Ni Maladaga a ni Jesus a nabungon iti puraw a lupot ken agid-idda iti garami

Ta maysa nga Ubing ti Mayanak Kadatayo, ni Simon Dewey

Disiembre 19–25

Paskua

“Isu ti Inur-uraytayo, ken Isalakannatayto”

Pinadpadaanan dagiti propeta iti Daan a Tulag iti naindaklan a rag-o iti pannakayanak ti Mesias (kitaen iti Isaias 25:9). Bayat ti panagsaganam a mangisuro bayat ti panawen ti Paskua, ibilangmo no kasano a matulongam dagiti ubbing a mangsarak iti rag-o iti pannakayanak ti Mangisalakan a ni Jesucristo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay no ania ti ammoda maipapan iti pannakayanak ni Jesucristo. Bayat ti panangdakamatda iti maysa a tao wenno banag manipud iti estoria, awisem ida a mangidrowing iti daytoy iti pisarra. Saludsodem kadagiti ubbing no ania ti magustuanda maipapan iti daytoy nga estoria.

icon iti panangisuro

Isuro ti Doktrina: In-inaudi nga Ubbing

Isuronak ti Daan a Tulag ti maipapan ken ni Jesus.

Tulongam dagiti ubbing a mangipamaysa iti Mangisalakan a ni Jesucristo kas gapu a rambakantayo ti Paskua. Mabalinmo nga aramiden daytoy nga us-usarentayo dagiti nasantuan a kasuratan manipud iti Daan a Tulag a mangipaneknek Kenkuana.

Dagiti Mabalin nga Aktibidad

• I-display ti maysa a ladawan ti belen (kas iti Libro ti Arte ti Ebanghelio, num. 30, wenno maysa kadagiti ladawan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Basaem iti Isaias 9:6, nga ik-ikkam ti tunggal ubing iti batang a mangitudo iti maladaga a ni Jesus no mangngeganda ti ragup ti balikas a “nayanak ti maysa nga ubing.” Ibinglaymo ti pammaneknekmo nga ammo dagiti propeta iti Daan a Tulag a mayanakto ni Jesus.

• Awisem ti tunggal ubing a mangisao iti naganna, ken ilawlawag a mainayon iti nagnagantayo, mabalin a maawagantayo iti dadduma pay a banag, kas iti kabsat a babai wenno kabsat a lalaki wenno gayyem. Awisem dagiti ubbing a mangpanunot iti dadduma pay a pagarigan. Ibasam ti Isaias 9:6 kadagiti ubbing, a mangyunay-unay kadagti nagan a mangitudo ken ni Jesucristo: “Nakaskasdaaw, Mamagbaga, Mannakabalin a Dios, Ti agnanayon nga Ama, Ti Prinsipe ti Kappia.” Tulongam dagiti ubbing a makaawat no ania ti ibaga kadatayo dagitoy a nagan maipapan ken Jesus.

• Ikkam ti tunggal ubing iti maysa a papel a bituen, ket awisem dagiti ubbing a mangitag-ay kadagiti bituenda no basaem dagiti sumaganad a ragup ti balikas manipud iti Numeros 24:17: “ken Jacob rummuarto ti maysa a bituen.” Awisem dagiti ubbing a mangibinglay no kasano a mayarig ni Jesus iti maysa a naraniag a bituen a mangsilnag iti intero a lubong. Aggigiddan nga agkansion iti maysa a kanta maipapan iti bituen a nagparang idi nayanak ni Jesus, a kas iti “Stars Were Gleaming” (Children’s Songbook,37) or “The First Noel” (Hymns, no. 213).

Ni Jesucristo ti Mangisalakanko.

Ti Paskua ti maysa a panawen a mangrambak saan laeng iti pannakayanak ni Jesus no di ketdi pay ti biag ken misionna kas Mangisalakan ti lubong. Kasano a matulongam dagiti ubbing a makarikna iti rag-o ken panagyaman iti Pannubbot ni Jesucristo?

Dagiti Mabalin nga Aktibidad

• Kiddawen kadagiti ubbing a mangpanunot iti maysa a banag a paspasungadenda. Ilawlawag a paspasungaden dagiti napudno a tao iti panawen ti Daan a Tulag ti pannakayanak ni Jesucristo. Ibasam ti Isaias 25:9 kadagiti ubbing, ket paulitmo kadakuada ti ragup ti balikas nga “Isu ti inur-uraytayo, agragsaktayto ken agrag-otayto iti panangisalakanna.” Ibinglay kadakuada no apay a naragsakka ken narag-oka a nayanak ni Cristo. Awisem dagiti ubbing a mangibinglay kadagiti riknada maipapan iti Mangisalakan.

• Aggigiddan nga agkanta iti maysa a kanta maipapan iti pannakayanak ni Jesus, kas iti “Away in a Manger” (Children’s Songbook, 42–43) wenno “Hark! The Herald Angels Sing” (Hymns, no. 209). Tulongam dagiti ubbing a mangtakuat kadagiti ragup ti balikas kadagitoy a kanta a mangisuro kadatayo maipapan iti Mangisalakan ken dagiti bendision nga adda kadatayo gapu Kenkuana.

icon iti panangisuro

Isuro ti Doktrina: In-inauna nga Ubbing

Isuronak ti Daan a Tulag maipapan ken ni Jesucristo, ti naikari a Mesias.

