Estatua ni Cristo

Disiembre 12–18

Malakias

“Siak Inayatkayo, Kinuna ni Jehova”

Ay-ayaten ti Apo dagiti ubbing a sursuruam. Kasano a matulongamto dagiti ubbing a mangrikna Iti ayatna bayat ti panangisurom iti doktrina a masarakan iti libro ni Malakias?

Isuratmo dagiti Impresionmo

icon iti panagbibinninglay

Yawis ti Panagbibinninglay

Basaem dagiti sumaganad a ragup ti balikas manipud iti Malakias 1:2: “Siak inayatkayo, kinuna ni Jehova.” Awisem ti tunggal ubing a mangibinglay iti maysa a wagas nga ammoda nga ay-ayaten ida ti Apo. Kalpasan ti panagibinglay ti tunggal ubing, agyamanka kenkuana, ket iburaymo ti pammaneknekmo maipapan iti ayat ti Apo para iti dayta nga ubing.

icon iti panangisuro

Isuro ti Doktrina: In-inaudi nga Ubbing

Malakias 3:10–12

Bendisionannakto ti Nailangitan nga Ama no agbayadak iti apagkapullo.

Uray no saan pay a makaullo iti kuarta dagiti ubbing a sursuruam masursuroda latta ti maipapan kadagiti bendision ti panagbayad iti apagkapullo.

Dagiti Mabalin nga Aktibidad

• Tulongam dagiti ubbing nga agbilang iti 10 a babassit a banag, kas kadagiti sensilio iti panid ti aktibidad iti daytoy a lawas. Awisem ida a mangisina iti maysa kadagiti banag manipud iti dadduma, ket ilawlawag a maipada daytoy iti apagkapullo nga itedtayo iti Apo. Itedtayo Kenkuana ti apagkapullo ti no ania ti awatentayo. Ibinglaymo ti pammaneknekmo maipapan iti no kasano a bendisionannatayo ti Apo no agbayadtayo iti apagkapullo. Makipagkansion kadagiti ubbing iti maysa a kanta maipapan iti apagkapullo, kas iti “I Want to Give the Lord My TenthChildren’s Songbook,150).

• Mangidrowing iti maysa a tawa iti pisarra, ket ibasam ti Malakias 3:10 kadagiti ubbing. Awisem ida a mangitudo iti tawa no basaem ti ragup ti balikas a “dagiti tawtawa ti langit.” Ilawlawag a kaipapanan daytoy nga ikkannatayo ti Nailangitan nga Ama kadagiti naindaklan a bendision no agbayadtayo iti apagkapullo. Bayat ti panangkolor dagiti ubbing iti panid ti aktibidad iti daytoy a lawas, isaritam maipapan iti sumagmamano kadagiti gapu no apay nga agbayadtayo iti apagkapullo.

• Ibinglay ti maysa nga estoria manipud iti magasin a Friend wenno manipud iti bukodmo a biag maipapan ti panagbayad iti apagkapullo. Awisem dagiti ubbing a dumngeg kadagiti bendision a sumangbay manipud iti panagbayad iti apagkapullo.

Malakias 4:5–6

Mailantiptayo kas pamilia iti templo.

Gapu kadagiti tulbek ti priesthood ti panagilantip nga inted ni Elias ken ni Joseph Smith iti Templo ti Kirtland, mabalin nga agkaykaysa dagiti pamilia iti agnanayon. Bayat ti panangisurom iti daytoy a kinapudno, agbalinka a sensitibo iti rikna dagiti ubbing a saan pay a nailantip dagiti pamiliada iti templo.

Dagiti Mabalin nga Aktibidad

• Ibasam ti Malakias 4:5 kadagiti ubbing. Kalpasanna isaritam kadakuada a naipatungpal ti kari idi nagparang ni Elias ken ni Joseph Smith iti Templo iti Kirtland (kitaen iti “Kapitulo 40: Dagiti Parmata iti Templo ti Kirtland,” iti Dagiti Estoria iti Doktrina ken Katulagan,157). Ipakitam ti maysa a ladawan daytoy a pasamak (kitaen iti Libro ti Arte ti Ebanghelio, num. 95), ket awisem dagiti ubbing a mangitudo ken ni Elias ken ni Joseph Smith. Ilawlawag a gapu ta immay ni Elias, mabalintayo a mailantip kas pamilia iti templo. Ibinglaymo ti pammaneknekmo maipapan iti kinapateg ti pannakailantip kas pamilia.

