“Agnanayon dagiti dalanna” (Habacuc 3:6). Idi Punganay Isu ti Balikas, ni Eva Timothy

Nobiembre 28–Disiembre 4

Nahum; Habacuc; Zofonias

“Agnanayon dagiti Dalanna”

Ti ayatmo para kadagiti nasantuan a kasuratan ket mabalin a maaddaan iti nabileg nga impluensia kadagiti ubbing a sursuruam. Ipakitam kadakuada no kasano nga agyamyamanka iti balikas ti Dios.

Isuratmo dagiti Impresionmo

Yawis ti Panagbibinninglay

Awisem dagiti ubbing nga agsisinnublatda iti panagtakder ken panagpammarang nga agbalin a maysa a propeta iti Daan a Tulag nga agtaktakder “iti rabaw ti torre” kas ken ni Habacuc (Habacuc 2:1). Kiddawem kadakuada a mangisarita iti dadduma nga ubbing iti maysa a banag a masursuroda maipapan ken ni Jesucristo ken ti ebangheliona.

Isuro ti Doktrina: In-inaudi nga Ubbing

Habacuc 2:3

Kanayonto nga ipatungpal ti Dios dagiti karina.

Nariribukan ni propeta Habacuc iti kinadangkes a nakitana kadagiti tao ti Juda (kitaen iti Habacuc 1:2–4). Impanamnama ti Apo kenkuana a maipatungpalto dagiti karina iti panawenna (kitaen iti Habacuc 2:3).

Dagiti Mabalin nga Aktibidad

• Mangibinglay iti sumagmamano a pagarigan dagiti banag a nasayaat ngem kalpasan laeng nga agur-uraytayo—kas iti bunga a kasapulan a paluomen wenno masa a kasapulan nga i-bake. Ania ti mapasamak no pinadastayo a kanen ti bunga wenno masa sakbay naisaganan daytoy? Isaritam ti maipapan ken ni propeta Habacuc, a nagtarigagay a mangammo no kaano nga isardengto ti Apo ti kinadangkes a nakitana iti aglawlawna. Ibasam kadagiti ubbing ti sungbat ti Apo, a masarakan iti Habacuc 2:3. Yunay-unay a kinasapulan ni Habacuc ti aguray kadagiti kari ti Apo a maipatungpal, kas iti no dadduma nasken nga aramidentayo. Mangibinglay iti maysa a panawen idi nasken nga agurayka iti maysa a bendision.

• Tulongam dagiti ubbing nga agpanunot kadagiti banag nga inkari ti Dios—kas pagarigan, nga agsublinto ni Jesucristo iti daga wenno tapno makipagnaedtayo manen iti Dios. Iti tunggal pagarigan, awisem dagiti ubbing a mangulit iti ragup ti balikas nga “isu urayem; ta pudno umayto.”

Habacuc 2:14

Makatulongak a mangpunno iti daga iti pannakaammo ken ni Jesucristo.

Impadto ni Habacuc dayta nga aldaw no ammonto ti sibubukel a lubong maipapan ken ni Jesucristo. Mangrugin a maipatungpal ti padto iti aldawtayo. Ibilangmo no kasano a matulongam dagiti ubbing a paset daytoy pannakaipatungpal.

Dagiti Mabalin nga Aktibidad

• I-display iti awan nagyanna a garapon, ken mangted iti tunggal ubing iti maysa a bassit a banag. Kiddawem iti tunggal ubing a mangibinglay iti maysa a banag nga inaramid wenno insuro ni Jesus ket kalpasanna ikabilda ti kukuada a banag iti garapon. Basaem iti napigsa ti Habacuc 2:14, ket ilawlawagmo a kas met laeng iti panangpunno dagiti ubbing iti garapon iti pannakaammoda iti Apo, mapunnotayo met ti lubong iti pannakaammo maipapan Kenkuana.

