“Oktubre 31–Nobiembre 6. Daniel 1–6: ‘Awan ti Sabali a Dios a Makabalin a Mangispal,’” Umaykayo, Sumurot Kaniak—Para iti Primary: Daan a Tulag 2022 (2021)
“Oktubre 31–Nobiembre 6. Daniel 1–6,” Umaykayo, Sumurot Kaniak—Para iti Primary: 2022
Ibuksilan ni Daniel ti Tagtagainep ni Nabucodonosor, ni Grant Romney Clawson
Oktubre 31–Nobiembre 6
Daniel 1–6
“Awan ti Sabali a Dios a Makabalin a Mangispal”
Bayat ti panangbasam iti Daniel 1–6, ilistam dagiti kinapudno a mariknam a nakaawisan ti riknam a makatulong kadagiti ubbing nga agtakuat.
Isuratmo dagiti Impresionmo
Yawis ti Panagbibinninglay
I-display dagiti ladawan dagiti pasamak iti Daniel 1–6 (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia wenno Libro ti Arte ti Ebanghelio, dagiti num. 23, 24, 25, 26). Kiddawen dagiti ubbing a mangibinglay no ania ti ammoda maipapan kadagiti pasamak iti daytoy nga estoria. Awisem ida a mangibinglay iti panawen idi pinilida ti mangsurot iti Mangisalakan, a kas iti inaramid ni Daniel ken dagiti gagayyemna.
Isuro ti Doktrina: In-inaudi nga Ubbing
Kayat ti Nailangitan nga Ama nga aywanak ti bagik.
Nagkedked ni Daniel ken dagiti gagayyemna iti karne ken arak nga indiaya kadakuada ti ari gapu ta tinarigagayanda a suroten dagiti bilin ti Dios ken liklikan a mangdangran kadagiti bagida. Ita tulongannatayo ti Word of Wisdom a mangliklik kadagiti sustansia a makadangran kadagiti bagitayo.
Dagiti Mabalin nga Aktibidad
-
Ibinglaymo kadagiti ubbing ti “Ni Daniel ken dagiti Gagayyemna” (iti Dagiti Estoria iti Daan a Tulag), wenno gupgopen ti Daniel 1:1–17. Awisem dagiti ubbing a mangyakem iti estoria. Tulongam ida a makaawat no kasano a binendisionan ti Apo ni Daniel ken dagiti gayyemna iti panagpilina nga agtungpal Kenkuana (kitaen iti bersikulo 17). Ania dagiti bendision nga awatentayo manipud iti Dios no pilientayo ti rumbeng?
-
Ipakitam kadagiti ubbing dagiti ladawan dagiti banag nga isuro kadatayo ti Word of Wisdom a kanen wenno usarentayo ken dagiti banag nga ibagana a ditayo kanen ken usaren (kitaen iti Doktrina ken Katulagan 89). Awisem dagiti ubbing nga agpammarang a mangan kadagiti nasayaat a banag ken mangisao iti saan kadagiti dakes a banag. Paneknekam a bendisionannatayo ti Apo no aywanantayo dagiti bagitayo. Aggigiddan nga agkansion iti maysa a kanta maipapan iti panangaywan kadagiti bagitayo, a kas iti “The Lord Gave Me a Temple” wenno “The Word of Wisdom” (Children’s Songbook, 153, 154–55). Ania ti isuro daytoy a kanta kadatayo?
Panangiladawan ni Daniel ken dagiti gagayyemna nga agkedkedked iti taraon ti ari, ni Brian Call
Bendisionannakto ti Dios no piliek a suroten ni Jesucristo
Naglaon ti libro ni Daniel kadagiti estoria dagiti tao a nangpili a sumurot kadagiti bilin ti Dios uray no narigat unay ti panangaramid iti daytoy. Kasano a matulongamto dagiti ubbing a makasursuro manipud kadagitoy a pagwadan?
