“Disiembre 5–11. Haggeo; Zacarias 1–3; 7–14: ‘Kinasantuan ken Jehova,’” Umaykayo, Sumurot Kaniak—Para iti Primary: Daan a Tulag 2022 (2021)
“Disiembre 5–11. Haggeo; Zacarias 1–3; 7–14,” Umaykayo, Sumurot Kaniak—Para iti Primary: 2022
Disiembre 5–11
Haggeo; Zacarias 1–3; 7–14
“Kinasantuan ken Jehova”
Sikakararag a mangbasa iti Haggeo ken Zacarias, nga ut-utobem dagiti impresion a maawatmo. Kasano a makatulong dagiti kinapudno kadagitoy a libro a mangtulong a mangipaay iti kasapulan dagiti ubbing?
Isuratmo dagiti Impresionmo
Yawis ti Panagbibinninglay
Mangidrowing ti naragsak a rupa iti maysa a papel, ket pagsisinnublatem dagiti ubbing a mangiggem iti daytoy. Kabayatan ti batangda, awisem ida a mangibinglay iti maysa a banag a masursuroda maipapan iti Nailangitan nga Ama ken ni Jesucristo a mangparagsak kadakuada.
Isuro ti Doktrina: In-inaudi nga Ubbing
Maipangrunak nga umuna ti Dios iti biagko.
Ti panangsursuro maipapan iti balakad ti Apo nga “utobenyo dagiti daldalanyo” ket maysa a gundaway para kadagiti ubbing a mangsigurado nga ar-aramidenda dagiti napateg a banag nga indawat ti Dios nga aramidentayo.
Dagiti Mabalin nga Aktibidad
-
Ilawlawag kadagiti ubbing a kayat ti Apo a mangbangon dagiti Israelita iti templo, ngem ketdi ar-aramidenda dagiti sabali a banag. Basaen iti napigsa ti Haggeo 1:7, ken ilawlawagmo a ti “utobenyo dagiti daldalanyo” kayatna a sawen a kayat ti Apo a panunoten dagiti Israelita maipapan iti no ar-aramidenda met laeng dagiti kapatgan a banag. Ibasam ti bersikulo 8 kadagiti ubbing, ket awisem ida nga agpammarang a “sumang-at iti bantay,” “mangala iti kayo,” ken “bangonenyo ti balay [ti Apo].” Ania dagiti napateg nga aramid a kayat ti Dios nga aramidentayo?
-
Ipakleb dagiti ladawan iti lamisaan a mangibagi iti sumagmamano a banag a napateg iti Dios, a kas dagiti nasantuan a kasuratan, panagkararag, ken ti templo. Pagsisinnublatem dagiti ubbing iti panangpili iti maysa a ladawan ken panangipakita iti daytoy iti klase. Tulongam ida a makaawat no apay a napateg daytoy tapno masigurado nga adda panawentayo nga aramiden ti tunggal maysa a banag kadagiti ladawan.
Maaramid ni Jesucristo a nadalus ti espirituk.
Dagiti narugit a pagan-anay ti kangatuan a padi a ni Josue, a nailadawan iti Zacarias 3:1–7, ket isimbolona no ania ti mapasamak no agbasoltayo. Babaen ti Pannubbot ni Jesucristo, makapagbalintayo a nadalus, kas ken ni Josue a naaramid a nadalus idi inawatna dagiti baro a pagan-anay.
Dagiti Mabalin nga Aktibidad
-
Paipasam kadagiti ubbing ti maysa a narugit a kamiseta, ken basaen ti Zacarias 3:3. Kalpasanna mangipasa iti nadalus a kamiseta ken basaen ti bersikulo 4. Isaritam kadagiti ubbing maipapan iti no kasano a mayarig ti panagpili kadagiti biddut iti panagbalin a naespirituan a narugit, ngem maaramidnatayo ti Mangisalakan a nadalus manen. Ania ti mariknatayo no nadalustayo? Ibinglaymo ti pammaneknekmo a gapu ta nagsagaba ken natay ni Jesucristo para kadatayo, agbalintayonto a nadalus manipud iti basbasoltayo no agbabawitayo.
