“Septiembre 19–25. Isaias 40–49: ‘Liwliwaenyo dagiti Taok,’” Umaykayo, Sumurot Kaniak—Para iti Primary: Daan a Tulag 2022 (2021)
“Septiembre 19–25. Isaias 40–49,” Umaykayo, Sumurot Kaniak—Para iti Primary: 2022
Panangagas iti Bulsek a Lalaki, ni Carl Heinrich Bloch
Septiembre 19–25
Isaias 40–49
“Liwliwaenyo dagiti Taok”
Adu a binatog iti Isaias 40–49 ti makatulong kadagiti ubbing a mangpadakkel iti ayatda para iti Apo ken ti pammatida Kenkuana. Agkalikagum a manggun-od iti pannarabay ti Espiritu a mangsarak kadagita a binatog bayat ti panagadalmo.
Isuratmo dagiti Impresionmo
Yawis ti Panagbibinninglay
Basaem ti Isaias 40:9 a kagiddan dagiti ubbing, ket awisem ida nga agpammarang nga umuli iti “nangato a bantay” ket kalpasanna agsisinnublat nga ingatoda ti timekda a mangibinglay iti maysa a banag a nasursuroda manipud kadagiti nasantuan a kasuratan itay kallabes—iti man pagtaengan wenno iti simbaan.
Isuro ti Doktrina: In-inaudi nga Ubbing
Makapagbalinak a maysa a saksi ti Apo.
Impalagip ti Apo kadagiti Israelita a nasaksianda ti adu a naindaklan a banag nga inaramidna para kadakuada. Kayatna ida (ken datayo amin) nga agbalin a saksina, a mangtultulong kadagiti dadduma a mangammo iti bileg ken kinaimbagna.
Dagiti Mabalin nga Aktibidad
-
Ibagamkadagiti ubbing maipapan iti maysa a banag a nasaksiam. Tulongam ida nga agpanunot kadagiti banag a napadasanda a mabalinda nga isarita iti tunggal maysa wenno agbalinda a maysa a “saksi” ti—kas pagarigan, ti naimas a taraon a rinamananda, maysa a lugar a sinarungkaranda, wenno maysa a tao nga am-ammoda. Ibasam kadagiti ubbing manipud iti Isaias 43:10: “Dakayo dagiti saksik, kinuna ni Jehova, ken ti adipenko a pinilik.” Ibagam kadagiti ubbing a no mabuniagantayo ikaritayo nga agbalin a saksi ni Jesucristo (kitaen iti Mosiah 18:9). Ania ti kaipapanan ti panagbalin a saksi ti Apo?
-
Idawatmo kadagiti ubbing a mangibinglay no ania ti ammoda maipapan ken ni Jesucristo ken ti ebangheliona. Ipakitam kadakuada dagiti ladawan tapno mangted kadakuada kadagiti kapanunotan (kas pagarigan, dagiti ladawan ti Panagungar ti Mangisalakan, ti Libro ni Mormon, iti templo, ken ti sibibiag a propeta). Awisem ida a mangisarita maipapan iti no ania ti mabalinda nga ibinglay kadagiti dadduma kas saksi ti Apo.
“No saan a siak awan ti mangisalakan.”
Ni Jesucristo laeng ti agmaymaysa a makaisalakan kadatayo manipud iti basol ken ipapatay. Utobem no kasano a maparegtamto dagiti ubbing nga agtalek Kenkuana.
Dagiti Mabalin nga Aktibidad
-
Awisem dagiti ubbing a mangipapan iti maysa a situasion a mabalin a kasapulanda ti tulong (kas iti panagsakit wenno nakamatan iti bagyo). Mangipakita iti sumagmamano a banag (wenno ladawan dagiti banag), sumagmamano a makatulong kadakuada iti situasion ken dadduma pay a saan a makatulong. Kas pagarigan, makatulong ti payong iti maysa a bagyo, ngem saan a makatulong ti sangabaso a danum ken maysa a lapis. Kiddawen kadagiti ubbing a pumidut iti banag a makatulong iti dayta a situasion. Ipakitam dagiti ladawan ti Mangisalakan a makatulong kadagiti ubbing a mangisarita maipapan no kasano a tultulongannatayo.
