“Oktubre 24–30. Ezequiel 1–3; 33–34; 36–37; 47: ‘Maysa a Baro a Puso Isaadkonto iti Unegyo’” Umaykayo, Sumurot Kaniak—Para iti Primary: Daan a Tulag 2022 (2021)
“Oktubre 24–30. Ezequiel 1–3; 33–34; 36–37; 47,” Umaykayo, Sumurot Kaniak—Para iti Primary: 2022
Umaykayo, Sumurot Kaniak, ni Scott Sumner
Oktubre 24–30
Ezequiel 1–3; 33–34; 36–37; 47
“Maysa a Baro a Puso Isaadkonto iti Unegyo”
Awanto ti orasmo a mangisuro iti tunggal pagbatayan iti Ezequiel. Agkiddaw iti naespirituan a pannarabay maipapan no ania ti ipokus, ken allukoyem dagiti ubbing a mangituloy ti panagsursuro iti pagtaengan.
Isuratmo dagiti Impresionmo
Yawis ti Panagbibinninglay
Pagsisinnublatem dagiti ubbing nga agdrowing kadagiti ladawan ti maysa a banag a nasursuroda manipud kadagiti nasantuan a kasuratan itay kallabes. Mabalin a pugtuan dagiti dadduma pay nga ubbing no ania ti idrowdrowing ti tunggal ubing.
Isuro ti Doktrina: In-inaudi nga Ubbing
Dagiti propeta ti maipada kadagiti agbambantay a mangballaag kadatayo iti peggad.
Maipada ni Ezequiel iti maysa nga agbambantay, a mangbalballaag kadagiti Israelita iti peggad a saanda a makita. Tulongam dagiti ubbing a mangkita no kasano a maipada kadagiti agbambantay dagiti propetatayo ita.
Dagiti Mabalin nga Aktibidad
-
Ibasa kadagiti ubbing no ania ti imbaga ti Apo ken ni Ezekiel iti Ezequiel 3:17. Awisem ida nga agaramid kadagiti tignay a maigiddan kadagiti balikas, kas iti panangitudo kadagit mata, lapayag, ken ngiwatda no basaem dagiti balikas nga “agbambantay,” “denggen,” ken “ngiwat.”
-
Mangidaulo kadagiti ubbing iti pannagna iti lawlaw ti siled. Ballaagam ida maipapan kadagiti agpammarang a peggad iti riles, kas iti karayan a tappuaken, sangsanga a paglemmengan, wenno ayup a liklikan. Pagsisinnublatem dagiti dadduma pay nga ubbing nga agbalin a lider. Isaritam maipapan iti no kasano a ballaagannatayo ti propetatayo kadagti peggad a saantayo a makita.
-
Ipakitam ti ladawan ti agdama a propeta bayat ti panagkantayo nga aggigiddan iti maysa a kanta maipapan kadagiti propeta, a kas iti maudi a berso ti “Follow the Prophet” (Children’s Songbook, 110–11). Ibagam kadagiti ubbing no kasano a maipada ti propeta iti maysa nga agbambantay para kenka.
Isuronak dagiti nasantuan a kasuratan maipapan ken ni Jesucristo.
Indilig ni Ezequiel ti balay ti Israel iti dua a stick ngaagbalin a maysa. Isimbolo dagitoy a stick ti Biblia ken ti Libro ni Mormon, nga agkaykaysa a mangipaneknek ken ni Cristo.
Dagiti Mabalin nga Aktibidad
-
Mangted iti sumagmamano nga ubbing kadagiti kopia ti Libro ni Mormon; mangted iti dadduma pay kadagiti kopia ti Biblia. Gupgopem ti Ezequiel 37:15–19 babaen ti panangilawlawag nga imbaga ti Apo ken ni Ezekiel a mangisurat iti dua a stick a mangibagbagi iti Biblia ken ti Libro ni Mormon. Basaem ti bersikulo 17, ket awisem ti tunggal ubing a mangsapul iti maysa a tao nga addaan iti maysa a libro ti nasantuan a kasuratan a maigiddiat iti kukuada ket “pagkaduaem ida” tapno “agbalinda a maymaysa kadagiti [imada].” Isaritam maipapan iti no kasano a tulongannatayo ti Biblia ken ti Libro ni Mormon a mangpapigsa iti pammatitayo iti Nailangitan nga Ama ken ni Jesucristo.
