Ti Pannakalalais ni Cristo, ni Carl Heinrich Bloch

Septiembre 26–Oktubre 2

Isaias 50–57

“Inturedna dagiti Lidaytayo, ken Inawitna dagiti Ladingittayo”

Naglaon tiIsaias 50–57 iti sumagmamano a napipintas a pagsasao a mabalin a saan a maawatan dagiti ubbing a sursuruam. Bayat ti panagsaganam a mangisuro, utobem dagiti simple a kinapudno nga isursuro dagitoy a balikas ken no kasano a matulongam dagiti ubbing a mangsursuro kadagitoy.

Isuratmo dagiti Impresionmo

Yawis ti Panagbibinninglay

Allukoyem ti tunggal ubing a mangibinglay no kasano a maammuanda nga ay-ayaten ida ni Jesucristo. Kiddawem kadakuada a mangibinglay no ania ti ar-aramidenda a mangipakita nga ay-ayatenda ni Jesus.

Isuro ti Doktrina: In-inaudi nga Ubbing

Isaias 53:4

Nagsagaba ni Jesucristo para kaniak gapu ta ay-ayatennak.

Babaen ti pangsubbot a sakripisiona, nagsagaba ni Jesucristo para kadagiti basbasoltayo ket inawatna iti Bagina dagiti “lidaytayo” ken “ladingittayo.” Kasano a paneknekamto kadagiti ubbing ti Pannubbot ti Mangisalakan?

Dagiti Mabalin nga Aktibidad

• I-display dagiti ladawan ti Mangisalakan nga agsagsagaba iti krus ken iti Minuyongan ti Getsemani (kitaen iti Libro ti Arte ti Ebanghelio, dagiti num. 56, 57, wenno dagiti kapitulo 51–53 iti Dagiti Estoria iti Baro a Tulag). Paisaritam kadagiti ubbing no ania ti makitada kadagiti ladawan ken paibinglay no ania ti ammoda maipapan iti mapaspasamak. Apay a nagsagaba ni Jesus para kadatayo?

• Ibasam kadagiti ubbing manipud iti Isaias 53:4: “Inturedna dagiti lidaytayo, ken inawitna dagiti ladingittayo.” Ipakitam kadagiti ubbing ti maysa a nadagsen a banag (wenno maysa a ladawan ti maysa), ket awisem ida nga agpammarang a mangbagkat iti maysa a banag a nadagsen. Ilawlawag a ti “liday” ken “ladingit” (wenno leddaang) ket mangiparikna a nadagsen ken narigat nga awiten. Paneknekam a tulongannatayto ni Jesucristo a mangibaklay kadagitoy a banag gapu ta ay-ayatennatayo.

Isaias 55:6

Mabalinko a sapulen ti Apo ken umawag Kenkuana.

Ibilangmo no kasano a matulongam dagiti ubbing a makaawat no ania ti kayat a sawen ti “sapulen” ni Jesus iti unos ti biagda.

Dagiti Mabalin nga Aktibidad

• Ilemmeng ti maysa a ladawan iti maysa a lugar iti siled, ken awisem dagiti ubbing a mangsapul iti daytoy. Basaem dagiti balikas a “Sapulenyo ni Jehova ita ta masarakan pay” manipud iti Isaias 55:6. Kiddawen kadagiti ubbing a manginagan iti sumagmamano a wagas a mabalin a sapulenda ti Apo—a kaipapananna nga ikarigatanda ti agsursuro maipapan Kenkuana ken umasidegda Kenkuana. Tunggal kanito a mangted manen iti maysa nga ubing iti sungbat, ilemmeng manen ti ladawan, ket awisem ti ubing a “sapulenna” daytoy.

• Tulongam dagiti ubbing a mangsursuro kadagiti balikas iti kanta a “Seek the Lord Early” (Children’s Songbook,108) wenno sabali pay a kanta maipapan iti umas-asideg iti Mangisalakan. Usarem ti panid ti aktibidad iti daytoy a lawas tapno matulongan dagiti ubbing a pumili iti maysa a banag nga aramidendanto a “sapulen ni Jehova.”

