“Nobiembre 21–27. Jonas; Mikias: ‘Pagay-ayatanna iti Kinamanagayat,’” Umaykayo, Sumurot Kaniak—Para iti Primary: Daan a Tulag 2022 (2021)
“Nobiembre 21–27. Jonas; Mikias,” Umaykayo, Sumurot Kaniak—Para iti Primary: 2022
Ni Jonas iti Igid ti Baybay iti Nineve, ni Daniel A. Lewis
Nobiembre 21–27
Jonas; Mikias
“Pagay-ayatanna iti Kinamanagayat”
Agsukisok kadagiti napapateg a pagbatayan iti Jonas ken Mikias a mangbendisionto kadagiti ubbing a sursuruam. Utobem no kasano a matulongamto dagiti ubbing a makasursuro kadagitoy a kinapudno. Mabalin a makatulong dagiti kapanunotan iti daytoy a balabala.
Isuratmo dagiti Impresionmo
Yawis ti Panagbibinninglay
Tapno matulongan dagiti ubbing a manglagip iti estoria ni Jonas wenno dadduma pay a kinapudno a mabalin a nasursuroda iti pagtaengan, agkansion iti maysa a kanta nga aggigiddan, kas iti bersikulo 7 ti “Follow the Prophet” (Children’s Songbook, 110–11).
Isuro ti Doktrina: In-inaudi nga Ubbing
Bendisionannak ti Apo no agtungpalak Kenkuana.
Idi kiniddaw ti Apo ni Jonas a mangasaba kadagiti tao ti Nineve, saan a nagtungpal ni Jonas. Tulongam dagiti ubbing a makaawat a mabendisionantayo no tungpalentayo ti Apo.
Dagiti Mabalin nga Aktibidad
-
Ipakitam dagiti ladawan ti estoria ni Jonas, ken awisem dagiti ubbing a mangisarita no ania ti ammoda maipapan iti estoria (kitaen iti “Ni Jonas a Propeta” iti Dagiti Estoria iti Daan a Tulag; iti panid ti aktibidad iti daytoy a lawas wenno ti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Agdamagka kadagiti saludsod kas kadagitoy: Ania ti napasamak idi saan a nagtungpal ni Jonas iti Apo? (kitaen iti Jonas 1:4–17). Ania ti napasamak idi nagtungpal? (kitaen iti Jonas 3:3– 5). Ibinglaymo ti pammaneknekmo a bendisionannatayto ti Apo no agtungpaltayo Kenkuana.
-
Aggigiddan nga agkansion iti kanta a maipapan iti panagtungpal iti Apo, kas iti “Quickly I’ll Obey” (Children’s Songbook,197). Isaritam maipapan iti no kasano koma ti kasayaatan para ken ni Jonas nga agtungpal iti umuna a gundaway. Tulongam dagiti ubbing nga agpanunot kadagiti banag a kayat ti Dios nga aramidenda ket kalpasanna yakemda no kasano a makapagtungpalda a dagus.
Kayat ti Nailangitan nga Ama a masursuro ti tunggal maysa ti ebanghelio.
Para iti tunggal maysa ti ebanghelio.
Nagbabawi dagiti tao ti Nineve idi imbinglay ni Jonas ti mensahe ti Apo kadakuada. Ania dagiti gundaway nga adda kadagiti ubbing a mangibinglay iti ebanghelio?
Dagiti Mabalin nga Aktibidad
-
Mangyakem kadagiti paset ti Jonas 3:3–8 kadagiti ubbing, kas iti pannagna iti siudad ti Nineve, panangibinglay iti mensahe ti Apo, ken panangisurat iti maysa a paulog manipud iti ari para kadagiti taona. Ipakitam ti maysa a ladawan dagiti misionario (kitaen iti Libro ti Arte ti Ebanghelio, dagiti num. 109, 110). Ania ti aramiden dagiti misionario? Kasano a nagbalin a misionario ni Jonas? Tulongam dagiti ubbing a mangpanunot kadagiti wagas a mabalinda nga ibinglay ti ebanghelio iti dadduma, kas iti panangibinglay iti maysa a pagannurotan ti pammati wenno panangted iti pammaneknek maipapan ken ni Jesucristo.