-
No mabalin, ipakitam kadagiti ubbing ti maysa a ladawan ti maysa a tao nga am-ammoda a nakakawes iti puraw iti panagbuniagna (wenno kitaen iti Libro ti Arte ti Ebanghelio, dagiti num. 103, 104). Apay nga agkawestayo iti puraw kadagiti panagbuniagtayo? Agkansion iti kanta maipapan iti panagbuniag kas iti “When I Am Baptized” (Children’s Songbook,103). Awisem dagiti ubbing a mangidrowing iti bagbagida a mabumbuniagan ket ibinglayda no kasano ti panagriknada maipapan iti pannakabuniag iti maysa nga aldaw.
Isuronatayo dagiti propeta maipapan ken ni Jesucristo.
Kas iti dadduma pay a propeta iti Daan a Tulag, impadto ni Zacarias ni Jesucristo. Ania ti maisuro dagiti padto iti Zacarias 2:10; 9:9; 14:3–9 kadagiti ubbing maipapan Kenkuana?
Dagiti Mabalin nga Aktibidad
-
I-display ti maysa a ladawan ni Jesucristo a sumsumrek iti Jerusalem iti maysa nga asna (kitaen iti Libro ti Arte ti Ebanghelio, num. 50). Isaritam kadagiti ubbing nga adu a tawen sakbay a dimteng ni Jesus iti daga, impadto ni Zacarias a sumakayto ni Jesucristo iti maysa nga asna a mapan iti Jerusalem sakbay a natay Isuna para kadatayo. Bayat ti panangbasam iti Zacarias 9:9, kiddawen kadagiti ubbing a mangitudo kadagiti tao iti ladawan a “naragsak unay” ken kasta met a mangitudo iti “Ari.” Asino ti Ari? Awisem dagiti ubbing a mangibinglay no apay nga agyamyamanda para ken ni Jesus.
-
Ibasam kadagiti ubbing ti sumagmamano kadagiti padto nga inaramid ni Zacarias maipapan iti Maikadua a Yaay ti Mangisalakan, kas kadagiti adda iti Zacarias 2:10; 14:9. Kiddawen kadagiti ubbing a mangidrowing kadagiti ladawan ti no ania iti panagkunada ti kayariganto ti yaay manen ni Jesus, wenno aggigiddan nga agkansion iti maysa a kanta maipapan iti Maikadua a Yaay, kas iti “When He Comes Again” (Children’s Songbook, 82–83).
Isuro ti Doktrina: In-inauna nga Ubbing
“Utobenyo dagiti daldalanyo.”
Napateg nga agbalintayo amin a mannakaammo kadagiti ipangpangrunatayo ken maaddaantayo iti panawen nga “utoben[tayo] dagiti daldalan[tayo].” Kasano a maparegtam dagiti ubbing a maaddaan iti panawen iti biagda para kadagiti banag ti Dios?
Dagiti Mabalin nga Aktibidad
-
Awisem dagiti ubbing a mangbasa iti Haggeo 1:2–5 tapno maammuan no apay saan a maragsakan ti Apo kadagiti Israelita. Kiddawen kadagiti ubbing a pumidut iti maysa a ragup ti balikas manipud iti bersikulo 6 ken mangidrowing iti maysa a ladawan daytoy. Papugtuam iti klase no ania a ragup ti balikas ti ibagi ti tunggal drowing. Isaritam maipapan iti no kasano ti panangbubos iti panawen kadagiti banag malaksid iti no ania ti tarigagayan ti Apo ket maipada iti pannangan ngem saan a pannakabsog, panagkawes ngem saan a pannakaimeng, ken dadduma pay. Apay a napateg a maaddaan iti panawen kadagiti banag a napateg ti Apo?
-
Isurat ti “Utobenyo dagiti daldalanyo” iti pisarra (bersikulo 7). Awisem ti tunggal ubing a mangilista kadagiti banag a mabalinda nga aramiden iti gagangay nga aldaw, agraman dagiti banag nga indawat ti Apo nga aramidentayo. Kiddawen kadagiti ubbing nga “uttoben[da] dagiti daldalan[da]” babaen ti panangtimbukel no ania ti mabalin a sawen ti Apo a kapatgan a bambanag iti listaanda. Kasano a masiguradotayo a mangtedtayo iti oras iti tunggal aldaw kadagiti banag a kayat ti Apo nga aramidentayo?
