“Oktubre 10–16. Jeremias 1–3; 7; 16–18; 20: ‘Kasakbayan ti Panangbukelko Kenka iti Tian Nabigbigankan,’” Umaykayo, Sumurot Kaniak—Para iti Primary: Daan a Tulag 2022 (2021)
“Oktubre 10–16. Jeremias 1–3; 7; 16–18; 20,” Umaykayo, Sumurot Kaniak—Para iti Primary: Daan a Tulag 2022
Jeremias, ni Walter Rane
Oktubre 10–16
Jeremias 1–3; 7; 16–18; 20
“Kasakbayan ti Panangbukelko Kenka iti Tian Nabigbigankan”
“Ti panggep a tun-oyen ti tunggal mannursuro iti ebanghelio … ket mangisuro iti natarnaw a doktrina ti ebanghelio, babaen ti Espiritu, tapno matulongan dagiti annak ti Dios a mangbukel iti pammatida iti Mangisalakan ken agbalin nga ad-adda pay a kas Kenkuana” (Panangisuro iti Wagas ti Mangisalakan, akinsango nga akkub).
Isuratmo dagiti Impresionmo
Yawis ti Panagbibinninglay
Isuratmo kadagiti papel ti sumagmamano a kangrunaan a balikas manipud iti daytoy a lawas a panagadalda iti Jeremias, kas propeta, nabiag a danum, panaguummong, ken pila. Ikabil dagiti papel iti maysa a container, ket awisem dagiti ubbing a pumidut iti maysa ken mangibinglay iti ania man a kapanunotanda maipapan iti daytoy. Tulongam ida a mangkita no kasano a mainaig ti balikas iti maysa a banag nga insuro ni Jeremias.
Isuro ti Doktrina: In-inaudi nga Ubbing
Am-ammonak ti Nailangitan nga Ama sakbay a nayanakak.
Gapu ta nagnaedtayo iti Dios sakbay nga immaytayo iti daga, am-ammonatayo, uray no saantayo a makalagip Kenkuana. Kasano a matulongamto dagiti ubbing a sursuruam a makaawat iti daytoy napateg a kinapudno?
Dagiti Mabalin nga Aktibidad
-
Ibasam kadagiti ubbing ti Jeremias 1:5, ket ilawlawag nga am-ammo ti Dios ti propeta a ni Jeremias sakbay ti pannakayanakna. Isaritam iti tunggal ubing, a saggaysa, nga am-ammo met isuna ti Nailangitan nga Ama sakbay ti pannakayanakna ken impatulodna ti tunggal maysa kadatayo ditoy para iti maysa a panggep.
-
Ipakitam kadagiti ubbing ti maysa a ladawan ti maysa a maladaga, ket kiddawen kadagiti ubbing no ammoda no sadino ti nagnaedan daytoy a maladaga sakbay ti pannakayanakna. Aggigiddan a mangkansion iti kanta a mangisuro maipapan iti biagtayo sakbay daytoy a biag a kadua ti Dios, kas iti “I Am a Child of God” wenno “I Lived in Heaven” (Children’s Songbook, 2–3, 4). Isaritam ti maipapan kadagiti naespirituan a rikna nga isangbay ti kanta. Iburaymo ti pammaneknekmo a naminsan a nagnaedtayo amin idi iti Nailangitan nga Ama ken imbaonnatayo ditoy daga.
Naawagan dagiti propeta a mangisao kadagiti balikas ti Apo.
Ipakita ti pannakaawag ti Jeremias no ania ti idawat ti Apo nga aramiden dagiti propeta. Kasano a matulongam dagiti ubbing a sursuruam a mangpapigsa iti tarigagayda a sumurot iti sibibag a propeta?