-
Isaritam ti maysa a padas idi imbinglaymo ti ebanghelio ni Jesucristo. Wenno, sumagmamano nga aldaw sakbay ti klase, awisem ti maysa a tao a bumisita iti klasem ket isaritam kadagiti ubbing maipapan iti panawen idi imbinglayna ti ebanghelio wenno imbinglay ti maysa a tao ti ebanghelio kenkuana. Allukoyem ti tao a mangipakita kadagiti ladawan, no mabalin. Tulongam dagiti ubbing a mangpanunot kadagiti wagas a pakapagbalinanda a misionario itan.
Nayanak ni Jesucristo iti Betlehem.
Impadto ni Mikias a mayanakto ti masakbayan nga “agturay iti Israel” iti Betlehem. Matulongam dagiti ubbing a mangammo nga impatungpal ti pannakayanak ni Jesucristo daytoy a padto.
Dagiti Mabalin nga Aktibidad
-
I-display dagiti ladawan ti paspasamak a nailikmut iti pannakayanak ni Jesucristo (kitaen iti Libro ti Arte ti Ebanghelio, dagiti num. 28, 29, 30, 31). Awisem dagiti ubbing a mangisarita no ania ti mapaspasamak iti tunggal ladawan. Basaem ti Mikias 5:2, ken awisem dagiti ubbing a tumakder no mangngegda ti balikas a “Betlehem.” Paneknekam a napateg unay ti pannakayanak ni Jesus gapu ta ammo dagiti propeta maipapan iti daytoy sakbay ti pannakayanakna.
-
Awisem dagiti ubbing nga agdrowing iti maysa a ladawan ti pannakayanak ni Jesus. Bayat ti panangipakitada kadagiti ladawanda, kiddawem kadakuada a mangibinglay no apay nga agyamanda unay para ken ni Jesucristo.
Isuro ti Doktrina: In-inauna nga Ubbing
Jonas 1:10–12; 2:1–4, 9; 3:1–5
Iraman ti panagbabawi ti panangbigbigko iti basbasolko ken panagkiddawko iti pannakapakawan.
Makaparegta ti pagwadan ni Jonas kadagiti ubbing nga umasideg iti Apo no nagbasolda.
Dagiti Mabalin nga Aktibidad
-
Tulongam dagiti ubbing a mangilista iti pisarra ti sumagmamano kadagiti kangrunaan nga elemento ti panagbabawi (kitaen iti Pangiwanwan iti Nasantuan a Kasuratan, “Agbabawi, Panagbabawi,” scriptures. ChurchofJesusChrist.org). Aggigiddan a mangrebyu ti estoria ni Jonas, ken awisem dagiti ubbing a mangilasin iti pakakitaan nga agbabbabawi ni Jonas (kitaen, kas pagarigan, iti Jonas 1:10–12; 2:1–4, 9; 3:1–5). Kasano a maipakitatayo iti Apo a napudno ti panagbabawitayo?
-
Aggigiddan nga agkansion iti maysa a kanta maipapan iti panagbabawi, kas iti “Repentance” (Children’s Songbook,98). Saludsodem kadagiti ubbing no ania a balikas wenno ragup ti balikas manipud iti kanta nga ibinglayda ken ni Jonas a mangtulong kenkuana nga agbabawi.
Jonas 2:7–10; 3:10; 4:2; Mikias 7:18–19
Manangngaasi ti Apo iti amin nga umasideg Kenkuana.
No maawatan dagiti ubbing a manangngaasi ken nasayaat ti Apo, umasidegdanto Kenkuana no kasapulanda ti asi.