• Basaem ti ragup ti balikas nga “Umawagkayo kenkuana ita ta asideg pay” manipud iti Isaias 55:6. Kasano nga “umawagtayo” iti Nailangitan nga Ama? Kiddawen kadagiti ubbing a mangisarita no ania ti isaoda kadagiti kararagda. Paneknekan nga ay-ayaten ida ti Nailangitan nga Ama ken denggenna ida no agkararagda.

Isuro ti Doktrina: In-inauna nga Ubbing

Isaias 51–52

Awisennak ti Apo a “yusong[ko] ti pigsa[k].”

Iti Isaias 51 ken52, inusar ti Apo dagiti ragup ti balikas a kas iti “agriingka,” “tumakderka,” ken “yusongmo ti pigsam” tapno mangparegta kadagiti tao a mangragpat iti nadiosan a potensialda. Ibilangmo no kasano a makaparegta dagitoy a ragup ti balikas kadagiti ubbing a sursuruam.

Dagiti Mabalin nga Aktibidad

• Sakbay ti klase, isuratmo iti pisarra ti sumagmamano a ragup ti balikas manipud iti Isaias 51–52 a mangyebkas kadagiti tignay a kayat ti Apo nga aramiden dagiti taona, kas iti “Itangadyo dagiti matayo,” “Agriingka,” “Tumakderka,” “Pagpagem ta bagim iti tapok,” ken “Pumgaakkayo iti rag-o” (Isaias 51:6, 17; 52:2, 9). Pagsisinnublatem dagiti ubbing iti panangyakem iti maysa kadagiti ragup ti balikas idinto a padasen a pugtuan dagiti dadduma pay iti klase no ania ti tignay. Kalpasan ti tunggal batang, ipakitam kadagiti ubbing ti ragup ti balikas kadagiti nasantuan a kasuratan, ket ilawlawag kadakuada ti naespirituan a kaipapanan ti ragup ti balikas. Ania ti dawdawaten ti Apo nga aramidentayo? Kasano a maaramidtayo ti tunggal maysa kadagitoy a banag?

• Awisem dagiti ubbing a mangbasa iti Isaias 51:1, 4,7 ket mangilasin no asino ti kasasao ti Apo ken no ania ti kayatna nga aramidenda. Ania ti kayat a sawen ti “dumngengkayo” iti Apo? Tapno mailadawan, kiddawem iti maysa kadagiti ubbing a mangted kadagiti simple nga annuroten a nasken a suroten dagiti dadduma. Apay a no dadduma narigat ti dumngeg ken agtungpal iti Apo? Kasano a maipakitatayo iti Apo a “dumngegtayo” Kenkuana?

Gapu iti Ayat, ni eskultor nga Angela Johnson

Isaias 53:3–9

Inawat ni Jesucristo iti Bagina dagiti basol ken ladingitko.

Kasano a mausarmo dagiti balikas ni Isaias a makatulong kadagiti ubbing a makaawat a nasaysayaat no ania ti inaramid ti Mangisalakan para kadakuada?

Dagiti Mabalin nga Aktibidad

• I-display ti sumagmamano a ladawan a mangiparang iti panagsagaba ken ipapatay ni Jesucristo (kas pagarigan, kitaen iti Libro ti Arte ti Ebanghelio, dagiti num. 56, 57, 58). Aggigiddan a mangbasa iti Isaias 53:3–6,9, ket awisem dagiti ubbing a mangsapul kadagiti ragup ti balikas a mangiladawan iti paspasamak kadagiti ladawan. Paneknekam a ginasgasut a tawen sakbay a nagsagaba ni Jesucristo para kadatayo, dagiti propeta kas ken ni Isaias ti nangisuro maipapan kadagitoy napapateg a pasamak. Apay a napateg a maammuan dagiti tao dagitoy a banag iti adu unay a tawen a nasapsapa? (kitaen iti Alma 39:15–19).