Dagiti Mabalin nga Aktibidad
-
Ipakita kadagiti ubbing ti ladawan ti maysa a sibibiag a propeta, ket awisem ida a mangibinglay no ania ti ammoda maipapan kenkuana. Ania ti aramiden dagiti propeta? Ibasam kadagiti ubbing no ania ti kinuna ti Apo iti sabali pay a propeta, ni Jeremias, iti Jeremias 1:7. Awisem dagiti ubbing a magna iti lugar no basaem ti “mapanka iti amin a pangibaonakto kenka” ket agpammarang nga agsaoda no basaem ti “ania man ti ibilinko kenka agsaokanto.” Ibinglaymo ti pammaneknekmo nga aramiden ken sawen dagiti propeta no ania ti ibilin ti Apo.
-
Ipakitam dagiti ladawan dagiti propeta manipud kadagiti nasantuan a kasuratan (kitaen iti Libro ti Arte ti Ebanghelio, dagiti magasin iti Simbaan, ken Umaykayo, Sumurot Kaniak—Para kadagiti Indibidual ken Pamilia). Awisem dagiti ubbing a mangisarita kenka no ania ti ammoda maipapan kadagitoy a propeta. Isaritam kadagiti ubbing maipapan iti maysa a banag nga inaramid ti tunggal maysa a makatulong iti aramid ti Dios. Iburaymo ti pammaneknekmo a maawagan dagiti propeta ti Dios a mangisao kadagiti balikasna ken agserbi kadagiti taona.
Matulongak dagiti annak ti Nailangitan nga Ama nga agsubli Kenkuana.
Iti panangusarna iti Jeremias 16:16, kinuna ni Presidente Russell M. Nelson, “Sinukisok dagiti misionario dagiti maibilang iti nawarawara nga Israel; naganupda kadakuada ‘iti abut dagiti bato’; ket nagdaklisda kadakuada a kas kadagiti nagkauna nga aldaw” (“The Gathering of Scattered Israel,” Liahona, Nob. 2006, 81).
Dagiti Mabalin nga Aktibidad
-
Bayat ti panangbasam iti Jeremias 16:16, awisem dagiti ubbing nga agpammarang nga agdakdaklis wenno agan-anup. Ilawlawag a dagiti dumadaklis ken agan-anup iti daytoy a bersikulo ket mabalin a mangibagi kadagiti misionario. Awisem dagiti ubbing nga agpammarang a misionario. Ania ti aramiden dagiti misionario? Kasano a makatulongtayo kadakuada?
-
Mangaramid iti ay-ayam a parisparis nga us-usaren ti panid ti aktibidad iti daytoy a lawas. No masarakan ti maysa nga ubing dagiti agparis a ladawan, isaritam no ania ti ipakita dayta a ladawan a mabalintayo nga aramiden a mangtulong kadagiti annak ti Nailangitan nga Ama nga agsubli Kenkuana.
Isuro ti Doktrina: In-inauna nga Ubbing
Naawagan dagiti propeta nga agsao iti balikas ti Apo.
Kasano a matulongam dagiti ubbing a mangpapigsa iti pammatida ken maawatanda ti akem dagiti propeta iti pagarian ti Dios?
Dagiti Mabalin nga Aktibidad
-
Pumili iti sumagmamano a kangrunaan a bersikulo manipud iti Jeremias 1 a mangisuro iti napapateg a kinapudno maipapan kadagiti propeta, a kas dagiti bersikulo 5, 7, 10, ken 19. Awisem ti tunggal ubing a pumidut iti maysa kadagiti bersikulo, basaenna daytoy, ken ibinglayna ti maysa a banag nga adalenna maipapan kadagiti propeta manipud iti bersikulo. Awisem ti sumagmamano nga ubbing a mangiburay kadagiti pammaneknekda maipapan iti panangsurot iti propeta.
-
Ipakitam ti maysa a ladawan ti sibibiag a propeta, ket aggigiddan nga agkansion iti maysa a kanta maipapan kadagiti propeta, kas iti “We Listen to a Prophet’s Voice” (Hymns, no. 22). Tulongam dagiti ubbing nga agaramid iti listaan dagiti banag nga indawat ti sibibiag a propeta nga aramidentayo. Pumili iti mensahe iti kallabes a komperensia manipud iti propeta, ket tulongam dagiti ubbing a mangsarak iti balakad iti mensahena. Kasano ti panangsurottayo iti propeta? Ilawlawag no kasano a tulongannatayo ti balakad manipud kadagiti propeta a mangsurot a nasaysayaat iti Nailangitan nga Ama ken ni Jesucristo.
