“Nobiembre 14–20. Amos; Abdias: ‘Sapulenyo ni Jehova, ket Agbiagkayto,’” Umaykayo, Sumurot Kaniak—Para iti Primary: Daan a Tulag 2022 (2021)
“Nobiembre 14–20. Amos; Abdias,” Umaykayo, Sumurot Kaniak—Para iti Primary: 2022
Tinapay ti Biag, ni Chris Young
Nobiembre 14–20
Amos; Abdias
“Sapulenyo ni Jehova, ket Agbiagkayto”
No ipamaysam ti panangisuro iti pudno a doktrina kadagiti simple a wagas, mangtedka kadagiti gundaway nga agpaneknek iti Espiritu Santo kadagiti ubbing. Usarem dagiti aktibidad iti daytoy a balabala—wenno mangparnuay iti bukodmo—a makatulong kenka a mangisuro kadagiti pagbatayan ti ebanghelio kadagiti simple a wagas.
Isuratmo dagiti Impresionmo
Yawis ti Panagbibinninglay
Idawatmo kadagiti ubbing a mangibinglay iti maysa a banag a nasursurona itay kallabes iti pagtaengan wenno iti simbaan. Kas pagarigan, saludsodem no nasarakandan ti ania man a baro a paggugustoda a nasantuan a kasuratan wenno nangngegan ti maysa a mensahe a mabalinda nga ibinglay iti klase.
Isuro ti Doktrina: In-inaudi nga Ubbing
Dagiti propeta ti mensahero ni Jesucristo.
Maysa kadagiti kapatgan a banag a mabalin a maammuan dagiti ubbing maipapan kadagiti propeta ket isuda iti mensahero ni Jesucristo. Dagiti kapanunotan iti baba ti makatulong kenka a mangisuro iti daytoy napateg a kinapudno.
Dagiti Mabalin nga Aktibidad
-
Yarasaasmo iti maysa kadagiti ubbing ti mensahe para iti dadduma pay iti klase (kas iti panangidawat kadagiti ubbing nga agtakder iti maysa nga addang wenno iti lawlaw iti sirkulo), ket idawatmo kenkuana a mangibinglay iti mensahe iti dadduma pay nga ubbing. Uliten daytoy nga aktibidad, a mangpalpalugod iti sumagmamano a dadduma pay nga ubbing nga agbalin a mensahero. Tulongam ida a makaawat no kasano a maipada ti mensahero iti daytoy nga aktibidad iti maysa a propeta, a mangibinglay iti mensahe ti Dios kadatayo. Ibinglay ti sumagmamano a pagarigan dagiti kallabes a mensahe manipud iti sibibiag a propeta a nakatulong kenka a dumur-as nga as-asideg ken ni Jesucristo.
-
Awisem ti maysa nga ubing a tumakder iti sango ti siled ket agpammarang nga isu ni propeta Amos. No ibinglaymo ti sumagmamano a kinapudno maipapan ken ni Amos manipud iti Amos 7:14–15, ikkam ti ubing kadagiti ladawan wenno props nga iggananna a maigiddan iti tunggal kinapudno, a kas kadagiti ladawan ti maysa a karnero, maysa a bunga, ken ti Apo. Ilawlawag a ni Amos ti maysa a pastor nga inawagan ti Apo nga agbalin a mensaherona. Kalpasanna ipakitam dagiti ladawan ti Apo ken ti sibibiag a propeta, ket ilawlawag nga ituloy ti Apo ti umawag kadagiti mensahero iti agdama. Basaem ti Amos 3:7 iti napigsa, ken kiddawen kadagiti ubbing a mangitudo iti maitutop a ladawan no mangngeganda dagiti balikas nga “Apo” ken “dagiti mammadto.” Ibinglaymo ti pammaneknekmo a kas kadagiti aldaw ni Amos, kasaonatayo ni Jesucristo babaen kadagiti propetana.
-
Ibinglay ti estoria manipud iti kallabes a magasin ti Simbaan maipapan iti sibibiag a propeta wenno maipapan kadagiti padas dagiti miembro ti Simbaan idi sinurotda ti balakad ti propeta. (Kitaen met iti “Meet Today’s Prophets and Apostles” iti ChurchofJesusChrist.org.)