-
Ibasam kadagiti ubbing ti Isaias 43:11, ket kiddawem kadakuada nga itudoda ti ladawan ni Jesus no mangngeganda ti balikas a “mangisalakan.” Paneknekam a gapu ta nagsagaba ken natay ni Jesucristo para kadatayo ken nagungar, Isu laeng ti agmaymaysa a makaisalakan kadatayo manipud kadagiti basbasoltayo ken manipud iti patay.
Maaddaantayo iti “kinalinteg kas kadagiti dalluyon ti baybay” (Isaias 48:18).
Ti panagtungpal kadagiti bilin ti Dios ti mangisangbay iti talna.
Ikari ti Apo ti talna kas “maysa a karayan” ken ti kinalinteg kas “dagiti dalluyon iti baybay” kadagiti agtungpal kadagiti bilinna.
Dagiti Mabalin nga Aktibidad
-
Ibasam kadagiti ubbing ti Isaias 48:18. Awisem ida a manggaraw kadagiti ima ken takiagda kas iti karayan ken dagiti dalluyon. Isaritam maipapan iti no kasano a nakatulong kenka ti panagtungpal kadagiti bilin ti Dios a makarikna iti talna a kas iti maysa a karayan wenno napigsa kas maysa a dalluyon.
-
Mangidrowing iti maysa a karayan iti pisarra. Tulongam dagiti ubbing a mangpanunot kadagiti bilin nga inted kadatayo ti Dios. Isuratmo dagita a bilin kadagiti papel (wenno agdrowing kadagiti simple a ladawanda), ken pagsisinnublatem dagiti ubbing a mangisilpo kadagiti bilin iti karayan iti pisarra. Tulongam dagiti ubbing a makasursuro no kasano a mangisangbay iti talna ti panagtungpal kadagiti bilin.
-
Aggigiddan nga agkansion iti maysa a kanta maipapan kadagiti bilin, kas iti “Keep the Commandments” (Children’s Songbook, 146–47). Ania ti isuro daytoy a kanta maipapan iti no apay a nasken a tungpalentayo dagiti bilin ti Dios?
Isuro ti Doktrina: In-inauna nga Ubbing
Makatulongak a mangisagana “ti dalan ni Jehova.”
Tumulongtayo a mangipatungpal iti padto iti Isaias 40:3–5 babaen ti panangtulong iti dadduma nga umawat iti Apo iti biagda.
Dagiti Mabalin nga Aktibidad
-
Kiddawem iti maysa nga ubing a mangbasa iti Isaias 40:3 idinto a saggaysa a basaen dagiti dadduma pay nga ubbing dagiti sumaganad a binatog ken sapulenda dagiti agpapada a balikas ken ragup iti balikas: Marcos 1:3–4 (Juan Bautista); Alma 7:9 (Alma); Doktrina ken Katulagan 33:10–11 (dagiti misionario iti ud-udina nga aldaw). Tulongam ida a mangilasin no asino ti mangisagsagana “iti dalan ti Apo” iti tunggal binatog. Kasano nga insagana dagitoy a tao ti dalan ti Apo? Ania ti maaramidtayo tapno makatulong?
-
Mangidrowing iti maysa a dana iti pisarra, ket basaem a kadua dagiti ubbing ti Isaias 40:3–5. Kiddawen kadagiti ubbing a mangilista kadagiti tubeng a mabalin a manglapped kadagiti tao manipud iti panangsurot iti Mangisalakan, ket awisem ida a mangidrowing kadagiti tubeng iti dana. Papugasmo kadakuada dagiti tubeng bayat ti panangisaritam maipapan kadagiti wagas a pakatulongantayo kadagiti tao a mangparmek kadagitoy.