Ad-adda pay ti Daan a Tulag ngem iti maysa a napagtitipon laeng a makaay-ayo nga estoria ken sinurat; a panggepna, kas iti amin a nasantuan a kasuratan, ti mangipaneknek maipapan ken ni Jesucristo. Tulongam dagiti ubbing a mangsursuro no kasano ti mangsapul Kenkuana iti Daan a Tulag.

Dagiti Mabalin nga Aktibidad

• Awisem dagiti ubbing a mangilista iti amin a nagnagan ken pangawag ken ni Jesucristo a masarakanda iti Moises 7:53; Salmo 23:1; Job 19:25; Isaias 7:14; 9:6; 12:2; Amos 4:13; ken Zacarias 14:16. Bay-am nga agtrabahoda iti kada paris no kayatda. Awisem ida nga agbibinninglay kadagiti listaanda. Ania ti masursurotayo maipapan ti Mangisalakan manipud iti tunggal maysa kadagitoy a nagnagan ken pangawag?

• Ipakitam kadagiti ubbing iti sumagmamano a dekorasion iti Paskua (wenno ladawan ti sumagmamano), kas iti maysa a bituen, silaw, wenno maysa a sagut. Saludsodem kadagiti ubbing no kasano a makaipalagip kadatayo ti tunggal maysa kadagitoy a banag maipapan iti Mangisalakan. Ilawlawag a masansan nga agusar dagiti nasantuan a kasuratan kadagiti simbolo a mangisuro kadatayo maipapan ken ni Jesucristo. Awisem dagiti ubbing a mangsapul iti maysa wenno ad-adu pay kadagiti sumaganad a bersikulo para iti maysa a banag a mabalin a mangisimbolo ken ni Jesucristo: Genesis 22:8; Exodo 17:6; Dagiti Salmo 18:2; 27:1 (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia para kadagiti nayon pay a pagarigan). Kasano a mayarig ni Jesus iti maysa a kordero, danum, bato, pagsaluadan, wenno silaw?

• Iti gibus ti panagadal iti Daan a Tulag iti daytoy a tawen, awisem dagiti ubbing a mangibinglay kadagiti paggugustoda nga estoria wenno nasantuan a kasuratan manipud iti Daan a Tulag. Ania ti isuro kadatayo dagitoy nga estoria wenno nasantuan a kasuratan maipapan ken ni Jesucristo? Apay nga agyamantayo nga addaan iti Daan a Tulag?

Ni Jesucristo ti Mangisalakan ken Mannubbotko.

Bayat ti panangrambaktayo iti pannakayanak ni Jesucristo, makapagrag-otayo pay iti biag ken ti pangsubbot a sakripisiona. Kasano a mausarmo dagiti nasantuan a kasuratan manipud iti Daan a Tulag a mangtulong kadagiti ubbing a mangbukel iti pammatida iti Mangisalakan ken Mannubbotda?

Dagiti Mabalin nga Aktibidad

• Aggigiddan a mangbasa iti Isaias 7:14; kalpasanna awisem dagiti ubbing a mangibinglay no ania ti ammoda maipapan ti pannakayanak ni Cristo. Wenno ipabuyam ti video a “The Nativity” (ChurchofJesusChrist.org), ket awisem ti tunggal ubing a pumili iti maysa a tao manipud iti video ken mangibinglay iti no kasano ti mabalin a narikna dayta a tao. Ibinglaymo ti pammaneknekmo maipapan iti Mangisalakan, ket awisem dagiti ubbing nga aramidenda met ti kasta.

• Tapno matulongam dagiti ubbing a nasaysayaat a maawatanda dagiti akem ni Jesucristo kas Mangisalakantayo, awisem ida a mangbasa iti Isaias 25:8–9; 53:3–5; ken Oseas 13:14. Ania ti isuro kadatayo dagitoy a nasantuan a kasuratan maipapan no kasano nga isalakannatayo ti Apo? Kasano a “[makap]agrag-otayo iti panangisalakanna? (Isaias 25:9).

• Aggigiddan nga agkansion iti maysa a kanta maipapan iti ayat ni Jesucristo para kadatayo, kas iti “Away in a Manger” (Children’s Songbook, 42–43) wenno “I Stand All Amazed” (Hymns, no.193). Awisem dagiti ubbing a mangibinglay kadagiti ragup ti balikas a mangtulong kadakuada a makarikna iti ayat ti Mangisalakan.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada wenno maysa a gayyem iti maysa a banag a nasursuroda maipapan ken ni Jesucristo manipud iti Daan a Tulag. Allukoyem ida a mangirugi iti panagadalda iti Baro a Tulag iti daytoy a lawas.

Panangpadur-as iti Panangisurotayo

Mangparnuay iti makaay-ayo ti aglawlaw a mangawis iti Espiritu. Adu dagiti wagas a mabalinmo a pangawisan iti Espiritu iti klasem. Makaallukoy ti musika iti panagraem. Mabalin a mangparnuay dagiti panangyebkas iti ayat ken pammaneknek iti maysa a nabara, ken naespirituan nga aglawlaw. Sikakararag nga utobem no ania ti maaramidmo a mangparnuay iti naespirituan nga aglawlaw iti klasem. (Kitaen iti Panangisuro iti Wagas ti Mangisalakan,15.)

panid ti aktibidad: isuronak ti Daan a Tulag ti maipapan ken ni Jesus