-
Agkansion wenno agpatokar iti recording ti maysa a kanta maipapan kadagiti propeta, a kas “Follow the Prophet” (Children’s Songbook, 110–11), bayat ti panangitrabaho dagiti ubbing iti panid ti aktibidad iti daytoy a lawas. Ilawlawag kadagiti ubbing dagiti ragup ti balikas iti kanta a mangisuro no kasano a mangidaulo dagiti propeta iti dalan nga agturong ken ni Jesucristo.
No agsapulak iti naimbag, addanto kaniak ti Apo.
Inawis ni Amos dagiti Israelita nga “agsapul iti naimbag, a saan nga iti dakes” ken inkarina a no aramidenda, “ni Jehova … addanto kadakayo.” Kasano a matulongamto dagiti ubbing a mangsungbat iti daytoy nga awis ken umawat iti daytoy a kari?
Dagiti Mabalin nga Aktibidad
-
I-display ti sumagmamano a ladawan dagiti ubbing nga agar-aramid iti nasayaat a banag, a kas iti panangtulong kadagiti dadduma wenno pannakiranud iti sakramento. Ikkan iti batang ti tunggal ubing a mangiladawan iti maysa kadagiti ladawan idinto a pugtuan dagiti dadduma pay nga ubbing no ania a ladawan ti iladladawanna. Basaem ti Amos 5:14, ket tulongam dagiti ubbing a mangpanunot kadagiti wagas nga “agsapulda[nto] iti naimbag” iti inaldaw.
-
Awisem dagiti ubbing nga agdrowing kadagiti ladawan ti bagbagida nga agar-aramid iti maysa a banag a naimbag. Basaem ti Amos 5:14, ket yunay-unay nga ikari iti Apo nga adaanto kadatayo no agsapultayo iti naimbag. Awisem dagiti ubbing a manginayon kadagiti drowingda iti ladawan ni Jesus a nakatakder a kaduana ida.
Isuro ti Doktrina: In-inauna nga Ubbing
Ipalgak ti Apo dagiti kinapudno kadagiti propetana.
Dagiti propeta ti mensahero ni Jesucristo.
TiAmos 3:7 ket maysa a naindaklan a binatog iti nasantuan a kasuratan a mangtulong kadagiti ubbing a mangbigbig a no dumngegtayo kadagiti propeta, dumdumngegtayo iti maysa a mensahero ni Jesucristo.
Dagiti Mabalin nga Aktibidad
-
Tulongam dagiti ubbing a mangyulo iti amin wenno paset ti Amos 3:7. Kas pagarigan, mangtedka kadakuada iti sumagmamano a minuto a mangbasa iti bersikulo iti sumagmamano a gundaway idinto nga isuratmo ti tunggal sabali a balikas ti bersikulo iti pisarra. Awisem dagiti ubbing a mangiserra kadagiti nasantuan a kasuratanda ket aggigiddan nga isaoda ti bersikulo iti napigsa, nga us-usaren dagiti pamugtuan iti pisarra. Kalpasanna pugasem ti sumagmamano a balikas iti tunggal kanito agingga a kabaelan nga uliten dagiti ubbing ti sibubukel a bersikulo nga awan dagiti ania man a pamugtuan. Ania ti isuro kadatayo daytoy a bersikulo maipapan kadagiti propeta? Kasano a matulongannatayo ti sibibiag a propetatayo a mangammo no ania ti kayat ti Mangisalakan nga aramidentayo?
-
Mangisuratka iti sumagmamano a saludsod maipapan iti propeta kadagiti akikid a papel, kas iti sumaganad: Apay nga addaantayo kadagiti propeta? Ania ti aramiden dagiti propeta? Apay a surotenyo ti propeta? Ania ti isuro dagiti propeta? Idawatmo kadagiti ubbing a mangbukel iti kada paris, ket pangalaem ti maysa nga ubing manipud iti tunggal paris iti maysa a saludsod ket pasungbatam daytoy iti kaparehana. No kasapulan dagiti ubbing ti tulong a mangsungbat iti maysa a saludsod, mabalinda a kitaen iti “Propeta” iti Pangiwanwan iti Nasantuan a Kasuratan (scriptures ChurchofJesusChrist.org). Kalpasan a nasungbatan ti kapareha ti saludsod, pagsinnukatem dagiti ubbing kadagiti akemda ken pumili iti sabali pay a saludsod.
