Ti Araraw ni Jeremias a Propeta, manipud iti kitikit a ladawan ti Pagadalan a Nazareno

Oktubre 17–23

Jeremias 30–33; 36; Dagiti Un-unnoy 1; 3

“Pagbalinekto ti Leddaangda a Rag-o”

Mabalin a narigat a maawatan dagiti ubbing ti libro ti Jeremias ken ti Dagiti Un-unnoy ngem masursuro pay laeng ti klasem dagiti adalen manipud kadagiti pagbatayan a naisuro kadagitoy a libro. Ania ti nakaawisam nga ibinglay?

Isuratmo dagiti Impresionmo

Yawis ti Panagbibinninglay

Ipasam ti maysa a kopia ti Biblia. Bayat ti panangiggem dagiti ubbing ti libro, kiddawem kadakuada a mangibinglay iti maysa a banag a magustuanda maipapan iti Daan a Tulag—nalabit a maysa a pagbatayan wenno maysa a paggugusto nga estoria a nasursuroda manipud iti daytoy iti pagtaengan wenno iti simbaan.

Isuro ti Doktrina: In-inaudi nga Ubbing

Jeremias 31:3

Patpatgennak ti Nailangitan nga Ama ken ni Jesus.

Iti pannakarikna iti “agnanayon nga ayat” ti Nailangitan nga Ama ken Jesucristo ket mangtulongto kadagiti ubbing a sursuruam nga umas-asideg Kadakuada.

Dagiti Mabalin nga Aktibidad

• Ipakitam kadagiti ubbing ti sumagmamano a banag (wenno ladawan dagiti banag) nga agpaut iti atiddog a panawen ken ti sumagmamano a saan nga agpaut, a kas iti metal a sensilio ken maysa a bunga. Saludsodem kadagiti ubbing no ania ditoy ti agpautto iti nabaybayag, ken ilawlawag no apay nga agpaut iti nabaybayag ti sumagmamano a banag ngem iti dadduma. Basaen ti Jeremias 31:3, ket tulongam dagiti ubbing a makaawat nga “agnanayon” ti ayat ti Nailangitan nga Ama ken ni Jesucristo para kadakuada.

• Kiddawen kadagiti ubbing a mangibinglay no kasano nga ipakita ti Nailangitan nga Ama ken Jesucristo ti “kinamanangngaasida kadakuada (Jeremias 31:3). Tapno mangted kadagiti ubbing iti kapanunotan, agkansion iti kanta maipapan Iti ayatda para kadatayo, kas iti “I Feel My Savior’s Love” wenno “My Heavenly Father Loves Me” (Children’s Songbook, 74–75, 228–29). No mabalin, ipakitam dagiti ladawan dagiti banag a nadakamat iti kanta. Kasano ti riknatayo no panunotentayo maipapan iti ayat ti Nailangitan nga Ama ken ni Jesucristo?

Makaparegta kadatayo nga agbabawi ken umasideg iti Apo dagiti nasantuan a kasuratan.

Jeremias 36:1–4

Dagiti nasantuan a kasuratan ti balikas ti Dios.

Imbaga ti Apo ken ni Jeremias a mangisurat kadagiti balikasna, ket nataginayon dagiti sinurat ni Jeremias para kadatayo iti libro ti Jeremias. Tulongam dagiti ubbing a mangpauneg iti ayatda para kadagiti nasantuan a kasuratan, a pakasarakantayo iti balikas ti Dios.

Dagiti Mabalin nga Aktibidad

• Awisem ti maysa nga ubing nga agpammarang a ni Jeremias, ken awisem dagiti dadduma pay nga ubbing nga agpammarang a ni Baruc. Tulongam ti ubing nga agak-akem a kas Jeremias a mangisao iti sumagmamano a balikas manipud iti Jeremias 36:3 idinto nga agpammarang dagiti dadduma pay nga ubbing nga agsursurat kadagitoy, kas iti inaramid ni Baruc. Paneknekam a dagiti nasantuan a kasuratan “ti sasao ni Jehova” (Jeremias 36:4) nga indawatna kadagiti propeta nga isuratda.

