“Disiembre 19–25. Paskua: ‘Isu ti Inur-uraytayo, ken Isalakannatayto,’” Umaykayo, Sumurot Kaniak—Para kadagiti Indibidual ken Pamilia: Daan a Tulag 2022 (2021)
“Disiembre 19–25. Paskua,” Umaykayo, Sumurot Kaniak—Para kadagiti Indibidual ken Pamilia: 2022
Ta maysa nga Ubing Mayanak Kadatayo, ni Simon Dewey
Disiembre 19–25
Paskua
“Isu ti Inur-uraytayo, ken Isalakannatayto”
Kabayatan daytoy a panawen ti Paskua, ibilangmo no kasano a pinapigsa ti Daan a Tulag ti pammaneknekmo ken ni Jesucristo iti unos ti tawen.
Isuratmo dagiti Impresionmo
Addaan ti Daan a Tulag iti espiritu ti nagagar a panangnamnama. Iti dayta a wagas, kasla dumani bassit kas iti panawen ti Paskua. Mangrugi kada Adan ken Eva, nagur-uray dagiti patriarka, propeta, mannaniw, ken tattao kadagiti nasaysayaat nga aldaw, a napnuan iti namnama para iti pannakapabaro ken pannakaisalakan babaen ti Mesias. Ket masansan nga agkasapulan dagiti Israelita iti dayta a namnama—addada man iti pagbaludan iti Egipto wenno Babilonia wenno nabaludda iti bukodda a basol wenno yaalsa. Babaen iti amin daytoy, impalagip dagiti propeta kadakuada nga umay ti maysa a Mesias, maysa a Mangisalakan, “ti pannakaluk-at kadagiti nabalud” (Isaias 61:1).
Nangrugi a maipatungpal dayta a namnama idi nayanak ni Jesucristo iti Betlehem. Nayanak ti maingel a Mangisalakan ti Israel iti maysa a kuadra ket naipaidda iti maysa a kulluong (kitaen iti Lucas 2:7). Ngem Isu ket saan laeng a Mangisalakan dagiti nagkauna nga Israelita. Immay a mangisalakan kadakayo—a mangitured iti lidayyo, mangawit iti ladingityo, nasugsugat a gapu kadagiti labsingyo, ket gapu kadagiti saplitna maagasankayo (kitaen iti Isaias 53:4–5). Daytoy ti gapu no apay a ti Paskua napnuan unay iti naragsak a panangnamnama uray iti agdama. Immay ti Mesias nasurok a 2000 a tawen ti napalabas, ket itultuloyna ti sumrek iti biagtayo no agsapultayo Kenkuana.
Dagiti Kapanunotan para iti Bukod a Panagadal iti Nasantuan a Kasuratan
Agrag-oak iti Mannubbotko.
Maam-ammo ti Paskua a maysa a naragsak a panawen gapu iti rag-o nga isangbay ni Jesucristo iti lubong. Uray pay dagiti tao a saan nga agdaydayaw ken ni Jesus kas Anak ti Dios ket masansan a makarikna iti ragsak ti Paskua. Utobem ti rag-o a mariknam a gapu ta imbaon ti Nailangitan nga Ama ti Anakna.
Adu a siglo sakbay a nayanak ti Mangisalakan, narikna met dagiti propeta iti Daan a Tulag ti rag-o bayat ti panangibagada iti yaay ti Mesias. Basaem ti sumagmamano kadagiti sumaganad a binatog, ket panunotem no apay a napateg dagitoy kadagiti mangpadpadaan iti mision ti Mangisalakan: Salmo 35:9; Isaias 25:8-9; 44:21–24; 51:11; Zofonias 3:14–20; Moises 5:5–11. Apay a napateg kenka dagitoy a binatog?
Kitaen met iti Russell M. Nelson, “Joy and Spiritual Survival,” Ensign wenno Liahona, Nob. 2016, 81–84.
Makatulong kaniak dagiti simbolo a manglagip ken ni Jesucristo.
Adu kadagiti tradision a mainaig iti Paskua iti mabalin nga addaan kadagiti simboliko a kaipapanan a mangitudo kadatayo ken ni Cristo. Dagiti dekorasion a nagsukog a bituen ket mangibagi iti naraniag a bituen a nangsilnag iti rabii ti pannakayanak ni Jesus (kitaen iti Mateo 2:2). Mabalin a palagipandatayo dagiti agtaptapat (carolers) maipapan kadagiti anghel a nagparang kadagiti agpaspastor (kitaen iti Lucas 2:13–14). Bayat ti panangadalmo iti Daan a Tulag iti daytoy a tawen, mabalin a nadlawmon ti adu a simbolo ti Mangisalakan. Sumagmamano ti nailista iti baba. Ibilangmo ti panangadal kadagitoy ken panangisuratmo no ania ti isuroda kenka maipapan Kenkuana.
-
Kordero (Genesis 22:8; Exodo 12:5; 1 Pedro 1:18–20).
-
Mana (Exodo 16:4, 12–21,31; Deuteronomio 8:3; Juan 6:30–40).
-
Danum (Exodo 17:1–6; Jeremias 2:13; Ezequiel 47:1–12; Juan 4:7–14).
-
Gambang nga uleg (Numeros 21:4–9; Juan 3:14–15).