• Isaritam kadagiti ubbing maipapan iti ayat para iti pamiliam; a mangipakitaka iti maysa a ladawan, no mabalin. Awisem ti sumagmamano nga ubbing a mangibinglay kadagiti riknada para iti pamiliada. Aggigiddan nga agkansion iti maysa a kanta maipapan kadagiti pamilia, kas iti “Families Can Be Together Forever” (Hymns, no. 300), ken paneknekam a kayat ti Nailangitan nga Amatayo a sangkamaysa a mapaglalantip dagiti pamilia ken daytoy ti maysa a gapu nga addaantayo kadagiti templo. Tulongam dagiti ubbing a makaawat a gapu ken ni Jesucristo, mabalin a mailantiptayo kadagiti miembro ti pamilia a saan a makapan iti templo iti daytoy a biag. Awisem dagiti ubbing a mangidrowing iti maysa a ladawan ti pamiliada nga agdedenna iti langit.

icon iti panangisuro

Isuro ti Doktrina: In-inauna nga Ubbing

Malakias 3:8–12

Bendisionannakto ti Nailangitan nga Ama no agbayadak iti apagkapullo.

Ti panagbayad iti apagkapullo ket ad-adda pay maipapan iti kaadda ti pammati iti Nailangitan nga Ama ken ni Jesucristo ngem iti maipapan kadagiti pakaseknan iti kuarta. Ania ti maawatan dagiti ubbing a sursuruam maipapan iti apagkapullo? Kasano a matulongam ida a maaddaan iti pammati nga agbayad iti apagkapullo?

Dagiti Mabalin nga Aktibidad

• Isurat iti pisarra dagiti saludsod maipapan iti apagkapullo kas iti sumaganad: Ania ti apagkapullo? Kasano nga agbayadak iti apagkapullo? Ania ti pagpaayan ti apagkapullo? Ania dagiti bendision ti panagbayad iti apagkapullo? Awisem dagiti ubbing a mangsukisok iti Malakias 3:8–12 ken “Apagkapullo, Dagiti Apagkapullo” iti Pangiwanwan iti Nasantuan a Kasuratan (scriptures.ChurchofJesusChrist.org) ket isuratmo dagiti sungbat a masarakanda. Awisem ida nga agbibinninglay kadagiti sungbatda. Ania a kita ti tao ti pagbalinantayo babaen ti panagbayad iti apagkapullo?

• Ipabuya ti video a “Jesus Teaches about the Widow’s Mite” (ChurchofJesusChrist.org), wenno aggigiddan a basaenyo ti Marcos 12:41–44. Ania ti isuro kadatayo daytoy nga estoria maipapan iti no kasano ti rikna ti Apo maipapan kadagiti datontayo?

• Mangidrowing iti maysa a tawa iti pisarra, ket awisem dagiti ubbing a mangisurat iti uneg ti tawa kadagiti bendision a mabalin nga awaten ti maysa a tao gapu iti panagbayad iti apagkapullo (para kadagiti kapanunotan, kitaen iti Malakias 3:10–12). Awisem dagiti ubbing a mangibinglay iti bukod a pagwadan ti no kasano a nabendisionanda wenno dagiti pamiliada babaen ti sipupudno a panagbayad iti apagkapullo. Wenno mabalinmo nga ibinglay ti maysa a pagwadan manipud iti bukodmo a biag maipapan iti no kasano a napapigsa ti pammatim iti Nailangitan nga Ama ken ni Jesucristo gapu iti panagbayad iti apagkapullo .

Ni Elias iti panagparangna kada Joseph Smith ken Oliver Cowdery iti Kirtland Temple

Panangiladawan ken ni Elias iti panagparangna kada Joseph Smith ken Oliver Cowdery iti Templo ti Kirtland, ni Robert T. Barrett

Malakias 4:5–6

“Ibaonkonto kadakayo ni Elias a mammadto.”

