Ni Jesus iti Sinagoga iti Nazaret, ni Greg K. Olsen

Oktubre 3–9

Isaias 58–66

“Ti Mannubbot Umayto iti Zion”

Nairanta dagiti kapanunotan iti aktibidad iti daytoy a balabala tapno maparegta ti kinamanagpartuatmo. Saanmo a riknaen nga obligadoka a mangsurot nga eksakto kadagitoy; surotem dagiti parikna ti Espiritu sakbay ken kabayatan ti leksionmo.

Isuratmo dagiti Impresionmo

Yawis ti Panagbibinninglay

Adu kadagiti balikas ni Isaias ti mangipaneknek ken mangisuro maipapan iti Mangisalakan. Ipakitam ti maysa a ladawan ni Jesucristo, ket awisem dagiti ubbing a mangibinglay iti maysa a banag a nasursuroda maipapan Kenkuana iti daytoy a lawas.

Isuro ti Doktrina: In-inaudi nga Ubbing

Isaias 58:13–14

Mabalin a maysa a rag-o kaniak ti Sabbath.

Ti aldaw ti Sabbath ket maysa a panawen a manglagiptayo iti Apo ken aginana manipud kadagiti linawas nga aktibidadtayo. Kasano a matulongam dagiti ubbing a sursuruam a mangaramid a rag-o ti aldaw ti Sabbath?

Dagiti Mabalin nga Aktibidad

• Idawatmo kadagiti ubbing a mangulit iti ragup ti balikas a “Naganem ti maysa nga aldaw a rag-o, ken nasantuan ni Jehova” (Isaias 58:13) iti sumagmamano a gundaway. Ilawlawag a ti “rag-o” kaipapananna ti maysa a banag a mangisangbay kadatayo iti rag-o. Awisem dagiti ubbing a mangibinglay iti sumagmamano a banag a mangisangbay iti rag-o kadakuada. Paneknekam nga inted ti Apo kadatayo ti aldaw ti Sabbath gapu ta kayatna a maaddaantayo iti rag-o. Ibagam kadagiti ubbing no apay a rag-o ti Sabbath kenka.

• Ibasam kadagiti ubbing manipud iti Isaias 58:14: “Iti kasta agrag-okanto ken ni Jehova.” Ilawlawagmo kadagiti ubbing a ti Sabbath ket maysa a naisangsangayan nga aldaw—maysa a panawen a pakapagpanunotantayo maipapan kadagiti banag nga inaramid ti Nailangitan nga Ama ken ni Jesus a mangtulong kadatayo nga agbalin a naragsak. Tulongam dagiti ubbing nga agpanunot kadagiti banag a mabalinda nga aramiden iti Sabbath a manglagip iti Nailangitan nga Ama ken ni Jesus. Awisem ida a mangidrowing kadagiti kapanunotan ken mangibinglay kadagiti ladawanda iti tunggal maysa ken kadagiti pamiliada.

“Ni Jehova isunto ti agnanayon a silawmo” (Isaias 60:19). Ti Sagut ti Lawag, ni Eva Timothy

Isaias 60:1–3

Mapagraniagko ti silaw ti Mangisalakan para kadagiti dadduma.

Impadto ni Isaias a kadagiti maudi nga aldaw, agbalinto dagiti tao ti Apo a kas maysa a silaw kadagiti adda iti kasipngetan. Ibilangmo no kasano a matulongam dagiti ubbing a “tumakder” ken “agraniag.”

Dagiti Mabalin nga Aktibidad

• Awisem dagiti ubbing nga agkidem bayat ti panangbasam iti Isaias 60:1–3. Idawatmo kadakuada nga agmulagat no mangngeganda ti balikas a “silaw” ken agkidem no mangngeganda ti balikas a “kasipngetan.” Ilawlawag a maipada ni Jesucristo ken ti ebangheliona iti maysa a silaw a mangtulong kadatayo a mangkita iti dalan nga agsubli iti Nailangitan nga Ama.