-
Ibinglay kadagiti ubbing iti sumagmamano a kinapudno maipapan iti maysa a propeta iti Daan a Tulag a nasursuroda iti daytoy a tawen (kas kada Noe, Moises, wenno Isaias). Kiddawem kadakuada a maNgpugto no asino ti propeta nga iladladawanmo. Uliten daytoy para iti dadduma pay a propeta.
No agsapulak iti naimbag, addanto kaniak ti Apo.
Addaan dagiti ubbing iti adu a gundaway a pumili iti umno ken biddut. Ibilangmo no kasano a paregtaemto ida nga “agsapul iti naimbag, ken saan nga iti dakes” (bersikulo 14).
Dagiti Mabalin nga Aktibidad
-
Awisem dagiti ubbing a mangsukisok iti Amos 5:4–15, a mangsapsapul iti balikas nga “agsapul.” Ania ti kayat ti Apo a sapulentayo, ken ania a kari ti aramidenna kadagiti agtungpal? Kasano a sapulentayo ti Apo?
-
Tulongam dagiti ubbing a mangyulo iti maudi a binatog ti maikasangapulo-ket-tallo a pagannurotan ti pammati. Kasano a “tun-oyantayo dagitoy a banag”?
Ti Pannakaisubli ti ebanghelio ti nanggibus ti panagbisin ti ikakalilis iti kinapudno.
Ti pannakaawat iti no ania ti insuro ni Amos maipapan iti ikakalilis iti kinapudno ket makatulong kadagiti ubbing a makarikna iti panagyaman para iti Pannakaisubli ti ebanghelio.
Dagiti Mabalin nga Aktibidad
-
Awisem dagiti ubbing a mangbasa iti Amos 8:11–12, ket isaritam no ania ti mapasamak no awanan dagiti tao iti balikas ti Apo. Tulongam dagiti ubbing a mangilawlawag kadagiti balikas nga ikakalilis iti kinapudno ken panagbisin, nga us-usaren ti Pangiwanwan iti Nasantuan a Kasuratan (scriptures.ChurchofJesusChrist.org) wenno maysa a diksionario. Kasano a maipada iti ikakalilis iti kinapudno iti maysa a panagbisin?
-
Tapno matulongan dagiti ubbing a makaawat iti Dakkel nga ikakalilis iti Kinapudno, irebyum kadakuada ti “Kalpasan ti Baro a Tulag” (iti Dagiti Estoria iti Baro a Tulag, 167–70). Kalpasanna paglilinnawagan dagiti saludsod kas kadagitoy: Apay nga adda maysa nga Ikakalilis iti Kinapudno? Ania ti napasamak kas bunga ti Ikakalilis iti Kinapudno? Apay nga insubli ti Apo ti ebangheliona? (kitaen met iti “Ti Pannakaisubli ti Pakabuklan ti Ebanghelio ni Jesucristo: Maysa a Waragawag iti Lubong para iti Maika-200 a Tawen nga Anibersario,” ChurchofJesusChrist.org). Allukoyem dagiti ubbing a mangisurat kadagitoy a saludsod ken dagiti sungbatda ken ibinglayda dagitoy kadagiti pamiliada iti pagtaengan.
Yallukoy ti Panagsursuro iti Pagtaengan
Ikkam dagiti ubbing ti sumagmamano a kanito a mangpanunot maipapan iti maysa a banag a nasursuroda ita nga aldaw a kayatda nga ibinglay iti maysa a miembro ti pamilia. Allukoyem ida a mangikeddeng no asino ti pangibinglayandanto iti daytoy ken no kasano nga ibinglaydanto daytoy.
Panangpadur-as iti Panangisurotayo
Mangted kadagiti awis a mangdayaw iti karbengan nga agpili. Agdamag kadagiti saludsod a mangtulong kadagiti ubbing a mangpanunot kadagiti bukod a wagas a mangyaplikar no ania ti nasursuroda. Kas pagarigan, mabalinmo a saludsoden, “Ania ti maysa a banag a mariknayo a nasken nga aramidenyo maibatay iti no ania ti napagsasaritaantayo maipapan ita nga aldaw?”