-
Ipabuya ti video “Why Do We Have Prophets?” (ChurchofJesusChrist.org), ket saludsoden kadagiti ubbing no kasano nga ilawlawagda iti maysa a gayyem no apay a bendision ti addaan iti maysa a sibibiag a propeta (kitaen iti Pagannurotan ti Pammati 1:6, 9). Awisem dagiti ubbing a mangibinglay iti riknada maipapan iti sibibiag a propeta.
Makapagbalinak a paset ti panaguummong ti Israel.
Ti mensahe maipapan ti panaguummong ti Israel a masarakan iti Jeremias 16:14–15 ket makaited iti dakkel a gundaway a mangisarita kadagiti ubbing maipapan iti aramid ti misionario ken family history. Daytoy ti maysa a wagas nga “agtakder [tayo] a saksi ti Dios” (Mosiah 18:9).
Dagiti Mabalin nga Aktibidad
-
Aggigiddan a mangbasa iti Jeremias 16:14, ket kiddawen kadagiti ubbing a mangibinglay kadagiti detalye a malagipda maipapan iti no kasano a “ni Jehova … nangiruar kadagiti annak ti Israel manipud iti daga ti Egipto” (kitaen iti Exodo 14). Awisem ida a mangbasa iti Jeremias 16:15 tapno ammuen no ania ti pasamak a kinuna ni Jeremias nga ad-adda a nakallalagip ngem iti dayta. Ilawlawag a naiwaraswaras ti Israel iti intero a daga, ngem inkari ti Dios nga ummongenna ida nga agsubli Kenkuana ken iti Simbaanna. Maawagan daytoy iti panaguummong ti Israel. Kasano a maipada daytoy iti panangisalakan kadagiti tao iti pannakabalud?
-
Ibinglaymo daytoy a palawag manipud ken ni Presidente Russell M. Nelson: “Ania man nga oras nga aramidenyo ti ania man a banag a mangtulong iti asino man—iti agsumbangir ti belo—mangalaka iti addang iti panangaramid kadagiti katulagan iti Dios ken panangawat kadagiti kasapulan nga ordinansa ti panagbuniagda ken ti templo, tumultulongkayo a mangummong iti Israel” (Russell M. Nelson ken Wendy W. Nelson, “Hope of Israel” [worldwide youth devotional, Hunio 3, 2018], supplemento iti New Era ken Ensign, Ago. 2018,15, ChurchofJesusChrist.org). Kasano a makatulongtayo a mangummong iti Israel?
-
Aggigiddan nga agkansion iti kanta maipapan iti aramid ti misionario, kas iti “I Hope They Call Me on a Mission” wenno “Called to Serve” (Children’s Songbook, 169,174), wenno ipabuya ti video a “Your Day for a Mission” (ChurchofJesusChrist.org). Kiddawen kadagiti ubbing no ania ti masursuroda manipud iti kanta wenno video maipapan iti no apay a pilien ti maysa a tao ti agserbi iti mision.
Yallukoy ti Panagsursuro iti Pagtaengan
Awisem dagiti ubbing a mangyawid iti kopia ti panid ti aktibidad iti daytoy a lawas ket agay-ayam iti parisparis a kaduada dagiti pamiliada. Allukoyem ida a mangisarita iti pamiliada maipapan no kasano a nabendisionan ida ti aramid ti misionario.
Panangpadur-as iti Panangisurotayo
Tulongam dagiti ubbing a mangilasin iti Espiritu. Masansan a mangyawis ti sagrado a musika iti impluensia ti Espiritu Santo. No makipagkantaka kadagiti ubbing, alaem ti gundaway a mangtulong kadakuada a mangilasin iti naespirituan a rikna a mangipatalged iti kinapudno ti no ania ti nasursuroda.