4) tapno mangisarita kadagiti ubbing maipapan iti Gubat iti Langit sakbay a nayanaktayo. (No aramidem, iramanmo dagiti ragup ti balikas manipud iti Isaias 14:12–14 a mangiladawan ken ni Satanas.) Kalpasanna awisem nga agisisinnublat dagiti ubbing iti panangulitda a mangisarita iti estoria kenka. Yunay-unay a sinurot ni Jesucristo ti plano ti Nailangitan nga Ama ket nagbalin a Mangisalakantayo.
-
Iti pisarra, mangidrowing iti maysa a sinanpuso nga addaan iti balikas a Satanas ken adda naliday a rupa iti uneg daytoy. Ilawlawag a kinuna ni Satanas iti pusona, “Ibayogkonto ti tronok iti ngato dagiti bitbituen ti Dios” (Isaias 14:13), a kayatna a sawen a kayatna ti agbalin a nalalaing ngem iti Nailangitan nga Ama. Awisem ti maysa nga ubing a mangidrowing iti sabali pay a sinanpuso, nga addaan daytoy iti balikas a Jesus ken naragsak a rupa iti uneg daytoy. Tulongam dagiti ubbing a makaawat a kayat ni Jesus nga aramiden ti indawat ti Nailangitan nga Ama Kenkuana nga aramidenna (kitaen iti Moises 4:1–2). Kasano a masurottayo ti pagwadan ni Jesus?
“Isu alimonennanto ni patay iti balligi” (Isaias 25:8).
Nagungar ni Jesucristo.
Maliwliwa ni Jesucristo ti ladingit a mariknatayo maipapan iti patay. Gapu ta nagun-odna ti balligi ken patay, agungartayonto met amin.
Dagiti Mabalin nga Aktibidad
-
Ipakitam ti ladawan ti Panagungar ni Jesucristo, ken idawatmo kadagiti ubbing nga ibinglayda no ania ti ammoda maipapan iti ladawan. No kasapulan, ibinglaymo kadakuada ti estoria ni Jesus a nagungar (kitaen iti “Nagungaren ni Jesus,” iti Dagiti Estoria iti Baro a Tulag, 139–44). Agay-ayam wenno agkansion iti kanta maipapan iti Panagungar, a kas iti “Jesus Has Risen” (Children’s Songbook,70), ket awisem dagiti ubbing a mangibinglay no ania ti mangiparikna kadakuada a mangammo a nagungar ni Jesus manipud kadagiti natay.
-
Isaritam kadagiti ubbing maipapan iti maysa a tao nga ammom a natayen. Ania ti mariknatayo no matay ti maysa a tao a patpatgentayo? Awisen dagiti ubbing a mangidrowing iti maysa a tao nga agsangsangit. Kalpasanna ibasam ti Isaias 25:8 kadakuada. Ania ti aramiden ni Jesus kadagiti luatayo no malaglagiptayo iti maysa a tao a natayen? Awisem dagiti ubbing a mangidrowing iti maysa a naragsak a rupa. Iburaymo ti pammaneknekmo a gapu ta nagungar ni Jesucristo, mabalin a maliwliwatayo no matay ti maysa a tao ken maammuan nga agungartayonto amin iti maysa nga aldaw.
Insubli ti Apo ti Simbaanna babaen ken ni Joseph Smith.
Ti Pannakaisubli ti ebanghelio ti “maysa a nakakaskasdaaw nga aramid ken datdatlag” (Isaias 29:14). Ibinglaymo kadagiti ubbing ti sumagmamano kadagiti nakaskasdaaw a banag nga inaramid ti Apo—ket agtultuloy nga agaramid—a mangisubli iti ebangheliona iti aldawtayo.
Dagiti Mabalin nga Aktibidad
-
Awisem dagiti ubbing a mangibaga kenka no ania ti ammoda maipanggep ken ni Joseph Smith. No kasapulan, ibinglaymo kadakuada ti “Ti Umuna a Parmata ni Joseph Smith“ (iti Dagiti Estoria iti Doktrina ken Katulagan, 9–12). Basaen ti Isaias 29:12, ket ilawlawag a nupay saan nga imbilang a “deadal” ti adu a tao ni Joseph Smiith, insubli ni Jesucristo ti ebanghelio babaen kenkuana.
-
Ibasam ti Isaias 29:14 kadagiti ubbing, ket ibinglaymo kadakuada iti sabali a balikas a kapada ti kaipapananna kas iti “nakakaskasdaaw” ken “dadatlag.” Ipakitam dagiti aytem a mangibagi iti sumagmamano a nakaskasdaaw nga aramid ti Apo kabayatan dagiti ud-udina nga aldaw, a kas maysa a ladawan ti Umuna a Parmata wenno ni Joseph Smith nga umaw-awat iti priesthood (kitaen iti Libro ti Arte ti Ebanghelio, dagiti num. 90, 93,94) wenno maysa a kopia ti Libro ni Mormon. Awisem dagiti ubbing a pumili iti aytem ken mangibinglay no apay a nakaskasdaaw daytoy kadakuada.
Isuro ti Doktrina: In-inauna nga Ubbing
Isaias 24:3–5; 29:7–10; 30:8–14
Ti ikakalilis iti kinapudno kaipapananna ti panangtallikud iti Apo ken dagiti propetana.
Ti panagbasa kadagiti ballaag ni Isaias maipapan kadagiti peggad ti ikakalilis iti kinapudno ket makatulong kadagiti ubbing a mangikeddeng nga agtalinaed a napudno iti Apo ken mangsurot kadagiti propetana.