• Ipakitam kadagiti ubbing ti maysa a mapa ti lubong (kitaen iti Church History Maps, no.7, “Map of the World”). Tulongam ida a mangsapul iti lugar a pagnaedanda ken lugar a nakapagserbian dagiti misionario nga am-ammoda. Iburaymo ti pammaneknekmo a kayat ti Nailangitan nga Ama a maammuan ti amin a tao iti intero a daga maipapan ken ni Jesucristo. Kasano a makatulongtayo a mangisuro kadagiti dadduma pay a tao maipapan ken ni Jesus? Isaritam kadagiti ubbing maipapan kadagiti banag a nakitam nga inaramidda a mangisuro kenka maipapan ken ni Jesucristo. Tulongam ida nga agpanunot kadagiti nalawag a bambanag a mabalinda nga aramiden.

• Aggigiddan nga agkansion iti maysa a kanta maipapan iti panangibinglay iti ebanghelio kas iti “I Want to Be a Missionary Now” (Children’s Songbook,168). Ania ti mabalintayo nga isarita iti dadduma maipapan ken ni Jesucristo? Para iti sumagmamano a kapanunotan, kitaen iti Pagannurotan ti Pammati.

Zofonias 2:3

“Sapulenyo ni Jehova.”

Insuro ni Zofonias a nasken a sapulentayo ti Apo kabayatan dagiti panawen ti nalaus a kinadangkes, a kas kadagitoy ud-udina nga aldaw. Utobem no kasano a maallukoymonto dagiti ubbing a mangsapul Kenkuana.

Dagiti Mabalin nga Aktibidad

• I-display ti maysa a ladawan ni Jesus, ket ibasam kadagiti ubbing ti Zofonias 2:3. Awisem ida a mangilukong kadagiti imada iti lawlaw dagiti matada a kasla sarming ken kumita iti ladawan iti tunggal kanito a basaem ti balikas a “sapulenyo.” Ilawlawag a kayat ti propeta Zofonias a sapulen dagiti tao ti Apo. Kasano a sapulentayo ti Apo? Sadino ti pakasarakantayo Kenkuana?

• Usarem ti panid ti aktibidad iti daytoy a lawas, wenno panunotem ti sabali pay nga ay-ayam a mangparegta kadagiti ubbing nga agsapul iti Apo. Agay-ayam wenno aggigiddan nga agkansion iti maysa a kanta a mainaig iti daytoy a topiko, kas iti “Seek the Lord Early” (Children’s Songbook,108). Paglilinnawagan no ania ti isuro ti kanta maipapan iti no kasano a masarakantayo ni Jesucristo iti biagtayo.

Isuro ti Doktrina: In-inauna nga Ubbing

Nahum 1:7

“Ni Jehova naimbag, maysa a sarikedked iti aldaw ti riribuk.”

Maipasango ti tunggal maysa kadatayo iti bukodtayo nga “aldaw ti riribuk.” Kasano a matulongamto dagiti ubbing nga agsubli iti Apo, “agtalek kenkuana,” ket agsapul iti naespirituan a talged kadagiti aldaw ti riribuk?

Dagiti Mabalin nga Aktibidad

• Ipakitam kadagiti ubbing ti ladawan ti maysa a sarikedked wenno pagsaluadan. Ania dagiti sumagmamano a rason a mabalin a kasapulan dagiti tao ti maysa a sarikedked? Awisem dagiti ubbing a mangbasa iti Nahum 1:7 tapno ammuen no ania ti kinuna ni propeta Nahum a maipada iti maysa a sarikedked wenno pagsaluadan para kadatayo. Ania ti mabalin a pangsalakniban ti Mangisalakan kadatayo?

• Awisem dagiti ubbing a mangidrowing iti ladawan ti bagbagida ken dagiti pamiliada iti uneg ti sarikedked wenno pagsaluadan. Allukoyem ida a mangisurat kadagiti balikas iti lawlaw dagiti sarikedked a mangiladawan iti sumagmamano kadagiti impluensia ti dakes iti lubong. Awisem ida a mangisurat kadagiti balikas iti uneg ti sarikedked a mangiladawan ken ni Jesucristo. Ania ti idawatna nga aramidentayo tapno umawat iti pigsa ken salaknibna? (kitaen iti Doktrina ken Katulagan 35:24).