• Mangted iti tunggal ubing iti maysa a ladawan ti maysa a silaw (kas iti maysa nga init, maysa a kandela, wenno maysa a bombilia). Tulongam dagiti ubbing a mangpanunot kadagiti wagas a mabalinda nga ibinglay ti silaw ti Mangisalakan kadagiti dadduma. Bayat ti pannakaibinglay ti tunggal kapanunotan, awisem ida a “tumakder” ken “mangparaniag” iti silawda babaen ti panangingatoda iti ladawanda. Isaritam kadagiti ubbing maipapan kadagiti wagas a nakitamon ida a mangibingbinglay iti silaw ti Mangisalakan.

• Makipagkansion kadagiti ubbing iti maysa a kanta maipapan iti panangibinglay iti silaw, kas iti “Shine On” {Children’s Songbook,144). Tulongam dagiti ubbing a mangkita kadagiti balikas iti kanta a mangpatibker iti no ania ti masursuroda manipud iti Isaias 60:1–3.

Isaias 61:1–3

Ni Jesucristo ti Mangisalakan ken Mannubbotko.

Mangted tiIsaias 61:1–3 iti nabileg a panangiladawan iti mision ti Mangisalakan iti panangisuro ken panagagas. Agsapul kadagiti wagas tapno matulongan dagiti ubbing a makaawat no kasano a maisuro ken maagasan ida a mismo ni Jesucristo.

Dagiti Mabalin nga Aktibidad

• Paiggamam kadagiti ubbing dagiti ladawan ni Jesus a mangisursuro, mangag-agas, ken mangtultulong kadagiti dadduma bayat ti panangbasam iti Isaias 61:1 (kitaen iti Libro ti Arte ti Ebanghelio). Ilawlawag nga imbaon ti Dios ni Jesucristo a mangaramid kadagitoy a banag para kadatayo amin. Awisem dagiti ubbing a mangibinglay kadagiti riknada maipapan ken ni Jesucristo. Paneknekam ti ayat ti Mangisalakan para iti tunggal maysa kadagiti ubbing.

• Iladawan tiIsaias 61:3 dagiti dumngeg ken agtungpal iti Apo a kas “kaykayo ti kinalinteg.” Mangidrowing iti maysa a kayo iti pisarra, ket awisem dagiti ubbing a mangpanunot kadagiti nalinteg a banag a mabalinda nga aramiden. Para iti tunggal kapanunotan, pagdrowingem dagiti ubbing iti maysa a bulong iti kayo.

Isuro ti Doktrina: In-inauna nga Ubbing

Isaias 58:6–11

Bendisionannak ti panagayuno ken dagiti dadduma nga agkasapulan.

Mabalin nga umdasen ti tawen ti sumagmamano nga ubbing a sursuruam tapno agayuno. Ngem uray pay dagiti saan pay a makapagayuno ket makagun-od iti pagimbagan manipud iti panagsursuro maipapan iti linteg ti Apo iti panagayuno ken agsagsaganada nga agayuno inton nakasaganadan.

Dagiti Mabalin nga Aktibidad

• Isurat iti pisarra Apay nga agayunotayo? ken Kasano nga agayunotayo? Awisem dagiti ubbing a mangisurat iti pisarra kadagiti mabalin a sungbat. Allukoyem ida a mangrebyu iti “Agayuno, Panagayuno” iti Pangiwanwan iti Nasantuan a Kasuratan (scriptures. ChurchofJesusChrist.org) ken Isaias 58:6–11 tapno mangsapul kadagiti nayon pay a sungbat. Kasano a matulongannatayo ti Isaias 58:6–11 no narigat ti panagayuno?

• Ibinglaymo kadagiti ubbing ti maysa a bukod a padas iti panagayuno, wenno ibinglay ti maysa nga estoria manipud kadagiti magasin ti Simbaan maipapan iti panagayuno. Yunay-unay dagiti bendision a sumangbay manipud iti panagayuno nga addaan iti naespirituan a panggep. No asino man kadagiti ubbing ti nakapagayuno, awisem ida a mangibinglay kadagiti padasda. Allukoyem dagiti ubbing a makisarita kadagiti nagannak kadakuada iti sumaruno a Domingo ti panagayuno maipapan iti no ania ti kaipapanan ti panagayuno. Tulongam ida a makaawat no ania ti kaipapanan ti agayuno nga addaan iti napudno a panggep ken managkararag a puso.