• Mangi-display iti maysa a libro dagiti ubbing ken maysa a kopia dagiti nasantuan a kasuratan, ket kiddawen kadagiti ubbing a mangisarita maipapan kadagiti paggigidiatan a madlawda iti nagbaetan dagiti libro. Ania ti mamagbalin a naisangsangayan dagiti nasantuan a kasuratan? Tulongam dagiti ubbing a makaawat a dagiti nasantuan a kasuratan ti balikas ti Dios nga insurat dagiti propeta, a kas met laeng ti libro ti Jeremias nga imbaga ti Dios ken ni Jeremias nga isuratna.

Jeremias 36:4–10

Maibinglayko no ania ti masursurok manipud kadagiti nasantuan a kasuratan.

Mabalin a maaddaan dagiti ubbing iti dakkel nga impluensia kadagiti adda iti aglawlawda. Kas ken ni Baruc, mabalinda nga ibinglay iti dadduma no ania ti masursuroda kadagiti nasantuan a kasuratan.

Dagiti Mabalin nga Aktibidad

• Awisem dagiti ubbing nga agaramid kadagiti tignay a kagiddan dagiti balikas bayat ti panangbasam (wenno pananggupgop) iti Jeremias 36:4–10, kas koma iti panagpammarang nga agsursurat iti maysa a libro (kitaen iti bersikulo 4), panangiggem iti rehas iti maysa a pagbaludan (kitaen iti bersikulo 5), ken panangibasa iti nasantuan a kasuratan kadagiti tao (kitaen kadagiti bersikulo 8,10). Yunay-unay a naaddaan iti tured ni Baruc a mangibasa kadagiti balikas ni Jeremias kadagiti tao uray no saan a kinayat dagiti lider iti Jerusalem nga aramidenna. Tulongam dagiti ubbing a manglagip iti maysa a banag a nasursuroda manipud iti Daan a Tulag ken mangpanunot kadagiti wagas a mabalinda a pangibinglayan daytoy kadagiti dadduma.

• Agkansion iti maysa a kanta maipapan kadagiti nasantuan a kasuratan, kas iti “Search, Ponder, and Pray” (Children’s Songbook,109). Ibinglaymo ti pammaneknekmo maipapan kadagiti nasantuan a kasuratan, ken allukoyem dagiti ubbing nga ibinglayda met ti pammaneknekda.

Isuro ti Doktrina: In-inauna nga Ubbing

Jeremias 31:31–34; 32:38–41

Makapagtungpalak kadagiti katulagak iti Dios.

Dagiti pannursuro ni Jeremias maipapan iti baro ken agnanayon a katulagan ti Apo ket makatulong kadagiti ubbing a sursuruam a mangpatibker iti tarigagayda a mangtungpal kadagiti katulaganda.

Dagiti Mabalin nga Aktibidad

• Mangidrowing iti maysa a puso iti pisarra, ket awisem ti kagudua dagiti ubbing a mangbasa iti Jeremias 31:31–34 ken ti sabali pay a kagudua a mangbasa iti Jeremias 32:38–41. Awisem dagiti grupo a mangisurat iti puso dagiti banag a masursuroda manipud kadagiti bersikuloda maipapan kadagiti katulagantayo iti Dios. ‎Kasano a ti kaadda ti linteg ti Dios a naisurat iti puspusotayo (kitaen iti Jeremias 31:33) ket maigiddiat iti panangbasa laeng iti daytoy kadagiti nasantuan a kasuratan? Apay a kayattayo ti agaramid kadagiti katulagan iti Apo? Apay a kayatna ti agaramid kadagiti katulagan kadatayo?

• Tapno marebyu dagiti katulagan nga aramidentayo no mabuniagantayo, awisem dagiti ubbing nga agaramid iti maysa a tsart a dua ti kolumna iti maysa a papel nga addaan kadagiti paulo a Ti Karik ken Dagiti Kari ti Dios. Kiddawem kadakuada a mangpunno iti tsart babaen ti panangusar iti benneg a napauluan iti “The Baptismal Covenant” in the Gospel Topics article “Baptism” (topics.ChurchofJesusChrist.org) wenno Mosiah 18:10,13; Doktrina ken Katulagan 20:37. Awisem dagiti ubbing a mangi-display iti papel iti pagtaengan tapno makatulong kadakuada a manglagip a mangtungpal kadagiti katulaganda.