-
Iti panangusarmo kadagiti ladawan manipud iti Libro ti Arte ti Ebanghelio wenno manipud kadagiti libro nga Umaykayo, Sumurot Kaniak kadagiti napalabas a tawen, tulongam dagiti ubbing a mangibinglay kadagiti estoria maipapan ken ni Jesus manipud iti Biblia ken ti Libro ni Mormon. Kiddawem kadakuada a mangibinglay no apay nga agyamanda kadagitoy dua a libro ti nasantuan a kasuratan.
Nakita ni Ezequiel iti parmata ti maysa a karayan nga agay-ayus manipud iti templo ken mangagas iti Natay a Baybay.
Ania dagiti bendision a sumangbay manipud iti templo.
Ti parmata ni Ezequiel iti maysa a makaagas a karayan a nagayus manipud iti templo ket makatulong kadagiti ubbing a mangammo a mangisangbay dagiti templo kadagiti bendision iti biagtayo.
Dagiti Mabalin nga Aktibidad
-
Ipakita kadagiti ubbing ti maysa a baso ti danum. Kasano a bendisionannatayo ti danum? Isaritam kadagiti ubbing maipapan iti parmata ni Ezequiel iti danum nga agay-ayus manipud iti templo (kitaen iti Ezequiel 47:1–12). Ipakitam ti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia (kitaen met iti video nga “And the River Will Grow,” ChurchofJesusChrist.org). Isaritam kadagiti ubbing maipapan kadagiti bendision nga awatem a, kas iti karayan iti parmata ni Ezequiel, nga agayus manipud iti templo.
-
Awisem dagiti ubbing a mangidrowing iti ladawan ti bagbagida a mapmapan iti templo. Aggigiddan nga agkansion iti kanta a mangiladawan kadagiti bendision ti templo, kas iti “Families Can Be Together Forever” (Children’s Songbook,188). Ania ti isuro daytoy a kanta maipapan iti no kasano a bendisionannatayo dagiti templo?
Isuro ti Doktrina: In-inauna nga Ubbing
Makatulong kaniak ni Jesuscristo a mangbalbaliw iti pusok
Inusar ni Ezequiel dagiti ragup ti balikas a kas iti “baro a puso” ken “baro nga espiritu” a mangisuro maipapan iti kita ti panagbalbaliw nga isangbay ti Mangisalakan iti biagtayo.
Dagiti Mabalin nga Aktibidad
-
Kiddawen kadagiti ubbing a mangsukisok iti Ezequiel 2:3–4; 3:7 kadagiti balikas a nangiladawan kadagiti Israelita. Kalpasanna awisem ida a mangbasa iti Ezequiel 36:26–27 tapno maammuan no kasano nga indiaya ti Mangisalakan a tulongan ida nga agbalbaliw. Ania dagiti balikas a mangiladawan iti “baro a puso” ken “baro nga espiritu” nga itedna kadatayo? (kas pagarigan, kitaen iti Mosiah 3:19; 5:2).
-
Kiddawen kadagiti ubbing nga agpanunot kadagiti banag a mabalin nga aramiden dagiti tao a “nabangag” wenno “natangken ti pusoda” (Ezequiel 2:4; 3:7). Kas pagarigan, kasano ti mabalin a reaksionda iti balakad manipud iti maysa a nagannak wenno iti propeta? Ania ti mabalin nga aramidenda no makitada ti maysa a tao nga agkasapulan? Kasano ti maiduma a tignaytayo no pinalukneng ti Mangisalakan ti puspusotayo?
Tumulong ti Biblia ken ti Libro ni Mormon a “mangummong” kadatayo ken ni Jesucristo.
Agtinnulong ti “sarukod ni Juda” (ti Biblia) ken ti “sarukod ni Jose (ti Libro ni Mormon) a mangummong iti Israel iti Mangisalakan (kitaen iti Ezequiel 37:19).