  

  “Ni Jehova naimbag, maysa a sarikedked iti aldaw ti riribuk.” (Nahum 1:7).

Habacuc 3:17–19

Maaddaanak iti rag-o ken ni Jesucristo, uray no saan a nasayaat ti pannakaaramid dagiti banag.

Inladawan ni Habacuc ti sumagmamano a pannubok a mabalin a mapasamak kadagiti taona, agraman kadagiti kayo wenno agkalatkat a mula. Kalpasanna kinunana nga uray no dagitoy banag a napasamak, “ngem agrag-oakto iti Apo.”

Dagiti Mabalin nga Aktibidad

• Awisem dagiti ubbing a mangbasa iti Habacuc 3:17 ken mangilasin kadagiti pannubok a nailadawan iti daytoy a bersikulo. Kasano a marikna ti maysa a tao no napasamak dagitoy a banag? Tulongam dagiti ubbing nga agpanunot kadagiti pannubok a mabalin a mapasamak kadakuada. Kalpasanna aggigiddan a mangbasa kadagiti bersikulo 18–19 tapno maammuan ti kinuna ni Habacuc no kasano ti mariknana no mapasamak dagitoy banag kenkuana.

• Tulongam dagiti ubbing a mangsarak iti dadduma pay a pagarigan dagiti tao kadagiti nasantuan a kasuratan a nagrag-o iti Apo uray kabayatan dagiti narigat a panawen. Masarakanda dagiti pagarigan iti Dagiti Aramid 16:19–25; Mosiah 24:10–15; ken ti mensahe ni Presidente Dieter F. Uchtdorf a “Grateful in Any Circumstances” (Liahona, Mayo 2014, 70–77), nangnangruna iti benneg a “Being Grateful in Our Circumstances.” Apay a kabaelan dagitoy a tao nga agbalin a narag-o kadagiti narigat a panawen? Kasano a masurottayo dagiti pagwadanda?

Zofonias 3:14–20

Makasarakto iti talna ken rag-o dagiti mangsurot ken ni Jesucristo.

Iladawan tiZofonias 3:14–20 ti naragsak nga aldaw no agturayto ni Jesucristo, “ti ari ti Israel,” kadagiti taona ken “agragsakto [kadatayo] a mabuyogan iti panagkankanta” (dagiti bersikulo 15,17).

Dagiti Mabalin nga Aktibidad

• Aggigiddan a basaen ti Zofonias 3:14. Kalpasanna awisem ti tunggal ubing a pumili iti maysa a bersikulo iti Zofonias 3:15–20 ken adalen daytoy, nga agsapsapul iti maysa a banag a makatulong kadatayo nga “agrag-o ken agragsak.” Awisem ida a mangibinglay no ania ti nasarakanda.

• Tulongam dagiti ubbing mangsarak kadagiti himno wenno kanta dagiti ubbing a mangtulong kadakuada nga “agragsak ken agrag-o iti isu amin a puso” (Zofonias 3:14). Aggigiddan a mangkansion iti sumagmamano a kanta, ken allukoyem dagiti ubbing nga agsarita maipapan iti rag-o a masarakan iti ebanghelio ni Jesucristo.

Yallukoy ti Panagsursuro iti Pagtaengan

Kiddawem kadagiti ubbing a mangisurat iti reperensia iti maysa a nasantuan a kasuratan a kayatda nga ibinglay kadagiti pamiliada (wenno isuratmo daytoy para kadakuada).

Panangpadur-as iti Panangisurotayo

Tulongam dagiti ubbing a mangbigbig iti Espiritu. Padasem a kitaen dagiti kanito a mabalin a pakariknaan dagiti ubbing iti impluensia ti Espiritu. No mapasamak daytoy, tulongam ida a makaawat a dumteng dagitoy a rikna manipud iti Espiritu Santo.