Kaduak ti Dios kadagiti pannubokko.
No agaramidtayo kadagiti katulagan iti Apo, agaramid Isuna kadagiti kari a mangkadkadua kadatayo—uray kabayatan dagiti pannuboktayo. Tulongam dagiti ubbing a mangkita iti bagbagida kas paset dagiti natulagan a tao ti Apo ken kas umaw-awat kadagiti karina.
Dagiti Mabalin nga Aktibidad
-
Isurat iti pisarra ti Siak… ken Siakto… Awisem dagiti ubbing a mangbasa iti Isaias 41:10 ken Isaias 43:1–5 tapno ammuen no asino ti kuna ti Apo nga Isu ken no ania ti kunana nga aramidennanto. Ania dagiti dadduma pay a ragup ti balikas a naulit kadagitoy a bersikulo? Kasano a mangted dagitoy a mensahe kadatayo iti liwliwa ken namnama kabayatan dagiti narigat a panawen?
-
Aggigiddan a mangbasa iti Isaias 48:10, ket pagsasaritaan maipapan ti no ania ti apuy nga urno ken ti nadumaduma a wagas a pannakausar daytoy. Ilawlawag a mapatarnaw iti maysa nga urno dagiti metal. Apay a ti urno ti maysa a nasayaat a wagas a pangiladawan iti rigat? Kasano a makapatarnaw kadatayo dagiti rigattayo? (kitaen iti Alma 62:41).
Ti Apo dinakto malipatan iti kaano man.
No mariknatayo nga adayotayo iti Apo gapu iti basol, pannubok, wenno ania man a gapu, ti mensahe ti Isaias 49:14–16 ti makaisangbay kadatayo iti liwliwa.
Dagiti Mabalin nga Aktibidad
-
Pabasam kadagiti ubbing ti Isaias 49:14. Ania koma ti mabalin a mangaramid kadagiti tao a makarikna a nalipatan wenno nabaybay-anda? Kasano a matulongantayo dagiti dadduma a mangammo a saan a nanglipat ti Apo kadakuada? Kasano nga ammotayo a dinatayo nalipatan?
-
Awisem dagiti ubbing nga agsarita maipapan iti maysa a tao nga am-ammoda a didanto kaano man malipatan, kas iti maysa a miembro ti pamilia wenno gayyem. Paglilinnawagan no kasano ti rikna ti maysa a managayat nga ina maipapan kadagiti annakna ken no kasano ti rikna ti Apo maipapan kadatayo. Kalpasanna idawatmo kadagiti ubbing a mangbasa iti Isaias 49:15–16. Segun kadagitoy a bersikulo, apay a dinatayto malipatan ti Apo iti kaano man? Awisem dagiti ubbing a mangibinglay iti riknada maipapan ken ni Jesucristo.
Yallukoy ti Panagsursuro iti Pagtaengan
Awisem dagiti ubbing a mangpanunot maipapan iti maysa a banag a nasursuroda ita nga aldaw ta kayatda a masursuro ti ad-adu pay. Tulongam ida a mangisurat iti maysa a saludsod maipapan iti daytoy a mabalinda a saludsoden iti maysa a nagannak wenno sabali pay a miembro ti pamilia.
Panangpadur-as iti Panangisurotayo
Ibagaymo iti kasapulan dagiti ubbing. No mangisuroka kadagiti in-inaudi nga ubbing ngem mariknam a naparegtaka a mangisuro kadakuada iti maysa kadagiti pagbatayan iti daytoy a balabala iti babaen ti “In-inauna nga Ubbing” wenno vice versa, ibagaymo ti maysa kadagiti naisingasing nga aktibidad para iti dayta a pagbatayan tapno mangipaay kadagiti kasapulan ken kabaelan dagiti ubbing a sursuruam.