Jeremias 36

Dagiti nasantuan a kasuratan ti balikas ti Dios.

Makatulong ti pakaammuan iti Jeremias 36 kadagiti ubbing a makasursuro manipud kadagiti pagarigan dagiti tao a nangawat iti balikas ti Apo kadagiti nasantuan a kasuratan.

Dagiti Mabalin nga Aktibidad

• Isurat dagitoy a saludsod iti pisarra: Apay? Asino ti nangipateg kadagiti nasantuan a kasuratan? Asino ti saan a nangipateg? Aggigiddan a mangbasa iti Jeremias 36:1–3, ket kiddawen kadagiti ubbing no apay a kayat ti Apo nga isurat ni Jeremias dagiti balikasna. Kalpasanna kiddawem kadagiti ubbing nga agtitinnulongda iti kada paris a mangbasa iti Jeremias 36:5–8, 20–25 ken lasinenda no asino ti nangipakita nga impategda dagiti nasantuan a kasuratan ken asino ti saan a nangipateg. Isaritam no apay nga ipategmo dagiti nasantuan a kasuratan. Ibinglaymo ti maysa a binatog ti nasantuan a kasuratan wenno estoria a naisangsangayan ti pategna kenka. Awisem met dagiti ubbing a mangibinglay.

• Awisem dagiti ubbing a mangusar iti daytoy a lawas iti panid ti aktibidad a mangsanay iti pangibinglay iti tunggal maysa ti pakaammuan iti Jeremias 36. Awisem ida a mangibinglay kadagiti pammaneknekda maipapan kadagiti nasantuan a kasuratan.

Dagiti Un-unnoy 1:1–2,16; 3:22–26

Inaramid ti Mangisalakan a mabalinak a mapakawan kadagiti basolko.

Kas iti libro ti naindaniwan a panangiladawan ti libro ti Dagiti Un-unnoy, masansan a mariknatayo ti ladingit no agbasoltayo. Dagitoy a rikna ti mabalin a mangparegta kadatayo nga agbalbaliw ken mangidawat iti Nailangitan nga Ama para iti pannakapakawan.

Dagiti Mabalin nga Aktibidad

• Ilawlawag kadagiti ubbing a gapu ta saan a nagbabawi dagiti Israelita, nadadael ti Jerusalem ken ti templo idiay. Kiddawen kadagiti ubbing nga agsarita maipapan no kasano koma ti mabalin a nariknada no nagnanaedda iti Jerusalem iti dayta a panawen. Aggigiddan a basaen ti Dagiti Un-unnoy 1:1–2,16. Ania dagiti balikas ken ragup ti balikas kadagitoy a bersikulo a makatulong kadatayo a makaawat no kasano koma ti mabalin a narikna dagiti Israelita? Kasano ti mabalin koma a naited kadakuada ti mensahe iti Dagiti Un-unnoy 3:22–26 a namnama?

• Kiddawen kadagiti ubbing a mangpanunot maipapan iti maysa a panawen idi nariknada ti liday gapu iti dakes a pili nga inaramidda. Ania ti nasarakanda iti Dagiti Un-unnoy 3:22–26 a mangtulong kadakuada a mangammo a naayat ti Apo a mangpakawan kadakuada?

Yallukoy ti Panagsursuro iti Pagtaengan

Awisem dagiti ubbing a mangidawat kadagiti miembro ti pamiliada a mangibinglay kadagiti padas a mainaig kadagiti pagbatayan nga inadalyo iti klase. Kas pagarigan, no pinaglilinnawaganyo dagiti nasantuan a kasuratan, mabalin nga idawat dagiti ubbing iti maysa a miembro ti pamilia tapno mangibinglay no kasano nga ammona a pudno dagiti nasantuan a kasuratan.

Panangpadur-as iti Panangisurotayo

Pagtalinaedem ti pasnek dagiti ubbing. Mabalin a kasapulam ti agpanunot kadagiti managpartuat a wagas a mangiraman kadagiti in-inaudi nga ubbing. Kas pagarigan, usarem dagiti ladawan, kanta, ay-ayam, ken dadduma pay nga aktibidad.