Dagiti Mabalin nga Aktibidad
-
Awisem dagiti ubbing a mangsapul iti kaipapanan ti balikas nga asi iti diksionario wenno iti Pangiwanwan iti Nasantuan a Kasuratan (scriptures.ChurchofJesusChrist.org). Apay a kinasapulan ni Jonas ti asi? Apay a kinasapulan dagiti tao ti Nineve ti asi? (kitaen ti Jonas 1:1–3). Idawat kadagiti ubbing a mangipapan a mabalinda ti manginterbyu ken ni Jonas. Ania a pakakitaan ti mabalin nga ited ni Jonas a mangipakita a manangngaasi ti Apo? (kitaen, kas pagarigan, iti Jonas 2:7–10; 3:10; 4:2). Kasano nga impakitan ti Apo kadatayo ti asi?
-
Kiddawen kadagiti ubbing a mangilista iti pisarra kadagiti banag a “pagragsakanda”, kas kadagiti kaay-ayo nga aramiden, dagiti bendision manipud iti Apo, ken dadduma pay. Awisem ida a mangbasa iti Mikias 7:18–19 a mangtakuat iti maysa a banag a pagragsakan ti Apo. Ania dagiti kinapudno kadagitoy a bersikulo a makatulong iti maysa a tao a mabuteng nga agbabawi?
-
Tulongam dagiti ubbing nga agpanunot kadagiti pagarigan idi nangipakita ti Mangisalakan iti asi kadagiti dadduma, kas iti Marcos 2:3–12; Lucas 23:33–34; ken Juan 8:1–11. Mangipakitaka kadagiti ladawan dagitoy a pasamak, no mabalin. Tulongam dagiti ubbing a mangpanunot kadagiti gundaway nga adda kadakuada tapno agbalin a manangngaasi ken nasayaat kadagiti dadduma.
Kayat ti Apo nga agaramidak iti nainkalintegan, agayat iti asi, ken magna a sipapakumbaba Kenkuana.
Mangted tiMikias 6:8 iti maysa a pagtuladan iti panagbiag a sililinteg. Kasano a matulongam dagiti ubbing a mangtakuat ken agtungpal kadagiti pannursuro daytoy a bersikulo?
Dagiti Mabalin nga Aktibidad
-
Aggigiddan a mangbasa iti Mikias 6:8, ken tulongam dagiti ubbing a makaawat no ania ti kayat a sawen dagitoy a ragup ti balikas: “agaramid iti nainkalintegan,” “agayat iti asi”, ken “magna a sipapakumbaba iti Dios.” Awisem dagiti ubbing a mangidrowing iti ladawan ti bagbagida nga agar-aramid iti maysa a banag a mainaig kadagiti ragup ti balikas.
-
Isurat iti pisarra ti “Ania ti kasapulan ti Apo kenka?” Awisem ida a mangsapul iti sungbat iti Mikias 6:8. Kasano a makatulong ti panagtungpal kadagiti bilin ti Apo iti panangipatungpaltayo no ania ti kasapulan ti Apo kadatayo iti daytoy a bersikulo?
Yallukoy ti Panagsursuro iti Pagtaengan
Mangisurat iti maysa a panid ti papel para iti tunggal ubing iti maysa a kangrunaan a ragup ti balikas manipud iti maysa kadagiti nasantuan a kasuratan a napaglilinnawaganyo kas maysa a klase. Awisem dagiti ubbing a mangpadas a mangyulo iti ragup ti balikas ket kiddawem iti maysa a miembro ti pamilia a mangibinglay kadagiti kapanunotanna maipapan iti daytoy.
Panangpadur-as iti Panangisurotayo
Ikasom dagiti ubbing. Kasano ti panagresponde dagiti ubbing iti klasem kadagiti aktibidad iti panagsursuro? No kasla saanda a makaidna, mabalin a gundaway a mangpadas iti sabali pay a kita ti aktibidad. Iti sabali a bangir, no madlawmo a makiraman dagiti ubbing ti maysa nga aktibidad, saanka a mapilpilit nga agpatuloy gapu ta dimo pay naisuro iti amin a material iti adalen.