Dagiti Mabalin nga Aktibidad
-
Isurat ti balikas nga ikakalilis iti kinapudno iti pisarra. Awisem dagiti ubbing a mangsarak iti depinision iti “Ikakalilis iti Kinapudno” iti Pangiwanwan iti Nasantuan a Kasuratan (scriptures.ChurchofJesusChrist.org). Awisem ida a mangbasa iti Isaias 24:5; 30:9–11 ken mangilista kadagiti banag nga ar-aramidenda iti panawen ni Isaias a nangiturong kadakuada iti ikakalilis iti kinapudno. Kalpasanna awisem dagiti ubbing a mangbalbaliw kadagiti banag iti listaan dagiti banag a mabalintayo nga aramiden tapno agtalinaed a napudno iti Apo.
-
Bingayem ti klase iti kada paris, ket tudingam ti tunggal paris a mangbasa iti maysa kadagiti sumaganad a binatog: Isaias 24:3–5; Isaias 29:7–10; wenno Isaias 30:8–14. Awisem ida a mangidrowing kadagiti ladawan a mangibagi no ania ti nabasada. Bayat ti panangibinglayda kadagiti drowingda, tulongam ida a mangilawlawag no ania ti isuro dagiti balikas ni Isaias maipapan iti no apay a nasken nga agtalinaedtayo a napudno ti Apo.
Ti Pannakaisubli ti ebanghelio ti maysa a “nakakaskasdaaw nga aramid.”
Kasano a matulongam dagiti ubbing a makaawat nga isuda ti paset ti “nakakaskasdaaw nga aramid” ti Apo (Isaias 29:14) kadagiti ud-udina nga aldaw?
Dagiti Mabalin nga Aktibidad
-
Ipakitam dagiti ladawan ti sumagmamano kadagiti nakaskasdaaw a pasamak a napagteng idi naisubli ti ebanghelio (kitaen iti Libro ti Arte ti Ebanghelio, dagiti num. 90–95, wenno ti panid ti aktibidad iti daytoy a lawas). Aggigiddan a mangbasa iti Isaias 29:14, 18,24, ket awisem dagiti ubbing a mangsapul kadagiti balikas ken ragup ti balikas a mainaig kadagiti pasamak kadagiti ladawan. Saludsodem kadagiti ubbing no kasano a makatulongda iti “nakaskasdaaw nga aramid” ti Apo (bersikulo 14).
-
Ibinglaymo ti ababa a padas a mangtulong kadagiti ubbing a makaawat no ania ti kaipapanan ti pannakaisubli . Kas pagarigan, isaritam maipapan iti maysa a banag a napukaw ken no kasano a nasarakam daytoy. Tulongam dagiti ubbing a mangidilig daytoy iti Pannakaisubli ti ebanghelio. Segun iti Isaias 29:13–15, apay a kasapulantayo ti Pannakaisubli? Ania adagiti nakaskasdaaw nga aramid nga inaramid ti Apo a mangisubli Iti ebangheliona?
Dagiti pannursuro ni Isaias ti mangitudo kaniak ken ni Jesucristo.
Mabalin nga itudo dagiti pannursuro ni Isaias dagiti ubbing a sursuruam iti Mangisalakan ken makatulong kadakuada a manglagip kadagiti banag nga inaramidnan para kadakuada.
Dagiti Mabalin nga Aktibidad
-
Iti nagsisina a papel isuratmo dagiti sumaganad a reperensia iti nasantuan a kasuratan: Isaias 14:3; Isaias 25:8; Isaias 28:16; Mateo 11:28–30; 1 Taga Corinto 15:53–57; Helaman 5:12. Itedmo dagiti papel kadagiti ubbing, ket awisem ida a mangisurat kadagiti papel dagiti kinapudno a nasursuroda manipud kadagiti bersikulo ket agtitinnulongda a mangiparis kadagiti bersikulo a mangisuro kadagiti isu met la a kinapudno. Segun kadagitoy a bersikulo, ania dagiti naindaklan a banag nga inaramid ti Apo para kadatayo?
-
Idawat kadagiti ubbing a mangpili iti maysa a ragup ti balikas manipud iti Isaias 14:3; 25:8; wenno 28:16 a mangipalagip kadakuada maipapan ken ni Jesucristo. Awisem ida a mangisurat iti ragup ti balikas iti maysa a papel ken mangidrowing iti maysa a ladawan ti Mangisalakan a mabalinda nga ipaskil kadagiti pagtaenganda.
Yallukoy ti Panagsursuro iti Pagtaengan
Awisem dagiti ubbing a mangisurat iti note wenno mangidrowing iti ladawan ti maysa a banag a nasursuroda iti klase ita nga aldaw. Allukoyem ida a mangibinglay iti daytoy kadagiti pamiliada wenno maysa a miembro ti klase a saan a dimmar-ay iti Primary ita nga nga aldaw.
Panangpadur-as iti Panangisurotayo
Ibagay dagiti aktibidad tapno mairaman dagiti ubbing nga addaan iti pagkurangan. Makaipanamnama dagiti babassit a panangibagay kadagiti aktibidad a makasursuro ti amin nga ubbing. Kas pagarigan, no isingasing ti maysa nga aktibidad a mangipakita iti ladawan, mabalin nga agkansionkayo iti maysa a kanta a mangiraman kadagiti ubbing nga addaan iti pagkurangan iti panagkita.