Agkawestayo iti puraw kadagiti panagbuniagtayo tapno ipakita a maaramidnatayo ni Jesucristo a nadalus no agbabawitayo kadagiti basbasoltayo (kitaen iti Zacarias 3:3–4).
Ti panagaramid ken panagtungpal kadagiti katulagan ket makatulong kaniak nga agbalin a kas iti Nailangitan nga Ama ken ni Jesucristo.
Iti parmatana, nakita ni Zacarias ti kangatuan a padi nga agnagan iti Josue, a “sikakawes kadagiti narugit a pagan-anay” (Zacarias 3:3). Inikkan ti maysa nga anghel iti nadalus a pagan-anay ken inlawlawagna a daytoy ti nangisimbolo iti pannakadalusna manipud iti basbasolna. Mabalinmo nga usaren daytoy a parmata a pangtulong kadagiti ubbing a makaawat kadagiti katulagan ken bendision a mainaig iti panagbuniag.
Dagiti Mabalin nga Aktibidad
-
Aggigiddan a basaen ti Zacarias 3:1–7 ket paglilinnawagan dagiti saludsod kas kadagitoy: Ania ti ibagi ti “narugit a pagan-anay” ni Josue? Kasano nga agbalintayo a nadalus manipud kadagiti basbasoltayo? Kasano a matulongannatayo dagiti katulagantayo iti panagbuniag tapno “magna kadagiti daldalan [ti Apo]?
-
Sumagmamano nga aldaw sakbay ti klase, awisem ti maysa nga ubing nga umay a nakasagana nga agsarita maipapan iti panagbuniagna. Aggigiddan a mangrebyu iti katulagan nga aramidentayo iti panagbuniag (kitaen iti Doktrina ken Katulagan 20:37). Kasano a matulongannatayo ti panagtungpal kadagiti karitayo tapno agbalintayo nga ad-adda a kas iti Nailangitan nga Ama ken ni Jesucristo? Kasano a matulongannatayo nga agtungpal kadagiti katulagan iti panagbuniag ti pannakiranudtayo iti sakramento iti tunggal lawas?
Zacarias 9:9–11; 11:12; 13:6–7
Ni Jesucristo ti naipadto a Mesias.
Ania ti masursuro dagiti ubbing manipud kadagiti padto ni Zacarias maipapan ken ni Jesucristo?
Dagiti Mabalin nga Aktibidad
-
Bingayem dagiti ubbing iti kada paris. Mangted iti tunggal paris iti maysa kadagiti sumaganad a padto manipud ken ni Zacarias, karagpin dagiti bersikulo iti Baro a Tulag a mangiladladawan iti pannakaipatungpal daytoy: Zacarias 9:9 ken Mateo 21:5–9; Zacarias 9:11 ken 1 Pedro 3:18–19; Zacarias 11:12 ken Mateo 26:14–16; Zacarias 13:7 ken Mateo 26:31. Kiddawem iti tunggal paris a mangibinglay iti klase no ania ti nasursuroda maipapan ken ni Jesucristo manipud kadagiti bersikuloda ken no apay nga agyamanda para Kenkuana.
-
I-display dagiti ladawan 50, 60, ken64 manipud iti Libro ti Arte ti Ebanghelio. Isuratmo dagiti sumaganad a reperensia iti pisarra, ket awisem dagiti ubbing a mangiparis kadagiti reperensia kadagiti ladawan: Zacarias 9:9; 13:6; 13:7. Awisem dagiti ubbing a mangibinglay kadagiti riknada maipapan ken ni Jesucristo.
Yallukoy ti Panagsursuro iti Pagtaengan
Awisem dagiti ubbing a mangisurat iti maysa a kinapudno a nasursuroda iti klase. Awisem ida a mangilawlawag kadagiti pamiliada no kasano a magun-odda ti napigpigsa a pammaneknek iti dayta a kinapudno.
Panangpadur-as iti Panangisurotayo
Usarem ti kinamanagpartuatmo. Bay-am dagiti kapanunotan iti daytoy a balabala ti pangparegta iti bukodmo a kinamanagpartuat. Panunotem no anianto ti magustuan dagiti ubbing iti klasem ken no anianto ti mangtulong kadakuada a mangsapul kadagiti pagnanaigan ti nasantuan a kasuratan ken ti biagda.