Dagiti Mabalin nga Aktibidad
-
Mangingato iti maysa a kopia ti Biblia ken ti Libro ni Mormon, ket kiddawem kadagiti ubbing no apay a mariknada a nasayaat ti addaan iti agpada kadagitoy a libro. Ibasam kadakuada ti Ezequiel 37:19, ket ilawlawagmo a “ti sarukod ni Jose” ket maitudo iti Libro ni Mormon, nga insurat dagiti an-annabo ni Jose iti Egipto, ken “ti sarukod ni Juda” ket maitudo iti Biblia, nga insurat dagiti Judio ti kaaduanna. Kalpasanna aggigiddan a basaenyo dagiti bersikulo 21–23 ken 2 Nephi 3:12, ket ilista dagiti bendision a sumangbay manipud iti pannakaadda nga agpada dagitoy a libro.
-
Mangikabil iti maysa a ladawan ni Jesus iti tengnga ti siled, ket awisem dagiti ubbing a mangyakar kadagiti tugawda iti agduduma a lugar kadagiti pader ti siled. Kalpasanna kiddawem kadakuada a mangusar iti pangiwanwan iti Nasantuan a Kasuratan a mangsarak kadagiti nasantuan a kasuratan iti Biblia ken iti Libro ni Mormon a mangisuro maipapan ken ni Jesucristo (no kasapulan, ipakitam kadakuada no kasano nga aramiden daytoy). Kalpasan ti panangibinglay ti tunggal ubing iti maysa a nasantuan a kasuratan, awisem dagiti amin nga ubbing a mangyakar kadagiti tugawda iti asideg ti ladawan ni Jesus. Ituloymo agingga a “naurnong” ti tunggal maysa nga agsubli Kenkuana.
Dagiti bendision ti templo ti makaagas kadagiti puspuso ken pamiliatayo.
Ti danum nga agay-ayus manipud iti templo iti parmata ni Ezequiel ti nangyeg iti biag iti amin a banag a sinagidna. Kapadana, dagiti bendision manipud iti templo ti makaagas kadatayo a naespirituan ken mangyeg kadatayo iti agnanayon a biag.
Dagiti Mabalin nga Aktibidad
-
Ilistam iti pisarra ti sumagmamano a kangrunaan a balikas ken ragup ti balikas a mainaig iti Ezequiel 47:1–12, kas templo, karayan, disierto, Natay a Baybay, adu nga ikan, ken nabunga a kayo. Awisem ti tunggal ubing a pumidut iti maysa kadagitoy a banag nga idrowing. Kalpasanna aggigiddan a basaen dagiti bersikulo, ket awisem dagiti ubbing nga ibinglayda dagiti drowingda no madakamat dagiti elementoda. Ania dagiti bendision a dimteng manipud iti karayan iti daytoy a parmata? (kitaen dagiti bersikulo 8–9,12). Tulongam dagiti ubbing a mangkita no kasano a maipada dagitoy a bendision kadagiti bendision nga idiaya ti Nailangitan nga Ama ken ti Mangisalakan kadagiti agtungpal kadagiti katulagan iti templo.
-
Ipakita ti video nga “And the River Will Grow” (ChurchofJesusChrist.org). Wenno aggigiddankayo a mangbasa iti no ania ti insuro ni Elder Dale G. Renlund maipapan iti parmata ni Ezequiel iti “Family History and Temple Work: Sealing and Healing” (Liahona, Mayo 2018, 47–48). Isaritam kadagiti ubbing no kasano a nangisangbay kadakayo ti aramid iti family history ken ti templo a nangisangbay iti panangagas ti Mangisalakan. Awisem dagiti ubbing a mangibinglay kadagiti riknada maipapan iti templo.
Yallukoy ti Panagsursuro iti Pagtaengan
Awisem dagiti ubbing a mangibinglay iti pamiliada ti maysa a banag a nasursuroda ita nga aldaw ken maysa a banag a kayatda a masursuro nga ad-adda pay.
Panangpadur-as iti Panangisurotayo
Suportaran ti panagsursuro iti pagtaengan “Nasken a ti maysa kadagiti panggepmo a tun-oyen kas maysa a mannursuro ket mangallukoy kadagiti sursuruam a maaddaan iti bukodda a padas iti panangusar kadagiti nasantuan a kasuratan—agpada a ti panagadal nga agmaymaysa ken kaduada dagiti pamiliada” (Panangisuro iti Wagas ti Mangisalakan, 36).