Naipatungpal ti padto ni Malakias maipapan ken ni Elias a mammadto ket idi nagparang ni Elias ken ni Joseph Smith iti Templo ti Kirtland ken intedna kenkuana dagiti tulbek ti priesthood a mangpalugod kadagiti pamilia a mailantip a sangkamaysa iti agnanayon. Mabalinmo nga ibilang ti panangawis iti maysa a tao iti ward nga addaan iti pagrebbengan iti aramid iti templo ken family history (kas iti maysa a miembro ti panguluen ti elders quorum wenno Relief Society) tapno mangtulong kenka a mangisuro iti daytoy a doktrina kadagiti ubbing. Laglagipem nga agbalinka a sensitibo iti rikna dagiti ubbing a saan pay a mailantip dagiti pamiliada.

Dagiti Mabalin nga Aktibidad

• Isurat iti tunggal ragup ti balikas manipud iti Malakias 4:5–6 iti nagsisina a panid ti papel. Ited dagiti panid ti papel kadagiti ubbing, ket idawatmo kadakuada a mangipuesto kadagiti ragup ti balikas iti husto nga urnos. Aggigiddan a basaen dagiti bersikulo, ket paglilinnawagan dagiti saludsod kas kadagitoy: Asino ti inkari ti Apo nga ibaonna? Kaano a kinunana a yaay daytoy a tao? Ania ti kinuna ti Apo nga aramidento daytoy a tao? Apay a nasken nga umay daytoy a tao? Sadino ti nakaipatungpalan daytoy a padto? (kitaen iti Doktrina ken Katulagan 110:13–16).

• Isurat iti pisarra ti maysa a saludsod kas Ania ti kayat a sawen iti isublinto ti puspuso dagiti annak kadagiti ammada? (kitaen iti Malakias 4:6). Awisem dagiti ubbing a mangutob iti daytoy a saludsod bayat ti panangbuyada iti video “Their Hearts Are Bound to You” (ChurchofJesusChrist.org). Kalpasanna awisem dagiti ubbing a mangibinglay kadagiti kapanunotanda maipapan iti saludsod iti pisarra. Paglilinnawagan a sangkamaysa dagiti padasda wenno dagiti ubbing iti panagsursuro maipapan iti family history.

• Ipakita ti ladawan ni Elias manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangibinglay no ania ti ammoda maipapan iti pasamak nga ipakita daytoy a ladawan (kitaen met iti Doktrina ken Katulagan 110:13–16). Paneknekam a ti pangilantip a bileg nga insubli ni Elias ti mangipalubos kadagiti pamilia nga agkaykaysa iti agnanayon—agraman dagiti pamilia a saan a naaddaan iti dayta a gundaway iti mortalidad. No nakiramanka iti maysa a panaglantip, para man iti bagim wenno para iti maysa a tao a pimmusayen, isaritam maipapan iti no ania ti nariknam kabayatan dayta nga ordinansa. Kiddawen kadagiti ubbing a mangibinglay kadagiti riknada maipapan iti pamiliada ken maipapan iti plano ti Dios a mangtulong kadagiti pamilia nga agkaykaysa iti agnanayon.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangpanunot iti maysa a banag a nasursuroda kabayatan ti klase ita nga aldaw, ken kiddawen ti sumagmamano nga ubbing a mangibinglay. Allukoyen ti amin nga ubbing a mangibinglay kadagiti pamiliada iti maysa a banag a nasursuroda maipapan kadagiti pannursuro ni Malakias.

Panangpadur-as iti Panangisurotayo

Iramanmo dagiti ubbing iti panaglilinnawag iti ebanghelio. Mabalin a kasapulam ti mangpanunot kadagiti managpartuat a wagas a mangiraman kadagiti in-inaudi nga ubbing iti panaglilinnawag iti ebanghelio. Kas pagarigan, mabalin nga ipasa dagiti ubbing ti maysa a bola ken ibinglay ti sungbatda iti maysa a saludsod no ig-iggamanda ti bola.

panid ti aktibidad: Bendisionannakto ti Nailangitan nga Ama no agbayadak iti apagkapullo