-
Sanga (Isaias 11:1–2; Jeremias 23:5; 33:15).
-
Lawag (Salmo 27:1; Isaias 9:2; 60:19; Mikias 7:8; Juan 8:12).
Ania dagiti dadduma pay a simbolo, binatog, ken pakaammuan a nasarakam kadagiti nasantuan a kasuratan a mangipaneknek maipapan ken ni Jesucristo?
Kitaen met iti 2 Nephi 11:4; Mosiah 3:14–15; Moises 6:63; “Types or Symbols of Christ,” iti Guide to the Scriptures, “Jesus Christ,” scriptures.ChurchofJesusChrist.org.
“Ti naganna magaladanto iti Nakaskasdaaw.”
Ni Jesucristo ket nadakamat iti adu a nadumaduma a nagan ken pangawag. Ania dagiti pangawag a masarakam kadagiti sumaganad a bersikulo? Salmo 23:1; 83:18; Isaias 7:14; 9:6; 12:2; 63:16; Amos 4:13; Zacarias 14:16; Moises 7:53. Ania dagiti dadduma pay a pangawag a mapanunotmo? Mabalin a magustuam pay ti panangilista kadagiti pangawag ken ni Jesucristo a masarakam kadagiti himno ti Paskua. Kasano a mangimpluensia ti tunggal pangawag iti wagas ti panagpanunotmo maipapan Kenkuana?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Makaitudo dagiti kannawidan iti Paskua ken ni Jesucristo.Adda dagiti kannawidan dagiti pamilia nga Israelita, kas iti Fiesta ti Paskua ken dadduma pay a fiesta, a naisangrat a mangitudo iti puspuso ken panunotda iti Apo (kitaen iti Exodo 12). Ania dagiti kannawidan nga adda iti pamiliam iti panawen ti Paskua a makatulong kenka a pangipamaysaam ken ni Jesucristo? Ania dagiti kannawidan nga ammom manipud iti pakasaritaan ti pamiliam? Mabalin nga ibilangyo ti panangilawlawag kas maysa a pamilia iti sumagmamano a kannawidan a kayatyo nga irugi. Mabalin nga iraman iti sumagmamano a kapanunotan ti panagserbim iti maysa nga agkasapulan (para kadagiti kapanunotan, kitaen iti ComeuntoChrist.org/lawag-iti-lubong), panangawis iti maysa a gayyem a makipagbuya kenka iti First Presidency Christmas Devotional (broadcasts. ChurchofJesusChrist.org), panagsurat iti bukodyo a kanta iti Paskua, wenno panangsapul iti managpartuat a wagas a mangibinglay iti mensahe ti pannakayanak ni Cristo.
-
“Ni Ubing a Cristo: Maysa nga Estoria ti Pannakayanak.”Kasano a matulongam dagiti miembro ti pamilia a makarikna iti panagraem ken rag-o ti pannakayanak ni Cristo? Mabalinyo a buyaen ti video “The Christ Child: A Nativity Story” (ChurchofJesusChrist.org) wenno aggigiddan a basaen ti Mateo 1:18–25; 2:1–12; Lucas 1:26–38; 2:1–20. Mabalin a pumili ti tunggal miembro ti pamilia iti maysa a tao manipud iti video wenno pakaammuan iti nasantuan a kasuratan ket ibinglay no kasano ti rikna dayta a tao maipapan iti Mangisalakan. Mabalin pay nga ibinglay dagiti miembro ti pamilia dagiti bukodda a rikna maipapan Kenkuana.
-
Panangsarak iti Mangisalakan iti Daan a Tulag.Bayat ti panagsaganam nga agadal iti biag ni Jesucristo iti Baro a Tulag iti sumaruno a tawen, ibilangmo ti panangrebyum iti pamiliam no ania ti nasursuroda maipapan Kenkuana iti daytoy a tawen iti Daan a Tulag. Mabalinmo ti mangrebyu kadagiti balabala iti daytoy a resource ken ania man a personal study notes a mangtulong kenka a manglagip no ania ti nasursuromon. Mabalin a mairanud dagiti in-inaudi nga ubbing manipud iti panangbuyada iti Dagiti Estoria iti Daan a Tulag wenno dagiti ladawan iti daytoy a pagadawan (resource). Ania dagiti padto wenno estoria a napateg kadatayo? Ania ti nasursurotayo maipapan iti Mangisalakan?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Naisingasing a kanta: “O Little Town of Bethlehem,” Hymns, no. 208.
Panangpadur-as iti Panangisurotayo
Denggem dagiti miembro ti pamiliam. “Maysa nga aramid ti ayat ti panagdengngeg. Agkasapulan daytoy nga ad-adda nga ipategtayo ti adda iti puso ti sabali a tao ngem iti no ania ti sumaruno iti agenda-tayo wenno balabala. … Kabayatan ti panangikasom a nasayaat kadagiti nayebkas ken saan a nayebkas a mensahe dagiti [miembro ti pamilia], ad-adda a maawatamto dagiti kasapulanda, pakaseknanda, ken tarigagayda. Tulongannakanto ti Espiritu a mangammo no kasano ti mangisuro kadakuada” (Panangisuro iti Wagas ti Mangisalakan 34).
Ti Pannakayanak, ni N.C. Wyeth