Dagiti Mabalin nga Aktibidad
-
Mangsapul kadagiti ladawan dagiti estoria iti Daniel 1, 3, ken6 (kitaen iti panid ti aktibidad iti daytoy a lawas, balabala itoy a lawas iti Umaykayo, Sumurot Kaniak—Para kadagiti Indibidual ken Pamilia, wenno Libro ti Arte ti Ebanghelio, dagiti num. 23, 25, 26). Ikabil dagiti ladawan a nakapakleb iti pisarra wenno iti suelo. Awisem ti maysa nga ubing a mangbaliktad iti maysa kadagiti ladawan, ken mangtulong kenkuana a mangisarita iti estoria nga ibagi daytoy. (Para iti tulong, kitaen iti “Ni Daniel ken dagiti Gagayyyemna,” “Sidrac, Misac, ken Abdenago,” ken “Ni Daniel ken ti Rukib dagiti Leon” iti Dagiti Estoria iti Daan a Tulag.) Kalpasan ti tunggal estoria, paglilinnawagan dagiti saludsod kas kadagitoy: Ania ti inaramid dagiti tao a sumurot iti Apo? Kasano a binendisionan ida ti Apo? Ibinglaymo no kasano a nabendisionannaka iti panagpili a mangsurot ken ni Jesucristo. Idawat kadagiti ubbing a mangibinglay kadagiti padasda.
-
Awisem dagiti ubbing a mangyakem kadagiti situasion a mabalinda nga ipakita ti pammatida iti Dios babaen ti panagtungpal kadagiti bilinna. Mabalin nga iraman dagitoy ti panagbalin a nasayaat iti maysa a kabsat, nga ibagbaga iti maysa a tao maipapan iti Mangisalakan, wenno panagkararag iti tunggal rabii. Ipakitam ti ladawan da Sidrac, Misac, ken Abdenago iti umap-apuy nga urno (kitaen iti Libro ti Arte ti Ebanghelio, num. 25), ket kiddawem kadagiti ubbing a mangbilang kadagiti tao iti urno. Basaem ti Daniel 3:24–25 a mangammo no ania pay ti adda iti urno. Ibinglaymo ti pammaneknekmo a kaduaennatayo ti Apo no sumurottayo Kenkuana.
Kayat ti Nailangitan nga Ama nga agkararagak a masansan.
Natallugod ni Daniel nga ipapeggad ti biagna tapno makapagkararag iti Nailangitan nga Ama iti inaldaw. Kasano a matulongam dagiti ubbing a mangpadur-as iti maipada a tarigagay nga agkararag?
Dagiti Mabalin nga Aktibidad
-
Isaritam ti estoria iti Daniel 6 (kitaen iti “Ni Daniel ken ti Rukib dagiti Leon” iti Dagiti Estoria iti Daan a Tulag), ket awisem dagiti ubbing a mangidrowing iti ladawan ti estoria. Kiddawem kadakuada nga agusar kadagiti ladawanda a mangisarita iti estoria iti tunggal maysa. Apay a kayat ti Nailangitan nga Ama nga agkararagtayo Kenkuana? Ibinglaymo no apay a napateg kenka ti panagkararag.
-
Isaritam kadagiti ubbing maipapan kadagiti panawen a makapagkararagda, a kas no agbutengda, no agaramidda kadagiti biddut, wenno no kasapulanda ti tulong iti pagadalan. Apay a nasayaat ti agkararag kadagitoy a situasion? Isuro kadagiti ubbing nga uray no sadino ti yanda, kanayon a makapagkararagda iti puspusoda.
-
Aggigiddan nga agkansion iti maysa a kanta maipapan iti kararag, kas iti “We Bow Our Heads” (Children’s Songbook,25). Isaritam kadagiti ubbing maipapan kadagiti banag nga ikararagantayo.
Isuro ti Doktrina: In-inauna nga Ubbing
Aramidek no ania ti rumbeng uray no narigat.
Dagiti estoria iti Daniel 1, 3, ken6 ket makaited kadagiti ubbing a sursuruam iti tured ken pammati nga agaramid kadagiti nasayaat a pili, uray pay no mariknada nga agmaymaysada.