• Aggigiddan a mangbasa iti Isaias 58:6–7, ket ilawlawagmo a maysa a wagas nga “iwaras[tayo] ti tinapay iti mabisin” no agayunotayo ket babaen ti panangidonar iti kuarta a binubostayo koma iti taraon a kas maysa a daton iti panagayuno. Ipakitam kadagiti ubbing ti papel ti donasion para iti apagkapullo ken daton iti panagayuno, ket ilawlawagmo no kasano ti mangpunno iti daytoy. Awisem dagiti ubbing a mangbasa iti Isaias 58: 8–10, nga agsapsapul kadagiti bendision a naikari kadatayo no agayunotayo. Kasano a ti panagayuno ket mabendisionannatayo ken dagiti agkasapulan?

Isaias 61:1–3

Ni Jesucristo ti Mangisalakan ken Mannubbotko.

Utobem no kasano a mabalin a kasayaatan nga usarem dagiti balikas ni Isaias a mangpapigsa iti pammaneknek dagiti ubbing ken ni Jesucristo kas Mangisalakan ken Mannubbotda.

Dagiti Mabalin nga Aktibidad

• Mangted kadagiti ubbing iti sumagmamano a minuto a mangbasa iti Isaias 61:1–3 iti bukodda. Kalpasanna awisem ida a mangisurat iti maysa a papel wenno iti maysa a study journal no ania ti isuro kadakuada dagitoy a bersikulo maipapan ken ni Jesucristo. Awisem ti sumagmamano kadagiti ubbing a mangibinglay kadagiti kapanunotanda.

• Awisem dagiti ubbing a mangibinglay iti maysa a ragup ti balikas manipud kadagitoy a bersikulo a nangnangruna a napnuan kaipapanan kadakuada ken mangilawlawag no apay. Kasano a tulongannatayo dagitoy a bersikulo a makaawat no ania ti nakaibaonan ni Jesucristo nga aramiden iti daga?

Isaias 65:17–25

Ti Milenium ket maysanto a panawen ti kappia ken rag-o.

Nakita ni Isaias ti maysa panawen no maaddaanto iti talna ken rag-o dagiti tao ti Dios. Matungpalto daytoy a padto inton agsubli ni Jesucristo iti daga ket agari ti sangaribu a tawen—maysa a panawen a maawagan iti Milenium.

Dagiti Mabalin nga Aktibidad

• Iladawan tiIsaias 65:17–25 no anianto ti langa ti daga inton umay manen ti Mangisalakan. Bingaybingayem dagiti ubbing iti babassit a grupo, a mangmangted iti tunggal grupo ti sumagmamano kadagitoy a bersikulo a basaenda. Kalpasan ti sumagmamano a minuto, sangkamaysa nga agilista iti pisarra maipapan no kasano a maigiddiatto ti biag iti “baro a daga” a nailadawan kadagitoy a bersikulo (bersikulo 17). Apay nga agbalinto daytoy a maysa a panawen ti “[pan]agragsak ken [pan]agrag-o iti agnanayon”? (bersikulo 18).

• Sakbay ti klase, mangisaganaka kadagiti word strip a nasuratan kadagiti balikas ken ragup ti balikas manipud iti maikasangapulo a pagannurotan ti pammati. Awisem ti maysa kadagiti ubbing a mangisao iti pagannurotan ti pammati, ket kiddawen kadagiti ubbing a mangurnos kadagiti word strip. Tulongam dagiti ubbing a makaawat no ania ti isuro kadatayo daytoy a pagannurotan ti pammati maipapan ti Milenium.

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada iti maysa a banag a nasursuroda maipapan iti Mangisalakan. Awisem ida nga agbasa kadagiti nasantuan a kasuratan a kadua dagiti pamiliada itoy a lawas.

Panangpadur-as iti Panangisurotayo

Agdamag kadagiti naparegta a saludsod. Agdamag kadagiti saludsod a mangawis kadagiti ubbing a sursuruam nga aglabes iti panangibagada kadagiti kinapudno. Kas pagarigan, panunotem dagiti saludsod a mangallukoy kadakuada a mangibinglay kadagiti pammaneknek ken padasda.