• Awisem dagiti ubbing a mangbasa iti Isaias 53:4–7 ken mangsapul kadagiti balikas a mangiladawan no ania ti sinagaba ti Mangisalakan para kadatayo. Awisem ida a mangisurat kadagitoy a balikas iti pisarra. Apay a sinagabana dagiti “liday,” “ladingit,” ken “basbasolyo”? (kitaen met iti Alma 7:11–12). Ibinglaymo kadagiti ubbing no kasano a tinulongannaka ti Mangisalakan a mangibaklay kadagiti liday ken ladingittayo. Paibinglaymo kadakuada no kasano ti panagriknada maipapan iti Mangisalakan ken no ania ti naaramidnan para kadakuada.

Isaias 55:7–9

Nangatngato dagiti wagas ti Apo ngem dagiti wagasko.

No maawatantayo a nangatngato dagiti pampanunot ken wagas ti Apo ngem dagiti wagastayo, agbalin a nalaklaka ti agtalek Kenkuana.

Dagiti Mabalin nga Aktibidad

• Saludsodem kadagiti ubbing no asino ti papananda no addaanda iti narigat a problema, ken apay. Basaem a kaduam dagiti ubbing ti Isaias 55:8–9, ket kiddawem kadakuada a dumngeg no apay a nasken a kalikagumanda a gun-oden ti pannarabay ti Apo no kasapulantayo ti tulong.

• Idrowing iti pisarra ti tangatang ken daga, ket ikkam iti label dagitoy iti Dagiti Langit ken Daga. Kalpasanna awisem dagiti ubbing a mangbasa iti Isaias 55:9 tapno ammuen no ania ti indasig ti Apo kadagiti langit ken daga, ket kiddawem kadakuada nga inayon dagitoy dadduma pay a label kadagiti drowing. Ania ti kayat a sawen ti “nangatngato” dagiti wagas ken kapanunotan ti Apo ngem dagiti wagas ken kapanunotantayo? Apay a napateg a maammuan daytoy?

• Ilawlawagmo kadagiti ubbing a nangatngato ti sumagmamano kadagiti wagas ti Apo ngem kadagiti wagastayo. Kas pagarigan, ania ti wagasna iti panangtrato kadagiti managbasol? (kitaen iti Marcos 2:15–17). Ania ti wagasna iti panangiturong kadagiti dadduma? (kitaen iti Mateo 20:25–28). Kasano a maigiddiat dagiti wagasna kadagiti wagas dagiti dadduma? Isaritam kadagiti ubbing no kasano a nasursurom ti agtalek kadagiti nangatngato a wagas ken pampanunot ti Apo.

Yallukoy ti Panagsursuro iti Pagtaengan

Isingasing kadagiti ubbing a mangituding iti maysa a panggep a tun-oyen a makatulong kadakuada nga umas-asideg ken ni Jesucristo, a maibatay iti maysa a banag a nasursuroda iti klase ita nga aldaw. Awisem ida a mangibinglay iti dayta a panggep a tun-oyen iti maysa a miembro ti pamilia.

Panangpadur-as iti Panangisurotayo

Tulongam dagiti babassit nga ubbing a makasursuro manipud kadagiti nasantuan a kasuratan. Tapno matulongan dagiti babassit nga ubbing a makasursuro manipud kadagiti nasantuan a kasuratan, agpokuska iti maysa a bersikulo wenno uray maysa laeng a kangrunaan a ragup ti balikas. No dadduma mabalinmo a basaen ti maysa a binatog ket awisem dagiti ubbing nga agtakder wenno ingato dagiti imada no mangngeganda ti naipangruna a balikas wenno ragup ti balikas a kayatmo a pangipamaysaan ti pasnekmo.