Dagiti Mabalin nga Aktibidad
-
Mangidrowing iti pisarra ti sumagmamano a sinanpana a nakatudo iti maymaysa a direksion ket kalpasanna ti maysa a sinanpana a nakatudo iti sabali a direksion. Kasano a maipada ni Daniel ken dagiti gagayyemna iti daytoy maysa a sinanpana? Awisem dagiti ubbing a mangted kadagiti pagarigan manipud kadagiti estoria iti Daniel 1, 3, ken6 (kitaen iti “Ni Daniel ken dagiti Gagayyemna,” “Da Sidrac, Misac, ken Abdenago,” ken “Ni Daniel ken ti Rukib dagiti Leon” iti Dagiti Estoria iti Daan a Tulag). Saludsodem kadagiti ubbing no apay iti panagkunada a mabalin a narigat para ken ni Daniel ken dagiti gagayyemna nga agaramid kadagiti nasayaat a pili. Kasano a pinaraburan ti Apo ida iti panagpili iti rumbeng?
-
Tulongam dagiti ubbing nga agpanunot kadagiti situasion no mapilitda nga agaramid iti biddut a pili. Awisem ida a mangibinglay kadagiti padas idi nabendisionanda gapu iti panagpili iti rumbeng uray no narigat daytoy. Aggigiddan nga agkansion iti kanta a mainaig iti daytoy a topiko, kas iti “Choose the Right” (Hymns, no. 239).
Ti Simbaan ni Jesucristo dagiti Santo iti Ud-udina nga Aldaw ti pagarian ti Apo Iti daga.
Idi inted ni Daniel ti naparegta a kayulogan ti tagtagainep ni Nabucodonosor, nakitana ti maysa a bato a “natagaan iti bantay a saan a gapuanan ti ima” (Daniel 2:45). Ibagi daytoy a bato ti Ti Simbaan ni Jesucristo dagiti Santo iti Ud-udina nga Aldaw, a maitungpal a mangpunno ti daga.
Dagiti Mabalin nga Aktibidad
-
Basaem ti Daniel 2:31–35, 44–45 a kaduam dagiti ubbing, ken awisem ida a mangidrowing iti ladawan ti no ania ti nakita ni Nabucodonosor iti tagtagainepna. Kiddawen kadagiti ubbing no ania ti nasursuroda manipud kadagitoy a bersikulo maipapan iti bato iti tagtagainep. Ilawlawag nga ibagi daytoy a bato ti Ti Simbaan ni Jesucristo dagiti Santo iti Ud-udina nga Aldaw. Kiddawen kadagiti ubbing a manginagan iti sumagmamano a banag nga inaramid ti Nailangitan nga Ama a mangbangon iti Simbaanna kadagiti ud-udina nga aldaw. Tapno mangted kadakuada kadagiti kapanunotan, ipakitam dagiti ladawan dagiti pasamak iti Pannakaisubli ti Simbaan (kitaen iti Libro ti Arte ti Ebanghelio, dagiti num. 90–95).
-
Mangted iti tunggal ubing iti nagelgel a papel a mangibagi iti bato iti tagtagainep ni Nabucodonosor. Kiddawem iti tunggal ubing a mangibinglay no kasano nga ammona nga insubli ti Dios ti Simbaan. No agibinglay dagiti ubbing, awisem ida a mangted kadagiti “bato” kenka. Bungonem dagiti bato a sangkamaysa nga us-usaren ti tape wenno sinulid a mangbukel iti dakkel a bato. Paneknekam a bayat ti panangpapigsa kadagiti pammaneknektayo ken panangibinglay iti ebanghelio iti dadduma, pagkaykaysaentayo ti pammatitayo tapno makatulong iti pagarian ti Dios a “mangpunno iti intero a daga” (Daniel 2:35).
Yallukoy ti Panagsursuro iti Pagtaengan
Awisem dagiti ubbing nga agaramid iti maysa a banag iti daytoy a lawas a mangipakita iti pammatida ken ni Jesucristo.
Panangpadur-as iti Panangisurotayo
Tulongam dagiti ubbing a mangilasin iti Espiritu. No addaankayo kadagiti naespirituan a padas kadagiti ubbing, tulongam ida a mangbigbig iti impluensia ti Espiritu Santo.